সাইন্স অমসুং তেক্নোলোজী মন্ত্রালয়
চন্দ্রয়ান ৩ জুলাইদা থাগৎনবা থৌরাং তৌরি হায়না কেন্দ্র মন্ত্রী দোক্তর জিতেন্দ্র সিংহনা হায়রি
Posted On:
14 JUN 2023 7:15PM by PIB Imphal
ভারতকী লেমজনিংঙাই ওইরবা থাগী মিসন চন্দ্রয়ান ৩ জুলাইদা, মরুওইনা থাদুগী অনিশুবা শরুক্তা, থাগৎনবা থৌরাং তৌরি।
ৱাফম অসি সাইন্স এন্দ তেক্নোলোজীগী কেন্দ্রগী রাজ্য মন্ত্রী (ইন্দিপেন্দেন্ত চার্জ), পি.এম.ও., পর্সোনেল, পব্লিক গ্রীভান্সেস, পেন্সন্স, এতোমিক ইনর্জী এন্দ স্পেসকী রাজ্য মন্ত্রী, দোক্তর জিতেন্দ্র সিংহনা ঙসি মফমসিদা মীয়ামগী অচৌবা মীফম অমদা পাউমীশিংনা হংবা ৱাহং অমগী পাউখুম পীরদুনা ফোঙদোকখিবনি।
কেন্দ্র মন্ত্রীনা, করিগুম্বা থৌরাং তৌরিবা অসিনা কায়দনা চৎলগদি, ইন্দিয়ন স্পেস রিছর্চ ওর্গনাইগেসন (ইস্রো) না থাগী খা থংবা নাকলদা স্পেসক্রাফ্ত তাহন্নবগী মরুওইবা তেক্নোলোজী উৎনবা পান্দম থম্লিবা অশা চাউরবা চন্দ্রয়ান-৩ মিসন থাগৎপা ঙমগনি হায়খি। চহি অসিগী অঙনবা শরুক্তা, চন্দ্রয়ান-৩ স্পেসক্রাফ্তনা মসিবু থাগৎপা অমদি মখা তারকপা খোঙচত্তা স্পেসক্রাফ্ত অসিনা থেংনগদৌরিবা তমথিরবা ফীভমশিং থেংনবা ঙম্বগী মতিং উত্থোকখিবা মথৌ তাবা চাংয়েংশিং মায় পাক্না লোইশিনখ্রে হায়না মহাক্না হায়খি।
ভারতকী অহানবা থাগী মিসন, চন্দ্রয়ান-১না থাগী লৈমায়দা ঈশিং লৈবগী খুদম অহানবা ওইনা খঙদোক্তুনা মালেমগী ফম্পাক্তা চাউথোকচবা অমদি মাঙজিল থাবগী মফম অমা ভারতনা কনবা ঙমখ্রে হায়না দোক্তর জিতেন্দ্র সিংহনা হায়খি। ইনপুৎ অসি য়ু.এস.এ.গী নাসানচিংবা মালেমগী মাঙজিল থাবা স্পেস এজেন্সীশিংনা মরুওইবা অমা ওইনা শকখঙখিবনি।
মতাঙসিদা পনবা য়াবদি, চন্দ্রয়ান-৩ অসি চন্দ্রয়ান-২গী মতুং তারকপা মিসন্নি। “সাইন্স ওফ দি মুন” হায়রিবা ৱাফমসিগী মতুং ইন্নদুনা, চন্দ্রয়ানগী লেন্দর অমদি রোভরদা হাপ্লিবা সাইন্তিফিক খুৎলায়শিং অসিনা থাগী অকোয়বগী ফীভম অমদি থর্মো-ফীজিও প্রোপর্তীশিং য়াওনা থাগী তোঙান তোঙানবা হীরমশিং থিজিন হুমজিনবা ঙমগনি। অদুগা অমরোমদা, চন্রয়ান-৩ মিসন্দা চাংয়েং ওইনা হাপ্লিবা অতোপ্পা খুৎলায় অমদি মালেমগী তোঙান তোঙানবা ফীভমশিং থিজিন হুমজিনবা ঙমগদবা মরম্না মসিনা “সাইন্স ওফ দি মুন” হায়রিবা ৱাফম অসিবুসু হেন্না মপুং ফাহল্লি।
মমাঙদা, অচৌবা মীয়ামগী মীফম অমদা ৱা ঙাংলদুনা, দোক্তর জিতেন্দ্র সিংহনা, হৌখিবা চহি ৯ অসিদা প্রধান মন্ত্রী নরেন্দ্র মোদীনা পুরক্লিবা তোঙান তোঙানবা মীয়ামগী য়াইফনবা থৌরাংশিং অসি মমাঙগী লৈঙাকশিংগী মতমদা নীংথিনা মীৎয়েঙ চঙবিরমদ্রবা খুন্নাইগী শরুকশিংদা অওনবা পুরক্নবখক নত্তনা, অশাংবা মতমদা হায়রিবশিং অসিনা খুন্নাই-শেন্মিৎলোনগী অওনবা পুরক্কনি লোয়ননা ঐখোয়গী খুন্নাইগী নাৎ অমদি শাজৎ লীচত্তা অহোংবসু পুরক্কনি হায়খি।
প্রধান মন্ত্রী নরেন্দ্র মোদীনা পায়খৎলিবা মীয়ামগী য়াইফনবা থৌরাং কয়া, খুদম ওইনা রোজগার মেলা, স্তার্তঅপ ইন্দিয়া, মুদ্রা য়োজনানচিংবশিং অসি মীয়ামগী ইহুল খঙনা মিনুংশিগা লোয়ননা ওইরকখিবনি অমদি নহাশিংদা মখোয়গী তৌবা ঙম্বা অমদি শুবা নোম্বা কনবগীদমক চপ মান্নবা খুদোংচাবা ফংহন্দুনা থোং মান্নবা মফম অমা পীরি হায়না থাজবা পীননবা শেমখিবনি হায়না দোক্তর জিতেন্দ্র সিংহনা হায়খি।
নুপীশিংগী মতাঙদা, উজ্জ্বলা অমদি স্বছ্চতা (তোইলেৎ)নচিংবা স্কীমশিং ভারতকী নুপীশিংদা খুদোংচাবা অমদি মখোয়গী ইকায়খুম্নবা ঙাক্ননবা শাফব ফীভম পীননবনি হায়না দোক্তর জিতেন্দ্র সিংহনা মখা তাখি।
<><><><>
(Release ID: 1932769)
Visitor Counter : 79