কলচর ৱর্কিং গ্রুপ (CWG) অসিনা ভারতকী G20 প্রসিদেন্স মখাদা UNESCOনা নোলেজ পার্ত্নর ওইনা খুৎশম্নদুনা কলচর অমসুং ক্রিএতিব ইন্দস্ত্রী অমসুং ক্রিএতিব ইকোনোমী খুমাং চাউশিলহন্নবা শীনবা মালেমগী থীমেতিক ৱেবিনার অমা শীনখ্রে। ৱেবিনার অসি CWGনা পীবা প্রাইওরিতী এরিয়াশিংদা মিৎয়েং চঙবা ৱেবিনার মরিগী পরিংগী মনুংদা অহুমশুবনি। ৱেবিনার অসিগী পান্দমদি অখঙ-অহৈশিংগী মিৎয়েং ফোংদোক্নহন্দুনা মরী লৈনবা হীরম পুম্নমক্কী মতাংদা কুপ্না খন্ন-নৈনহনবনি।

ৱেবিনার অসি এপ্রিল 19দা 12.30 pmদগী 8.30 pm (IST) ফাওবা পাংথোকখি। ৱেবিনার অসিদা G20 মেম্বর অমসুং অতোপ্পা লৈবাক য়াওনা অপুনবা লৈবাক 28 অমসুং মালেমগী ওর্গনাইজেসন অমসুং হীরম অসিগা মরী লৈনবা ইস্তিত্যুসনশিংদগী অখঙ-অহৈ 43না শরুক য়াদুনা পাংথোকখিবা ৱেবিনার অসিদা কলচরেল অমসুং ক্রিএতিব ইন্দস্ত্রী অমসুং ক্রিএতিব ইকোনোমী খুমাং চাউশিলহন্নবা খন্ন-নৈনবা অমসুং থবক পাংথোকপগী খ্বাইদগী ফবা পাম্বৈ লান্নবগী থৌওংশিং মায় পাক্না পাংথোকখি।

ঙসিগী গ্লোবেলাইজ ওইবা মালেম অসিদা কলচরেল অমসুং ক্রিএতিব ইন্দস্ত্রী অমসুং ক্রিএতিব ইকোনোমীনা মালেমগী শেন্মিৎলোনগী লমদা লৌরুবা মরু ওইবা থৌদাং অসি হেঞ্জিন্না হায়বসু য়ারোই। ইং 2020দা ক্রিএতিব গুদ অমসুং সর্ভিসকী মালেমগী এক্সপোর্তনা মথংশিৎনা US$ মিলিয়ন 524 অমসুং US$ ত্রিলিয়ন 1.1 য়ৌখিবা ফিভম অদুদগী ত্রেদ অমসুং দিভেলপমেন্তকী য়ুনাইতেদ নেসন্স কনফরেন্সকী ক্রিএতিব ইকোনোমী আউতলুক 2022গী মতুং ইন্না মসিগুম্বা ইন্দস্ত্রীশিং অসি গ্রোথকী শাফু অমা ওইরে। ফিভম অসিমক লাক্কদৌরিবা চহিশিংদা মখা চত্থখিগনি হায়বগী থাজবা লৈরি। সেক্তর অসিনা খ্বাইদগী মশিং য়াম্না থবক পীরিবশিং অসি চহি 15-29গী মরক্তা লৈবনিনা কলচরেল অমসুং ক্রিএতিব ইন্দস্ত্রীশিংদা নহাশিংনা শরুক য়াবগী মতৌ অসি লায়না লৌবা য়াদে। সাউথ-সাউথ ত্রেদকী ওইনা, কলচরেল অমসুং ক্রিএতিব ইদস্ত্রীশিং অসিনা শেন্মিৎলোনগী শাহৌ অমসুং চাউখৎ-থৌরাংগী লেপ্তনা লৈহনবা সোর্স অমা ওইদুনা মরু ওইবা হেনগৎলক্লি। মমাংগী দিকেদ অনিদা, ক্রিএতিব গুদশিংগী সাউথ-সাউথ ত্রেদ শরুক অনি হেনগৎখি, মসিদা চাউখৎলক্লিবা শেন্মিৎলোনশিংগী ইং 2020গী ক্রিএতিব এক্সপোর্তকী 40.5% য়াওরি। মসিগা লোয়ননা, ইং 2011দগী হৌদুনা, চাউখৎলক্লিবা শেন্মিৎলোনশিংনা চাউখৎলবা শেন্মিৎলোনশিংদগী হেন্না ক্রিএতিব গুদ এক্সপোর্ত তৌখি।

ক্রিএতিব ইন্দস্ত্রীশিং অসিগী মরু ওইবা য়াম্না লৈরবসু, মখোয়গী ইনফোর্মেল স্ত্রকচর অমা ওইবগী মতৌ অসিনা তুং কোইনা শাহৌ লৌবদা মশক থোকপা অয়েৎপা অমদি পীরি। হৌজিক্কী ওইনা, ইনফোর্মেল ইকোনোমীনা মালেমগী ক্রিএতিব ইদস্ত্রীগী চাউরাকপা চাদা 60গী শরুক কল্লি, মসিনা কলচরেল প্রেক্তিস্নরগী থাক্তা চৈথেং পীরি অমসুং মপুং ওইবা শেন্মিৎলোন্দা শিংনবা খরদি পদুমক লৈহল্লি।

CWGগী চেয়রমেন অমসুং কলচর মন্ত্রালয়গী সেক্রেতরী, গোবিন্দ মোহনগী ৱেবিনার হৌদোকপগী ৱারোলদা “ক্রিএতিবিতীবু শৌগৎপা অমসুং মগুন লৈনা লৌবা মতিক লৈবা অমসুং ইনক্লুসিব ওইবা কলচরেল ইকোসীস্তেম অমা লৈহনবা হায়বসিনা মীওই অমা, খুন্নাই অমসুং সোসাইতীদা অফবা শাফু পীবা ঙমগনি। কলচরেল অমসুং ক্রিএতিব সেক্তর অসি অহোংবা পুরকপা, মীওই অমসুং খুন্নাইগী মপাঙ্গল হাপ্পা, ফ্রীদম ওফ এক্সপ্রেসন পুক্নিং থৌগৎপা অমসুং কলচর ৱাংমা লান্নবা ৱারী শাবগী থৌওংশিংদা খোঙজেল হাপ্পা থৌওং অমসু ওইরি। মরম অদুনা, মসি সেক্তর অসিবু শৌগৎপা অমসুং ক্রিএতিবিতী অমসুং ইন্নোভেসন্না চাউখৎপা ঙম্বা অকোয়বগী ফিভম অমা শেম্বা হায়বসি য়াম্না মরু ওই” হায়খি।

ৱেবিনার অসিদা ৱা ঙাঙবগী সেগমেন্ত অহুম লৈখি অমসুং অখঙ-অহৈশিংগী মরী লৈনবা তাইম জোনগী মতুং ইন্না মখোয়না ৱা ঙাঙবগী মতমশিং অসি সেগমেন্তশিং অসিদা য়েন্থোকখি। ৱেবিনার অসিবু ILO, UNCTAD, অমসুং WIPOগী মীহুৎশিংনা মথং-মনাও নাইনা মোদরেত তৌখি। ৱেবিনার অসি UNESCOগী য়ুত্যুব চেন্নেলদা লাইব স্ত্রীম তৌখি।

ৱেবিনার অসিদা G20, গেস্ত লৈবাক অমসুং মালেমগী ওর্গনাইজেসনশিংগী মীহুৎশিংনা দেতা শেয়র তৌদুনা মখোয়গী মশাগী লৈবাক্কী GDPদা ক্রিএতিব ইকোনোমীনা মশক থোক্না তেংবাংখিবগী ফিভমশিং উৎখি। ক্রিএতিব ইকোনোমীনা কলচরেল দাইবর্সিতীবু চঙদবা য়াদবা ৱাখল্লোন্নি হায়না লৌবা অমত্তা ওইবা, হ্যুমেন-সেন্তর্স সোসাইতী অমগী ফম্বাক ওইনসু মথৌ তৌই হায়না অখন্নবা ৱারোল খরনা মিৎয়েং চঙখি। দিজিতেল ইহৌ, অমসুং খ্বাইদগী অনৌবা ওইনা, কোবিদ-19 লাইচৎকী চৈথেংনা পুরকখিবা অহোংবা, মরু ওইনা, চাউখৎলক্লিবা ব্যুজিনেস মোদেল অমসুং কতিং-এজ তেক্নোলোজীগা মরী লৈনবশিং, অসিদা খন্ন-নৈনবশিংনা মিৎয়েং চঙখি।

অখন্নবা মন্ত্রালয় খরা মতাং খরদা শেমখিবা অসিনা খুদম ওইরদুনা কলচরেল অমসুং ক্রিএতিব ইন্দস্ত্রীশিং অসি য়াম্না মরু ওইবা প্রাইওরিতী অমা ওইরক্লি হায়না লৈবাক কয়ানা ফোংদোকখি। কলচরেল প্রেক্তিস্নরশিংগী থাক ফগৎহনবা, কম্পেন্সেসন পীবদা মীচঙ-মীখাই নাইদবা অমসুং কলচরেল সেক্তরদা ইনক্লুসিবিতী অমসুং ইকুইতী হেনগৎহনবদা মিৎয়েং চঙবা পোলিসী কয়া অমসু হৌদোকখ্রে। মসিগা লোয়ননা, হায়রিবা লৈবাকশিং অসিনা ফোর্মেল এজুকেসন, প্রোফেস্নেলাইজেসন অমসুং তেলেন্ত দিভেলপমেন্ততা ইনভেস্ত তৌদুনা কলচরেল সেক্তরদা থবক হেন্না লৈহন্নবা হোৎনবগা লোয়ননা কলচর সেতিলাইত একাউন্ত শিজিন্নদুনা ক্রিএতিব সেক্তরদা  দেতা খোমজিনবগী থবক হেন্না ফগৎহন্নবসু হোৎনরি।

ক্রিএতিব সেক্তরবু কাঙলুপ খায়বদা শিজিন্নবা থৌওং কয়াগী মতাংদসু ৱাহৌদোক কয়া থমখি। মখোয়শিং অসিগী মরক্তগী ৱাখল্লোন খরনা, অখন্নবা নেস্নেল কলচর পোলিসী খরদগী লৌথোকপা মালেম্না য়ানরবা ৱাহন্থোক অমসুং খুদমদা য়ুম্ফম ওইরগা ক্রিএতিব ইকোনোমীগী ময়েক শেংবা অমসুং পুম্নমক্না য়ানরবা হীরম খরা য়াৎপগী তঙাই ফদবা লৈ হায়না মিৎয়েং চঙনখি। অতোপ্পা পাউতাকশিংনা ক্রিএতিব সেক্তরনা GDPদা শরুক তম্লিবা অসিগী চাং ওনবদা মিৎয়েং চঙবা অমসুং G20 লৈবাকশিংগী সস্তেনেবল দিভেলপমেন্ততা মসিনা শাফু পীবগী মতৌদা মিৎয়েং চঙফম থোকই হায়না ফোংদোক্নখি।

মালেমগী ওইবা থীমেতিক ৱেবিনার অসিগী অপুনবা পাউদম অমা পুথোক্তুনা G20 মেম্বর, গেস্ত লৈবাক অমসুং মালেমগী ওর্গনাইজেসনশিংগী মফমদা জুলাই 15-18, 2023দা কর্নাতকাগী হাম্পীদা পাংথোক্কদৌরিবা CWGগী অহুমশুবা মীফমদা পীগনি। রিপোর্ত অসি পুথোকপগী পান্দমদি মতম মতমগী মখা পোন্না লৌশিং শেমগৎপা য়াহন্নবগীদমক্তা CWGগী থবক পাংথোকপদা পুন্না হোৎনমিন্নবা, ৱারী ৱাতাই শানখিবা অমসুং খন্ন-নৈনখিবশিংবু নিংশিংদুনা লৈহৌহনবনি। মরিশুবা প্রাইওরিতী অমা ওইরিবা, কলচর ঙাক শেনবা অমসুং খুমাং চাউশিলহনবদা দিজিতেল তেক্নোলোজী শিজিন্নবা হায়বসিগী মালেমগী ওইবা থীমেতিক ৱেবিনার অসি এপ্রিল 20, 2023দা পাংথোক্কনি। 

*****