প্রধান মন্ত্রী অলবানিস

লৈবাক অনিমক্কী মীহুৎশিং,

মেদিয়াগী মরুপ-মপাংশিং

খুরুমজরি!
ঐগী অস্ত্রেলিয়া খোঙচৎ মনুংদা ঐ অমসুং ঐগা লোয়ন্নরকপা মীহুৎশিং তরাম্না ওকপা অমসুং ইকায়খুম্নবা উৎপগীদমক ঐনা অস্ত্রেলিয়াগী মীয়াম অমসুং প্রধান মন্ত্রী অলবানিস থাগৎপা ফোঙদোকচরি। ঐগী মরুপ অলবানিসগী ভারত খোঙচৎকী থা অনিগী মনুংদা ঐ অস্ত্রেলিয়াদা লাকপনি। মসি হৌখিবা চহি অমগী মনুংদা ৬শুবা উনবনি।

খোঙচৎ অসিদা ঐখোয়গী অচেৎপা মরীশিং,  ঐখোয়গী মরীশিং মপুংফারকপা অমসুং ঐখোয়গী ৱাখল্লোনশিং অমতা ওইরকপা অদুগী মমি তারে। মসি করিগুম্বা ঐনা ক্রিকেতকী লোলদা হায়রবদি, ঐখোয়গী মরী অসি তি-২০গী মওংদা লাক্লে।

শক্নাইরবশিং,

ঙরাং অদোমনা হায়খি, ঐখোয়গী গনতন্ত্রগী গুনশিং অসি ঐখোয়গী মরীশিংগী য়ুম্ফম্নি। অমগা অমগা থাজনবা অমসুং ইকায়খুম্নবদা ঐখোয়গী মরী অসি য়ুম্ফম ওইবনি। অস্ত্রেলিয়াদা লৈরিবা ভারতমচাশিং অসি ঐখোয়গী লৈবাকশিংগী মরক্তা অহিংবা থোংনি। হৌখিবা নুমিদাংৱাইরমদা পাংথোকপা ভারতমচাশিংগী থৌরমদা, প্রধান মন্ত্রী অলবানিস অমসুং ঐনা হেরিস পার্ককী ‘লিত্তল ইন্দিয়া’ হাংদোকখ্রে।  প্রধান মন্ত্রী অলবানিস মীয়াম্না য়ানবা অদু থৌরম অদুদা ঐ খঙলে।

মরুপশিং,

ঙসি ঐনা প্রধান মন্ত্রী অলবানিসকা উনবদা, মথং চহি ১০দা ইন্দিয়া-অস্ত্রেলিয়াগী অচেৎপা মরুপ-মপাং ওইবা মরী হেন্না ফগৎহন্নবা ঐখোয়না ৱারি শানখ্রে। অনৌবা হিরমশিংদা মতেং পাংনবগী ওইথোকপা য়াবশিংগী মতাংদা ঐখোয় ৱা খন্নখি। হৌখিবা চহিদগী ইন্দিয়া-অস্ত্রেলিয়া ই.সি.তি.এ চৎনবা হৌখ্রে। ঙসি ঐখোয়না কমপ্রেহেন্সিপ ইকোনোমিক কোওপরেসন এগ্রিমেন্তগী ৱারেপ লৌরে। মসিনা ঐখোয়গী ললোন-ইতিক অমসুং শেন-থুমগী মতেং পীনবা মখা তানা হেনগৎহনগনি অমসুং অনৌবা মশক অমা উবা ফংগনি।

মাইনিং অমসুং ক্রিতিকেল মিনরেলশিংগী লমদা মতেং পীনবা হেনগৎহনবা ঐখোয়না ৱা খন্নখ্রে। রিনিউএবল ইনর্জিগী মতেং পীন্নবা চপ চাবা হিরমশিং ঐখোয়না লেপথোক্নরে। গ্রিন হায়দ্রোজেনগী তাক্স ফোর্স অমা লিংখৎনবা মীফম অসিদা ৱারেপ লৌরে। তোঙান-তোঙানবা হিরমশিংদা শেন থাদনবা ঙরাং ঐনা অস্ত্রেলিয়াগী সি.ই.ওশিংগা কান্নবা ৱাফমশিং খন্নখ্রে। ঙসি ঐনা ললোন-ইতিক, ইনভেস্তমেন্ত অমসুং তেক্নোলোজিগী লমদা মতেং পাংন্নবা বিজিনেসন রাউন্দতেবলদা ৱা ঙাংগনি।
 

