প্রধানমন্ত্রীগী লোইশঙ
প্রধান মন্ত্রীনা অসামগী গুৱাহাতিদা সারুসাজাই স্তদিয়মদা লুপা করোর ১০,৯০০ হেনবগী প্রোজেকশিং উরেপ-উয়ুং তমখ্রে, শঙ্গাখ্রে অমসুং মীয়ামদা কৎথোকখ্রে
ব্রাহ্মপুত্রা তুরেলদা পালাশবরী অমসুং সুয়ালকুচি শম্নগদবা থোঙ অমা শানবা অমসুং সিবসাগরদা রঙ্গ ঘর ফজহন্নবা প্রোজেক উরেপ-উয়ুং তমখ্রে
নামরুপ্তা ৫০০ তি.পি.দি মেন্থোল প্লান্ত শঙ্গাখ্রে
রেলৱে প্রোজেক ৫ মীয়ামদা কৎথোকখ্রে
মীওই ১০,০০০ হেনবনা শরুক য়াবা অচৌবা বিহু জগোয় য়েংখি
“মসি ৱাখলনা শাখৎপগী ৱাংমদনি। মসি অখন্নবনি। মসি অসামনি”
“কাইনথংদা অসাম এ-ৱান স্তেৎ অমা ওইরে”
“ভারতমচা খুদিংমক্কী লৌশিং অসি লৈবাক অসিগী লৈহাও অমসুং চৎনবীশিংদগী শেমখিবনি অমসুং মসি চাউখৎলবা ভারতকী য়ুম্ফমসু ওইরি”
“রোঙ্গালি বিহু অসি অসামগী মীয়ামগী থৱায় অমসুং হকচাংগী কুহ্মৈ অমনি”
“চাউখৎলবা ভারত অসি ঐখোয়গী খ্বাইদগী চাউবা মঙলান্নি”
ঙসিদি, অমগা অমগা শম্নবা অসি মাইকৈ মরি লোংবা মহাযজ্ঞ অমনি, লম্বী-থোঙগী শম্নবা, দিজিতেলগী শম্নবা, খুন্নাইগী শম্নবা অমসুং নাৎ-চৎনবীগী শম্নবা”
“অৱাং-নোংপোক্তা থাজনদবগী ফিবম লৈত্রে”
Posted On:
14 APR 2023 7:38PM by PIB Imphal
ঙসি প্রধান মন্ত্রী শ্রী নরেন্দ্র মোদীনা অসামগী গুৱাহাতিদা সারুসাজাই স্তদিয়মদা লুপা করোর ১০,৯০০ হেনবগী প্রোজেকশিং উরেপ-উয়ুং তমখ্রে, শঙ্গাখ্রে অমসুং মীয়ামদা কৎথোকখ্রে। উরেপ-উয়ুং তমখিবা প্রোজেকশিং অদুগী মনুংদা ব্রাহ্মপুত্রা তুরেলদা পালাশবরী অমসুং সুয়ালকুচি শম্নগদবা থোঙ অমা শানবা অমসুং সিবসাগরদা রঙ্গ ঘর ফজহন্নবা প্রোজেক, নামরুপ্তা ৫০০ তি.পি.দি মেন্থোল প্লান্ত শঙ্গাবা অমসুং রেলৱে প্রোজেক ৫ মীয়ামদা কৎথোকপা য়াওখি। প্রধান মন্ত্রীনা মীওই ১০,০০০ হেনবনা শরুক য়াবা ফজরবা বিহু জগোয়গী থৌরম অমসু য়েংখি।
থৌরম অদুদা তিনখিবা মীয়ামদা ৱা ঙাংবদা প্রধান মন্ত্রীনা হায়খি ঙসিগী চিংলেম্লবা থৌরম অসি য়েংখিবা কনাগুম্বা অমনা মসি মহাক্কী পুন্সি চুপ্পা কাউবা ঙম্লরোই। মসি ৱাখলনা শাগৎপগী ৱাংমদনি। মসি অখন্নবনি। মসি অসামনি।ঙসিদি ভারত শীনবা থুংনা ধোলশিং, পেপাশিং অমসুং গোগানাশিংগী মখোল তারগনি। অসামগী কলাকার লিশিং কয়াগী হোৎনবশিং লৈবাক অসিনা অমসুং মালেম্না উরে। বিধান সভা মীখল মনুংদা মহাক্না অসামদা লাকখিবা খোঙচৎ অদু নিংশিংলদুনা মহাক্না হায়খি নোংমদি মীয়াম্না ‘এ ফোর অসাম’ হায়রগনি অমসুং কাইনাথংদা রাজ্য অসি এ ৱান স্তেৎ অমা ওইরে। বিহু কুহ্মৈগী থৌরম অসিদা প্রধান মন্ত্রীনা অসাম অমসুং লৈবাক অসিগী মীয়ামদা য়াইফ-পাউজেল পীখি।
