প্রধান মন্ত্রী, শ্রী নরেন্দ্র মোদীনা ঙসি ভিদিও পাউজেলগী খুত্থাঙদা গোৱাদা পাঙথোকপা জি২০ তুরিজম মন্ত্রীশিংগী মীফমদা ৱা ঙাংখ্রে‍।

তিল্লিবা মীয়ামদা ৱা ঙাঙলদুনা, প্রধান মন্ত্রীনা ইনক্রেদিবল ইন্দিয়াগী ৱাখল্লোনবু হৌদোকখি অমদি তুরিজম মন্ত্রীশিং অসি মালেমগী ওইনা দোলর ত্রিলিয়ন অনিগী সেক্তর পায়জরবসু তুরিস্ত অমা ওইবগী খুদোংচাবা তাঙনা ফংই‍।

প্রধান মন্ত্রীনা ভারতকী তুরিজম অসি অরিবা সংস্কৃৎকী ৱারোল ‘অতিথী দেবো ভবহ’ হায়বদি ‘মীথুংনা লাইগী মশক্নি’ হায়বসিদা য়ুম্ফম ওইবনি হায়খি‍। তুরিজম অসি কোইবখক নত্তে পুক্নিং লুপশিনবা এক্সপরিএন্স অমনি হায়না শ্রী মোদীনা হায়খি‍। “ঈশৈ-নোংমাই নৎত্রগা চীঞ্জাক, কলা নৎত্রগা নাৎপু ওইরবসু, ভারতকী খেন্নবা মশকশিং অসি তশেংনা নীংথিজৈ‍। হিমালয়গী অৱাংবা চীংদোলদগী শোঙলবা উমং ফাওবা, অকংবা লৈকংলাদগী ফজরবা সমুদ্র খোঙপান ফাওবা, এদভেঞ্চর স্পোর্তসতগী হীরী কোনফম মফমশিং ফাওবদা, ভারত্তা মীপুম খুদিংমক্কী করিগুম্বা অমদি অদুমক লৈ,” হায়না প্রধান মন্ত্রীনা ফোঙদোকখি‍। ভারতনা মাগী জি-২০ প্রেসিদেন্সী মনুংদা লৈবাক পুম্বদা তোঙান তোঙানবা মফম ১০০দা মীফম ২০০গী ময়াদা শীন্দুনা অমনা অমদগী খেন্নবা মহাওশিং পীরি হায়না প্রধান মন্ত্রীনা পাউদমখি‍। “করিগুম্বা অদোম্না মীফমশিং অসিগীদমক ভারত্তা হান্ননা লাকখ্রবা অদোমগী মরূপ মপাংশিংদা হংলবদি, এক্সপরিএন্স অমত্তা কৈদৌঙৈদসু মান্নরম্লোই হায়না ঐনা থাজৈ,” হায়না মহাক্না মখা তাখি‍।

তুরিজম সেক্তরদা ভারতনা হোৎনরিবশিং অসি তুরিজমগী মালেমগী থাক্কী মচাক মথুমশিং শেমগৎপগা লোয়ননা লমদমসিগী ইনাক খুল্লবা পারী পুরীগী লনথুম ঙাক শেনবদা য়ুম্ফম ওইবনি হায়না প্রধান মন্ত্রীনা ফোঙদোকখি‍। ভারতনা মালেমগী অচৌবা লাইনিং খুদিংমক্কী লাই খুরুম্বা লাকপশিংগী পুক্নিং চিংশিল্লি হায়রদুনা, প্রধান মন্ত্রীনা স্পিরিচুএল তুরিজম শেমগৎপা অসিসু মীৎয়েঙ চঙলিবা হীরমশিংগী মনুংদা অমনি হায়খি‍। অচৌবা লাইনিংগী মফম অমা ওইরিবা বরানসীগী শেংলবা ময়োল্লমদা শেমগৎলিবা মচাক মথুমশিং অসিনা লাই খুরুম্বা লাকপা মীশিং শরুক তরা হেনগৎহন্দুনা ঙসিদি মিলিয়ন ৭০ য়ৌরে‍ হায়না মহাক্না পাউদমখি‍। ভারতনা লমকোইবশিংগী অনৌবা পুক্নিং চিংশিনফমশিং শেমগৎলি হায়রদুনা মহাক্না শঙ্গাখিবা চহি অমগী মনুংদা লম কোইবা মীওই মিলিয়ন ২.৭গী পুক্নিং চিংশিনখিবা, মালেমগী খ্বায়দগী ৱাংবা মীতম ওইরিবা, স্তেচু ওফ য়ুনিতীবু খুদম ওইনা পীখি‍। হৌখিবা চহি মাপনসিদা ঐখোয়না লৈবাকসিগী তুরিজমগী অপুনবা ইকোসিস্তেম শেমগৎপদা অখন্নবা মীৎয়েঙ থম্লি হায়না প্রধান মন্ত্রীনা হায়খি‍। “ত্রান্সপোর্ত ইনফ্রাস্ত্রকচরদগী হোস্পিতালিতা সেক্তর অমদি স্কিল দিভেলপমেন্ত ফাওবদা, অমদি ঐখোয়গী ভিজা সিস্তেম ফাওবদা, ঐখোয়না তুরিজম সেক্তরবু ঐখোয়গী রিফোর্মগী মরুওইবা মীৎয়েঙফম ওইনা থম্লি”, হায়না শ্রী মোদীনা হায়খি‍। হোস্পিতালিতী সেক্তর অসিনা অতৈ সেক্তরশিংগা চাংদম্নবদা নুপী অমদি নহা মশিং হেন্না থবক পীদুনা মসিদা থবক পীনবা, পুম্নমক্কী ওইবা খুন্নাই অমদি শেন্মিৎলোন চাওখৎহন্নবগী মতিং চাউনা লৈ হায়না মহাক্না ফোঙদোকখি‍। সস্তেনেবল দিভেলপমেন্ত গোলশিং খোঙজেল য়াঙনা ফংনবগীদমক তুরিজম সেক্তরগী মরু ওইববুসু ভারতনা শকখঙলি হায়না প্রধান মন্ত্রীনা হরাওবা ফোঙদোকখি‍।

