কলচরগী রাজ্য মন্ত্রী, শ্রীমতী মীনাক্সি লেখিনা ৭৫শুবা ইন্তরনেস্নেল অর্কাইব্স দে পাঙথোক্নবগীমক নই দিল্লীদা লৈবা নেস্নেল অর্কাইব্স ওফ ইন্দিয়াদা ঙসি অজাদী কা অমৃৎ মহোৎসব (এ.কে.এ.এম.)গী মখাদা “হমারী ভাসা, হমারী বিরাসত” কৌবা একজিবিসন অমা হৌদোকখ্রে‍।

একজিবিসন অসি লৈবাক অমা ওইনা ভারতকী লোলগী খেন্নবা মশক্কী ইনাক খুল্লবা পারি পুরিগী লনবু নীংশিংনবা থৌরাং অমনি: “লৈবাক অমা, লোল ময়াম” ভারত অসি তোপ তোপ্পা লোলগী খেন্নবনা লৈতেংলি‍। মালেমগী ওইনা লোল ৭,১১১ চাউরাক্না ঙাঙনরি হায়বসিগী মতুং ইন্না, লোল ৭৮৮দি ভারতখক্তদা ঙাঙনরি‍। মরম অসিনা পপুৱা নিউ গীনি, ইন্দোনেসিয়া অমদি নাইজেরিয়াগা লোয়ননা ভারত অসি মালেমগী ওইনা লোলগী খেন্নবা খ্বায়দগী য়াম্না লৈবা লৈবাক মরিগী মনুংদা অমা ওইরি‍।

থৌরম অদুদা, কলচরগী রাজ্য মন্ত্রী, মিসত্রেস মীনাক্সি লেখিনা হায়খি, “মালেমগী অর্কাইব্স নুমিত্তা, নেস্নেল অর্কাইব্স ওফ ইন্দিয়ানা ভারতকী হৌজিক ফাউবা তেক্ত কায়দনা লৈরিবা খ্বায়দগী অরিবা মেনুস্ক্রিপ্ত কল্লেক্সন ওইরিবা, খৃস্ত মমাঙ চহিচা ৫ অমদি ৬কী মরক্তা ইরম্বা গিলগিৎ মেনিস্ক্রিপ্ত ময়ামদা ফংহল্লে‍।” বির্চ উগী মকুগী মনুং থংবা শরুক্তা মচেৎশিংদা ইরম্বা বির্চ বার্ক ফ,লিও দোকুমেন্তশিং অদু কাস্মিরদগী ফংখিবনি অমদি লাইনিং-ৱাঙউলোন কয়া ওল্লকপগী মতাঙদা ইরম্বা কয়া খংবা ঙমহল্লিবা জৈন অমদি বুদ্ধিস্তকী ওইবা কেনোনিকেল অমদি নন-কেনোনিকেল ওইবা মচাক কয়া য়াউরি হায়নসু মহকা্না ফোঙদোকখি‍। নহারোলশিংদা গিলগিৎ মেনুস্ক্রিপ্তকী মরমদা খঙহনবা মথৌ তাই হায়বা ৱাফমসু মহাক্না থমখি‍।

“ঐনা নেস্নেল অর্কাইব্স ওফ ইন্দিয়াবু মফমসিদা মেনুস্ক্রিপ্ত ৭২,০০০ হেন্না ফংহনবগীদমক ঐনা নুংঙাইবা ফোঙদোকচরি অমদি দিজিতাইজেসনগী থৌওং চত্থদুনা হায়রিবশিং অসি মালেম শিনবা থুংনা য়ৌহন্দুনা ঐখোয়গী নহারোলশিংদা হায়রিবা মেনিস্ক্রিপ্তশিং অসিগী মরমদা খঙহনবদা মতেং ওইরগনি”, হায়না মহাক্না ফোঙদোকখি‍।

একজিবিসন অদুদা অর্কাইবেল রিপোজিতরীদগী লৌখত্তুনা খনগৎলবা অশেংবা মেনুস্ক্রিপ্তশিং (বির্চ-বার্ক গিলগিৎ মেনুস্ক্রিপ্ত, ততত্বরথ সুত্র, রামায়ন, স্রিমদ ভগবদ গীতা, অমদি অতৈ কয়া), লৈঙাক্কী ওফিসিএল ফাইলশিং, লোইলম লৈঙাক্কী মখাদা থিংদুনা থম্লম্বা লিতরেচরশিং, মশক মমিং নাইরবা মীওই কয়াগী লনাই খুৎইশিং, লোয়ননা এন.এ.আই. লাইব্রেরীদা লৈরিবা অতাঙবা লাইণিকশিংগী খোমজিনবশিং উৎখি‍।