প্রধান মন্ত্রীনা হায়খি পঞ্জাব য়াওনা অৱাংথংবা ভারতকী রাজ্যশিংদা বৈশাখী পাংথোক্লি। বাংলা মীয়াম্না পোইলা বৈশাখী পাংথোকপা মতমদা, কেরলাদা বিসু পাংথোক্কনি। বিহু কুহ্মৈসু পাংথোক্লি। মসি এক ভারত শ্রেস্থা ভারতকী মমিনি অমসুং সবকা প্রায়াসকা লোয়ন্না চাউখৎলবা ভারত অমা ওইনবা ৱাশক মপুংফানবা পীবা ইথিল অমনি। ঙসিগী প্রোজেকশিং অসিগী মনুংদা এ.আই.আই.এম.এস, মেদিকেল কলেজ অহুম, রেলৱেজ প্রোজেকশিং, ব্রাহ্মপুত্রা মথক্তা থোঙ শাবা অমসুং মেথানোল প্লান্ত অমসুং রঙ্গ ঘর ফজহনবা য়াওরি।
মখোয়গী নাৎ কনবা অমসুং ঙসি পাংথোকখিবা চিংলেম্লবা থৌরম অদুগীদমক অসামগী মীয়াম থাগৎলদুনা প্রধান মন্ত্রীনা হায়খি ঐখোয়গী কুহ্মৈশিং অসি নাৎকী ফজবশিং খক নত্তনা মীওই খুদিংমক অমতা ওইনবা অমসুং মাঙলোমদা চঙশিন্নবা ইথিল পীনবা পাম্বৈ অমনি। রোঙ্গালি বিহু অসি অসামগী মীয়ামগী থৱায় অমসুং হকচাংগী কুহ্মৈ অমনি। মসিনা খেন্নবশিং লৈহন্দ্রে অমসুং
মীওইবা অমসুং মহৌশাগী মরক্তা মপুংফানা নুংশিন্না হিংমিন্নবগী খুদম অমনি।
প্রধান মন্ত্রীনা হায়খি ভারতকী তোপ-তোপ্পা মশক্তি চহি লিশিং কয়া ভারতমচা খুদিংমক শম্নহল্লিবা লৈবাক অসিগী চৎনবীশিংনি। মীনাই ওইরিঙৈগী অমম্বা মতমদা লৈবাক অসি অমতা ওইনা লেপখি অমসুং ভারতকী নাৎ অমসুং হেরিতেচদা অকনবা শাফু কয়া মায়োক্নখি। শক্তি পায়বশিং কয়ারক হোঙবা উরবসু ভারত শিবা নাইদনা লৈখি অমসুং লৈঙাকপশিং লাকখি অমসুং চৎখি। ভারতমচা খুদিংমক্কী লৌশিং অসি লৈবাক অসিগী লৈহাও অমসুং চৎনবীশিংদগী শেমখিবনি অমসুং মসি চাউখৎলবা ভারতকী য়ুম্ফমসু ওইরি।
মমিং লৈরবা অইবা অমসুং ফিল্মগী মীওই জয়তি প্রসাদ অগরৱালাগী ঈশৈ অমা বিশ্বা বিজয় নোজাৱান নিংশিংলদুনা প্রধান মন্ত্রীনা হায়খি ঈশৈ অসি অসাম অমসুং ভারত শীনবা থুংবগী নহারোলশিং পুক্নিং থৌগৎপা ঈশৈ অমা ওইরে। ইমা ভারতনা কৌবা তানবা অমসুং অহোঙবা পুরকপদা শরুক য়ানবা ভারতকী নহারোলশিংদা ঈশৈ অসিনা হায়রি। নিংতম্বা ভারত ওইনবা অচৌবা মঙলান মঙলিঙৈদা ঈশৈ অসি ইখিবনি, ঙসি ঐখোয় নিংতম্লে, চাউখৎলবা ভারত অসি খ্বাইদগী চাউবা মঙনি। ভারত অমসুং অসামগী নহারোলশিং মাঙলোমদা চঙশিনগদবনি অমসুং চাউখৎলবা ভারতকী থোঙশিং হাংদোক্কদবনি।
