U Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah u la pynlong ia ki jingialang bad u Myntri Rangbah ka Manipur, ki nongmihkhmat na ki jaitbynriew Meitei bad Kuki bad kiwei kiwei kiba don bynta ha kane ka kam ban peit ia ki sienjam ba la shim ban wanrah biang ia ka shongsuk shongsain ha ka jylla.

U Amit Shah u la pynlong ia ka jingialang bad u Myntri Rangbah ka Manipur, u N Biren Singh, saw ngut ki dkhot ka kynhun myntri jong u bad u MP ka Rajya Sabha ha New Delhi ha ka Sngi U Blei. Hadien kane, u Myntri Kam Pohiing u la iakynduh ia ki nongmihkhmat na ki jaitbynriew Meitei ha ka Sngi U Blei. U Shah u la iakynduh ruh ia ki nongmihkhmat na ka jaitbynriew Kuki na Manipur bad ka kynhun jong ki dkhot ki kynhun ha ka imlang sahlang jong ka Manipur mynta ka sngi.

Ha kine ki jingialang, u Myntri Kam Pohiing u la peit ia ki sienjam ba la shim ban wanrah biang ia ka shongsuk shongsain ha Manipur kaba la mad ia ka jingia umsnam hapdeng ar tylli ki kynhun jaitbynriew. U la hukum ba kin don ki sienjam kiba eh pyrshah ia kito kiba pynkulmar bad u la kular ia ka jingiarap jong ka Sorkar Pdeng ban pynthikna ia ka shongsuk shongsain kaba iaineh.

U Amit Shah u la kular ba ka Sorkar kan shim lut ia ki sienjam ban iada ia baroh ki jaitbynriew ha ka jylla. U la phah ruh ba kan don ka jingiakren bad baroh ki kynhun bad ban pynsaphriang ia ka khubor jong ka jingiasuk bad u la ong ba yn pynksan ia ka hok. 

U Amit Shah u la phah ruh ban pynsted ia ka jingai jingiarap ban pynduna ka jingsangsot jong ki briew.

*****