ਇੰਡੀਅਨ ਕੋਸਟ ਗਾਰਡ ਮਾਲਦੀਵ ਦੇ ਸਮੁੰਦਰੀ ਖੇਤਰ ਤੋਂ ਬਚਾਏ ਗਏ ਦਸ ਭਾਰਤੀ ਮਛੇਰਿਆਂ ਨੂੰ 06 ਮਈ, 2023 ਨੂੰ ਸੁਰੱਖਿਅਤ ਵਿਸ਼ਾਖਾਪਟਨਮ ਲਿਆਂਦਾ ਗਿਆ।

ਇਹ ਮਛੇਰੇ 16 ਅਪ੍ਰੈਲ, 2023 ਨੂੰ ਕੰਨਿਆਕੁਮਾਰੀ, ਤਮਿਲ ਨਾਡੂ ਦੇ ਨੇੜੇ ਥੇਂਗਾਪਟਨਮ ਤੋਂ ਸਮੁੰਦਰ ਵਿੱਚ ਮੱਛੀਆਂ ਫੜਣ ਗਏ ਸਨ। ਹਾਲਾਂਕਿ, ਉਨ੍ਹਾਂ ਦੀ ਕਿਸ਼ਤੀ ਦਾ ਇੰਜਣ ਫੇਲ੍ਹ ਹੋ ਗਿਆ ਅਤੇ ਉਹ 5 ਦਿਨਾਂ ਤੱਕ ਬਿਨਾ ਕਿਸੇ ਮਦਦ ਦੇ ਮਾਲਦੀਵ ਸਮੁੰਦਰੀ ਖੇਤਰੀ ਵਿੱਚ ਵਹਿੰਦੇ ਚਲੇ ਗਏ। 26 ਅਪ੍ਰੈਲ, 2023 ਨੂੰ ਇੰਡੀਅਨ ਕੋਸਟ ਗਾਰਡ ਐੱਮਆਰਸੀਸੀ ਯਾਨੀ ਸਮੁੰਦਰੀ ਬਚਾਅ ਕੇਂਦਰ ਦੇ ਤਾਲਮੇਲ ਨਾਲ ਮਾਲਦੀਵ ਖੋਜ ਅਤੇ ਬਚਾਅ ਖੇਤਰ ਚੋਂ ਐੱਮਵੀ ਫਿਊਰੀਅਸ ਦੁਆਰਾ ਇਨ੍ਹਾਂ ਮਛੇਰਿਆਂ ਨੂੰ ਬਚਾਇਆ ਗਿਆ। ਕੋਸਟ ਗਾਰਡ ਮੈਰੀਟਾਈਮ ਰੈਸਕਿਊ ਕੋਆਰਡੀਨੇਸ਼ਨ ਸੈਂਟਰ (ਐੱਮ.ਆਰ.ਸੀ.ਸੀ.) ਨੂੰ ਪ੍ਰਾਪਤ ਸੂਚਨਾ ਦੇ ਆਧਾਰ 'ਤੇ, ਆਈਸੀਜੀਐੱਸ ਵਿਗ੍ਰਹ ਨੂੰ ਇਨ੍ਹਾਂ ਬਚਾਏ ਗਏ ਮਛੇਰਿਆਂ ਨੂੰ ਅੰਡੇਮਾਨ ਅਤੇ ਨਿਕੋਬਾਰ ਦ੍ਵੀਪ ਸਮੂਹ ਵਿੱਚ ਕੈਂਪਬੈਲ ਖਾੜੀ ਤੋਂ ਆਉਣ ਵਾਲੇ ਵਪਾਰੀ ਜਹਾਜ਼ 'ਤੇ ਚੜਾਉਣ ਲਈ ਰਵਾਨਾ ਕੀਤਾ ਗਿਆ ਸੀ। 

ਇਨ੍ਹਾਂ ਦਸ ਮਛੇਰਿਆਂ ਵਿੱਚੋਂ ਅੱਠ ਕੇਰਲ ਦੇ ਵਿਝੀਂਜਮ ਦੇ ਹਨ ਜਦਕਿ ਦੋ ਤਮਿਲ ਨਾਡੂ ਵਿੱਚ  ਕੰਨਿਆਕੁਮਾਰੀ ਦੇ ਹਨ। ਬਚਾਏ ਗਏ ਸਾਰੇ 10 ਮਛੇਰਿਆਂ ਦੀ ਮੁੱਢਲੀ ਡਾਕਟਰੀ ਜਾਂਚ ਤੱਟ ਰੱਖਿਅਕ ਜਹਾਜ਼  'ਤੇ ਕੀਤੀ ਗਈ  ਅਤੇ ਸਾਰੇ ਪੂਰੀ ਤਰ੍ਹਾਂ ਸਿਹਤਮੰਦ ਅਵਸਥਾ ਵਿੱਚ ਪਾਏ ਗਏ ।

****

ਏਬੀਬੀ/ਆਨੰਦ/ਐੱਚਐੱਨ