ಗಣಿಗಳ ನಡುವೆ ಸ್ಪರ್ಧಾತ್ಮಕತೆಯನ್ನು ಉತ್ತೇಜಿಸಲು ಮತ್ತು ಶಾಸನಬದ್ಧ ನಿಬಂಧನೆಗಳ ಅನುಸರಣೆ, ಸುಧಾರಿತ ಗಣಿಗಾರಿಕೆ ತಂತ್ರಜ್ಞಾನದ ಅಳವಡಿಕೆ ಮತ್ತು ಆರ್ಥಿಕ ಸಾಧನೆಗಳ ಆಧಾರದ ಮೇಲೆ ಅವುಗಳ ಅತ್ಯುತ್ತಮ ಕಾರ್ಯಕ್ಷಮತೆಯನ್ನು ಗುರುತಿಸಲು, ಕಲ್ಲಿದ್ದಲು ಸಚಿವಾಲಯವು 2022-23ರ ಆರ್ಥಿಕ ವರ್ಷಕ್ಕೆ ಕಲ್ಲಿದ್ದಲು ಮತ್ತು ಲಿಗ್ನೈಟ್ ಗಣಿಗಳ ಸ್ಟಾರ್ ರೇಟಿಂಗ್ ನೋಂದಣಿ ಪ್ರಕ್ರಿಯೆಯನ್ನು ಪ್ರಾರಂಭಿಸುವುದಾಗಿ ಘೋಷಿಸಿದೆ.

ಸ್ಟಾರ್ ರೇಟಿಂಗ್ ನೀತಿಯು ಗಣಿಗಾರಿಕೆ ಕಾರ್ಯಾಚರಣೆಗಳು, ಪರಿಸರ ಸಂಬಂಧಿತ ನಿಯತಾಂಕಗಳು, ತಂತ್ರಜ್ಞಾನಗಳ ಅಳವಡಿಕೆ, ಉತ್ತಮ ಗಣಿಗಾರಿಕೆ ಅಭ್ಯಾಸಗಳು, ಆರ್ಥಿಕ ಕಾರ್ಯಕ್ಷಮತೆ, ಪುನಸ್ಥಾಪನೆ ಮತ್ತು ಪುನರ್ವಸತಿ, ಕಾರ್ಮಿಕರ ಸಂಬಂಧಿತ ಅನುಸರಣೆ ಮತ್ತು ಸುರಕ್ಷತೆ ಮತ್ತು ಭದ್ರತೆ ಎಂಬ ಏಳು ಪ್ರಮುಖ ನಿಯತಾಂಕಗಳಲ್ಲಿ ವಿವಿಧ ಅಂಶಗಳ ಆಧಾರದ ಮೇಲೆ ಗಣಿಗಳನ್ನು ಮೌಲ್ಯಮಾಪನ ಮಾಡುವ ಗುರಿಯನ್ನು ಹೊಂದಿದೆ.

ಸ್ಟಾರ್ ರೇಟಿಂಗ್ ಕಾರ್ಯಕ್ರಮಕ್ಕೆ ಎಲ್ಲಾ ಕಲ್ಲಿದ್ದಲು ಮತ್ತು ಲಿಗ್ನೈಟ್ ಗಣಿಗಳ ನೋಂದಣಿಗಾಗಿ ಈ ವರ್ಷದ ಅಧಿಸೂಚನೆಯನ್ನು 2023 ರ ಮೇ 30 ರಂದು ಹೊರಡಿಸಲಾಯಿತು ಮತ್ತು ನೋಂದಣಿಗಾಗಿ ಸ್ಟಾರ್ ರೇಟಿಂಗ್ ಪೋರ್ಟಲ್ ಅನ್ನು 01.06.2023 ರಂದು ತೆರೆಯಲಾಯಿತು. 19.06.2023 ರವರೆಗಿನ ಅಲ್ಪಾವಧಿಯಲ್ಲಿ, 376 ಗಣಿಗಳು ಈಗಾಗಲೇ ಭಾಗವಹಿಸುವಿಕೆಗಾಗಿ ಅರ್ಜಿ ಸಲ್ಲಿಸಿವೆ, ಇದು 2018-19 ರಲ್ಲಿ ಕಾರ್ಯಕ್ರಮ ಪ್ರಾರಂಭವಾದಾಗಿನಿಂದ ಅತಿ ಹೆಚ್ಚು ಭಾಗವಹಿಸುವ ಗಣಿಗಳಾಗಿವೆ. ಪೋರ್ಟಲ್ 30.06.2023 ರವರೆಗೆ ನೋಂದಣಿಗಾಗಿ ತೆರೆದಿರುವುದರಿಂದ ಇನ್ನೂ ಹೆಚ್ಚಿನ ಗಣಿಗಳು ನೋಂದಾಯಿಸಲು ಸಚಿವಾಲಯ ನಿರೀಕ್ಷಿಸುತ್ತಿದೆ.

