মহাক্কী নুমিৎ মরিনিগী মনিপুর খোঙচৎকী অরোইবা নুমিত্তা, য়ুনিয়ন হোম মিনিস্তর অমসুং কোওপরেসন মিনিস্তর শ্রী অমিত সাহনা ঙসি ইম্ফালদা পাউগী মীফম অমদা ৱা ঙাংখ্রে। শান্তি থম্নবা, ৱারি শান্নবা অমসুং নুংশি চান্ননা লৈমিন্ননবা শ্রী অমিত সাহনা মীয়ামদা অপীল তৌখি। মীয়াম তোকঙা থাজদনবা অমসুং শান্তি থম্নবা মহাক্না মনিপুরগী মীয়ামদা অপীল তৌখি। মোদী সরকারগী মহুৎ শীন্দুনা, মনিপুরগী ইরাংদা লৈখিদ্রবশিংগী ইমুং-মনুংগী অৱাবদা শ্রী অমিত সাহনা অৱাবা ফোঙদোকখ্রে।

য়ুনিয়ন হোম মিনিস্তর অমসুং কোওপরেসন মিনিস্তর শ্রী অমিত সাহনা হায়খি মনিপুরগী ইরাং থিজিন্নবা থবক্তগী পোথারবা হায় কোর্তকী চীফ জর্জতিস অমগী লমজিং মখাদা জুদিসিএল কম্মিসন অমা লিংখৎলগনি। মনিপুরগী রাজ্যপালনা চিয়ারমেন ওইদুনা পিছ কম্মিতি অমা শেম্লগনি, মসিদা কাংলুপ খুদিংমক্কী মীহুৎশিং শরুক য়াগনি।

শ্রী অমিত সাহনা হায়খি ইরাংদা লৈখিদ্রবশিংগা নক্নবা ইমুং-মনুংগী মীওইদা মখোয়গী বেঙ্ক একাউন্তশিংদা দি.বি.তিগী খুৎথাংদা লুপা লাখ ১০গী শেনফম অমা পীরগনি। সেকুরিতি এদভাইজর শ্রী কুলদিপ সিংহনা চিয়ারমেন ওইদুনা মনিপুরদা সেকুরিতিগী থবক তৌরিবা এজেন্সিশিংগী মরক্তা মীচং-মীখাই নাইদনা মতেং পাংন্নবা অমসুং ফজনা থবক তৌনবা ইন্তর-এজেন্সি য়ুনিফাইদ কমান্দ অমা লিংখৎকনি। ক্রিমিনেল কন্সপিরেসি কেস ৫ য়াওনা কেস ৬ রেজিস্তার তৌরে অমসুং জেনেরেল কেস ১ সি.বি.আইগী স্পিসিএল তিম্না থিজিনগনি।  মীচং-মীখাই নাইদনা ইরাং অসিগী কমদৌনা হৌরকখিবনো হায়বগী মরম থিদোক্কগন অমসুং অসিগুম্বা থৌদোকশিংদা চেন্নবশিং চৈরাক পীগনি।

য়ুনিয়ন হোম মিনিস্তরনা হায়খি মনিপুরদা তঙাইদবা পোৎলমশিং লেপ্তনা ফংহন্নবা, হান্নগী কোতাগী মথক্তা অহেনবা চেঙ মেত্রিক তন ৩০,০০০ ভারত সরকারনা থাখ্রে, গ্যাস সিলিন্দরশিং, পেত্রোল অমসুং মনা-মশিং ফংহন্নবা থৌরাং তৌরে। খোঙশাং রেলৱে স্তেসন্দা মতম খরগী প্লেতফোর্ম অমা শেমগৎতুনা লৈবাক্কী অতৈ মফমশিংদগী মনিপুরদা তঙাইফদবা পোৎলমশিং ফংহনগনি। এয়রপোর্ত ফাওবা লাকপগী খুদোংচাবা পীনবা মীওই অমদা লুপা ২০০০ লৌরগা চুরাচান্দপুর, মোরে অমসুং কাংপোকপীদগী মতম খরগী ওইনা হেলিকোপ্তর সর্বিস লৈরে। মসিগী থবক অসিগী অতৈ চাদিং ভারত সরকার অমসুং মনিপুর সরকারনা পুথোক্কনি। ভারত সরকারনা শেমখিবা মেদিকেল তিম ৮গী মনুংদা, তিম ৩ মনিপুরদা থুংখ্রে অমসুং তিম ৫ অথুবদা য়ৌরক্লগনি, হায়রিবা তিমশিং অসিনা মোরে, চুরাচান্দপুর অমসুং কাংপোকপীদা হকশেলগী খুদোংচাবশিং ফংহনগনি।

