কেন্দ্রগী গৃহ মন্ত্রী অমদি কোওপরেসন মন্ত্রী, শ্রী অমিত সাহনা অসামসা নেস্নেল ফোরেন্সিক সাইন্স য়ুনিভর্সিতী (এন.এপ.এস.য়ু.)কী গুৱাহাতী কেম্পসকী উরেপ উয়ুং তমখ্রে‍। মসিগা লোয়ননা, শ্রী অমিত সাহনা অসাম পুলিসনা পীরিপা সর্ভিসশিংবু মীয়ামদা হেন্না ফংহন্নবা অমদি অরোন অথুপ লৈহন্দনবা ‘অসাম পুলিস সেবা সেতু’ ৱেব পোর্তেলসু হাংদোকখি‍। জুদিসিয়রীদা ফোরেন্সিক সাইন্স শীজিন্নবগী মতাঙদা দোক্তর জে.এম. ব্যাসনা ইবা লাইরিক অমসু থৌরমদুদা ফোঙখি‍। অসামগী মুখ্য মন্ত্রী শ্রী হিমন্ত বিস্বা সর্ম য়াওনা মীথুং কয়াসু থৌরমদুদা শরুক য়াখি‍।

মহাক্কী ৱারোলদা, শ্রী অমিত সাহনা মালেমগী ১১শুবা অমদি লৈবাকসিগীনা ১০শুবা নেস্নেল ফোরেন্সিক সাইন্স য়ুনিভর্সিতী কেম্পস গুৱাহাতীদা লিংখৎপগা লোয়ননা ঙইই অসি অসামগী অমদি অৱাং-নোংপোক পুম্বগী ওইনা ক্রিমিনেল জস্তিস সিস্তেমগী য়াম্না মরুওইবা নুমিৎ অমনি হায়খি‍। স্তেত লৈঙাক্না ফোরেন্সিক সাইন্স য়ুনিভর্সিতী লিংখৎনবগীদমক একর ৫০গী লম অমা পীরি অমদি প্রধান মন্ত্রী শ্রী নরেন্দ্রা মোদীনা লুচিংবা লৈঙাক অসিনা এন.এফ.এস.য়ু. অসিদা মহৈরোয় ৩৫০০গী গ্রেজুএসন অমদি পোস্ত গ্রেজুএসনগীদমক লুপা করোর ৫০০ পীগনি হায়না মহাক্না হায়খি‍। ঙসি নেস্নেল ফোরেন্সিক সাইন্স য়ুনিভর্সিতী (এন.এফ.এস.য়ু.)গী উরেপ উয়ুং তম্বা অমদি মসিগী তেম্পররী কেম্পস মথৌ তৌবা হৌখিবগা লোয়ননা, অৱাং নোংপোক পুম্নমক্কী মহৈরোয়শিংনা ফোরেন্সিক সাইন্সকী লমদা মহৈ তম্নবগীদমক দিল্লী, গুজরাত, মুম্বাইনচিংবা মেত্রোপোলিতন ময়োল্লমশিংদা চৎনররোই হায়না মহাক্না হায়খি‍। মালেমগী অমত্তা ঙায়রবা স্পিসিএলাইজ ফোরেন্সিক সাইন্স য়ুনিভর্সিতী ভারত্তা লৈ হায়না শ্রী সাহনা হায়খি‍।

শ্রী অমিত সাহনা, প্রধান মন্ত্রী শ্রী নরেন্দ্র মোদীগী লুচিং মখাদা, ভারত লৈঙাক্না আই.পি.সি., সি.আর.পি.