మేటి వృద్ధి పథాన్ని సాధించిన ఆండ్రూ యూల్ & కో. లిమిటెడ్ (ఏవైసీఎల్)ను కేంద్ర భారీ పరిశ్రమల శాఖ మంత్రి డాక్టర్ మహేంద్ర నాథ్ పాండే ప్రశంసించారు. గత ఏడాది ఎగుమతులతో పోలిస్తే కంపెనీ టీ ఎగుమతులు 431% పెరిగాయి. ఈ ఘనత సాధించినందుకు కంపెనీని ఆయన ప్రశంసించారు. ఏవైసీఎల్ తేయాకు పరిశ్రమలో నాణ్యత, నూతన ఆవిష్కరణల నిబద్ధతకు ఇది నిదర్శనమని అన్నారు.  ఏవైసీఎల్ వృద్ధి పథం ఈ పరిశ్రమ యొక్క సామర్థ్యానికి నిదర్శనమని డాక్టర్ పాండే తెలిపారు. నిరంతరం అభివృద్ధి చెందుతున్న పరిశ్రమలో ఆవిష్కరణ మరియు అనుకూలత యొక్క ప్రాముఖ్యతను ప్రధానంగా తెలుపుతుందని అన్నారు. ప్రపంచ మార్కెట్‌లో భారత్‌ను ప్రధాన శక్తిగా బలోపేతం చేయాలనే ప్రధాని నరేంద్ర మోదీ దార్శనికతకు ఏవైసీఎల్ సాధించిన విజయాలు కూడా సరిపోతాయని ఆయన అన్నారు. 'స్థానికం' నుండి 'ప్రపంచ స్థాయికి' చొరవను మనం సాధించాల్సిన అవసరం ఉందని చెప్పిన ప్రధానమంత్రి లక్ష్యాన్ని సాధించడంలో ఇది సహాయపడుతుందని వివరించారు. విదేశీ ఎగుమతులను ప్రోత్సహించడానికి ప్రభుత్వం వివిధ పథకాలు మరియు ప్రోత్సాహకాలను చురుకుగా అందిస్తోందన్నారు.  ఏవైసీఎల్ విజయంతో, టీ పరిశ్రమకు దేశీయంగా మరియు అంతర్జాతీయంగా వృద్ధి చెందడానికి మరియు విస్తరించేందుకు అపారమైన అవకాశాలు ఉన్నాయన్న  సంగతి స్పష్టమైందని అన్నారు.  భారతదేశంలో టీ పరిశ్రమ ప్రాముఖ్యతను కూడా ఆయన నొక్కి చెప్పారు. విస్తారమైన తేయాకు తోటలు మరియు మారుమూల కొండ ప్రాంతాలతో, పరిశ్రమ అనేక మందికి ఉపాధి అవకాశాలను అందిస్తోందని తెలిపారు. ఏవైసీఎల్ వృద్ధి చెందుతూనే ఉంది, ఇది నిస్సందేహంగా భారతీయ ఆర్థిక వ్యవస్థకు మరింత దోహదపడుతుంది. మారుమూల ప్రాంతాల్లో నివసించే ప్రజలకు మరిన్ని ఉపాధి అవకాశాలను అందిస్తుంది అని అన్నారు. ఏవైసీఎల్ మూన్ డ్రాప్, సిల్వర్ నీడిల్ మరియు ఊలాంగ్ వంటి ప్రత్యేక టీలతో సహా అధిక-నాణ్యత గల ఆర్థోడాక్స్ మరియు సీటీసీ టీలను ఉత్పత్తి చేస్తుంది. ఈ టీలు యుకే, యుఏఈ మరియు పోలాండ్ వంటి దేశాలకు ఎగుమతి చేయబడ్డాయి, ఇది 2022-23 ఆర్థిక సంవత్సరంలో కంపెనీ యొక్క రికార్డు-బ్రేకింగ్ ఎగుమతులకు దోహదపడింది.

