প্রধান মন্ত্রী, শ্রী নরেন্দ্র মোদীনা ঙসি তেলঙ্গানাগী হাইদরাবাদতা লৈবা পরেদ গ্রাউন্দদা লুপা করোর ১১,৩০০ হেনবগী তোঙান-তোঙানবা প্রোজেক্তশিং উরেপ-উয়ুং তমখ্রে অমসুং জাতিদা কত্থোকখ্রে। প্রোজেক্তশিং অসিদা হাইদরাবাদকী এম্স বীবীনগর, নেস্নেল হায়ৱে প্রোজেক্ত মঙা অমসুং সিকন্দরাবাদ রেলৱে স্তেসন নৌনা শেমগৎ-শাগৎপগী উরেপ-উয়ুং তম্বা য়াওরি। মহাক্না রেলৱেজকা মরী লৈনবা অতোপ্পা চাউখৎ-থৌরাংগী প্রোজেক্তশিংসু কত্থোকখি। ঙসি অঙনবদা হাইদরাবাদতা লৈবা সিকন্দরাবাদ রেলৱে স্তেসন্দা সিকন্দরাবাদ-তিরুপতি ভন্দে ভারত এক্সপ্রেসসু লমথাখি।

থৌরম অসিদা ৱা ঙাংলদুনা প্রধান মন্ত্রীনা তেলঙ্গানাগী রাজ্যগী চাউখৎ-থৌরাং খোঙজেল য়াংশিন্নবা খুদোংচাবা পীবিখিবগীদমক তৌবীমল খঙবা উৎখি। মহাক্না হাইদরাবাদকী আই.তি. সিতীগা ভগবান বেঙ্কতেশ্বরাগী খুবম ওইরিবা, তিরুপতি শম্নহনগদৌরিবা সিকন্দরাবাদ-তিরুপতি ভন্দে ভারত এক্সপ্রেস ঙসি অঙনবদা সিকন্দরাবাদ রেলৱে স্তেসন্দগী লমথাখিবা অদু নীংশিংখি। শ্রী মোদীনা হায়, “সিকন্দরাবাদ-তিরুপতি ভন্দে ভারত এক্সপ্রেসনা থাজবা, মোদর্নিতী, তেক্নোলোজী অমসুং তুরিজম মাইপাক্না শম্নহল্লগনি। প্রধান মন্ত্রীনা তেলঙ্গানাগী প্রজাশিংদা রেলৱেজ অমসুং রোদ কন্নেক্তিবিতী অমদি হেল্থ ইনফ্রাস্ত্রকচরগী চাউখৎ থৌরাংগী মরী লৈনবা লুপা করোর ১১,৩০০ হেনবা ঙসিগী প্রোজেক্তশিং অসিগীদমক নুংঙাইবা ফোংদোকখি।

প্রধান মন্ত্রীনা তেলঙ্গানা অসি কেন্দ্রদা লৈরিবা হৌজিক পাল্লিবা সরকারগা চপ মান্নবা মতমদগী লৈরকখি হায়না ফোঙদোকখি অমসুং রাজ্য অসি শেম্নবা হোৎনবদা শরুক তমখিবা মীওইশিংদা মকোক নোন্না খুরুমখি। ‘সবকা সাথ, সবকা বিকাস, সবকা বিশ্বাস, সবকা প্রয়াস’কী ৱাখল্লোন অদু ফোঙদোক্লদুনা শ্রী মোদীনা হায়খি, “তেলঙ্গানাগী চাউখৎ-থৌরাংগী মরী লৈনবা রাজ্য অসিগী মঙলানশিং থুংহনবা হায়বা অসি কেন্দ্রদা লৈরিবা সরকারগী থৌদাংনি”। মহাক্না হায়খি হৌখিবা চহি মঙা অসিদা শেমখিবা ভারতকী দিবেলপমেন্ত মোদেল অসিদগী তেলঙ্গানানা চাউনা কান্নবা লৌহৌবা ঙম্নবা অখন্নবা মীৎয়েং চংখি। সহরশিংদা পুরক্লিবা চাউখৎ-থৌরাংগী খুদম খরা পীরদুনা প্রধান মন্ত্রীনা হায়খি হৌখিবা চহি মাপলদা মেত্রো নেৎৱার্ক কিমি ৭০ শেমখি অমসুং হাইদরাবাদ মল্তি-মোদেল ত্রান্সপোর্ত সিস্তেম (এম.এম.তি.এস.) শেমগৎপদা খুমাং চাউশিনখি। ঙসি এম.এম.তি.এস. সর্ভিস ১৩ হৌখিবগী মতাংদা প্রধান মন্ত্রীনা আবকি রাজ্য অসিদা মসি পাকথোক চাউথোকহন্নবগিদমক তেলঙ্গানাদা লুপা করোর ৬০০ এল্লোকেৎ তৌখি, মসিনা হাইদরাবাদ, সিকন্দরাবাদ অমসুং মনাক নকপদা লৈবা জিলাশিংদা লেরিবা প্রজা লাখ কয়াদা কান্নবা পীরগনি অমদি অনৌবা বিজিনেস হব লৈহল্লগনি অমসুং ইনভেস্তমেন্ত লাকহল্লগনি।