য়ুনিয়ন হোম মিনিস্তরনা হায়খি মনিপুরগী মহৈরোয়শিং মখা তানা লাইরক তম্নবা, কম্পিতিতিপ একজামশিং শরুক য়ানবা ভারত সরকারগী ইজুকেসন মিনিস্ত্রিগী ওফিসিএলশিং অমসুং মনিপুরগী ইজুকেসন দিপার্তমেন্তগী ওফিসিএলশিংনা ওনলাইন ইজুকেসন, পরিখা অমসুং দিসতেন্স ইজুকেসনগী থৌরাং অমা পায়খৎলগনি, মসি নুমিৎ ২গী মনুংদা থৌরাং তৌগনি। ভর্চুএলগী খুৎথাংদা চুরাচান্দপুর, মোরে অমসুং কাংপোকপীদগী মনিপুর হায় কোর্তকী কেসশিং শরুক য়ানবা দরকার ওইবা খুদোংচাবশিং ফংহল্লগনি। য়ুনিয়ন হোম মিনিস্ত্রিগী জোইন্ত সেক্রেতরি থাক্কী  ওফিসার অমা অমসুং তোঙান-তোঙানবা মিনিস্ত্রিশিংগী দাইরেক্তর লেবেল ওফিসার মঙা মনিপুরদা লৈরগনি।

য়ুনিয়ন হোম মিনিস্তরনা হায়খি ম্যান্মারগা তাইনবা ঙমখৈদা কিলোমিতর ১০গী শম্বল খানবা চাংয়েং পাংথোকপা লোইরে অমসুং কিলোমিতর ৮০ শম্বল খানবা তেন্দর কৌবগী থবক লোইশিল্লে অমসুং হৌজিক ঙমখৈগী শরুক্তা লেমহৌরিবা শরুকশিং শম্বল খানবা সর্ভে পাংথোক্লি। য়ুমলোন্নরিবা লৈবাকশিংদগী চঙলকপা মীওইশিং বাইওমেত্রিক অমসুং মীৎকী ইমপ্রেসনশিং লৌরগনি, কনাগুম্বা মীওই অমতনা লমদম অসিদা ইরাং থোকহনবা য়ারোই।

য়ুনিয়ন হোম মিনিস্তরনা হায়খি সস্পেন্সন ওফ ওপরেসনগী এগ্রিমেন্ত ঙাক্তবা হকচিন্না লৌগনি অমসুং য়ানখিবা নিয়মশিং থুগাইবা কাংলুপশিং এগ্রিমেন্তগী তার্মশিংগী মতুংইন্না অকনবা থবক লৌখৎকনি। মরী লৈনবা খুদিংমক্না এগ্রিমেন্তগী তার্মশিং চেকশিন্না ইনগদবনি। খুৎলায় পায়রিবশিং পুলিসতা মখোয়গী খুৎলায়শিং পীশিনগদবনি, পুলিসকী কোম্বিং ওপরেসন্দা খুৎলায় পায়রম্বা থেংনরবদি অকনবা থবক লৌখৎকনি। 

সিবিল সোসাইতি ওর্গনাইজেসনশিংনা শান্তি পুরক্নবা শ্রী অমিত সাহনা অপীল তৌখি অমসুং মহাক্না হায়খী শান্তি পুরক্নবা অমসুং ৱারি শান্ননবা ফিবম অমা শেমগৎনবা মীওই খুদিংমক্না থবক তৌগদবনি। কাংলুপ অনিগী মরক্তা খুৎ থোক্নবা অসি মনিপুরদা এপ্রিল ২৯দগী হৌখিবনি। প্রধান মন্ত্রী শ্রী নরেন্দ্র মোদী অমসুং চীফ মিনিস্তর শ্রী এন.বিরেন সিংহগী দবল ইঞ্জিন সরকার অমা মনিপুরদা লাকপদগী হৌখিবা চহি ৬ অসিদা মনিপুর বন্দ, ব্লোক্কেদ, কার্ফিয়ু অমসুং ইরাং লৈতবা লমদম অমা ওইরকখি। রাজ্য অসি মমাঙদা অমুক্তা ওইখিদ্রিবা মওংদা চাউখৎপা পুরকখি। রাজ্য অসিগী ইনফ্রাস্ত্রকচর মপাঙ্গল কনখৎহল্লে, শেন থাদবা হেনগৎলে, মনিপুর লাইরিক-লাইশু অমসুং শান্নবগী মফম অমা ওইরে।

শ্রী অমিত সাহনা হায়খি মহাক্কী মনিপুর খোঙচৎ মনুংদা, মহাক্না কাংলুপ খুদিংমক্কী মীওইশিংগা উনরে, রিলিফ কেম্পশিংদা চৎলুরে অমসুং ইম্ফাল, মোরে, চুরাচান্দপুর অমসুং কাংপোকপীদা মীহুৎশিং অমসুং অৱাবা তারবা মীওইশিংগা উনরে। মহাক্না রাজ্যগী মন্ত্রীমন্দলগী মিনিস্তরশিং অমসুং নুপী লুপশিংগশু উনরে। মহাক্না মৈতৈ কাংলুপগী সি.এস.ও ২২ রোমগা উনখি অমসুং কুকিগী সি.এস.ও ২৫ গা উনখি। শান্তি হঞ্জিল্লক্নবা মহাক্না অখঙ-অহৈশিং, প্রোফেসারশিং, থবক্তগী পোথারবা ওফিসারশিং অমসুং কাংলুপ খুদিংমক্কী মীওইশিং হৌখিবা নুমিৎ ২দা উনখি। মহাক্না রাজনিতি দল ১১গা ৱারি শানখি। মসিগী মথক্তা শান্নরোয়শিং অমসুং দল খুদিংমক্কী মীখলদগী কারকপা মীহুৎশিংগা ৱারি শানখি।

****