অর্নব গোস্বামীজী, রিপ্লিক মেদিয়া নেৎৱার্ক্কী ভারত অমসুং মপান্দা লৈরিবা মরুপ পুম্নমক, সুইসাইদ তৌবগী মতাংদা চিথী অমা লৈরম্মি মদুদা হায়, ঐহাক হিংবদা ৱারে, মখা তানা হিংনীংবা পোক্ত্রে অদুনা মসি চারগা পুখ্রিদা চোংথদুনা শীজরগনি। অয়ুক্তা মচানুপী অদু য়ুমদা লৈরমদ্রে। ফমুংদা চিথী অমা লৈরমখি মতম অদুদা মপানা য়াম্না শাওখি। মহাক্না হায়খি, ঐহাক প্রোফেসর অমনি, ঐহাক্না চহি কয়া থবক কন্না তৌরকখি অদুবু চিথী অসিদা বনান লান্না অদুমক ইরি। অর্নবনা হিন্দী নীংথিনা ঙাংবদা ঐহাক্না নুংঙাইবা পোকই। মহাক্না করি হায়রিবনো তাদ্রবসু মহাক্কী হিন্দী চুমব্রা নত্ত্রগা লানব্রা হায়না ঐহাক্না মুন্না তাখি অমসুং মহাক্না মুম্বাইদা লৈবদগী হিন্দী নীংথিনা তমখি।

মরুপশিং,

নখোয়গী নরক্তা লাকপদা নুংঙাইবা পোকপা হায়বা অসি মহৌশানি। রিপব্লিক তি.ভি.না মথংগী থাদা চহি ৬ মপুং ফারগনি। নেস্নন ফর্স্ত ৱাবরগী নখোয়গী মিসন তোক্তবগীদমক নখোয়বু থাগৎচনীংই। খুদোংচাদবা অমসুং অৱাবা মখল কয়া থেংনরবসু নখোয়না খাংখি। করিগুম্বা মতমদা অর্নবকী খনাও নাখি, করিগুম্বদা মীয়াম্না অর্নবকী খনাও নাবা অদু ফাওখি অদুবু চেনেলদি লেপখিদে, চোকথখিদে।

মরুপশিং,

২০১৯দা ঐহাক্না রিপব্লিক সম্মিৎতা লাকপা মতমদা মতম অদুগী থিম অসি ‘ইন্দিয়াস মোমেন্ত’না ওইখি। থিম অসিগী বেকগ্রাউন্দদা লৈবাক্কী মীয়ামদগী ফংখিবা মেন্দেৎনা ওইখি। দিকেদ কয়ামরুমগী মতুংদা ভারতকী মীয়াম্না চাউনা মেজোরিতী পীদুনা থংন-থংননা অনিরক স্তেবল ওইবা সরকার অমা শেম্বা ঙমহনখি। লৈবাক অসিনা ‘ইন্দিয়াস মোমেন্ত’ তশেংনা য়ৌরক্লে হায়না থাজখি। ঙসি চহি ৪গী মতুংদা নখোয়গী সম্মিৎকী থিম অসি তাইম ওফ ত্রান্সফোর্মেসন্না ওইরি। হায়বদি থাজবা থমখিবা ত্রান্সফোর্মেসন অদু থবক ওইনা উবা ফংলে হায়বনি।

মরুপশিং,

ঙসি লৈবাক অসিদা লাক্লিবা অহোংবগী খোঙজেল অসি য়েশিন্নবা পাম্বৈ অসি শেন্মীৎলোনগী চাউখত্পা অমসুং পাকথোক-চাউথোকপগী খোঙজেলনা ওইরি। ভারত অসি দোল্লর ত্রিলিয়ন অমগী ইকোনোমি অমা ওইরকপদা চাউরাক্না চহি ৬০ চংখি। ২০১৪ ফাওবদা ঐখোয়না করিগুম্বা মওং অমদা দোল্লর ত্রিলিয়ন অনিগী মশিং অদু য়ৌবা ঙমখি। হায়বদি চহি তরাগী খুজিং ৭তা দোল্লর ত্রিলিয়ন ২গী ইকোনোমি হায়বনি। অদুবু ঙসিদি ঐখোয়গী সরকারগী চহি ৯গী মতুংদা ভারত অসি চাউরাক্না দোল্লর ত্রিলিয়ন ৩.৫গী ইকোনোমি ওইবা লৈবাক অমা ওইরে । হৌখিবা চহি ৯ অসিদা ঐখোয়না নম্বর ১০দগী নম্বর ৫গী ইকোনোমিদা হেনগৎপা ঙমখি। অমসুং মসি পুম্নমক অসি চহি ১০০গী খ্বাইদগী চাউবা ক্রাইসিসকী মরক্তা থোকখিবনি। মালেমগী খ্বাইদগী চাউবা ইকোনোমিশিংনা শোত্থরকপা মতম অসিদা ভারতনা ক্রাইসিস অসিদগী থোরকখি অমসুং খোঙ্গজেল য়াংনা মাংলোমদা চংশিল্লি।

