مرکزی وزیر داخلہ اور امداد باہمی کے وزیر جناب امت شاہ نے آج نئی دلی میں شری دلی گجراتی سماج کے 125 سال مکمل ہونے کے موقع پر منعقدہ تقریب میں بطور مہمان خصوصی شرکت کی۔ جناب امت شاہ نے دلی کے شری شری لکشمی نارائن ٹرسٹ گجرات سینئر سیکنڈری اسکول میں سردار ولبھ بھائی پٹیل اور ڈاکٹر وکرم سارا بھائی کے مجسموں کی نقاب کشائی بھی کی۔

جناب امت شاہ نے اپنے خطاب میں کہا کہ اگر کوئی تنظیم بغیر کسی توقع کے اور بہت سے لوگوں کو اپنے ساتھ جوڑ کر اپنے قیام کے 125 سال مکمل کر لیتی ہے تو یقیناً اس معاشرے اور تنظیم کی طاقت کا پتہ چلتا ہے۔ انہوں نے کہا کہ ملک یا بیرون ملک کوئی ایسی جگہ نہیں ہوگی جہاں گجراتی نہ ہوں اور گجراتی سماج جہاں بھی گیا دودھ میں شکر کی طرح گھل گیا اور خدمت کا کام بھی  کیا۔ انہوں نے کہا کہ اس تنظیم نے دلی میں رہنے والے گجراتیوں کو ان کی ثقافت اور تہذیب سے جوڑے رکھنے کے ساتھ ساتھ انہیں ملک اور سماج کی خدمت کرنے کی ترغیب دینے کا کام کیا ہے۔اس تنظیم سے جڑے تمام لوگوں کو 125 سال مکمل ہونے پر  میں مبارکباد دیتا ہوں۔

مرکزی وزیر داخلہ اور امداد باہمی کے وزیر نے کہا کہ گجراتی سماج نے اپنے لئے قبولیت حاصل کی ہے اور گجراتی ہونے کے باوجود دلی میں رہتے ہوئے گجرات کی روح  کو برقرار رکھنے، اس کی ثقافت کو فروغ دینے اور اس کے تحفظ اور اسے آگے لے جانے کا کام کیا ہے۔ انہوں نے کہا کہ دلی میں ہر برادری کے لوگ رہتے ہیں اور گجراتی برادری بھی یہاں مل جل کر سکون سے رہ رہی ہے۔

جناب امت شاہ نے کہا کہ آج بھارت  کی شہرت پوری دنیا میں وزیر اعظم جناب نریندر مودی کی وجہ سے پھیل رہی ہے۔ انہوں نے کہا کہ گاندھی جی، سردار ولبھ بھائی پٹیل، مرار جی دیسائی اور مودی جی، ان چاروں گجراتیوں نے بھارت  کی جدید تاریخ میں اہم کردار ادا کیا ہے۔ جناب شاہ نے کہا کہ ملک کو گاندھی جی کی وجہ سے آزادی ملی، سردار صاحب کی وجہ سے ملک متحد ہوا، مرار جی دیسائی کی وجہ سے ملک کی جمہوریت بحال ہوئی اور نریندر مودی کی وجہ سے بھارت  کا نام دنیا کے سامنے آیا۔ انہوں نے کہا کہ ان چار گجراتی ہستیوں نے بڑے کام کیے ہیں اور وہ پورے ملک کا فخر ہیں۔

مرکزی وزیر داخلہ نے کہا کہ وزیر اعظم جناب نریندر مودی کے 9 سالہ دور حکومت میں ملک نے بہت سی کامیابیاں حاصل کی ہیں۔ انہوں نے کہا کہ 2014 میں جب جناب مودی وزیر اعظم بنے تو بھارت  کی معیشت دنیا میں 11ویں نمبر پر تھی اور آج 9 سال بعد بھارتی  معیشت دنیا کی 5ویں بڑی معیشت بن چکی ہے۔ جناب شاہ نے کہا کہ آج آئی ایم ایف سمیت کئی ایجنسیاں بھارت  کی معیشت کو ایک روشن مقام کے طور پر دیکھتی ہیں۔ انہوں نے کہا کہ مودی جی کی فیصلہ کن قیادت میں سرجیکل اور فضائی حملے کر کے بھارت نے دنیا کو یہ پیغام دیا کہ کوئی بھی بھارت کی سرحدوں سے چھیڑ چھاڑ نہیں کر سکتا۔ جناب شاہ نے کہا کہ 130 کروڑ لوگوں کے ساتھ بھارت  جیسے وسیع ملک میں کووڈ ویکسی نیشن مہم  بہت اچھے طریقے سے مکمل ہوئی۔

جناب امت شاہ نے کہا کہ وزیر اعظم مودی کی قیادت میں بھارت  دنیا کا سب سے بڑا موبائل پروڈیوسر بن گیا ہے، بھارت  اسٹارٹ اپس کے میدان میں تیسرے، قابل تجدید توانائی کی پیداوار کے معاملے میں چوتھے نمبر پر ہے۔

انہوں نے کہا کہ مودی جی نے جموں و کشمیر سے آرٹیکل 370 کو بغیر کسی تشدد کے ختم کرنے کا کام کیا، دہشت گردی کے خلاف زیرو ٹالرنس کی پالیسی بنائی، جس کے نتیجے میں 9 سالوں میں دہشت گردی کا ایک بھی بڑا واقعہ نہیں ہوا۔ جناب شاہ نے کہا کہ وزیر اعظم جناب نریندر مودی نے ملک کی اندرونی اور سرحدوں کی حفاظت کو مضبوط بنانے کے لیے کئی اقدامات کیے ہیں۔ انہوں نے کہا کہ مودی جی سب کے ہیں اور سب ان کے ہیں اور یہ ہم سب کے لئے فخر کی بات ہے۔

۔۔۔۔۔۔۔۔۔۔۔

ش ح۔  ش ت۔ ت ح۔

U- 5289