কমদৌনা মহাক্না অসিগুম্বা অচৌবা পান্দমশিং ফংগনি অমসুং কনানা চাউখৎলবা ভারতকী দাইত্ব লৌগনি হায়না মহাক্না মীয়ামগা ৱারি শানবদা ফোঙদোকখিবা অদু পল্লদুনা, প্রধান মন্ত্রীনা হায়খি মসি লৈবাক অসিগী মীয়ামগী থাজবনি, অমসুং ভারতমচা করোর ১৪০গী থাজবনি। নাগরিকশিংগী লম্বীদা অপনবা ওইরিবশিং লৌথোক্নবা সরকারনা পুকচেল শেংনা হোৎনরি অমসুং ঙসিগী প্রোজেকশিং অসি মসিগী মতিক চারবা খুদম অমনি।
প্রধান মন্ত্রীনা হায়খি মতম শাংনা, শম্নবা হায়রগা অখুবা মীৎয়েংদা মফম অমদগী অতোপ্পা মফম অমদা চৎপা হায়না লৌনরম্মী। ঙসিদি, শম্নবগী মতাংদা লৈরিবা ৱাখল্লোন হোঙলে। ঙসিদি, অমগা অমগা শম্নবা অসি মাইকৈ মরি লোংবা মহাযজ্ঞ অমনি। হায়রিবা মাইকৈ মরি অদুদি লম্বী-থোঙগী শম্নবা, দিজিতেলগী শম্নবা, খুন্নাইগী শম্নবা অমসুং নাৎ-চৎনবীগী শম্নবা অসিনি।
নাৎ-চৎনবীগী শম্নবগী মতাংদা প্রধান মন্ত্রীনা হায়খি অসামগী মমিং লৈরবা লান্মী লচিৎ বোরফুকানগী চহি ৪০০শুবা থৌরম দিল্লিদা পাংথোকখিবা অদু নাৎ-চৎনবী শম্নবগী খুদম্নি। নাৎ-চৎনবীগী শম্নবা ওইনা রানি গাইদিলিয়ু, কাসি তামিল শঙ্গমম, সৌরাস্ত্রা তামিল শঙ্গমম অমসুং কেদারনাথ-কমাখ্যা পনবা য়াই। ঙসিদি ৱাখল্লোন অমসুং কলচরগী মরক্তা শম্নবা অসি মরা তারে। হন্দক চীফ মিনিস্তর হিমান্ত বিশ্বা শর্মা মধাবপুর মেলা য়েংখি অমসুং কৃষ্ণ রুকমনিগী মরী অসিনা অৱাং-নোংপোক্কা নোংচুথংবা ভারতকা শম্নহল্লে। মুগা সিল্ক, তেচপুর লেসু, জোহা রাইস, বোকা চাউল, কাজি নেমুগী মতুংদা, হৌজিক গামোসাসু জি.আই তেগ ফংলে। মসি অসামগী কলা অমসুং ঐখোয়গী ইচলশিংগী হোৎনবা লৈবাক্কী অতোপ্পা মফমশিংদা য়ৌহন্নবা হোৎনবা অমনি।
তুরিজমগী খুৎথাংদা ভারতকী তোঙান-তোঙানবা নাৎশিং মালেম শীনবা থুংনা মশক তাক্লিবা অসিগী মতাংদা প্রধান মন্ত্রীনা হায়খি হায়রিবা মফমশিং য়েংলিবা লমকোয়বশিংনা শেন চাদিং তৌবা খক নত্তনা নিংশিংবা ওইনা মখোয় মশামক নাৎকী শরুক অমা ওইখি। মতম অয়াম্বা অৱাং-নোংপোক লমদমগী লম্বী-থোঙ মতিক চাদবগী ৱাফম অমা লৈরি অদুবু হৌজিক লৈরিবা সরকার অসিনা লমদম অসিদা লম্বী,রেল অমসুং এয়রগী খুদোংচাবশিং হেন্না শেমগৎলে।
হৌখিবা চহি ৯দা লম্বী-থোঙ শেম্বা হেনগৎলকপগী মতাংদা প্রধান মন্ত্রীনা হায়খি অৱাং-নোংপোক্কী খুঙ্গং অয়াম্বা লম্বী লৈরে, অনৌবা এয়রপোর্তশিং থবক হৌরে অমসুং অহানবা ওইনা কম্মর্সিএল ফ্লাইতশিং তারে, মনিপুর অমসুং ত্রিপুরাদা ব্রোদ গেজ ত্রেনশিং য়ৌরে, মমাঙদগী শরুক অহুম হেন্না য়াংনা অৱাং-নোংপোক্তা অনৌবা রেল লাইনশিং শেমগৎলে অমসুং মমাঙদগী শরুক ১০ য়াংনা রেল লাইনশিং অনি শুহনবগী থবক পায়খৎলে।