সি. অমদি ইভিদেন্স এক্ততা চাউনা অহোংবা পুরক্লগনি হায়খি‍। মসিগী মচং ওইবা পান্দমদি ব্রিতিস মতমদা শেমখিবা লো অহুম অসিবু ঐখোয়গী সংবিধানগী ৱাখল্লোন পরিংদা হোংদোকপা অমদি লৈবাকসিগী মিয়াৎ তাবগী চাং হেনগৎহনবনি‍। লৈঙাক অসিনা মিয়াৎ তাবগী চাং হেনগৎহন্নবগীদমক চহি ৬ হেনবগী ফাদোক লৈগদবা কেস খুদিংদা ফোরেন্সিক এক্সপর্ত চৎপা মথৌ তাহনগনি, অমদি মসিনা লৈবাক পুম্বদা ফোরেন্সিক সাইন্স মহৈরোয়শিংগী থবক পীবগী খুদোংচাবা কয়া শেমগৎকনি‍। মালেম শিনবা থুংনা ফোরেন্সিক এক্সপর্তকী অচৌবা দিমান্দ লৈ হায়না মহাক্না মখা তাখি‍। গুজরাত্তগী হৌখিবা নেস্নেল ফোরেন্সিক সাইন্স য়ুনিভর্সিতী অসি ফোরেন্সিক সাইন্সকী লমদা তোঙানবা কোর্সশিং শেম শানবগী অমদি ফোরেন্সিক সাইন্সকী মাইওন পুম্নমকপু কোর্সতা ওন্থোক্নবগী মালেমসিগী অমত্তা ঙায়রবা মদুবু এন.এফ.এস.য়ু.নি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা, এন.এফ.এস.য়ু.-গুৱাহাতীনা অৱাং নোংপোক স্তেতশিং লোয়ননা নোংপোক থংবা ঙমখি পরিংদা লৈরিবা বঙ্গলাদেশ, ভুতান, নেপাল, ম্যান্মার, ইন্দোনেসিয়ানচিংবা লৈবাক কয়াদা কান্নবা পীগনি হায়খি‍। নেস্নেল ফোরেন্সিক সাইন্স য়ুনিভর্সিতীনা লৈবাক কয়াগা মেমোরেন্দম ওফ অন্দরস্তেন্দিং খুৎয়েক পীনদুনা নেস্নেল ফোরেন্সিক সাইন্স য়ুনিভর্সিতী অসিনা পুলিস অমদি জুদিসিএল থৌওংদা শীজিন্ননবখক নত্তনা প্রাইভেৎ ইন্দস্ত্রীশিংদসু শীজিন্ননবগীদমক ওফিসিএলশিংদা ওনলাইন অমদি ওফলাইন ত্রেনিংশিং পীরি হায়খি‍। নেস্নেল ফোরেন্সিক সাইন্স য়ুনিভর্সিতীনা লৈবাক ৭০ হেনবগী পুলিস ওফিসরশিং অমদি ফোরেন্সিক সাইন্তিস্তশিংদা ত্রেনিং পীখ্রে অমদি মালেমগী লৈবাক্কী থাক্কী অমদি মালেমগী থাক্কী লূপ কয়াগা য়ানচে ১৭০ হেন্না খুৎয়েক পীনখ্রে‍। শ্রী সাহনা, এন.এফ.এস.য়ু.গী গুৱাহাতী কেম্পস অসি তশেং তশেংনা মতিক চপ চারবা য়ুনিভর্সিতী অমনি হায়খি‍। মসিদা সাইবর সিক্যুরিতী, দিজিতেল ফোরেন্সিক, আর্তিফিসিএল ইন্তলিজেন্স, দি.এন.এ. ফোরেন্সিক, ফুদ ফোরেন্সিক, এনভাইরনমেন্তেল ফোরেন্সিক অমদি এগ্রিকলচরেল ফোরেন্সিক্কী কোর্সশিংগা লোয়ননা দবল গ্রেজুএসনগী থৌরাংসু লৈংনগনি‍। চৎলিবা একাদমিক সেসন অসিদগী হৌরগা ফেকল্তী মঙানা একাদমিক কোর্স ৫ হৌরগনি অমদি মতুং তারকপদা তোঙান তোঙানবা কোর্স ৪০দা পাকথোক চাউথোরক্কনি অমদি য়ুনিৎ অসি মপুং ফাবা য়ুনিৎ অমা ওন্থোক্কনি হায়না মহাক্না হায়খি‍।