ಭಾಗವಹಿಸುವ ಗಣಿಗಳನ್ನು ಸಮಗ್ರ ಸ್ವಯಂ ಮೌಲ್ಯಮಾಪನ ಪ್ರಕ್ರಿಯೆಯನ್ನು ಕೈಗೊಳ್ಳಲು ಪ್ರೋತ್ಸಾಹಿಸಲಾಗುತ್ತದೆ, ಇದನ್ನು 2023 ರ ಜುಲೈ 31 ರೊಳಗೆ ಪೂರ್ಣಗೊಳಿಸಬೇಕು. ಪೂರ್ಣಗೊಂಡ ನಂತರ, ಸಮಿತಿಯು ನಡೆಸಿದ ತಪಾಸಣೆಯ ಮೂಲಕ ಹೆಚ್ಚಿನ ಮೌಲ್ಯಮಾಪನಕ್ಕಾಗಿ ಅತಿ ಹೆಚ್ಚು ಅಂಕ ಗಳಿಸಿದ ಮೊದಲ ಶೇ.10 ರಷ್ಟು ಗಣಿಗಳನ್ನು ಆಯ್ಕೆ ಮಾಡಲಾಗುತ್ತದೆ. ಉಳಿದ  ಶೇ. 90 ಗಣಿಗಳು ಆನ್ ಲೈನ್ ಪರಿಶೀಲನಾ ಪ್ರಕ್ರಿಯೆಗೆ ಒಳಗಾಗುತ್ತವೆ, ಎಲ್ಲಾ ಭಾಗವಹಿಸುವವರು ಇತರ ಗಣಿಗಳನ್ನು ಪರಿಶೀಲಿಸುವ ಮೂಲಕ ಮೌಲ್ಯಮಾಪನಕ್ಕೆ ಕೊಡುಗೆ ನೀಡಬಹುದು. ಸಮಗ್ರ ಪರಿಶೀಲನೆಯನ್ನು 2023ರ ಅಕ್ಟೋಬರ್ 31 ರೊಳಗೆ ಅಂತಿಮಗೊಳಿಸಲಾಗುವುದು. ತರುವಾಯ, ಕಲ್ಲಿದ್ದಲು ನಿಯಂತ್ರಕ ಪರಿಶೀಲನೆಯನ್ನು ನಡೆಸಲಾಗುವುದು, ಇದು 2024 ರ ಜನವರಿ 31 ರೊಳಗೆ ಅಂತಿಮ ಫಲಿತಾಂಶಗಳನ್ನು ಪ್ರಕಟಿಸಲು ಕಾರಣವಾಗುತ್ತದೆ. ಮೌಲ್ಯಮಾಪನವನ್ನು ಕಲ್ಲಿದ್ದಲು ನಿಯಂತ್ರಕರ ಸಂಸ್ಥೆ ನಡೆಸುತ್ತದೆ, ಮೌಲ್ಯಮಾಪನದಲ್ಲಿ ಪಾರದರ್ಶಕತೆ ಮತ್ತು ನಿಷ್ಪಕ್ಷಪಾತತೆಯನ್ನು ಖಚಿತಪಡಿಸುತ್ತದೆ.

ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವ ಮೂಲಕ ಮತ್ತು ಜವಾಬ್ದಾರಿಯುತ ಗಣಿಗಾರಿಕೆ ಅಭ್ಯಾಸಗಳನ್ನು ಉತ್ತೇಜಿಸುವ ಮೂಲಕ ದೇಶದಲ್ಲಿ ಕಲ್ಲಿದ್ದಲು ಮತ್ತು ಲಿಗ್ನೈಟ್ ಗಣಿಗಾರಿಕೆಯ ಒಟ್ಟಾರೆ ಕಾರ್ಯಕ್ಷಮತೆ ಮತ್ತು ಸುಸ್ಥಿರತೆಯನ್ನು ಹೆಚ್ಚಿಸುವ ಗುರಿಯನ್ನು ಕಲ್ಲಿದ್ದಲು ಸಚಿವಾಲಯ ಹೊಂದಿದೆ. ನೀಡಲಾದ ರೇಟಿಂಗ್ ಗಳು ಫೈವ್ ಸ್ಟಾರ್ ನಿಂದ ನೋ ಸ್ಟಾರ್ ವರೆಗೆ ಇರುತ್ತವೆ, ಪ್ರತಿ ಗಣಿಯ ಸಾಧನೆಗಳನ್ನು ಸಮಗ್ರವಾಗಿ ಮೌಲ್ಯಮಾಪನ ಮಾಡುತ್ತವೆ.

*****