প্রধান মন্ত্রীনা হায়খি ঙসি শঙ্গারিবা লুপা করোর ৬০০০ হেনবগী রেলৱে প্রোজেক ৫ অসিনা অসাম য়াওনা লমদম অসিগী অয়াম্বা শরুক চাউখৎপগী খোঙজেল য়াংখৎলগনি। অহানবা ওইনা অসামগী য়াম্লবা শরুক অমা রেল লাইন য়ৌরে অমসুং রেল লাইনশিং মশিং অনি শুহনবা অসিনা অসাম, মনিপুর, মিজোরম, ত্রিপুরা অমসুং নাগালেন্দ লাইনা চৎথোক-চৎশিন তৌবা য়ারগনি। লাইনিংগী মফমশিং অমসুং লমকোয়ফমশিংদা চৎথোক-চৎশিন তৌবদা হৌজিক য়াম্না লাইরগনি।
বোগীবিল থোঙ অমসুং ধোলা-সাদিয়া-ভুপেন হাজারিকা থোঙ শঙ্গানবা মহাক্না লাকখিবা অদু নিংশিংলদুনা প্রধান মন্ত্রীনা হায়খি হৌখিবা চহি ৯দা অনৌবা প্রোজেকশিং য়াংনা অমসুং পাক-চাউনা পায়খৎলে। হৌখিবা চহি ৯দা পায়খৎখিবা থবকশিংনা মরম ওইদুনা ব্রাহ্মপুত্রা মথক্তা থোঙ কয়া লৈরে অমসুং হায়রিবা থোঙশিং অমসুং ঙসিগী থোঙ অসিনা খুয়ালকুসি সিল্ক ইন্দস্ত্রি কান্নবা ফংলগনি।
খুন্নাইগী শম্নবা হেনগৎহন্নবা হৌখিবা চহি ৯দা দবল-ইঞ্জিন সরকারনা পায়খৎখিবা থবকশিং পল্লদুনা প্রধান মন্ত্রীনা হায়খি শ্বাছ ভারত মিসন্না মরম ওইদুনা খুঙ্গং লাখ কয়া হৌজিক লমহাংদা খোঙহামদ্রে, মীওই করোর কয়াগী য়ুম শাবদা পি.এম অৱাস য়োজনানা মতেং পাংলে, সাউভাগ্যা য়োজননা মৈ ফংহল্লে, উজ্জৱালা য়োজননা গ্যাস সিলিন্দরশিং পীরে অমসুং জল জিবন মিসন্না তোতি ঈশিং ফংহল্লে। দিজিতেল ইন্দিয়া মিসন অমসুং মমল হোংবা দেতানা মীয়াম হিংবদা লাইহল্লে। হায়রিবা য়ুমশিং, হায়রিবা ইমুংশিং অসিনা চাউখৎপা পাম্বা ভারতকী মহুৎশীল্লে। মখোয় চাউখৎলবা ভারত অমগী মঙ মঙফাওন্নবা ভারতকী মপাঙ্গলনি।
প্রধান মন্ত্রীনা হায়খি চাউখৎপা পুরক্নবা, থাজনবগী লংলাসু চপ মান্ননা কনগদবনি। ঐখোয়গী সরকারনা হোৎনবদগী, ঙসি অৱাং-নোংপোক্কী মফম খুদিংমক তুংকোইনা শান্তি লৈরে। নহারোল কয়া হিংসাগী লম্বী থাদোক্লে অমসুং চাউখৎপগী লম্বীদা লাক্লে। অৱাং-নোংপোক্তা থাজনদবগী ফিবম লৈত্রে। থম্মোয়শিংগী মরক্তা লৈরম্বা অরাপ্পা মাঙশিল্লক্লে। নিংতম্বগী অমৃত কালদা চাউখৎলবা ভারত অমা ওইনবা, ঐখোয়না মসিগী ফিবম অসি ফগৎহনগদবনি। সবকা সাথ, সবকা বিকাস, সবকা বিশ্বাস অমসুং সবকা প্রায়াসকী থৌনাগা লোয়ন্না ঐখোয় মাঙলোমদা চঙশিনগদবনি।
