غازی آباد–علی گڑھ ایکسپریس وے نے 100 گھنٹے کے بے مثال وقت میں 100 لین کلومیٹر کے فاصلے پر بٹومینس کنکریٹ بچھانے کا قابل ذکر کارنامہ انجام دے کر تاریخ رقم کی ہے۔ یہ کامیابی ہندوستان کی سڑک کے بنیادی ڈھانچے کی صنعت کی لگن اور آسانی کو نمایاں کرتی ہے۔ روڈ ٹرانسپورٹ اور شاہراہوں کے مرکزی وزیر جناب نتن گڈکری نے کیوب ہائی ویز، ایل اینڈ ٹی، اور غازی آباد علی گڑھ ایکسپریس وے پرائیویٹ لمیٹڈ (جی اے ای پی ایل) کی غیر معمولی ٹیموں کو ان کی شاندار کامیابی پر مبارکباد دی۔

جشن کی تقریب سے خطاب کرتے ہوئے جناب گڈکری نے کہا کہ این ایچ 34 کا غازی آباد–علی گڑھ حصہ، جو 118 کلومیٹر پر محیط ہے، غازی آباد اور علی گڑھ کے گنجان آبادی والے علاقوں کے درمیان نقل و حمل کے رابطے کے طور پر اہم کردار ادا کرتا ہے۔ انہوں نے کہا کہ یہ پروجیکٹ دادری، گوتم بدھ نگر، سکندرآباد، بلند شہر، اور خورجہ سمیت اتر پردیش کے مختلف قصبوں اور شہروں سے گزرتا ہے۔ انہوں نے مزید کہا کہ یہ ایک اہم تجارتی راستے کے طور پر کام کرتا ہے، جو سامان کی نقل و حرکت میں سہولت فراہم کرتا ہے اور صنعتی علاقوں، زرعی علاقوں اور تعلیمی اداروں کو جوڑ کر علاقائی اقتصادی ترقی میں مدد کرتا ہے۔

جناب گڈکری نے کہا کہ پائیداری اور مناسب لاگت کے اپنے  نصب العین پر توجہ مرکوز کرتے ہوئے، ہم نے پروجیکٹ میں کولڈ سینٹرل پلانٹ ری سائیکلنگ (سی سی پی آر) ٹیکنالوجی کے استعمال کو لاگو کیا ہے۔

وزیر موصوف نے کہا کہ اس جدید سبز ٹیکنالوجی میں 90 فیصد  مل کے  میٹریل کا استعمال شامل ہے، جو تقریباً 20 لاکھ مربع میٹر سڑک کی سطح کے برابر ہے۔ انہوں نے کہا کہ اس کے نتیجے میں، ورجن میٹریل کی کھپت محض 10 فیصد رہ گئی ہے۔ انہوں نے کہا کہ اس نقطہ نظر کو اپنانے سے، ہم نے ایندھن کی کھپت اور اس سے منسلک گرین ہاؤس گیسوں کے اخراج کو نمایاں طور پر کم کیا ہے، اس طرح ہمارے کاربن فوٹ پرنٹ کو کم کرنے میں اہم پیش رفت ہوئی ہے۔

جناب گڈکری نے کہا کہ وزیر اعظم جناب نریندر مودی کی قیادت میں ہمارا عزم ہر مسافر کے لیے غیر معمولی نقل و حرکت کو یقینی بنانے میں ہے، اس طرح تجارت کو فروغ دینا اور معیار پر سمجھوتہ کیے بغیر تیز ترین رفتار سے عالمی معیار کی شاہراہوں کی ترقی کے ذریعے خطے میں اقتصادی سرگرمیوں کو آگے بڑھانا ہے۔

*****

ش ح – ق ت – ت ع

U: 5302