মরুপশিং,

অদোম্না অয়াম্বনা পোলিসি মেকরশিংদগী ৱাফম অমা তাবিরম্লগনি – ফার্স্ত ওর্দর ইম্পেক্ত হায়বসি পোলিসি অমহেক্তগী অহানবা অমসুং মহৌশাগী ওইবা ফলনি। ফার্স্ত ওর্দর ইম্পেক্ত অসি পোলিসিগী অহানবা পান্দমনি, অমসুং মসি অতেনবা মতমগী মনুংদা থোরকপা হৌই। অদুবু পোলিসি খুদিংমক্কী সেকেন্দ অমসুং থার্দ ওর্দরগী ইম্পেক্তসু লৈ। মখোয়গী ইম্পেক্ত অসি য়াম্না লুবা, য়াম্না লাপ্না চৎলি অদুবু মসি ফোঙদোকপদা মতম চংই। মসিগী কম্পরেতিব স্তদী তৌনবগীদমক, অকুপ্পা মরোল খঙনবগীদমক ঐখোয়না চহি তরাগী খুজিং কয়াগী মমাংদা চখৎপা তাই। অদোম তি.ভি.গী লমগী মীয়াম্না ৱিন্দো অনি চলাইরি, মমাংঙৈগী অমসুং হৌজিক্কী, মমাংঙৈ অমসুং মতুং, মরম অদুনা ঐহাক্না ঙসিসু মসিগা মান্নবা থবক অমা পাঙথোক্কনি। অদুনা অহানবদা বিফোর্গী মতাংদা ৱারি শাসি।

মরুপশিং,

নীংতম্লবা মতুংদা চৎনখিবা লাইসেন্স রাজকী ইকোনোমিক পোলিসিদা সরকার মশামক কন্ত্রোলর ওইখি। কম্পিতিসন লোইশিনখি, প্রাইবেৎ ইন্দস্ত্রী, এম.এস.এম.ই.শিং মাংলোমদা চংশিনবা য়াহনখিদে। মসিগী অহানবা নেগেতিব ইফেক্তদি ঐখোয়না অতোপ্পা লৈবাকশিংগা চাংদম্নবদা তুংদা লেপতুনা লৈখি, ঐখোয়না লায়রবা হেনগৎলকখি। পোলিসিশিং অদুগী সেকেন্দ ওর্দরগী ইফেক্ত অদু হেন্না ফত্তবা ওইখি। ভারতকী কঞ্জুমসন গ্রোথ অসি মালেমগা চাংদম্নবদা য়াম্না নেম্না লৈখি। মসিনা মরম ওইদুনা মেন্যুফেকচরিং সেক্তর শোথখি অমসুং ঐখোয়না শেল থাদবগী খুদোংচাবা মাংখি। মসিগী অহুমশুবা মহৈদি ভারত্তা ইনোবেসনগী এতমোস্ফিয়র অমা শেম্বা ঙমখিদে। অসিগুম্বা ফিভম অসিদা হেন্না অনৌবা ইন্তর্প্রাইজশিং শেমখিদে, নত্রগা হেন্না লনাইগী থবক পীখিদে। নহারোলশিংনা সরকারগী থবক খক্তদা থাজবা থম্বা হৌরকখি। লৈবাক অসিগী তেলেন্ত কয়া অমনা থবক তৌবগী অকোয়বগী ফিভম য়েংদনা লৈবাক অসি থাদোক্নবা ফাওবা ৱারেপ লৌখি। মসি পুম্নমক অসি চপ মান্নবা সরকারগী পোলিসিশিংগী থার্দ ওর্দরগী ইম্পেক্ত ওইখি। পোলিসিশিং অদুগী ইম্পেক্তনা লৈবাক অসিগী ইনোবেসন, কন্না হোৎনবা অমসুং ইন্তর্প্রাইজকী কেপাসিতি অদু শোকহনখি।

মরুপশিং,

হৌজিক ঐহাক্না হায়গদৌরিবা অদু খঙলবদি রিপব্লিক তি.ভি. য়েংলিবশিংনা শোইদনা নুংঙাইগনি। ২০১৪গী মতুংদা ঐখোয়গী সরকারনা করিগুম্বা পোলিসি অমা শেমখিবা ওইরবসু, অহানবা কান্নবা অদু খক্তা নত্তনা সেকেন্দ অমসুং থার্দ ওর্দরগী ইফেক্তশিংদসু মরু ওইনা লৌখি। অদোম্না নিংশিংবীরমগনি, ২০১৯দা রিপব্লিক সমিত্তা ঐহাক্না হায়খি মদুদি পি.এম.অৱাস য়োজনাগী মখাদা ঐখোয়না চহি ৫গী মনুংদা ইমুং করোর ১.৫দা য়ুম পীখ্রে। হৌজিক মসিগী মশিং অসি মিলিয়ন ৪০ হেন্না হেনগৎলে। য়ুমশিং অসি অয়াম্বদি, মখোয়গী মপু ওইবগী হক অসি ঐখোয়গী ইমা-ইপাশিংগী মীংদা লৈরি অমসুং নখোয়না খঙলে মদুদি ঙসিদি য়ুম খুদিংমক লাখ লাখ কয়াদা শারে। হায়বদি লায়রবা ইচিল-ইনাও করোর কয়া, ঙসি ঐনা য়াম্না নুংঙাইবগা লোয়ননা হায়রি মদুদি দিদি মিলিয়নর ওইরে। মসিদগী হেন্না চাউবা রক্ষা বন্ধন লৈরোই। মসিনা অহানবা ইম্পেক্তনি। মসিগী অনিশুবা মহৈদি স্কিম অসিনা খুঙ্গং খুদিংদা থবক ফংহনবগী খুদোংচাবা লাখ কয়া শেমগত্পনি । অমসুং অদোম্না খঙবিরিবা অদুনি মদুদি কনাগুম্বা অমনা মশাগী য়ুম অমা লৈরকপা মতমদা, পর্মেনেন্ত ওইবা য়ুম অমা লৈরকপা মতমদা, মদুগী মতুংদা মহাক্কী থাজবা অদু কয়া য়াম্না হেনগৎলকই, মহাক্কী রিস্ক লৌবগী কেপাসিতি অদু কয়া য়াম্না হেনগৎলকই। মহাক্কী মংলানশিং অদু অতিয়া পক্না ৱাংলকই। পি.এম.অৱাস য়োজনানা লৈবাক অসিগী লায়রবশিংগী থাজবা অসি অনৌবা পনখৈদা পুখৎখি।

মরুপশিং,

মুদ্রা য়োজনানা নুমিৎ খরনিগী মমাংদা চহি ৮ মপুং ফাখি। মসিগী স্কিম অসি মাইক্রো অমসুং স্মোল ওন্ত্রপ্রিনরশিংদা শেল-থুমগী মতেং পীনবা হৌদোকখিবনি। মুদ্রা স্কিমগী মখাদা লোন করোর ৪০ হেন্না পীখ্রে, মসিগি মনুংদা চাউরাক্না চাদা ৭০দি নুপিনি। স্কিম অসিগী অহানবা কান্নবা অসি মশানা মশাবু থবক পিজবা হেনগত্হনবগী মওংদা ঐখোয়গী মাংদা উরি। মুদ্রা য়োজনা ওইগেরা, নুপিশিংগী জন ধন একাউন্ত হাংবা ওইগেরা নত্ত্রগা সেল্ফ হেল্প গ্রুপশিং প্রমোৎ তৌবা ওইগেরা, ঙসি ঐখোয়না স্কিমশিং অসিগি খুত্থাংদা লৈবাক অসিদা অচৌবা খুন্নাইগী অহোংবা অমা লাকপা উবা ফংলি। স্কিমশিং অসিনা ঙসি ইমুংগী ৱারেপ লৌবগি থৌওংদা নুপিশিংগী থৌদাং হেনগৎহনখি। হৌজিক্তি নুপি কয়ানা থবক পীবগী থৌদাং লৌদুনা লাক্লি, লৈবাক অসিগী চাউখৎলক্লিবা ইকোনোমিদা পাঙ্গল হাপ্পী।

মরুপশিং,

পি.এম.স্বামিত্ব য়োজনাদসু অদোম্না অহানবা, অনিসুবা অমসুং অহুমসুবা ওর্দরগী ইম্পেক্ত তোঙান্না উবা ফংগনি। মসিগী মখাদা খ্বাইদগী নৌবা তেক্নোলোজী শীজিন্নদুনা লাইরবশিংদা প্রোপর্তি কার্দ পীখি, মদুনা মখোয়দা প্রোপর্তি সেক্যুরিতীগী থাজবা পীখি। স্কিম অসিগী ইফেক্ত দ্রোন সেক্তরদা উবা ফংই। মসিদা দিমান্দ অমসুং এক্সপান্সনগী ওইথোকপা য়াবশিং অসি লেপ্তনা হেনগৎলক্লি। পি.এম.স্বামিত্ব য়োজনা হৌদোকখিবা অসি চাউরাক্না চহি অনি মখায় শুরে, মতম য়াম্না কুইদ্রি, অদুবু মসিগী খুন্নাইগী ওইবা শাফু অদুসু উবা ফংলি। প্রোপর্তি কার্দ ফংবদা অমগা অমগা ৱাথোক থোক্লকপগী ওইথোকপা হন্থরে। মসিনা ঐখোয়গী পুলিস অমসুং জুদিসিএল সিস্তেমদা লেপ্পা লৈতনা হেনগৎলক্লিবা প্রেসর হন্থহল্লগনি। মসিগা লোয়ননা হৌজিক্তি খুঙ্গংদা প্রোপর্তি পেপর ফংলবশিংদা বেঙ্কশিংদগী মতেং ফংবদা লাইথোকহল্লে। খুঙ্গং অসিদা লৈরিবা লন-থুমশিং অসিগী মমলসু হেনৎহনখি।

মরুপশিং,

ঐঙোন্দা ফার্স্ত ওর্দর, সেকেন্দ ওর্দর অমসুং থার্দ ওর্দরগী ইম্পেক্তকী কেস স্তদি কয়া অমা লৈরি মসিনা অদোমগী রনদাউন অদু আউৎ ওফ ওর্দর ওইহনগনি, মসিদা মতম কয়া অমা চংগনি। দি.বি.তি ওইগেরা, লায়রবা মীওইশিংদা মৈ, ঈশিং, তোইলেত্গুম্বা খুদোংচাবশিং ফংহন্নবা থৌরাং তৌরি, মসি পুম্নমক অসিনা গ্রাউন্দ লেবেলদা রিভোলুসন অমা পুরক্লি। স্কিমশিং অসিনা লৈবাক অসিগী লায়রবশিংগী খ্বাইদগী লায়রবশিং ফাওবা ইকাই খুম্নবা অমসুং সেক্যুরিতিগী ৱাখল্লোন্না থলহল্লি। লৈবাক অসিদা অহানবা ওইনা লায়রবশিংনা সেক্যুরিতিগী মথক্তা ইকায় খুম্নবসু ফংলে। চহি তরাগী খুজিং কয়াদগী মখোয়না লৈবাক অসিগী চাউখৎ-থৌরাংদা পোৎলুম অমা ওইরি হায়বা খনখিবশিং অদু ঙসিদি লৈবাক অসিগী চাউখৎ-থৌরাংদা খোংজেল য়াংশিলহল্লি। সরকারনা স্কিমশিং অসি হৌদোকপা মতমদা মীওই খরনা ঐখোয়বু লান্না লমজিংবীরম্মি। অদুবু ঙসিদি স্কিমশিং অসিনা ভারতকী খোংজেল য়াংনা চাউখত্পদা ইথিল পীরি, স্কিমশিং অসিনা চাউখত্পা ভারত অমা সেমগত্পগী য়ুম্ফম ওইরে।

মরুপশিং,

লায়রবা, দলিৎ, শোত্থরবা, ত্রাইবেল, জেনরেল ক্লাস, মিদল ক্লাস, মীপুম খুদিংমক্না হৌখিবা চহি ৯দগী মখোয়গী পুন্সিদা অহোংবা অমা উবা ফংলি। ঙসি লৈবাক অসিদা য়াম্না সিস্তেমেতিক ওইবা মওংদা থবক পায়খৎলি, মিসন মোদতা থবক পায়খৎলি। ঐখোয়না শক্তি লৈরবশিংগী ৱাখল্লোনসু হোংদোক্লে। ঐখোয়না শেবাগী ৱাখল্লোন পুরকখি। ঐখোয়না লায়রবা য়াইফনবা থবক তৌবনা ঐখোয়গী মেদিয়ম ওইহল্লি। ঐখোয়না ফাদবগী মহুৎ অপেনবা পোকহনবনা ঐখোয়গী বেজ ওইহল্লে। মসিগী এপ্রোচ অসিনা লৈবাক অসিগী লায়রবা অমসুং মিদল ক্লাসকীদমক দিফেন্স সিল্দ অমা শেমগৎলে। মসিগী প্রোতেক্তিব সিল্দ অসিনা লৈবাক অসিগি লায়রবশিং হেন্না লায়রবা ওইহনবদগী ঙাকথোক্লি। আয়ুশ্মান য়োজনানা লৈবাক অসিগী লায়রশিংদা লুপা করোর লিশিং ৮০ চাদিং তৌগদবদগী কনবিখি। মদু লায়রবশিংগী ফুরিৎ খাওদগী চত্কদৌরিবনি, করিগুম্বা স্কিম অসি লৈরমদরবদি লায়রবশিংনা মখোয়গী ফুরিৎ খাওদগী চপ মান্নবা শেনফম অদু চাদিং তৌবা তাখি। খন্থবিয়ু, ঐখোয়না লায়রবা মীওই কয়া লায়রবদগী কনবিরে । ক্রাইসিসকী মতমদা কান্নবা থৌরাং মসিনা ওইখি। মদুগী মহুত্তা ইমুং করোর কয়ানা অহানবা ওইনা শেন্দোং লৈবা হিদাক-লাংথক, লেম্না তিকা থবা, লেম্না দাইলাইসিস তৌবা, এক্সিদেন্ত ইন্সুরেন্স, লাইফ ইন্সুরেন্সকী খুদোংচাবশিংসু ফংলে। পি.এম.গরিব কল্যান অন্ন য়োজনা অসি লৈবাক অসিগী য়াম্লবা মীয়ামগীদমক অতোপ্পা প্রোতেক্তিব সিল্দ অমনি। স্কিম অসিনা কোরোনাগী ক্রাইসিসকী মতমদা লায়রবা অমত্তা চরা হেল্লগা তুমহনখিদে। ঙসি সরকারনা ফুদ স্কিম অসিগীদমক লুপা করোর লাখ ৪ চাদিং তৌরি। ৱান নেসন ৱান রেসন কার্দ ওইরবসু নত্ত্রগা ঐখোয়গী জে.এ.এম. ঙসিদি লায়রবশিংগী মরক্তা খ্বাইদগী লায়রবশিংনা মখোয়না ফংগদবা অদু শোইদনা ফংগনি হায়বগী থাজবা ফংলে। অমসুং মসি অচুম্বা মওংদা সোসিয়েল জস্তিস ফংহনবনি হায়না ঐনা থাজৈ। অসিগুম্বা স্কিম কয়া অমা লৈরি, মখোয়না ভারত্তা লায়রবা হন্থহনবদা অচৌবা মতেং অমা পীরি। মতম খরগী মমাংদা আই.এম.এফ.কী রিপোর্ত অমা, ৱার্কিং পেপর অমা অদোম্না উবিরমগনি। রিপোর্ত অসিনা তাক্লি মদুদি অসিগুম্বা স্কিমশিং অসিনা মরম ওইদুনা লাইচৎ অসি লৈরবসু ভারতনা লায়রবা মুৎথৎনবা লম্বীদা চংশিল্লি অমসুং মসিনা ত্রান্সফোরমেসন অসি করিনো তাক্লি?