শ্রী অমিত সাহনা, মপুং ফাবা পুলিসিংগী থৌওং অসি – লো অমসুং ওর্দর ঙাকপা, ক্রাই থিজিনবা অমদি মরাল লৈবা মীওইশিংবু ৱায়েল পথাপকী মতুং ইন্না চৈরাক ফংহনবা – হায়না শরুক অহুম থোক্না খায়দোকই হায়খি‍। হৌজিক, হায়রিবা থৌওং অহুম্মক্তা ফোরেন্সিক সাইন্স য়াম্না মরুওইরে হায়না মহাক্না মখা হায়খি‍। সাইকোলোজিকেল প্রোফাইল, ফিঙ্গরপ্রিন্তনচিংবা ফোরেন্সিক সাইন্সকী তোঙান তোঙানবা সাইন্তিফিক দিসিপ্লিনশিং শীজিন্নদুনা পুলিসনা ক্রাইমশিং থর্দ দিগ্রী মেথদশিং শীজিন্নদনা থিজিন হুমজিনবা ঙমহল্লগনি‍। ৱিৎনেস চেনখিবা মতাঙদা ফাওবা, কোর্তনা ফোরেন্সিক এক্সপরর্তকী মতেঙগা লোয়ননা পুলিসনা শেমখিবা চার্জসীত্তা য়ুম্ফম ওইরগা মরাল লৈবা মীওইশিংবু ফাদোক পীবা ঙমগনি‍। ভারত লৈঙাক্না লৈবাকসিগী দিস্ত্রিক্ত খুদিংদা ফোরেন্সিক মোবাইল ইনভেস্তিগেসন ফেসিলিতী অমমা লিংখৎপা পাম্মি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা অসামদা মিয়াৎ তাবগী চাং ৫% দগী ১৪% দা হেনগৎলে হায়খি‍। মিয়াৎ তাবগী রেসিওসু ৫% দগী ৪৫ – ৪০%দা হেনগৎলে‍। অদুম ওইনমক, স্তেত অসিনা মিয়াৎ তাবগী চাং চাদা ৮৫দা হেনগৎহন্নবা পান্দম থমগদবনি, অমদি মসি ফোরেন্সিক সাইন্সকী মতেং য়াওদনা ঙম্লোই‍। অসামগী মুখ্য মন্ত্রী, শ্রী হিমন্ত বিস্বা সর্মগী ইচঙ থৌবা শক্লোন্না মরম ওইরগা নেস্নেল ফোরেন্সিক সাইন্স য়ুনিভর্সিতীগী ১১শুবা কেম্পস অসি ঙসি অসামদা শঙ্গারি, মসিগীদমক মহাক্কী মফমদা থাগৎচরি হায়না মখা তাখি‍।

শ্রী অমিত সাহনা, লৈবাকসিগী মিয়াৎ তাবগী চাং ৫০%নি, অদুগা কেনাদাগীনা ৬২%, ইজ্রেলগীনা ৯৩%, অদুগা ইংলেন্দ অমদি য়ু.এস.এ.গীনা ৯০%নি হায়খি‍। ফোরেন্সিক সাইন্স য়ুনিভর্সিতীগী মতেঙগা লোয়ননা, লৈবাক অসিনা মিয়াৎ তাবগী চাং হেনগৎহন্নবা মায়কৈদা চঙশিনবা তাই‍। এন.এফ.এস.য়ু.