একজিবিসন অদুদা মালেমগী ওইনা খ্বায়দগী লিরবশিংগী মরক্তা – নৌপুর খুঙ্গংদা (গিলগিৎ রিজন) তাঙ্কক অহুমদ ফংখিবা, অমদি ইং ১৯৩১দা আর্কিওলোজিস্ত সর ঔরেল স্তৈন্না অহানবা ওইনা লাউথোক্লম্বা গিলগিৎ মেনিস্ক্রিপ্তশিং – য়াওরি‍। মসিদা নত্তনা, একজিবিসন অসিনা লৈবাকসিগী মফম শিনবা থুংবদা ঙাঙনরিবা লোলশিংগা মরী লৈনবা খেন্নবা মখলগী অর্কাইবেল রেকোর্দশিংগী পাক চাউরবা খোমজিন তাশিনবশিংসু য়াওরি‍।

ঐখোয়না ঐখোয়গী নীংতম্বগী চহি ৭৫ হরাও তয়াম্না পাঙথোকপগা লোয়ননা, একজিবিসন অসিগী খুত্থাঙদা নেস্নেল অর্কাইব্স ওফ ইন্দিয়ানা ঐখোয়গী লৈবাকসিগী লোলগী খেন্নবা অসিদা শ্রদ্ধাঞ্জলি কৎলি‍। ভারতকী লোলশিং অসি মখোয়বু ঙাঙলিবা মীওইশিংগীখক নত্তনা, ভারতকী লোলশিংদা মনুং হুৎনা থিজিন হুমজিনবগী থবক (খুদম ওইনা লিঙ্গুইস্তিক সর্ভে ওফ ইন্দিয়া) তৌরিবা মপান লমগী মীওইশিংগী মরক্তা ঙল্লিঙৈ মতমদগী হৌনা পুক্নিং চঙনবা হীরম অমা ওইরি‍। একজিবিসন অসি মীয়াম্না থাংজ, নোংমাইজিং অমদি লৈবাক্কী সিলহেন নুমিৎশিং য়াওনা নুমিৎ খুদিংগী অয়ুক পুং ১০ দগী নুমিদাংৱাইরম পুং ৫ ফাওবা জুলাই ০৮, ২০২৩ ফাওবদা চঙদুনা য়েংবা য়াগনি‍।

নেস্নেল অর্কাইব্স ওফ ইন্দিয়া মার্চ ১১, ১৮৯১দা কোলকতাদা (কলকতা) ইম্পিরিএল রেকোর্দ দিপার্তমেন্ত ওইনা লিংখৎখিবনি‍। কলকতাদগী দিল্লীদা কোনুং হোংলকখ্রবা মতুংদা, হৌজিক লৈরিবা নেস্নেল অর্কাইব্স ওফ ইন্দিয়াগী বিল্দিং অসি ১৯২৬তা সর ইদ্বিন লুতয়েন্সনা দিজাইন তৌদুনা শাখিবনি‍। কলকত্তাদগী নই দিল্লীদা রেকোর্দ পুম্নমক ত্রান্সফর তৌরকপগী থবক ১৯৩৭দা মপুং ফাখি‍। নেস্নেল অর্কাইব্স ওফ ইন্দিয়া অসি পব্লিক রেকোর্দ্স এক্ত, ১৯৯৩ অমদি পব্লিক রেকোর্দ্স রুল্স, ১৯৯৭ থবক ওইনা পায়খৎনবগী নোদেল এজেন্সীসু ওইরি‍।

নেস্নেল অর্কাইব্স ওফ ইন্দিয়াগী রিপোজিতরীদা হৌজিক ফাইল, ভোল্যুম, মেপ, ভারতকী রাস্ত্রপতীনা অয়াবা পীখ্রবা বিল, য়ানচে, অতাঙবা মেনুস্ক্রিপ্ত, ওরিএন্তেল রেকোর্দ, লনাই চে, কার্তোগ্রাফিক রেকোর্দ, গেজেৎ অমদি গেজেতীয়রশিংগী মরুওইবা খোমজিন তাশিনবা, সেন্সস রেকোর্দ, এসেমব্লী অমদি পার্লিয়ামেন্ত দিবেৎ, অথিংবা লিতরেচর, কোয়না চৎপগী ৱারীনচিংবা য়াওনা পাক চাউনা খোমজিন তাশিল্লবা রেকোর্দশিং লৈ‍। ওরিএন্তেল রেকোর্দকী অয়াম্বা শরুক্তি সংস্কৃৎ, পর্সিয়ান, অরাবিকনচিংবা লোলশিংদা লৈ‍।

******