কোবিদ-১৯ লাইচৎ অমসুং লৈবাক অনিগী মরক্তা হৌজিক চত্থরিবা লান্না মরম ওইদুনা মালেমগী শেন্মীৎলোন্দা তম্বা ঙমদবা ফীভম ওইরক্লিবা অসিগী মতাংদা প্রধান মন্ত্রীনা হায়খি ভারত অসি মোদর্ন ইনফ্রাস্ত্রকচরদা চাউনা ইনভেস্তমেন্ত তৌখিবা লৈবাক খরগী মনুংদা অমা ওইরি। মহাক্না হায়খি চহী অসিগী বজেৎতা ভারত্ত মোদর্ন ইনফ্রাস্ত্রকচর শেমগৎনবগীদমক লুপা করোর লাখ ১০ খাক্তুনা থমখি। মহাক্না হায়খি হৌখিবা চহি মাপলদা তেলঙ্গানাগী রেলৱে বজেৎ অসি শরুক তরাতরেৎ হেনগৎখি। অমসুং অনৌবা রেল লাইনশিং শেম্বা, রেল লাইন দবলিং তৌবা অমসুং ইলেক্ত্রিফিকেসনগী থবক অসি অতেনবা মতমদা তৌবা ঙমখি। মসিনা হাইদরাবাদ অমসুং বেঙ্গলোরগী মরক্তা কন্নেক্তিবিতী ফগৎহল্লগনি হায়না ফোঙদোক্লদুনা মহাক্না হায়, “সিকন্দরাবাদ-মহাবুবনগর প্রোজেক্ত ইলেক্ত্রিফিকেসন তৌবসি মসিগী অচৌবা খুদমনি”। প্রধান মন্ত্রীনা সিকন্দরাবাদ রেলৱে স্তেসন নৌনা শেমগৎ-শাগৎপা অসি লৈবাক্কী মরু ওইবা রেলৱে স্তেসনশিং মোদর্নাইজ তৌনবগী কেম্পেনগী শরুক্নি।

প্রধান মন্ত্রীনা হায়খি, রেলৱেজকা লোয়ননা তেলঙ্গানাগী হায়ৱে নেৎৱার্ক অসিসু খোংজেল য়াংনা শেমগৎলি অমসুং ঙসি হায়ৱে প্রোজেক্ত মরি উরেপ-উয়ুং তমখি হায়নসু ফোঙদোকখি। লুপা করোর ২৩০০দা শেমখিবা হায়ৱেগী আক্কালকোৎ-কুর্নুল সেক্সন, লুপা করোর ৯০০গী কালৱাকুর্তী-কোল্লাপুর সেক্সন, অমসুং লুপা করোর ২৭০০গী শেনফমফা খাম্মাম-দেবরাপল্লী সেক্সনগী মতাংদা পল্লদুনা কেন্দ্র সরকারনা মপুং ফাবা সক্তিগা লোয়ননা তেলঙ্গানাদা মোদর্ন হায়ৱেশিং শেমগৎনবা লমজিংলি হায়না প্রধান মন্ত্রীনা ফোঙদোকখি। শ্রী মোদীনা হায়খি তেলঙ্গানাগী নেস্নেল হায়ৱেগী অশাংবা অসি ২০১৪দা রাজ্য অসি শেমখিবা মতমদা কিলোমিতর ২৫০০ ওইরম্বদগী ঙসি কিলোমিতর ৫০০০ হেন্না শেমদুনা শরুক অনি হেনগৎহনবা অসিদা কেন্দ্র সরকারনা লুপা করোর ৩৫০০০ চাদিং তৌখি। মহাক্না মখা তারদুনা হায় অওনবা পুরক্কদবা হাইদরাবাদ রিং রোদ য়াওনা তেলঙ্গানাদা লুপা করোর ৬০,০০০রোমগী রোদ প্রোজেক্তকী থবক পাইখৎলি।