থৌরম অদুদা অসামগী রাজ্যপাল শ্রী গুলাব চান্দ কাতারিয়া, অসামগী চীফ মিনিস্তর শ্রী হিমান্ত বিশ্বা শর্মা, রেলৱেজগী য়ুনিয়ন মিনিস্তর শ্রী অশ্বিনি বৈষ্ণো, পোর্তস, সিপ্পিং অমসুং ৱাতরৱেজগী য়ুনিয়ন মিনিস্তর শ্রী সর্বনন্দা সোনোৱাল, পেত্রোলিয়ম অমসুং নেচরেল গ্যাসকী রাজ্য মন্ত্রী শ্রী রমেশ্বর তেলি অমসুং অসাম সরকারগী মিনিস্তরশিং শরুক য়াখি।
নুঙগীৱারোল
প্রধান মন্ত্রীনা পলাসবারী অমসুং সুয়ালকুচি শম্নহনগদবা ব্রহ্মপুত্র তুরেল মথক্তা শাগদবা থোঙ অমগী উরেপ উয়ুং তমখ্রে। থোঙ অসিনা লমদম অসিদা তঙায় ফদনা মথৌ তারিবা লম্বী-থোঙ শম্নহনবগী ফীভম ফংহনগনি। মহাক্না দিব্রুগরগী নামরুপ্তা ৫০০ তি.পি.দি. মিথানোল প্লান্ত অমসু মথৌ তৌহনখ্রে। মহাক্না লমদম অসিগী রেলৱেগী তোঙান তোঙানবা সেক্সনশিং দব্লিং অমসুং ইলেক্ত্রিফিকেসন তৌবা য়াওনা রেলৱে প্রোজেক্ত মঙাশু শঙ্গাখ্রে।
শঙ্গাখ্রবা রেলৱে প্রোজেক্তশিং অদুদা দিগারু – লুমদিং সেক্সন; গৌরিপুর – অভয়পুরী সেক্সন; নিউ বোঙ্গাইগাও – ধুপ ধারা সেক্সন দব্লিং তৌবা; রানিনগর জলপাইগুরী – গুৱাহাতী সেক্সন ইলেক্ত্রিফিকেসন তৌবা; সেঞ্চো – সিলঘাত তাউন অমদি সেঞ্চো – মাইরাবারি সেক্সন ইলেক্ত্রিফিকেসন তৌবা য়াওরি।
প্রধান মন্ত্রীনা সিবসাগরদা লম কোয়বশিংগী খুদোংচাবশিং হেন্না ফংহন্নবা রঙ্গ ঘর শেমজিন শাজিনবগী প্রোজেক্তকী উরেপ উয়ুংসু তমখ্রে। রঙ্গ ঘর শেমজিন শাজিনবগী প্রোজেক্ত অসিনা অচৌবা ঈশিং তুংফমদুগী অকোয়বদা শাগবা ঈশিং চাইবীগী সো অমসুং অহোম দাইনাস্তীগী পুৱারী উৎকদবা, এদভেঞ্চর হি তোংনবগীদমক জেত্তীগা লোয়নবা বোত হাউস, লমদমদুগী খুৎশা-হৈবগী শিন্ফমবু য়োকখৎনবা অর্তিজন ভিলেজ, চাবা থকপা পামজবশিংগীদমক খেন্নবা মখলগী ইথ্নিক কুইজিন্নচিংবা ফেসিলিতীশিং ফংহনগনি। সিবসাগরদা লৈবা রঙ্গ ঘাত অসি অহোমগী নাৎ অমদি চৎনবী উৎলিবা খ্বায়দগী মশক নাইবা স্ত্রকচরশিংগী মরক্তা অমনি। মসি অহোম নিংথৌ স্বরগদেও প্রমত্ত সিংহানা ১৮শুবা চহিচাদা শারম্বনি।
প্রধান মন্ত্রীনা অসামিজ মীয়ামগী নাৎকী অমদি পুন্সিগী শক্তমগী মাস্কোৎ অমা ওইনা বিহু জগোয়বু মালেম পুম্বদা মশক উত্থোক্নবগীদমক শিল্লিবা মেকা বিহু জগোয়সু মীৎয়েং তাখি। থৌরম অসিদা মফম অমখক্তদা পর্ফোর্মর/ বিহু আর্তিস্ত ১০,০০০ হেনবনা শরুক য়াদুনা মালেমগী ওইনা মফম অমখক্তদা খ্বায়দগী চাউনা বিহু জগোয় উৎপা কাঙলুপ্তা অনৌবা জীনেস ৱর্ল্দ রেকোর্দ অমা থমখ্রে। মসিদা স্তেত অসিগী দিস্ত্রক্ত ৩১দগী লাকপা আর্তিস্তশিংনা শরুক য়াখি।
*****
(Release ID: 1916788)
Visitor Counter : 108
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam