ঙসি ভিদিও মেসেজগী খুৎথাংদা প্রধান মন্ত্রী শ্রী নরেন্দ্র মোদীনা করৱা পতিদার সমাজগী ১০০শুবা মপোক কুমওন থৌরমদা ৱা ঙাংখ্রে। থৌরম অদুদা ৱা ঙাংবদা প্রধান মন্ত্রীনা সনাতান সতাব্দি মহোৎসব থৌরমদা মহাক্কী য়াইফ-পাউজেল পীখি অমসুং জগৎগুরু সঙ্করচার্য়া শ্বামী সাদানন্দ সরস্বাতি জি শরুক য়াবা থৌরম অমদা অহানবা ওইনা মহাক শরুক য়াবা ফংলে হায়না মহাক্না ফোঙদোকখি।

প্রধান মন্ত্রীনা হায়খি করৱা পতিদার সমাজনা খুন্নাইগী থবক তৌরকপা চহি ১০০ শুরকপা, য়ুথ ৱিংগী চহি ৫০শুরকপা অমসুং ৱুমেন ৱিং চহি  ২৫ মপুংফারকপগা মপা চানবা অসিদা অপেনবা পোকই। মাইপাকপা অমসুং নুংঙাই-য়াইফবা হায়বসি খুন্নাইগী নহারোল অমসুং নুপীশিংনা মখোয়গী থৌদাং পাংথোক্লবা মতমদা ঙমগনি। সনাতন অসি শুপ্নগী ৱাহৈ অমা খক নত্তে, মসি মতম পুম্নমক্তা নৌদুনতা লৈ, হোংদুনতা লৈ। মসি হৌখিবা মতমদগী হেন্না ফগৎনিংবগী অপাম্বা লৈ অমসুং মরম অদুনা লোম্বা নাইদে, শিদে।

প্রধান মন্ত্রীনা হায়খি লৈবাক অমগী খোঙচৎ অদু লৈবাক অদুগী খুন্নাইগী খোঙচৎতা মমি তাই। চহি ১০০শুরবা পতিদার সমাজ অমসুং চহি চা কয়া শুরবা শ্রী অখিল ভারতিয়া কুছ করৱা সমাজগী খোঙচৎ অমসুং মসিগী পান্দম অসি ভারত অমসুং গুজরাত মশক খঙনবা পাম্বৈ অমনি। চহি চা কয়া মপান লৈবাকশিংদগী লান্দারকপশিংনা ভারতকী খুন্নাই ওৎ-নৈখি অমসুং লৈবাক অসিগী ইপা-ইপুশিংনা মখোয়গী শক্তম মুৎথৎপা য়াখিদে অমসুং মখোয়গী থাজবদা মচেৎ-মকাই তাবা য়াখিদে। চহিচা কয়া কৎথোকপগী কান্নবা হৌজিক্কী মীরোলনা ফংবা অদু ঐখোয়না উরে। কুছ করৱা পতিদার কাংলুপ অসি তিম্বর, প্লাইৱুদ, হার্দৱায়ার, মার্বল, য়ুম শানবা মচাকশিংদা য়াম্না মাঙজিল থাবা কাংলুপ অমনি।

খুন্নাই অসিগা মহাক্কী রাজনিতিগী পুন্সিগা লোয়নরকপগী মতাংদা নিংশিংলদুনা প্রধান মন্ত্রীনা হায়খি মহাক্না গুজরাতকী চীফ মিনিস্তর ওইরিঙৈদা হিরম কয়াদা করৱা পতিদার সমাজগা থবক তৌমিন্নখি। কুছ লমদম অসি লৈবাক অসিদা খ্বাইদগী শোৎথবা জিলা অমা ওইনা লৌনখি অমসুং ঈশিং ফংদবা, চারা হেনবা, শা-ষনশিং শিবা, য়ুম হোংবা অমসুং অৱা-অনাগী থৌদোকশিংনা জিলা অসি মশক তাকখি। অদু চহি কয়া অপুনবা ওইনা ঐখোয়না কুছ অমুক হন্না শেমগৎলে। কুছগী ঈশিংগী অৱাবা কোক্নবা থবক পায়খৎপদগী মফম অসি মালেমদা খ্বাইদগী চাউবা লমকোয়ফম অমা ওইরে অমসুং ঙসিদি লৈবাক অসিদা কুছ অসি য়াংনা চাউখৎলক্লিবা জিলাশিংগী মনুংদা অমা ওইরে। লমদম অসি লম্বী-থোং, অচৌবা উদোগ অমসুং লৌউ-শিংউগী পোৎথোকশিং মপান্দা থাদোকপদা মমিং চৎলে।

প্রধান মন্ত্রীনা হায়খি সোসাইতি অসিনা পায়খৎলিবা থবকশিং মহাক্না মতম মতমগী ওইনা পাউ লৌরি অমসুং কোরোনা মনুংদা সোসাইতি অসিনা শিংথানিঙাই ওইবা থবক পাংথোকখি। মথং চহি ২৫গীদমক সোসাইতি অসিনা লৌরিবা ৱারেপ অসি লৈবাক অসিনা নিংতম্বা চহি ১০০ মপুংফারকপগী হরাওবা ফোঙদোকপা মতমদা থবক ওইনা পাংথোকপা ঙমগনি। খুন্নাই নুংশিন্নবা, অকোয়বগী শক্তম অমসুং মহৌশাগী লৌউ-পথাপ পুম্নমক লৈবাক অসিগী অমৃত মহোৎসবকা শম্নরে। মাইকৈ অসিদা শ্রী অখিল ভারতিয়া কুছ করৱা সমাজনা লৈবাক্কী ৱারেপশিংগী থৌনা হাপকনি অমসুং মাইপাক্না মখোয় লমজিংগনি।

Sharing my remarks at 100th anniversary of Kadwa Patidar Samaj in Gujarat. https://t.co/C1BJhzeR4P

— Narendra Modi (@narendramodi) May 11, 2023

*****