ভারত অমসুং ব্রাজিলগী মরক্তা দিপ্লোমেতকী মরী লৈনরকপা চহি ৭৫ মপুংফারকপা থৌরমগী শরুক অমা ওইনা, অমসুং হিরোসিমাদা জি-৭ মীফমগী নাকলদা প্রধান মন্ত্রী শ্রী নরেন্দ্র মোদী অমসুং ব্রাজিলগী রাস্ত্রপতি লুইজ ইনাসিও লুলা দা সিলভাগী মরক্তা উনখিবগী মখা তারকপা ওইনা, পর্লিয়ামেন্তরি এফেয়ার্স, কোএল অমসুং মাইন্সকী য়ুনিয়ন মিনিস্তর শ্রী প্রালহাদ জোসিনা লুচিংবা মেম্বর ১০গী পর্লিয়ামেন্তরি গুদৱিল দেলিগেসন অমা জুন ১১ দগী জুন ১৩, ২০২৩ ফাওবা ব্রাজিলদা চৎখ্রে।

পর্লিয়ামেন্তরি এফেয়ার্স মিনিস্ত্রিগী সেক্রেতরি, শ্রী জি শ্রীনিভাসনা হায়খি মসি পর্লিয়ামেন্তগী অহানবা গুদৱিল দেলিগেসন্নি অমসুং ২০০৬তগী স্ত্রাতেজিক পার্তনর অমা ওইনা ব্রাজিলগা লৈনবা মরীশিংদা খোঙচৎ অসি য়াম্না মরুওই।

মখোয়গী খোঙচৎ মনুংদা, ভারত অমসুং ব্রাজিলগী মরক্তা শরুক য়ামিন্নরিবা গনতন্ত্রগী গুনশিং অমসুং শান্তিগী খুদম অমা ওইরিবা, ব্রাসিলিয়া অমসুং রিও দে জেনেরিওগী সিতি পার্কশিংগী ময়াইদা লৈরিবা জাতিগী মপা মহাত্মা গান্ধীগী মীতমশিংদা মীহুৎ কাংবু অদুনা ইকায়খুম্নবা উৎখি।

জুন ১৩দা মীহুৎ কাংবু অদুনা ব্রাজিল পর্লিয়ামেন্তগী অপ্পর হাওসকী ফেদেরেল সেনেতকী প্রসিদেন্ত রোদ্রিগো ওতাবিও সোরস পাচেকোগা লোয়ন্না মীফম অমা পাংথোকখি।  লৈবাক অমনা অমদা থাজনবা অমসুং মতেং পীন্দুনা ভারত অমসুং ব্রাজিলগী মরক্তা লৈনবা অচেৎপা মরী ফগৎলকপগী খুদম অমা মীফম মনুংদা ৱারি শানবা অদুনা ওইখি অমসুং পর্লিয়ামেন্তরিয়ানশিংগী মীহুৎ কাংবু অমা ভারত্তা লাক্নবা প্রধান মন্ত্রীগী চেবাউ অদু তরাম্না ওকখি।

মীহুৎ কাংবু অদুনা ইন্দিয়া-ব্রাজিল ফ্রেন্দসিপ ফ্রন্তগী প্রসিদেন্ত সিনেতর নেলসন ত্রাদ অমসুং ফ্রন্তগী অতোপ্পা মেম্বরশিং উনখি। লৈবাক অনিগী মরক্তা লৈনরিবা দিপ্লোমেতকী  মরীশিং মখা তানা চেৎশিনহন্নবা উনবা অদুনা য়ুম্ফম থোনখি।

মসিগী তুংদা কংগ্রেসকী দিপুতি প্রসিদেন্ত মার্কোস পেরৈরা অমসুং ফেদেরেল দিপুতি ভিনিসিয়স কার্ভালহো, ইন্দিয়া ব্রাজিল পর্লিয়ামেন্তরি ফ্রেন্দশিপ গ্রুপকী প্রসিদেন্ত অমসুং মসিগী শক্নাইরবা মেম্বরশিংগা কানরবা মীফম অমা পাংথোকখি।

খোঙচৎ মনুংদা, হৌখিবা চহি খর অসিদা লৈবাক অনিমক্তা ললোন-ইতিক্কী থবক হেনগৎলকপদা নাকল অনিমক্না অপেনবা ফোঙদোকখি। লৈবাক অনিগী ললোন-ইতিক অসি ২০২০দা য়ু.এস দোল্লর বিল্লিয়ন ৭.০৫ ওইরম্বদগী চাদা ১১৫ হেনগৎলক্তুনা ২০২২দা য়ু.এস দোল্লর বিল্লিয়ন ১৫.২০ য়ৌরে। লৈবাক অনিমক্না কান্নবা ফংমিন্নবা, শেন-থুমগী ফিবম ফগৎলকপা অমসুং দিপ্লোমেতকী মরীশিং ফগৎলকপা অদু মসিদা মমি তারে।

রিও দি জেনেরিও অমসুং ব্রাসিলিয়াগী খোঙচৎ মনুংদা, মিনিস্তর জোসিনা ব্রাজিলদা লৈরিবা ভারতমচাশিংগা উনখি। ভারতকী শেন-থুম অমসুং খুন্নাই য়াংনা চাউখৎলক্লিবা, সরকারনা পায়খৎলিবা থবক-থৌরমশিং অমসুং থৌশিলগী মতাংদা মহাক্না মখোয়দা পাউদমখি। উনবা অদুদা লৈবাক অদুদা লৈরিবা ভারতমচাশিংদা হৌজিক ওইরিবা ভারতকী চাউখৎপগী ৱারি হেন্না খঙহন্নবা খুদোংচাবা অমা পীখি অমসুং ভারতমচাশিং অমসুং মখোয়গী মমা লৈবাক অনিগী মরক্তা লৈনবা মরী মখা তানা ফগৎহল্লগনি।

এম্বেসেদর সুরেস রেদ্দিনা হায়খি ভারত পর্লিয়ামেন্তগী গুদৱিল দেলিগেসনগী খোঙচৎ অসি ভারত-ব্রাজিলগী মরীশিংগী ইনাকখুল্লবা পুৱারিগী মাইকৈদা থাংজিনবা মরুওইবা খোঙথাং অমনি। মসিনা ঐখোয়গী মরক্তা শরুক য়ামিন্নরিবা গনতন্ত্রগী গুনশিং হেন্না মপাঙ্গল কনখৎহনগনি অমসুং তোঙান-তোঙানবা হিরমশিংদা মতেং পীনবা হেনগৎহনগনি। খোঙচৎ অসিনা সিনেত অমসুং কংগ্রেসকী মীহুৎশিং ভারত্তা চৎনবা খুদোংচাবা অমা পীরগনি।

****