মরুপশিং,

অদোম্না নীংশিংবীরমগনি, ঐহাক্না পার্লিয়ামেন্ততা এম.এন.আর.ই.জি.এ. অসি কংগ্রেস সরকারগী মাইপাকপশিংগী মমি অমা ওইনা শক খঙহনখিবনি। ২০১৪গী মমাংদা এম.এন.আর.ই.জি.এ.গী মতাংদা ৱাকৎ কয়া লাকখি। অদুদগী সরকারনা স্তদি অমা তৌরম্মি। স্তদি অসিদা মফম কয়াদা নুমিৎ অমগী থবক তৌবগী মহুত্তা নুমিৎ ৩০ ফাওবগী এতেন্দেন্স উৎলি হায়বসি য়াম্না মরু ওইনা লাক্লে। হায়বদি অতোপ্পা কনাগুম্বা অমনা শেনফম অদু চাথোকই হায়বনি। মসিদা কনাদা চৈথেং নংহনখিবগে? লায়রবশিংগী, লেবরগীনি। ঙসিসু করিগুম্বা নহাক্না খুঙ্গংশিংদা চৎতুনা ২০১৪গী মমাংদা এম.এন.আর.ই.জি.এ.গী মখাদা করি প্রোজেক্ত পাইখৎখিবগে হায়না হংলবদি, মদুদগী মতেং ফংলোই। মমাংদা পর্মানেন্ত এসেৎ দিবেলপমেন্তগী থবক অসি এম.এন.আর.ই.জি.এ.দা চাদিং তৌরম্বা শেনফমদগী য়াম্না হন্থরম্মি। ঐখোয়না পোজিসন অদুসু হোংদোকখি। ঐখোয়না এম.এন.আর.ই.জি.এ.গী বজেৎ হেনগত্হনখি, ত্রান্সপরেন্সিসু হেনগত্হনখি। ঐখোয়না বেঙ্ক একাউন্ততা হকথেংননা শেল থাবা হৌখি অমসুং খুঙ্গংগীদমক রিসোরসশিংসু শেমখি। ২০১৪গী মতুংদা লায়রবশিংগী পুক্কা য়ুমশিং, ৱেলস-স্তেপৱেল-কেনেলশিং, এনিমেল শেদশিং, অসিগুম্বা থবক লাখ কয়া এম.এন.আর.ই.জি.এ.গী মখাদা তৌখ্রে। ঙসিদি অয়াম্বা এম.এন.আর.ই.জি.এ.গী  পেমেন্তশিং অসি নুমিত ১৫নিগী মনুংদা ক্লিয়র তৌখ্রে। হৌজিক এম.এন.আর.ই.জি.এ.গী শিন্মী চাদা ৯০ হেনবগী আধার কার্দ লিঙ্ক তৌখ্রে। মসিনা জোব কার্দতা অশাবা শেম্বা হন্থহল্লে। অদুগা ঐহাক্না অদোমদা অতোপ্পা স্তেতিসতিক অমা পীজরি। এম.এন.আর.ই.জি.এ.দা ফ্রোদ থিংবদগী লুপা করোর লিশিং ৪০ অরানবা খুত্তা চত্পদগী কনবা ঙম্লে। হৌজিক এম.এন.আর.ই.জি.এ.গী শেনফম অদু লায়রবা শিন্মী অদুদা চৎলি, ঐখোয়গী সরকারনা লায়রবশিংদা তৌরিবা অদুগুম্লবা অরানবা অদু লোইশিনখ্রে।

