ভাৰতীয় নিৰ্বাচন আয়োগে আজি জনপ্ৰতিনিধিত্ব আইন, ১৯৫০ৰ ধাৰা ৮-কত উল্লেখ কৰা অনুসৰি, অসমৰ বাবে বিধানসভা আৰু সংসদীয় সমষ্টিসমূহৰ পুনৰ নিৰ্ধাৰণৰ প্ৰস্তাৱৰ খচৰা প্ৰকাশ কৰে। প্ৰাসংগিক আইনসমূহ যেনে- ভাৰতীয় সংবিধানৰ সীমা নিৰ্ধাৰণ আইন, ২০০২ (২০০২ৰ ৩৩), অনুচ্ছেদ ৮২, ১৭০, ৩৩০ আৰু ৩৩২ৰ ধাৰা ৯ (১) (গ) আৰু (ঘ)ৰ সৈতে আৰ. পি. আইন, ১৯৫০ৰ ধাৰা ৮ ক অনুসৰি সীমা নিৰ্ধাৰণৰ প্ৰক্ৰিয়া আগবঢ়োৱা হৈছে। অসমত শেষ সমষ্টি পুনৰ নিৰ্ধাৰণৰ প্ৰক্ৰিয়া ১৯৭৬ত সম্পন্ন হৈছিল।

সংবিধানৰ ১৭০ আৰু ৮২ নং অনুচ্ছেদৰ অনুসৰণেৰে ২০০১ৰ লোকপিয়লৰ ভিত্তিত ৰাজ্যখনৰ সকলো বিধানসভা আৰু সংসদীয় সমষ্টিৰ পুনৰ নিৰ্ধাৰণ কৰা হ’ব। কেৱল লোকপিয়ল আয়ুক্তই প্ৰকাশ কৰা ২০০১ৰ লোকপিয়লৰ পৰিসংখ্যা এই উদ্দেশ্যে বিবেচনা কৰা হৈছে। অসমৰ বিধানসভা আৰু লোকসভাৰ আসনৰ সংখ্যা ক্ৰমে ১২৬ আৰু ১৪খন হৈ থাকিব। ১৭০ আৰু ৮২ নং অনুচ্ছেদত উল্লেখ কৰা হৈছে যে ২০২৬ৰ পাছৰ প্ৰথম লোকপিয়লৰ প্ৰাসংগিক পৰিসংখ্যা উপলব্ধ নোহোৱালৈকে প্ৰতিখন ৰাজ্যৰ বিধানসভাৰ আসন আৰু লোকসভাৰ আসনৰ আবন্টনৰ সংখ্যা সলনি কৰা নহ’ব।

বিধানসভাৰ ১২৬খন আসনৰ ভিতৰত অনুসূচিত জনজাতিৰ বাবে ১৯খন আসন, আনহাতে অসমলৈ আবন্টিত লোকসভাৰ ১৪খন আসনৰ ভিতৰত অনুসূচিত জনজাতিৰ বাবে ২খন আসন আবন্টনৰ প্ৰস্তাৱ দিয়া হৈছে। একেদৰে, বিধানসভাৰ ০৯খন আসন অনুসূচিত জাতিৰ বাবে, আনহাতে লোকসভাত অনুসূচিত জাতিৰ বাবে ১খন আসন আবন্টনৰ প্ৰস্তাৱ জনোৱা হৈছে।

 

প্ৰস্তাৱিত বিধানসভা সমষ্টি	বিধানসভা সমষ্টি	সংসদীয় সমষ্টি
সাধাৰণ	৯৮	১১
এছচি	০৯	০১
এছটি	১৯	০২
মুঠ আসন	১২৬	১৪

 