ঙসি, মাইক্রেসন অমসুং মোবিলিতি পার্তনরসিপ এগ্রিমেন্ত খুৎয়েক পীনরে। মসিনা ঐখোয়গী অথিংবা থোং মখা তানা মপাঙ্গল কনখৎহনগনি। মশা-মরেং ফন্দোরক্লিবা ঐখোয়গী মরী হেন্না ফগৎহন্নবা, ঙরাং ঐনা লাউথোকখিবা অদুগুম্না, ঐখোয়না ব্রিসবেন্দা অথুবা মতমদা অনৌবা ইন্দিয়ান কন্সুলেত অমা হাংদোক্লগনি অমসুং মসি অস্ত্রেলিয়ানা বেঙ্গালুরুদা অনৌবা কন্সুলেত অমা হাংদোক্নবা লাউথোকখিবা মতুংদনি।

মরুপশিং,

অস্ত্রেলিয়াদা লাইশঙশিংদা অমাং-অতা থোকহনখিবা অমসুং মমাঙদা তোখায় তানিংবশিংগী থবকশিংগী মতাংদা প্রধান মন্ত্রী অলবানিস অমসুং ঐ ৱা তানখ্রে। ঙসি ঐখোয়না হিরম অসিগী মতাংদা ৱা খন্নখি। মখোয়গী থবকশিং নত্ত্রগা ৱাখল্লোলশিংনা ভারত অমসুং অস্ত্রেলিয়াগী মরক্তা লৈরিবা মরুপ-মপাং ওইবা মরীশিং  অকায়বা থোকহনবা ঐখোয়না য়াবা ঙম্লোই। হিরম অসিদা থবক কয়া পায়খৎপগীদমক ঐনা প্রবান মন্ত্রী অলবানিস থাগৎপা ফোঙদোকচরি। মসিগা লোয়ন্না, অসিগুম্বা মীওইশিংগী মথক্তা মখা তানা অকনবা থবক লৌখৎকনি হায়না মহাক্না ঐঙোন্দা থাজবা পীরে।
মরুপশিং,

 ইন্দিয়া-অস্ত্রেলিয়া মরীশিংগী পাক-চাউবা অসি শুপ্নগী লৈবাক অনি খক্তগী নত্তে। মসি লমদম অসি তংদু-লৈতাবা , শান্তি অমসুং মালেমগী নুংঙাই-য়াইফবগা মরী লৈনৈ। নুমিৎ খরগী মমাঙদা, প্রধান মন্ত্রী অলবানিসগা লোয়ন্না, হিরোসিমাদা ক্বাদ মীফমদা, ঐখোয়না ইন্দো-পেসিফিক্কী মরমদসু খন্নখি। ভারত-অস্ত্রেলিয়াগী মরী অসিনা গ্লোবেল সাউথকী চাউখৎপদা কান্নবা পীগনি। ভারতনা জি-২০গী প্রসিদেন্ত ওইরিবা অসি, ভসুধাইব কুতুম্বকম-মালেম অসি ইমুং অমনি হায়বা ভারতকী চৎনবীদা য়ুম্ফম ওইবনি। ঐখোয়না জি-২০গী পায়খৎলিবা থবকশিংদা অস্ত্রেলিয়ানা মতেং পাংবগীদমক ঐনা প্রধান মন্ত্রী অলবানিস থাগৎপা ফোঙদোকচরি।

মরুপশিং,

চহি অসিদা ভারত্তা পাংথোক্কদৌরিবা ক্রিকেত ৱার্ল্দ কপ অসিগীদমক প্রধান মন্ত্রী অলবানিস অমসুং অস্ত্রেলিয়াগী ক্রিকেত ফেনশিং ভারত্তা লাক্নবা ঐনা হায়জরি। মতম অসিদা, ক্রিকেতকা লোয়ন্না, অদোম্না দিৱালিগী অচৌবা কুহ্মৈসু উবা ফংগনি।

শক্নাইরবা,

চহি অসিগী সেপ্তেম্বরদা জি-২০ মীফমগীদমক ভারত্তা লাকপদা অদোম অমুক হন্না ঐনা তরাম্না ওকপদা ঐ হরাওগনি। অদোম অমুক হন্না থাগৎচরি!

****