মরুপশিং,

ত্রান্সফোরমেসনগী খোঙচৎ অসি মতমগা চান্নবা ওইবতা নত্তনা তুঙ্গি ওইবা খোঙচৎনি। ঐখোয়না ঙসি লাক্কদৌরিবা চহি তরাগী খুজিং কয়াগীদমক শেম শারি। মমাংঙৈদা করিগুম্বা তেক্নোলোজী লাক্লবসু চহি তরাগী খুজিং কয়া নত্রগা চহি কয়াগী মতুংদা ভারত্তা য়ৌরকখি। হৌখিবা চহি ৯ অসিদা ভারতনা মসিগী ত্রেন্দ অসিসু হোংদোকখি। ভারতনা থবক অহুম অমগা হৌদোকখি। অহানবদা ঐখোয়না তেক্নোলোজীগা মরি লৈনবা সেক্তরশিং সরকারগী কন্ত্রোলদগী নান্থোকহনখি। অনিসুবদা, ভারতকী দরকার ওইবগী মতুং ইন্না ভারত্তা তেক্নোলোজী দিবেলপ তৌনবা ঐখোয়না অকনবা ৱাফম থমখি। অহুমসুবা, ঐখোয়না তুংগী তেক্নোলোজীগীদমক রিসর্চ অমসুং দিবেলপমেন্তগী মতাংদা মিসন মোদ এপ্রোচ অমা লৌখৎখি। ঙসি অদোম্না উবা ফংলি মদুদি মতৌ করম্না অমসুং কয়া য়াম্না য়াংনা লৈবাক অসিদা ৫জি লোঞ্চ তৌখিবগে। ঐখোয়না মালেমদা খ্বাইদগী য়াংনা চাউখৎলক্লি। ৫জিগী মতাংদা ভারতনা উৎখিবা খোংজেল, তেক্নোলোজী শেমগত্পগৌ মওং মতৌ অদু মালেম পুম্বদা খন্ন-নৈনরি।

মরুপশিং,

কোরোনাগী মতমদা তিকা থাবগী ৱাফম্ অসি কনাগুম্বা অমত্তনা কাওবা ঙম্লোই। অরিবা ৱাখল্লোন অমসুং এপ্রোচ লৈবা মীওইশিংনা ‘মেদ ইন ইন্দিয়া’ তিকাশিংগী মথৌ তাবদা চিংনবা পোকখি। মখোয়না খনখি অতোপ্পা লৈবাকশিংনা তিকাশিং অসি পুথোক্লি মরম অদুনা মখোয়না ঐখোয়দা তিকাশিং অসি নুমিৎ অমদা নত্ত্রগা অমদা কাপ্পা ফংগনি হায়বসিনি। অদুবু ক্রাইসিসকী মতমদসু ভারতনা মশা-মরোমদোম লেপচবা ঙম্বগী লম্বি খনখি অমসুং মসিগী ফল অসি ঐখোয়গী মাংদা লৈরি। অদুগা ইচিল-ইনাওশিং, ঙসি অদোম য়াম্না নুংঙাইবা ফাওই। অদুবু মতম অদুদা ঐখোয়না কদায়দা ৱারেপ লৌবা তাখিবগে হায়বদু খন্দুনা য়েংবীয়ু। মালেম অসিনা ঐখোয়দগী তিকাশিং লৌবিয়ু হায়না হায়রকপা মতমদা অদোম্না ইসাবু অদুগুম্বা ফিভম অদুদা থমখি, মীয়াম্না তিকা য়াওদ্রবদি অৱাবা মায়োক্নগনি অমসুং ঐখোয় শিগনি হায়না হায়রম্মি। ইদিতোরিয়লশিং অমসুং তি.ভি.গী দিবেৎশিংদা খুদোংথিবশিং অদু ফোঙদোকখি। মখোয়না তিকাশিং পুরক্নবা লাউথোক্লম্মি। মরুপশিং, ঐহাক্না ঐহাক্কি লৈবাক খক্তগীদমক অচৌবা পোলিতিকেল কেপিতেল রিস্ক অমা লৌরম্মি। নত্রবদি ঐহাক্না মসিমসু হায়বা য়াই মদুদি ঐহাক্না ত্রেজরি শীজিন্নগদবনি অমসুং তিকাশিং অসি মপান্দগী পুসিল্লক্কদবনি। মীওই অমদা তিকা থাদুনা পাউ-চেদা এদভর্তাইজ তৌরগা লোইরগনি। অদুবু মরুপশিং, ঐখোয়না লম্বি অদু খনখিদে। ঐখোয়না য়াম্না অতেনবা মতমগী মনুংদা মালেমগী খ্বাইদগী ফবা অমসুং ইফেক্তিব ওইবা তিকাশিং পুথোকখি। মালেমগী খ্বাইদগী চাউবা অমসুং মাইপাকপা ভেক্সিন কেম্পেন অসি ঐখোয়না য়াম্না থুনা হৌদোকখি। অদুগা অদোম্না নীংশিংবীরমগনি মদুদি ভারত্তা জনুৱারি-ফেব্রুৱারিদগী কোবিদ শন্দোকপা হৌরকখি অমসুং মে থা ফাওবদা ভারতনা তিকাশিং অসিগীদমক তাস্ক ফোরস অমা শেমখি। তুংগী দরকার ওইবশিং অদু য়েংলগা ঐখোয়না হান্না থৌরাং তৌখি। অমসুং মসি মীওই খরনা ‘মেদ ইন ইন্দিয়া’ তিকা থাদোকপদা থৱাই য়াওখিবা মতম অদুসু ওইখি। করম্বা মখলগী ৱাহৈ শীজিন্নখিবগে? কনাগী প্রেসর লৈরম্বগে হায়বা ঐ খঙদে? মপান লৈবাক্কি তিকাশিং মপান্দগী পুশিল্লকপদা মীওইশিং অসিনা অপাম্বা ফোঙদোক্লিবা অসিগী কান্নবা অদু করিনো হায়বা ঐ খঙদে।?