প্ৰস্তাৱৰ খচৰাখনৰ একাংশ উল্লেখযোগ্য বৈশিষ্ট্য

• সৰ্বনিম্ন প্ৰশাসনিক ইউনিট গ্ৰামাঞ্চলত ‘গাঁও’ আৰু চহৰাঞ্চলত ‘ৱাৰ্ড’ হ’ব আৰু গাঁও আৰু ৱাৰ্ডসমূহক অক্ষত অৱস্থাত ৰখা হৈছে আৰু ৰাজ্যখনৰ কোনো ঠাইতে ই ভাঙি যোৱা নাই
• এছচি বিধানসভাৰ আসন ৮ ৰপৰা ৯লৈ বৃদ্ধি কৰা হৈছে; এছটি বিধানসভাৰ আসন ১৬ ৰপৰা ১৯লৈ বৃদ্ধি পাইছে;
• পশ্চিম কাৰ্বি আংলং জিলাৰ স্বায়ত্তশাসিত জিলাসমূহত ০১খন বিধানসভাৰ আসন বৃদ্ধি;
• বড়োলেণ্ডৰ জিলাসমূহত বিধানসভা সমষ্টি (AC) ১৬ ৰপৰা ১৯লৈ বৃদ্ধি;
• ডিফু আৰু কোকৰাঝাৰ সংসদীয় আসন এছটিৰ বাবে সংৰক্ষিত থাকিব;
• লখিমপুৰ সংসদীয় আসন অসংৰক্ষিত হিচাপে থাকিব;
• ধেমাজি জিলাত ০১ অসংৰক্ষিত বিধানসভা সমষ্টি;
• এখন সংসদীয় আসন যথা ‘ডিফু’ এছটিৰ বাবে সংৰক্ষিত। ই ০৩খন স্বায়ত্তশাসিত জিলাৰ ০৬টা বিধানসভা সমষ্টিক সামৰি লৈছে;
• বৰাক উপত্যকাৰ জিলাসমূহ অৰ্থাৎ কাছাৰ, হাইলাকান্দি আৰু কৰিমগঞ্জ জিলাক ০২খন সংসদীয় আসন।
• এখন সংসদীয় আসনৰ নাম কাজিৰঙা হ’ব।

গ্ৰামাঞ্চলত প্ৰশাসনিক ইউনিট অৰ্থাৎ উন্নয়ন খণ্ড, পঞ্চায়ত (বিটিএডিত ভিচিডিচি) আৰু চহৰাঞ্চলৰ পৌৰসভা, ৱাৰ্ডৰ ভিত্তিত খচৰাৰ প্ৰস্তাৱ যুগুত কৰা হৈছে। 

মুখ্য নিৰ্বাচন আয়ুক্ত শ্ৰী ৰাজীৱ কুমাৰৰ লগতে নিৰ্বাচন আয়ুক্ত শ্ৰী অনুপ চন্দ্ৰ পাণ্ডে আৰু শ্ৰী অৰুণ গোৱেলৰে গঠিত আয়োগে ২০২৩ৰ জুলাইত পুনৰ অসম ভ্ৰমণেৰে প্ৰস্তাৱৰ খচৰা সন্দৰ্ভত ৰাজহুৱা শুনানি গ্ৰহণ কৰিব।

 

নীতি-নিৰ্দেশনা আৰু ব্যৱস্থাবিধিঃ

 