“তেরোরিজম্না খাইদোকই অদুবু তুরিজম্না পুনশিল্লি”, হায়না প্রধান মন্ত্রীনা ফোঙদোকখি‍। তুরিজমদা পুন্সিগী শিনফম কয়াদা লৈবা মীওইশিংবু পুনশিন্নদুনা পুকচেল খোইজেল তিন্নবা খুন্নাই অমা শেম্নবগী মতিং লৈ হায়না মহাক্না হায়খি‍। খ্বায়দগী ফবা থৌওংশিং, কেস স্তদীশিং অমদি পুক্নিং থৌগৎনিংঙাই ওইবা ৱারীশিং পুনশিন্নরিবা অসিগুম্বা মখলগী অহানবা প্লেতফোর্ম ওইরিবা জি২০ তুরিজম দেসবোর্দ অসি য়ু.এন.দব্লিউ.তি.ও.গা খোঙবু ওইদুনা শেমগৎমিন্নরি হায়না শ্রী মোদীনা হরাওবা ফোঙদোকখি‍। ‘গোৱা রোদমেপ’কী মখাদা খন্ন-নৈনরিবা অসিনা তুরিজমগী অহোংবা পুরকপগী মপাঙ্গল ফুদোকহন্নবগী অপুনবগী থৌওংবু হেন্না মথৌ হাপকনি হায়বগী থাজবা প্রধান মন্ত্রীনা ফোঙদোকখি‍। “ভারতকী জি২০ প্রেসিদেন্সীগী মোত্তো, ‘বসুদৈব কুতুম্বকম’ – ‘মালেম অমা, ইমুং অমা, তুংলমচৎ অমা’ হায়রিবসি মালেমগী তুরিজমগী মোত্তো অমা অদুমক ওইবা য়াই” হায়না মহাক্না মখা তাখি‍।

প্রধান মন্ত্রীগী মপুংফাবা ৱারোলগীদমক মফম অসিদা ক্লিক তৌবিয়ু

জি২০ তুরিজম ৱার্কিং গ্রুপকী মরিশুবা মীফম অমসুং জি২০ তুরিজম মিনিস্তরশিংগী মীফম ঙসি গৱাদা লোইশিনখ্রে।

মিনিস্তরশিংগী মীফমদা তুরিজম, কলচর অমসুং দোনরগী কেন্দ্র মন্ত্রী শ্রী জি. কিশন রেদ্দী, তুরিজমগী রাজ্য মন্ত্রী শ্রী শ্রীপদ য়েসো নায়ক অমসুং তুরিজমগী রাজ্য মন্ত্রী শ্রী অজয় ভাতনা শরুক য়াখি। জি২০ লৈবাকশিংগী মিনিস্তরশিং অমসুং জি২০ লৈবাকশিং, বার্তন ফংলবা লৈবাকশিং অমসুং ইন্তরনেস্নেল ওর্গনাইজেসনশিংগী মীহুৎ কাংবুশিংনা মীফমদা শরুক য়াখি।

মিনিস্তরশিংগী মীফমদা ৱা ঙাংলদুনা শ্রী জি. কিশন রেদ্দীনা জি২০ মেম্বর লৈবাকশিং, মীথুংলেন লৈবাকশিং অমসুং ইন্তরনেস্নেল ওর্গনাইজেসনশিংগী তুরিজম মিনিস্তরশিং অমসুং মীহুৎ কাংবুগী লুচিংবশিংবু তরাম্না ওকখি।

মন্ত্রীনা হায়খি মদুদি ঐখোয় পুম্নমক্না জি২০গী ইমেন্স সিগনিফিকেন্স অমসুং গ্লোবেল গবর্নান্সতা মসিগী থৌদাং অদু খংলে। মহাক্না হায়খি মদুদি মরুওইবা মায়োক্নবশিং কোকহন্নবা অমসুং সস্তেনেবল, বেলেন্স অমসুং ইনক্লুসিব গ্রোথ থৌগৎনবগীদমক জি২০না মালেমগী মরুওইবা ইকোনোমীশিংবু পুন্না পুরক্লি।  