মরুপশিং,

ঐখোয়গী দিজিতেল ইন্দিয়া কেম্পেনসু ঙসি মালেম শিনবা থুংবদা শোন্নরি। হন্দক ঐনা জি-২০ সমিৎকীদমক বালিদা চৎখি। ঐঙোন্দগী দিজিতেল ইন্দিয়াগী অকুপ্পা মরোলশিং খঙনবা হোৎনদবা লৈবাক অমত্তা লৈরমদে। মতম অমদা দিজিতেল ইন্দিয়াবু লান্না লমজিংনবা হোৎনখিবা অমসু লৈরম্মি। মমাংদা লৈবাক অসি দেতা অমদি অত্তাগী দিবেৎ তৌরম্মি। অমসুং তি.ভি.গী মেদিয়াগী মীওইশিং অসিনা মসি য়াম্না পাম্মি, মখোয়না ৱাহৈ অনি থমখি – অদোম্না দেতা নত্রগা অত্তা মথৌ তাই। জন ধন-আধার-মোবাইলগী ত্রিনিতি থিংবদা মখোয়না পার্লিয়ামেন্ততগী কোর্ত ফাওবা হোৎনখি। ২০১৬তা লৈবাক মীয়ামদা বেঙ্ক অসি মখোয়গী মখুত্তা লৈরগনি হায়না হায়রুবা মতমদা মখোয়না ঐবু নোক্নরম্মি। শুপ্নগী ৱাখল লৌশিং লৈবা মীওই খরনা ঐঙোন্দা হংলম্মি ‘মোদি জী, ঐঙোন্দা হায়বিয়ু, লায়রবশিংনা মতৌ করম্না আলু অমসুং খামেন অশিনবা দিজিতেল ওইনা লৌগনি?’ অমসুং মতুংদা মীওইশিং অসিনা করি হায়খিবগে? ‘লায়রবশিংগী লন-থুমদা আলু অমসুং খামেন অশিনবা কদায়দা লৈরিবনো?’ মখোয়না ফাওবা হায়খি মদুদি খুঙ্গংশিংদা মেলা পাঙথোকই, মীয়াম্না মেলাশিংদা মতৌ করম্না দিজিতেল পেমেন্ত তৌগনি

মরুপশিং,

করিগীদমক্তা সরকারনা থবক কয়া পায়খৎলিবনো নত্রগা মফম অদুদা লৈরিবা মীওইশিংনসু মসিগী কান্নবা ফংলিবরা হায়না অদোম্না খঙবীরমগনি। অদুবু মোদিগী খুদোংচাদবা থেংনরিবা মীওই খরদি লৈরি। মসিগী মতুং ইন্না মেদিয়ানা চৎলি। অদুগা ঙসি ঐহাক্না মসিগী মরমশিং অদু রিপব্লিক তি.ভি.দা উবা ফংলিবা অশাওবা, থোক্লিবা হুরানবা অসি মোদিনা মীওই খরগি ব্লেক ইনকমগী লম্বি মতম চুপ্পগী থিংজিনবদগীনি। হৌজিক শেঞ্জা-থুমজাগী মায়োক্তা লান্থেংনবদা হাফ হার্ত নত্রগা আইসোলেতেদ এপ্রোচ অমত্তা লৈত্রে । হৌজিক্তি ইন্তিগ্রেতেদ, ইন্সতিত্যুস্নেলাইজ এপ্রোচ অমা লৈরে। মসি ঐখোয়গী ফিরেপনি।

অদোম্না খঙবদা অঙকপা ফাওগনি মদুদি জে.এম. ফিগর অসি অপিকপা নত্তে সর। অরানবা বেনিফিসরি করোর ১০ থাদোকখ্রে। হায়রিবা লুপা করোর ১০ অসি হান্নদি সরকারগী স্কিমশিংগী কান্নবা লৌরম্বা মীওইশিংনি। হায়রিবা করোর ১০ অসি কৈদৌঙৈদসু পোকখিদবা অদুবু সরকারগী শেনফম মখোয়দা থারিবা মীওইশিংনি। অদোম্না খঙই মদুদি কংগ্রেস সরকারনা অসিগুম্বা মশিং য়াম্লবা অরানবা বেনিফিসরিশিংদা শেল থারকখি মদু দিল্লি, পঞ্জবা অমসুং হরিয়ানাগী অপুনবা মীংশিংদগী হেন্না য়াম্না ৱাংখি। করিগুম্বা ঐখোয়গী সরকারনা হায়রিবা অরানবা  মীং করোর ১০ অসি সিস্তেম অসিদগী দিলিৎতেদ তৌরম্লবদি ফিভম অসি য়াম্না হেন্না ফত্তবা ওইরম্বা য়াই। মসিগী থৌনা অসি পুথোকপা অসি য়াম্না লাইবক ফবনি, ঐগী ইচিল-ইনাওশিং। ঐখোয়না অহানবদা আধারদা কন্সতিত্যুস্নেল স্তেতস পীবা তাখি। মিসন মোদতা জন ধন বেঙ্ক একাউন্ত করোর ৪৫ হেন্না হাঙদোকখি। হৌজিক ফাওবদা লুপা করোর লাখ ২৮ দি.বি.তি.গী খুত্থাংদা বেনিফিসরি করোর কয়াদা ত্রান্সফর তৌখ্রে। দাইরেক্ত বেনিফিৎ ত্রান্সফর হায়বসি মিদলমেন লৈতবা, ব্লেক মনি শেম্লিবা মীওইশিং য়াওদবা হায়বনি।