• আয়োগে সাংবিধানিক আৰু আইনী বিধান তথা প্ৰতিনিধিসকলৰপৰা লাভ কৰা পৰামৰ্শৰাজি অনুসাৰে এই নীতি-নিৰ্দেশনা আৰু ব্যৱস্থাবিধি উদ্ভাৱন কৰি উলিয়াইছে। 
• ৰাজ্যৰ সমষ্টিসমূহৰ সীমা নিৰ্ধাৰণৰ উদ্দেশ্যে অসমৰ মুখ্য নিৰ্বাচনী বিষয়াৰপৰা পৰিসংখ্যাগত তথ্য আৰু মানচিত্ৰ বিচৰা হৈছিল, যিয়ে ২০০১ৰ লোকপিয়ল অনুসৰি সকলো জিলাৰ তথ্য আৰু ২০২৩ৰ ১ জানুৱাৰী অনুসৰি, প্ৰশাসনিক ইউনিট অৰ্থাৎ জিলা/ উন্নয়ন খণ্ড/পঞ্চায়ত বা ভিচিডিচি (Village Council Development Committee)/ গাঁও/ ৱাৰ্ড আদিৰ মানচিত্ৰ সংগ্ৰহ কৰে। 
• সকলো সমষ্টিকে সম্ভৱপৰ ভৌগোলিকভাৱে অখণ্ড অঞ্চল হিচাপে ৰখাৰ প্ৰচেষ্টা গ্ৰহণ কৰা হৈছে আৰু এইসমূহৰ সীমা নিৰ্ধাৰণৰ ক্ষেত্ৰত ভৌতিক বৈশিষ্ট্য, জনসংখ্যাৰ ঘনত্ব, প্ৰশাসনিক ইউনিটসমূহৰ বৰ্তমানৰ সীমা, যোগাযোগৰ সুবিধা আৰু ৰাজহুৱা সুবিধাৰ প্ৰতি লক্ষ্য ৰখা হৈছে। ভৌগোলিক বৈশিষ্ট্য, জনসংখ্যাৰ ঘনত্ব, যোগাযোগৰ মাধ্যম, জনসাধাৰণৰ সুবিধা, অঞ্চলসমূহৰ সংলগ্নতা আৰু প্ৰয়োজনীয়তা আদি কাৰকৰ ক্ষেত্ৰত কিছুমান বিশেষ পৰিস্থিতিত আন্তঃজিলা ভিন্নতাৰ বাবে ৰাজ্য আৰু জিলাৰ গড়ৰপৰা কিছু পৰিমাণে বিচ্যুতিৰ অনুমতি প্ৰদান কৰা হৈছে। এই ক্ষেত্ৰত প্ৰশাসনিক ইউনিটসমূহ ভাঙি নোযোৱাৰ ব্যৱস্থা গ্ৰহণ কৰা হৈছে। অসমত বিগত সীমা নিৰ্ধাৰণৰ পাছৰেপৰা (১৯৭৬) জিলাৰ সংখ্যা ১০ ৰপৰা ৩১খনলৈ বৃদ্ধি পাইছে আৰু একেদৰে উন্নয়ন খণ্ড আৰু গাঁও পঞ্চায়ত পৰ্য্যায়ৰ প্ৰশাসনিক ইউনিটৰ সংখ্যাও বৃদ্ধি হৈছে।
• অসমৰ জনসংখ্যা বৃদ্ধিৰ অসমান ধৰণটো সন্দৰ্ভত আয়োগক অৱগত কৰা হয়। যোৱা সীমা নিৰ্ধাৰণৰ পিছত একাংশ জিলাত জনসংখ্যা বৃদ্ধি অধিক হোৱাৰ বিপৰীতে আন কেতবোৰ জিলাত জনসংখ্যা বৃদ্ধি কমকৈ হোৱা দেখা গৈছে। ৰাজ্যখনৰ জিলাসমূহৰ ভিতৰত জনসংখ্যাৰ ঘনত্ব ডিমা হাচাও জিলাত প্ৰতি বৰ্গ কিলোমিটাৰত ৩৮ জনৰ বিপৰীতে কামৰূপ (মহানগৰ) জিলাত প্ৰতি বৰ্গ কিলোমিটাৰত ১০৯৬ জন। 
• আয়োগে এই সকলোবোৰ কথা লক্ষ্যৰে ৩১খন জিলাকে প্ৰতিটো বিধানসভা সমষ্টি (AC)ৰ গড় জনসংখ্যাৰ (+/-) ১০% মাৰ্জিনেৰে তিনিটা বিস্তৃত শ্ৰেণী ক, খ আৰু গত শ্ৰেণীভুক্ত কৰিছে, একেদৰে জিলাসমূহলৈ সমষ্টি আবন্টনৰ প্ৰস্তাৱ জনাইছে। 
• ৰাজ্যখনৰ গড় জনসংখ্যা ঘনত্ব প্ৰতি বৰ্গ কিলোমিটাৰত ৩৩৮ জন। ৩০৪ (গড় জনসংখ্যা ঘনত্বৰপৰা ১০% বিয়োগ কৰি) ৰপৰা ৩৭২ (গড় জনসংখ্যা ঘনত্বৰ ১০% যোগ কৰি) লৈ জনসংখ্যাৰ ঘনত্বৰ পৰিসৰ স্থাপন কৰা হৈছে আৰু এই ভিত্তিতে তিনিটা শ্ৰেণী গঠন কৰা হৈছেঃ