গী মতেঙগা লোয়ননা হৈনবী ওইরবা ক্রিমিনেলশিংবু চৈরাক পীবনাল লৈবাকসিদা ক্রাইমগী ত্রেন্দ লাকশিন্নবা খুন্নাইসিগী অকনবা খুদম ওইনা থম্বা য়াই‍। ক্রিমিনেল জস্তিসকী মতাঙদা লৈরিবা ঐখোয়গা পান্দম তশেং তশেংই মদুদি ঐখোয়না মিয়াৎ তাহনবগী চাং চাওখৎপা লৈবাকশিংদগী হেনগৎহনবা তাই, অমদি মসিগীদমক, ভারত লৈঙাক্না প্রধান মন্ত্রী শ্রী নরেন্দ্র মোদীগী লুচিং মখাদা লৈবাক শিনবা থুংনা নেস্নেল ফোরেন্সিক সাইন্স য়ুনিভর্সিতীগী নেতৱর্ক অমা শেমগৎনবা থবক পায়খৎলি হায়না মহাক্না হায়খি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা অসামদা মিয়াৎ তাহনবগী চাং হেনগৎহন্নবা মায়কৈ মরি লোঙবা লাল্লোং অমা লেপথোক্লে হায়খি‍। মসিদা ফোরেন্সিক্কী ইনফ্রাস্ত্রকচর মপাঙ্গল কনখৎহনবা, স্তেত লেবেল ফোরেন্সিক লেব অপগ্রেদ অমদি মোদর্নাইজ তৌবা, রীজনেল ফোরেন্সিক লেবশিং লিংখত্তুনা দিস্ত্রিক্তকী থাক্তা ক্রাইম থোকফমদগী ইভিদেন্স খোমগৎনা মোবাইল ফোরেন্সি লেবোরেতরীশিং মথৌ তৌহনবা, অমদি ফোরেন্সিক এক্সপর্তশিং শেমগৎপা য়াওরি‍। ফোরেন্সিক্কী ইনফ্রাস্ত্রকচর মপাঙ্গল কনখৎহনবা অসি স্তেত অমদি কেন্দ্র লৈঙাক্কী থবক ওইরগা, ফোরেন্সিক এক্সপর্তকী মেনপৱার ত্রেনিং পীবা অমদি ফংহনবা, রীছর্চ অমদি দিভেলপমেন্ত ফগৎহনবা অমদি মালেমগী খ্বায়দগী নৌবা তেক্নোলোজী লৈবাকসিদা পুরকপনা নেস্নেল ফোরেন্সিক সাইন্স য়ুনিভর্সিতীগী থবক ওইগনি‍। শ্রী সাহনা, এন.এফ.এস.য়ু.না মালেম পুম্বদা ফোরেন্সিক সাইন্সকী লমদা হোংলক্লিবশিং লেপ্পা নাইদনা নৈনরি অমদি লৈবাকসিগী ফোরেন্সিক সাইন্সপু মালেমগী থাক্তা লৈহন্নবা থবক পায়খত্তুনা আর. এন্দ দি.গী শিন লাংবগা লোয়ননা অঙাংশিংবু হীরম অসিদা চঙশিন্নবা পুক্নিং থৌগৎলি‍ হায়খি‍। এন.এফ.এস.য়ু.না এসিয়াগী অমত্তা ঙায়রবা বলিস্তিক রীছর্চ সেন্তর ত্রেনিং রেঞ্জ, সেন্তর ওফ এক্সেলেন্স ইন দি.এন.ও. ফোরেন্সিক সাইন্স অমদি ইন্তরনেস্নেল হ্যুমেনিতরিয়ন ফোরেন্সিক সেন্তর লিংখৎলে‍। দ্রোন ফোরেন্সিক সেন্তর অমদি সেন্তর ওফ এক্সেলেন্স ইন ফীজিওলোজিকেল ফোরেন্সিকসু এন.এফ.এস.য়ু.না লিংখৎলে হায়না মহাক্না হায়খি‍।