মরুপশিং,

সরকারগী প্রোক্যুর্মেন্তসু ঐখোয়গী লৈবাক অসিদা শেঞ্জা-থুমজাগী অচৌবা হৌরকফম অমা ওইরম্মি। মসিদসু হৌজিক ত্রান্সফোরমেসন লৈরে। সরকারগী প্রোক্যুর্মেন্ত অসি হৌজিক্তি মপুং ফানা জে.এম.- হায়বদি সরকারগী ই-মার্কেত্প্লেস পোর্তেলদা তৌরি। তেক্সকি সমস্যাশিংগা মরি লৈনবা সমস্যাশিংগী মতাংদা পাউ-চেশিংনা য়াম্না ৱানা ইরম্মি। ঐখোয়না করি তৌখিবগে? ঐখোয়না সিস্তেম অসি ফেসলেস ওইহনখি। তেক্স ওফিসর অমসুং তেক্সপেয়রগী মরক্তা ফেস তু ফেস লৈহন্দনবা থৌরাং তৌখ্রে। জি.এস.তি.না ব্লেক মনিগী লম্বিশিংসু থিংজিনখ্রে। পুকচেল শেংনা থবক লৈবা মতমদা মীওই খরদা খুদোংচাদবা থেংনবা অসি মহৌশানি। অদুগা খুদোংচাদবা লৈরবশিং অদুনা লম্বিদা মীশিংবু লান্না লমজিংগদ্রা?

মরুপশিং,

করিগুম্বা মখোয়গী লান্থেং অদু মোদী খক্তগা ওইরবদি মখোয়না মতম কয়াগী মমাংদগী মায় পাকলমগনি। অদুবু মখোয়না কম্মন ইন্দিয়াগী মায়োক্তা লান্থেংনরি হায়বা খঙদবনা মরম ওইদুনা মখোয়গী থৌরাংশিংদা মায় পাকপা ঙমদ্রি। শেঞ্জা-থুমজা তৌরিবা মীওইশিং অসিনা কয়া য়াম্না চাউবা এলাইন্স অমা শেম্লবসু, শেঞ্জা-থুমজা তৌরিবা মীওই পুম্নমক প্লেৎফোর্ম অমদা লাক্লবসু, লাইনিংগী মীহুৎ পুম্নমক মফম অমদা লাক্লবসু, অদুবু মোদীদি হল্লক্লরোই। শেঞ্জা-থুমজা অমসুং নেপোতিজমগী মায়োক্তা ঐহাক্কী লানফম অসি ঐহাক্কী ইচিল-ইনাওশিং মখা চত্থগনি অমসুং ঐহাক্না লৈবাক অসিবু অরানবা থবকশিং অসিদগী নান্থোকহন্নবা ৱাশক লৌখিবা মীওই অমনি। ঐহাক্না নখোয়গী থৌজাল মথৌ তাই।

মরুপশিং,

নীংতম্বগী ‘অমৃত কাল’ অসি ঐখোয় পুম্নমক্কী হোৎনজমননি। ভারত মচা খুদিংমক্কী পাঙ্গল অমসুং কন্না হোৎনবা অদু চৎনরকপা মতমদা ঐখোয়না চাউখত্পা ভারতকী মংলান অদু অথুবা মতমদা মপুং ফাহনবা ঙম্লগনি। ঐহাক্না থাজবা থম্লি মদুদি রিপব্লিক নেতৱার্কনা মসিগী ৱাখল্লোন অসি মখা তানা মপাঙ্গল কনখত্হনগনি অমসুং হৌজিক্তি অর্নবনা হায়খি মদুদি মহাক গ্লোবেল ওইরক্লি, মরম অদুনা ভারতকী খোঞ্জেলনা অনৌবা পাঙ্গল অমা ফংলগনি। মহাকপুসু ঐহাক্না য়াইফ-পাউজেল। হৌজিক মশিং য়াম্লবা পুকচেল চাউবা ইরৈবাকচাশিংনা অচৌবা ভারতকী গরেন্তী ওইরি। ঐহাক্কী ইরৈবাকচাশিংনা অচৌবা ভারতকী গরেন্তীনি। ঐহাক্না থাজবা পীরি মদুদি মসিদা ঐহাক্না চেৎনা থাজৈ। অমুক হন্না ঐহাক্না পুম্নমকপু থাগৎচরি!

***