ఏవైసీఎల్ అనేది తేయాకు పరిశ్రమలో భారత ప్రభుత్వం యొక్క ఏకైక ప్రభుత్వ రంగ సంస్థ. ఏవైసీఎల్ 1863లో స్థాపించబడింది. 1979 నుండి సీపీఎస్ఈ, టీ, ఇంజనీరింగ్ మరియు ఎలక్ట్రికల్ వ్యాపారాలలో చురుకైన ఆసక్తులతో కూడిన పారిశ్రామిక సమ్మేళనంగా ముందుకు సాగుతోంది. కంపెనీకి అస్సాం మరియు పశ్చిమ బెంగాల్‌లో 15 టీ తోటలు ఉన్నాయి. ఏవైసీఎల్ బీఎస్ఈలో జాబితా చేయబడింది. మార్చి 31, 2023 నాటికి, ఇది టాప్ 1000 కంపెనీలలో ఒకటిగా నిలిచింది. ఏవైసీఎల్ 14,225 మంది రెగ్యులర్ ఉద్యోగులను కలిగి ఉంది, వీరిలో 48.5% మంది మహిళలు మరియు 91.14% మంది SC/ST/OBC వర్గానికి చెందినవారు. కంపెనీ సమాజంలోని అట్టడుగు వర్గాలను ఉద్ధరించే ప్రయత్నంలో ఉన్నారు. ఇవి ఎక్కువగా అస్సాం, డోర్స్, డార్జిలింగ్‌లోని తేయాకు తోటలలో ఉన్నాయి, కంపెనీ కార్యకలాపాలు ఈశాన్య ప్రాంతంలోని మారుమూల ప్రాంత ఆర్థిక వ్యవస్థకు దోహదం చేస్తున్నాయి.  ఏవైసీఎల్ టీ మార్కెట్‌లోని రిటైల్ విభాగంలోకి కూడా విస్తరించింది. కంపెనీ తన మార్కెట్ వాటాను పెంచుకోవడానికి మరియు ఈ విభాగంలో తన బ్రాండ్‌ను నిర్మించడానికి వివిధ వ్యూహాలలో పెట్టుబడి పెట్టింది. ఏవైసీఎల్ ఇప్పటికే 2023 ఆర్థిక సంవత్సరంలో క్యాంటీన్ స్టోర్స్ డిపార్ట్‌మెంట్ (సీఎస్డీ) మరియు న్యాఫెడ్ కు ప్యాకెట్ టీని సరఫరా చేయడం ప్రారంభించింది, దాని బ్రాండెడ్ టీల సరఫరా కోసం ఎన్ఏసీఓఎఫ్, కేంద్రీయ భండార్ మరియు హెచ్ఏఎఫ్ఈడీ వంటి సహకార సంఘాలతో చర్చలు జరుపుతోంది. రాజస్థాన్ మరియు పశ్చిమ బెంగాల్‌లో రిటైల్ మార్కెట్ డెవలపర్‌లను నిమగ్నం చేయాలని మరియు 2024లో కనీసం 50 కియోస్క్‌లను ఏర్పాటు చేయాలని కంపెనీ యోచిస్తోంది. ఈ కార్యక్రమాలతో, రాబోయే సంవత్సరాల్లో రిటైల్ టర్నోవర్‌లో పలు రెట్లు పెంచాలని ఏవైసీఎల్ లక్ష్యంగా పెట్టుకుంది. ఏవైసీఎల్ తన మొదటి టీ రిసార్ట్‌ను డార్జిలింగ్‌లోని ఎంఐఎం టీ ఎస్టేట్‌లో స్థాపించడంతో టీ టూరిజంలోకి కూడా ప్రవేశించింది. ఈ రిసార్ట్‌ను గత సంవత్సరం గౌరవనీయమైన భారీ పరిశ్రమల మంత్రి ప్రారంభించారు. దీనికి సందర్శకుల నుండి విశేష స్పందన లభించింది. పెరుగుతున్న డిమాండ్‌కు అనుగుణంగా రిసార్ట్‌ను మరింత విస్తరించాలని కంపెనీ యోచిస్తోంది.

*****