শ্রী অমিত সাহনা অসামগী মুখ্য মন্ত্রী শ্রী হিমন্ত বিস্বা সর্মবু স্তেত অসিদা পুলিস অমুক হিংগৎহনবগীদমক থাগৎখি‍। শ্রী মোদীগী লুচিং মখাদা অসামদা ইং-তপ্পা অমদি নুংশি-চান্ননা হিংমিন্নবগী অনৌবা চক অমা হৌরে হায়না মহাক্না হায়খি‍। ভারত লৈঙাক্না অৱাং নোংপোক পুম্বদা ইনফ্রাস্ত্রকচর শেমগৎলে অমদি মসিবু মেনলেন্দ ভারতকা শম্নহল্লে‍। মসিগা লোয়ননা, লালহৌ লূপশিংগা ইং-তপ্পগী ৱারী শানদুনা মীপুম খুদিংমকপু মেনস্ত্রীমদা পুরক্নবা থবকসু পায়খৎলি‍। মসিনা মরম ওইরগা – কার্বি, বোরো অমদি দিমাসা হায়রিবা অচৌবা লালহৌ লূপ অহুমসিগী নহা ৮০০০লোম চঙজরক্তুনা মেনস্ত্রীমদা লাকখ্রে‍। মনিপুরদা হন্দক্তা থোক্লিবা ইরাংসিগী মতাঙদা, শ্রী সাহনা মনিপুরগী মীয়ামদা ইং-তপ্পা ঙাক্না লৈনবা অমদি লো অমসুং ওর্দরদা থাজবা থম্নবা ৱাফম থমখি‍। ইরাং শন্দোক্লিবশিংগী মথক্তা অকনবা থবক লৌখত্তুনা অচুম্বা ৱায়েল ফংহনবা হায়বসিনা প্রধান মন্ত্রী শ্রী নরেন্দ্র মোদীনা লুচিংবা লৈঙাক অসিগী খুজিল থৌরাংনি হায়না মহাক্না হায়খি‍। হৌখিবা তহি ৬ সিদা মনিপুর ইং-তপ্না লৈরক্লি অমদি ব্লোকেদ অমত্তা লৈতনা লাক্লি‍। ঐখোয়না লৈরিবা ফীভম অসিবু ৱারী শানদুনা ইংনা তপ্না ৱারোইশিন পুরক্কনি হায়না শ্রী সাহনা হায়খি‍।‍।

কেন্দ্রগী গৃহ মন্ত্রী অমদি কোওপরেসন মন্ত্রীনা অথোইবা নীংতম লান্মী শ্রী রাস বিহারীগী মফমদা মহাক্কী মপোক কুমওন্না লাকপদা লৈবাকসিগী নীংতম ঈহৌদা মহাক্না লৌরম্বা মমল য়াম্লবা থৌদাংগীদমক শ্রদ্ধাঞ্জলি কৎখি‍। নীংতম লান্মী শ্রী রাস বিহারী বোসনা নীংতম ঈহৌদা ইহুল হাপখি অমদি মতমদুগী নহাশিংগী পুক্নিং থৌগৎনফম ওইখি হায়না মহাক্না হায়খি‍। এন.এফ.এস.য়ু.দা ১০০% প্লেসমেন্ত রেসিও লৈ অমদি ইনস্তিত্যুৎ অসিদগী গ্রেজুএত তৌরকপা হায়বসি খুদক্তা থবক ফংবনি হায়না মহাক্না হায়খি‍। সাইন্সকী লমদা লৈরিবা কোর্স পুম্নমকসিগী মরক্তা, খ্বায়দগী মশিং য়াম্বা থবক ফংবগী খুদোংচাবদি ফোরেন্সিক সাইন্সকী লমদনি হায়খি‍। শ্রী সাহনা মহৈরোয়শিংগী মফমদা অসামদা লিংখৎকদৌরিবা নেস্নেল ফোরেন্সিক সাইন্স য়ুনিভর্সিতী অসিদা মখা তাবা মহৈ মশিংগীদমক লাক্নবা অমদি মখোয়গী তুংগী লম্বী শেম্ননবা অমদি লৈবাকসিগী লো অমসুং ওর্দরগী ফীভম মপাঙ্গল কনখৎহনবদা থৌদাং য়াননবা ৱাফমসু থমখি‍।

****