ক। প্ৰতি বৰ্গ কিলোমিটাৰত ৩০৪ জনতকৈ কম জনসংখ্যাৰ ঘনত্ব থকা জিলা।

খ। প্ৰতি বৰ্গ কিলোমিটাৰত ৩০৪-৩৭২ জনসংখ্যাৰ ঘনত্ব থকা জিলা।

গ। প্ৰতি বৰ্গ কিলোমিটাৰত ৩৭২ জনতকৈ অধিক জনসংখ্যাৰ ঘনত্ব থকা জিলা। 

 

• জিলা এখনৰ শ্ৰেণীৰ ভিত্তিত বিধানসভাৰ আসন আবন্টন জনোৱা হৈছে। ক, খ আৰু গ শ্ৰেণীৰ জিলাসমূহত ক্ৰমে গড় বিধানসভা (AC) জনসংখ্যা ১,৯০,৩৯৭ (ৰাজ্যৰ গড় এচি জনসংখ্যা -১০%), ২,১১,৫৫২ (ৰাজ্যৰ গড় এচি জনসংখ্যা) আৰু ২,৩২,৭০৭ (ৰাজ্যৰ গড় এচি জনসংখ্যা +১০%)ৰ ওপৰত ভিত্তি কৰি আসন আবন্টন জনোৱা হৈছে। জিলাখনৰ মুঠ জনসংখ্যাক জিলাখনৰ বাবে প্ৰযোজ্য ক, খ, গ শ্ৰেণীৰ গড় এচি জনসংখ্যাৰে ভাগ কৰি এখন বিশেষ শ্ৰেণীৰ জিলাৰ বাবে আসনৰ সংখ্যা পোৱা গৈছে। ০.৫ৰ সমান বা ততোধিক ভগ্নাংশক ১(এক) আৰু ০.৫তকৈ কম ভগ্নাংশক ০ (শূন্য) বুলি গণ্য কৰা হৈছে। ইয়াৰ ভিত্তিত জিলাসমূহলৈ ১২২খন বিধানসভাৰ আসন আবন্টন জনোৱা হৈছে। এই মাপকাঠি অভিযোজনাৰ সময়ত ০৪খন বিধানসভাৰ আসনক আবন্টন প্ৰক্ৰিয়াৰপৰা আঁতৰাই ৰখা হৈছিল। ০.২৫-০.৪৯ৰ ভিতৰত ভগ্নাংশ থকা সকলো জিলাকে ছৰ্ট আউট কৰা হয় আৰু এনে ১০খন জিলাৰ ভিতৰত আটাইতকৈ বেছি ভৌগোলিক অঞ্চল থকা ০৪খন জিলালৈ এখনকৈ আসন আবন্টন জনোৱা হৈছে। এই জিলাকেইখন হৈছে কাছাৰ, কোকৰাঝাৰ, পশ্চিম কাৰ্বি আংলং আৰু ওদালগুৰি।

 

এছচি আৰু এছটিৰ বাবে আসন সংৰক্ষণ

 

• এছচিৰ বাবে সংৰক্ষিত হ'বলগীয়া এচিৰ মুঠ সংখ্যা ৰাজ্যৰ মুঠ জনসংখ্যাৰ এছচিৰ অংশৰ ভিত্তিত নিৰ্ধাৰণ কৰা হৈছে:

 