তুরিজম ৱার্কিং গ্রুপ মীফমগী এচিবমেন্তশিং ফোংদোক্লদুনা মিনিস্তরনা খংহনখি মদুদি মীফম অদুদা প্রায়োরিতী ৫ – গ্রীন তুরিজম, দিজিতেলাইজেসন, স্কিলস, তুরিজম এম.এস.এম.ই.শিং অমসুং দেস্তিনেসন মেনেজমেন্তদা খন্ন-নৈনখি।

মহাক্না হায়খি মদুদি তুরিজম মন্ত্রালয়না তুরিজম ৱার্কিং গ্রুপকী মীফমগী নাকলদা থৌরমশিংগী পরিং অমা পাংথোকখি। থৌরমশিং অসিনা সস্তেনেবল অমসুং দাইবর্স তুরিজম প্রমোত তৌবদা মরুওইবা ওইরি মদুদা রুরেল তুরিজম, আর্কিওলোজিকেল তুরিজম, এদভেঞ্চর তুরিজম, ফিল্ম তুরিজম, ইকো তুরিজম অমসুং ক্রুইজ তুরিজমগুম্বা তোঙান তোঙানবা হিরমশিংদা খন্ন-নৈনখি।

মন্ত্রীনা হায়খি মদুদি জি২০ ৱার্কিং গ্রুপকী আউতকম দোকুমেন্ত অনিমক তরাম্না ওকলি। ত্রাভেল ফোর লাইফতা ৱা ঙাংলদুনা শ্রী জি. কিশন রেদ্দীনা হায়খি মদুদি গৱা রোদমেপতা য়াওরিবা “ত্রাভেল ফোর লাইফ”, ঐখোয়গী প্রধান মন্ত্রীগী ভিজনরী ইনিসিয়েতিব ‘মিসন লাইফ’দা য়ুমফম ওই। ক্লাইমেত চেঞ্জগী ইফেক্তকী মায়োক্তা এনভাইরনমেন্তবু প্রোতেক্ত তৌবদা শরুক য়ানবা মহাক্না মীয়াংদা তকশিনখি।

কেন্দ্র মন্ত্রী শ্রী জি কিশন রেদ্দীনা গৱা রোদমেপপু তরাম্না ওক্লদুনা হায়খি মদুদি “ঐখোয়না ‘গৱা রোদমেপ ফোর তুরিজমবু সস্তেনেবল দিবলপমেন্ত গোলস ফংনবগীদমক ভেহিকল অমগুম’ তরাম্না ওকলি অমসুং তুরিজম ইন্দস্ত্রীদা দিবলপমেন্ত, ইনোভেসন অমসুং কোওপরেসনবু থৌগৎপদা ভারতকী জি২০ প্রসিদেন্সীগী মখাদা মশক খংদোক্লবা মরুওইবা প্রায়োরিতী এরিয়া ৫গী ফাইভোতেল রোলবু হেন্না চেৎশিলহল্লে।”

মহাক্কী লোইশিন ৱারোলদা মহাক্না হায়খি মদুদি “ঐহাক্না মসি শেয়র তৌবদা নুংঙাইবা ফাওই মদুদি এস.দি.জি.শিংগী মায়কৈদা খুমাং চাউশিন্নবগীদমক জি২০ মেম্বরশিংগী বেস্ত প্রেক্তিসশিং অমসুং কেস স্তদীশিং উৎনবা জি২০ তুরিজম অমসুং এস.দি.জি. ওনলাইন দাশবোর্দ শেমগৎলগনি। মসিনা স্তেকহোল্দরশিংবু বেস্ত প্রেক্তিসশিংদগী তম্বা অমসুং মদু রেপ্লিকেত তৌবদা মতেং ওইরগনি।”

“ঐহাক্না অমুক হন্না হায়জনিংবদি তুরিজমগী শক্তিগী কানবা লৌদুনা ঐখোয়না লাক্কদৌরিবা জেনরেসনগীদমক হেন্না ফবা মালেম অমা শেম্বা ঙমগনি।” ৱাফম অসিগা লোয়ননা মন্ত্রীনা মহাক্কী ৱারোল লোইশিনখি।

মসিগী মমাংদা ‘পব্লিক প্রাইভেত দাইলোগ: ইম্পোর্তেন্স ওফ ত্রাভেল এন্দ তুরিজম তু দি জি২০ ইকোনোমীজ’দা খন্ন-নৈনবা অমা পাংথোকখি।

খন্ন-নৈনবা অদুদা কেন্দ্র মন্ত্রী শ্রী জি. কিশন রেদ্দীনা ৱা ঙাংখি অমসুং ৱার্লদ ত্রাভেল অমসুং তুরিজম কাউন্সিলগী প্রসিদেন্ত অমসুং সি.ই.ও. শ্রীমতী জুলিয়া সিম্পসন্না শরুক য়াখি।

****