అస్సాంలో రుతుపవనాలకు ముందు వరదల కారణంగా తలెత్తే ఆరోగ్య సంబంధిత సమస్యలపై చర్చించడానికి కేంద్ర ఆరోగ్య మరియు కుటుంబ సంక్షేమ శాఖ మంత్రి డాక్టర్ మన్సుఖ్ మాండవియా ఈ రోజు వీడియో కాన్ఫరెన్స్ ద్వారా కేంద్ర మరియు రాష్ట్ర ఆరోగ్య సంస్థలతో సమావేశం నిర్వహించారు. అస్సాంలో వరదలను సమర్థవంతంగా నిర్వహించేందుకు కేంద్ర సంస్థలు మరియు రాష్ట్ర ప్రభుత్వ ఏజెన్సీలు ఏర్పాటు చేసిన ఏర్పాట్లను సమావేశం అంచనా వేసింది.

వరదలు మరియు ఇతర అత్యవసర పరిస్థితులను సమర్థవంతంగా ఎదుర్కొనేందుకు కేంద్ర మరియు రాష్ట్ర ఆరోగ్య సంస్థల మధ్య బలమైన సమన్వయం అవసరమని డాక్టర్ మాండవ్య హైలైట్ చేశారు. క్రిటికల్ కేర్ ఎక్విప్‌మెంట్, ఆక్సిజన్, హాస్పిటల్ బెడ్‌ల సన్నద్ధతతో పాటు వరద ప్రభావిత ప్రాంతాల్లో స్వచ్ఛమైన తాగునీటి లభ్యత అవసరమని ఆయన నొక్కి చెప్పారు.నివారణ ఆరోగ్య సంరక్షణ మరియు వెక్టర్ ద్వారా మరియు నీటి ద్వారా సంక్రమించే వ్యాధులకు సంబంధించి కమ్యూనిటీలలో ఎక్కువ అవగాహన కల్పించాలని ఆయన స్పష్టంచేశారు.

అసోంలో పునరావృతమయ్యే వరద పరిస్థితిని ఎదుర్కోవడానికి వరద నిర్వహణ నమూనాలో పని చేయాలని కేంద్ర ఆరోగ్యశాఖ మంత్రి అధికారులను కోరారు. ఏదైనా ఆరోగ్య అత్యవసర పరిస్థితిని సమర్ధవంతంగా నిర్వహించేలా బెడ్‌లు, ఆక్సిజన్ మరియు ఇతర ఆరోగ్య సదుపాయాల లభ్యత వంటి అన్ని ముఖ్యమైన సమాచారాన్ని జాబితా చేసే ఆన్‌లైన్ డేటాబేస్‌ను సిద్ధం చేయాలని అధికారులను ఆయన ఆదేశించారు.

హెల్త్ అండ్ వెల్‌నెస్ సెంటర్‌లలో అవసరమైన మందులు, సరైన వైద్య పరికరాలు మరియు ఇతర సౌకర్యాలు ఉండేలా చూడాలని డాక్టర్ మాండవ్య అధికారులను కోరారు. ఎబి-హెచ్‌డబ్ల్యుసిలలో ఆరోగ్య కార్యకర్తలందరికీ శిక్షణ ఇవ్వాలని ఆయన ఆదేశించారు. తద్వారా వారు అటువంటి అత్యవసర పరిస్థితుల్లో అవసరమైన ఆరోగ్య సంరక్షణ సేవలను అందించడానికి బాగా సన్నద్ధమవుతారు. "ఆశాలు, ఏఎన్‌ఎంలు, సిహెచ్‌ఓలు మొదలైనవారు ఏదైనా అత్యవసర పరిస్థితిలో వారి పాత్రలు మరియు బాధ్యతలను తెలుసుకోవాలి. ముందస్తు శిక్షణ అత్యవసర వరద నిర్వహణ సమయంలో ఆరోగ్య సంరక్షణ సేవలను అందించడంలో వారు ప్రభావవంతంగా ఉన్నారని నిర్ధారిస్తుంది" అని ఆయన పేర్కొన్నారు.

అవసరమైన అన్ని మందులు తగినంత స్టాక్‌లో ఉన్నాయని అస్సాం ప్రిన్సిపల్ సెక్రటరీ (ఆరోగ్యం) శ్రీ అవినాష్ జోషి తెలియజేశారు. సమీక్షా సమావేశంలో పాల్గొన్న బార్‌పేట, కమ్‌రూప్, కాచర్, లఖింపూర్, డిమా హసావో మరియు దిబ్రూఘర్‌లోని ఆరు జిల్లాల డిప్యూటీ కమిషనర్లు వరదలు వచ్చినప్పుడు సమర్థవంతంగా నిర్వహించేందుకు సన్నద్ధతను ఎప్పటికప్పుడు సమీక్షిస్తున్నామని తెలిపారు.

రాష్ట్ర ప్రభుత్వానికి మద్దతు ఇవ్వడానికి తమ ప్రాంతీయ కార్యాలయాలు సంసిద్ధతగా ఉన్నాయని ఎంఓహెచ్‌ఎఫ్‌డబ్ల్యూ డిజిహెచ్‌ డాక్టర్ అతుల్ గోయెల్ పేర్కొన్నారు. రాష్ట్రానికి అవసరమైనప్పుడు సహాయం చేయడానికి ఎయిమ్స్‌ గౌహతి మరియు ఎస్‌సిడిసి నుండి నిపుణుల బృందాన్ని నియమిస్తామని ఆయన తెలిపారు.

రాష్ట్రంలో వరదల నిర్వహణకు కేంద్రం అన్ని విధాలా సహకరిస్తుందని కేంద్ర ఆరోగ్యశాఖ మంత్రి హామీ ఇచ్చారు.

ఈ సమావేశంలో ఆరోగ్య మంత్రిత్వ శాఖ జాయింట్ సెక్రటరీ శ్రీ అశోక్ బాబు  మరియు మంత్రిత్వ శాఖ నుండి సీనియర్ అధికారులు మరియు ఆల్ ఇండియా ఇన్స్టిట్యూట్ ఆఫ్ మెడికల్ సైన్సెస్ (ఎయిమ్స్‌), గౌహతి, ఈశాన్య ఇందిరా గాంధీ రీజనల్ ఇన్స్టిట్యూట్ ఆఫ్ హెల్త్ & మెడికల్ సైన్సెస్ (ఎన్‌ఈఐజిఆర్‌ఐహెచ్‌ఎంఎస్), షిల్లాంగ్ వంటి అనుబంధ సంస్థలు; ఇండియన్ కౌన్సిల్ ఆఫ్ మెడికల్ రీసెర్చ్ - రీజినల్ మెడికల్ రీసెర్చ్ సెంటర్ (ఐసిఎంఆర్‌-ఆర్‌ఎంఆర్‌సిఎన్‌ఈ), దిబ్రూఘర్ మరియు రీజినల్ ఇన్స్టిట్యూట్ ఆఫ్ పారామెడికల్ అండ్ నర్సింగ్ సైన్సెస్ (ఆర్‌ఐపిఏఎన్‌ఎస్‌), ఐజ్వాల్ పాల్గొన్నారు.
 

****