২০০১ এছচি জনসংখ্যা = ১৮২৫৯৪৯

২০০১ মুঠ জনসংখ্যা = ২৬৬৫৫৫২৮

এছচিৰ অংশ = ০.০৬৮৫

ৰাজ্যত এচিৰ মুঠ সংখ্যা = ১২৬

সংৰক্ষিত হ'বলগীয়া বিধানসভা আসনৰ সংখ্যা= ৮.৬৩, ধৰা হ'ল ৯

পিচিৰ মুঠ সংখ্যা = ১৪

সংৰক্ষিত হ'বলগীয়া পিচিৰ সংখ্যা = ০.৯৬, ধৰা হ'ল ১

• তাৰ পাছত, এছচি আসন প্ৰথমে ৰাজ্যৰ মুঠ এছচি জনসংখ্যাৰ অংশ জিলাখনত থকাৰ হিচাপত আৱণ্টন দিয়া হয়। জিলাৰ ভিতৰত, সৰ্বাধিক এছচি জনসংখ্যা থকা আসনবোৰ (এচিৰ মুঠ জনসংখ্যা অনুসৰি) এছচিৰ বাবে সংৰক্ষিত কৰা হৈছে। একেদৰে, সৰ্বাধিক এছচি জনসংখ্যা থকা পিচি (পিচিৰ মুঠ জনসংখ্যা অনুসৰি) এছচিৰ বাবে সংৰক্ষণ কৰা হৈছে।
• সংবিধানৰ অনুচ্ছেদ ৩৩২ৰ খণ্ড (৬) অনুসৰি, "অসমৰ কোনো স্বায়ত্তশাসিত জিলাৰ এটা অনুসূচিত জনজাতিৰ সদস্য নোহোৱা কোনো লোক সেই জিলাৰ কোনো সমষ্টিৰ পৰা ৰাজ্যৰ বিধানসভালৈ নিৰ্বাচনৰ বাবে যোগ্য নহ'ব": সেইমতে, তিনিওখন স্বায়ত্তশাসিত জিলাৰ সকলো আসন (অৰ্থাৎ, ৬) জিলাখনত বাস কৰি থকা এছটিসকলৰ বাবে। বাকী জিলাসমূহত (৩খন স্বায়ত্তশাসিত জিলাৰ বাহিৰে), এছটিৰ বাবে সংৰক্ষিত হ'বলগীয়া এচিৰ মুঠ সংখ্যা ৰাজ্যৰ মুঠ জনসংখ্যাৰ এই জিলাসমূহত থকা এছটিৰ অংশৰ ভিত্তিত নিৰ্ধাৰণ কৰা হৈছে আৰু এই সংখ্যা হৈছে ১৩।
• সংবিধানৰ অনুচ্ছেদ ৩৩২ৰ খণ্ড (৬)ৰ ব্যৱস্থা অনুসৰি, "কোৱা হৈছে যে অসম ৰাজ্যৰ বিধানসভাৰ নিৰ্বাচন, বড়োলেণ্ড টেৰিটৰিয়েল এৰিয়াজ ডিষ্ট্ৰিক্টত অন্তৰ্ভুক্ত সমষ্টিসমূহত অনুসূচিত জনজাতি আৰু অনুসূচিত নোহোৱা জনজাতিৰ প্ৰতিনিধিত্ব, যিদৰে অধিসূচিত হৈছে, বড়োলেণ্ড টেৰিটৰিয়েল এৰিয়াজ ডিষ্ট্ৰিক্ট গঠনৰ আগতে থকাৰ দৰে, ৰূপায়িত হ'ব"। সেইমতে, ৪খন বড়োলেণ্ড জিলাৰ ৬টা এচি (মুঠ ১১টাৰ বৰ্তমানৰ ৬টা এছটি এচি) মুঠ ১৫খন আসনৰ পৰা এছটিৰ বাবে প্ৰস্তাৱ কৰা হৈছে।
• বাকী থকা ৭খন আসন (১৩-৬) বাকী থকা জিলাসমূহক আৱণ্টন দিয়া হৈছে (৩খন স্বায়ত্তশাসিত জিলা আৰু ৪খন বিটিএডি জিলাৰ বাহিৰে)। তাৰ পাছত, এই জিলাসমূহৰ এচিবিলাকত এছটি জনসংখ্যাৰ (এচিৰ মুঠ জনসংখ্যা অনুসৰি) ক্ৰমহ্ৰাসমান অংশৰ ভিত্তিত এইবিলাকৰ ব্যৱস্থা কৰা হৈছে আৰু এছটিৰ বাবে শীৰ্ষ ৭খন আসন সংৰক্ষণ কৰা হৈছে।
• ৩খন স্বায়ত্তশাসিত জিলাত এছটি আসনৰ সংখ্যা = ৬

বাকী থকা ২৮খন জিলাৰ মুঠ জনসংখ্যা = ২৫৬৫৪১৩৮

এই ২৮খন জিলাত এছটিৰ শতাংশ = ১০.৬০%

এই ২৮খন জিলাৰ এছটি আসনৰ সংখ্যা = ১২০*১০.৬৩/১০০ = ১৩

বিটিএডিত এছটি আসন = ৬

বাকী থকা ২৪খন জিলাত এছটি আসন = ৭

মুঠ এছটি আসন = ১৯

• অনুচ্ছেদ ৩৩০(২) অনুসৰি: খণ্ড (১)ৰ অধীনত অনুসূচিত জাতি বা অনুসূচিত জনজাতিৰ বাবে যিকোনো ৰাজ্য বা কেন্দ্ৰীয় শাসিত অঞ্চলত সংৰক্ষিত আসনৰ সংখ্যা হ'ব, যিমান পাৰি সিমান ওচৰ, সেই ৰাজ্য বা কেন্দ্ৰীয় শাসিত অঞ্চলত অনুসূচিত জাতি বা জনজাতিৰ জনসংখ্যা অনুসৰি হাউছ অফ দ্য পিপলত  সেই ৰাজ্য বা কেন্দ্ৰীয় শাসিত অঞ্চলত আৱণ্টিত মুঠ আসনৰ সংখ্যাৰ সমান, যি ক্ষেত্ৰত আসন সংৰক্ষণ কৰা হৈছে, সেয়া ৰাজ্য বা কেন্দ্ৰীয় শাসিত অঞ্চলৰ মুঠ জনসংখ্যা অনুসৰি হ'ব। 

২০০১ এছটি জনসংখ্যা = ৩৩,০৮,৫৭০

২০০১ মুঠ জনসংখ্যা = ২৬৬৫৫৫২৮

এছটিৰ অংশ = ০.১২৪

এছটি পিচিৰ সংখ্যা = ১.৭৪, ধৰা হ'ল ২

পৃষ্ঠভূমি 

স্মৰণযোগ্য যে আয়োগে ২৬-০৩-২০২৩ৰ পৰা ২৮-০৩-২০২৩লৈকে অসম ভ্ৰমণ কৰিছিল আৰু ৰাজনৈতিক দল, জন প্ৰতিনিধি, নাগৰিক সমাজ, সামাজিক সংগঠন, ৰাইজৰ সদস্য আৰু মুখ্য নিৰ্বাচনী বিষয়া, ৰাজ্যৰ সকলো জিলাৰ উপায়ুক্ত আৰু জিলা নিৰ্বাচনী বিষয়াকে ধৰি ৰাজ্যখনৰ প্ৰশাসনৰ বিষয়াবৰ্গৰ সৈতে ৰাজ্যখনত সীমা নিৰ্ধাৰণ অনুশীলন সন্দৰ্ভত বাৰ্তালাপ কৰিছিল। সৰ্বমুঠ, ১১টা ৰাজনৈতিক দলৰ আৰু ৭১টা অন্য সংগঠনৰ পৰা প্ৰতিনিধিত্ব পোৱা যায়।

আয়োগে এই সকলো প্ৰতিনিধিৰ সৈতে আলচ কৰি তলত দিয়া প্ৰধান পৰামৰ্শ লাভ কৰে:

• ২০০১ৰ পিয়লৰ ভিত্তিত সীমা নিৰ্ধাৰণ: কিছুমান গোট সপক্ষে আৰু কিছুমান ইয়াৰ বিপক্ষে।
• ৰাজ্যখনৰ জনগাঁথনিৰ ধৰণৰ পৰিৱৰ্তন সীমা নিৰ্ধাৰণ প্ৰক্ৰিয়া ৰূপায়নৰ সময়ত মন কৰা দৰকাৰ। অসমৰ কেইখনমান জিলাত জনসংখ্যা বৃদ্ধি কম হোৱাৰ বিপৰীতে কিছুমান জিলাত ই আচৰিত ধৰণে বেছি। জনসংখ্যা কম বৃদ্ধি হোৱা জিলাসমূহক অসুবিধাত পেলাব নালাগে আৰু এই জিলাসমূহত আসনৰ সংখ্যা হ্ৰাস কৰিব নালাগে।
• অন্ততঃ ২৫%ৰ পাৰ্থক্য মানি ল'ব লাগে, সাধাৰণ নিয়ম অনুসৰি, যাতে যথোচিত প্ৰতিনিধিত্ব নোহোৱা বুলি কোনো সামাজিক গোটে একাষৰীয়া অনুভৱ নকৰে।
• অসমৰ খিলঞ্জীয়া লোকৰ অধিকাৰ সীমা নিৰ্ধাৰণ অনুশীলনত সুৰক্ষিত হ'ব লাগিব।
• উজনি অসমত নিম্ন জনগাঁথনিগত পৰিৱৰ্তনৰ প্ৰতি লক্ষ্য ৰাখি, উজনি অসমত আসনৰ সংখ্যা হ্ৰাস কৰিব নালাগে, যাতে ৰাষ্ট্ৰীয় জন্ম নীতি অনুসৰণ কৰি থকা লোকসকলে ভূগিবলগা নহয়। নামনি অসমত জনগাঁথনিৰ পদ্ধতি বেছি, যাক আয়োগে গুৰুত্বসহকাৰে চাব লাগে।
• উজনি অসমত ধেমাজি আৰু জোনাইত এচি আসন এছটিৰ বাবে সংৰক্ষিত হ'ব লাগে। একেদৰে, ধেমাজি জিলাৰ সকলো আসন সংৰক্ষণ হ'ব নালাগে বুলি দাবী উঠিছে।
• কামৰূপ জিলাত এখন আসন এছটিৰ বাবে সংৰক্ষিত হ'ব লাগে। কামৰূপ জিলাত চমৰীয়া নামেৰে নতুন এচি হ'ব লাগে বুলি দাবী উঠিছে। গোৱালপাৰা জিলাত দুধনৈ এচি আসন এছটিৰ বাবে সংৰক্ষিত হ'ব লাগে।
• বড়োলেণ্ডত এছটি আসন একে থাকিব লাগে আৰু কোকৰাঝাৰ এছটিৰ বাবে সংৰক্ষিত হ'ব লাগে। বড়োলেণ্ডত এচি আসনৰ সংখ্যা বাঢ়িব লাগে।
• ভৈয়ামত এছটি আসনৰ সংখ্যা বাঢ়িব লাগে ভৈয়ামৰ জনজাতিৰ মুনাফাৰ বাবে, যিহেতু যোৱা বছৰবোৰত তেওঁলোকৰ জনসংখ্যা বৃদ্ধি হৈছে।
• পশ্চিম কাৰ্বি আংলং জিলাত আসন বাঢ়িব লাগে, বৰ্তমান জিলাখনত কেৱল এটাহে আসন আছে।
• স্থানীয় কাৰকৰ ভিত্তিত কিছুমান পৰামৰ্শ আছে, যেনেআসন বাছনি কৰোঁতে সম্প্ৰদায়ৰ স্বাৰ্থ অটুট ৰাখি নিৰ্দিষ্ট কিছুমান সমষ্টিত নিৰ্দিষ্ট ঠাইৰ অন্তৰ্ভুক্তি, এটা এচিত নিৰ্দিষ্ট কিছুমান ঠাইৰ ঘনত্ব।

 

 

 

********************

(Release ID: 1933792) Visitor Counter : 6630