শ্রী মোদীনা হায়খি “কেন্দ্র সরকারনা তেলঙ্গানাদা ইন্দস্ত্রী অমসুং এগ্রিকলচর অনিমক চাউখৎহনবদা মীৎয়েং চংলি”। তেক্সতাইল অসি লৌমী অমদি শিন্মী অনিমক্তা শক্তি পীরিবা অদুগুম্বা ইন্দস্ত্রী অমনি হায়না ফোঙদোক্লদুনা প্রধান মন্ত্রীনা হায়খি সরকার অসিনা লৈবাক শিনবা থুংবদা মেগা তেক্সতাইল পার্ক ৭ লিংখৎনবা ৱারেপ লৌখি অমসুং তেলঙ্গানাদা অমা ওইগনি। মহাক্না মখা তারদুনা হায়খি মসিনা নহারোলশিংগীদমক অনৌবা থবক্কী খুদোংচাবশিং পীগনি। প্রধান মন্ত্রীনা হায় সরকার অসিনা তেলঙ্গানাদা এজুকেসন অমসুং হেল্থতসু ইনভেস্ত তৌরি। মহাক্না মখা তারদুনা হায় “ঙসিগী প্রোজেক্তশিং অসিনা তেলঙ্গানাদা ইজ ওফ ত্রেবেল, ইজ ওফ লিবিং অমসুং ইজ ওফ দুইং বিজিনেস হেনগৎহল্লগনি”। অদুম ওইনমক রাজ্য সরকারদগী মতেং ফংবা ৱাৎপনা মরম ওইদুনা কেন্দ্রগী প্রোজেক্ত কয়ামরুম লোইশিনবদা থিন্থরিবা অসিদা প্রধান মন্ত্রীনা নুংঙাইতবা ফোঙদোকখি। মসিনা তেলঙ্গানাগী মীয়ামদা অমাংবা পীরি হায়না ফোঙদোক্লদুনা প্রধান মন্ত্রীনা রাজ্য সরকারদা চাউখৎ-থৌরাংগী মরী লৈনবা থবকশিংদা অপনবা পীদনবা অমসুং খোঙজেল য়াংশিনহন্নবা হায়খি।

ঐখোয়গী সরকারগী মরু ওইবা অসি ইরৈবাকচাশিংগী আশা,  অনীংবা, অমসুং মঙলানশিং থুংহনবনি হায়না ফোঙদোক্লদুনা প্রধান মন্ত্রীনা মীওই খুজোক খরনা চাউখৎ থৌরাংনা খুমাং চাউশিনবদা য়াম্না য়ানীংদবা ফোঙদোক্লিবা অসিগী মতাংদা শাওনীংবা ফোঙদোকখি। মহাক্না হায়খি নেপোতিজম অমসুং শেঞ্জা-থুমজা য়োকখৎলিবা মীওইশিংনা লৈবাক্কী অফবা অমসুং খুন্নাইগী য়াইফনবা কৈদৌনুংদা খল্লোই অমরোমদা মখোয়না থমোয় শেংনা থবক তৌরিবশিংদা খুদোংচাবা থোকহল্লি। প্রধান মন্ত্রীনা তেলঙ্গানাগী মীয়ামদা চেকশিনৱা থম্লদুনা হায়খি মখোয়না প্রোজেক্ত অমসুং ইনভেস্তমেন্ত খুদিংদা মখোয়গী ইমুংগী কান্নবা খক্তা য়েংখি।

শেঞ্জা-থুমজা অমসুং নেপোতিজমগী মরক্তা লৈরিবা মান্নবশিং মতাংদা প্রধান মন্ত্রীনা শেঞ্জা-থুমজা অসি নেপোতিজম লৈবা মফমদগী হৌরকই হায়না ফোঙদোকখি। প্রধান মন্ত্রীনা হায়, “ফেমিলিজম অমসুং দাইনাস্তিক পোলিতিক্সকী মপুং ওইবা মন্ত্র অসি কন্ত্রোলনি। অসিগুম্বা প্রন্সিপলশিংগী মহাক্কী ক্রিতিজম অসিগী মতাংদা প্রধান মন্ত্রীনা হায়খি শাগৈ-নাতৈ হায়বা অসিনা সিস্তেম খুদিংমক্তা মখোয়না খুদুম চনশিনখি অমসুং কনাগুম্বা অমনা মখোয়না খুদুম চল্লিবা অদুবু শীংনরুবদা শাওনীংবা পোকই। দাইরেক্ত বেনিফিৎ ত্রান্সফর সিস্তেম অমসুং লৈবাক শিনবা থুংবদা দিজিতেল পেমেন্ত প্রমোসন তৌরিবা অসি খুদম ওইনা পীরদুনা প্রধান মন্ত্রীনা বেনিফিসরীনা ফংগদবা কান্নবা অদু কন্ত্রোল তৌদুনা থমখি দাইনাস্তিক ফোর্সশিংদা খুৎথিন্দুনা চৈখি অমসুং মসিগী ফীভম অসিদগী থোরক্লিবা ৱাহন্থোক অহুমগী মতাংদা শন্দোক্না ফোঙদোকখি। অহানবদা প্রধান মন্ত্রীনা হায়খি, মখা তানা ইমুং-মনুংশিংবু থাগৎকদবনি, অনিশুবদা শেঞ্জা-থুমজাদগী লাকপা শেল অসি ইমুং-মনুংগী ওইগদবনি অমসুং অহুমশুবদা লায়রবগীদমক থাখিবা শেল অসি শেঞ্জা-থুমজানা থমহৎলবা ইকোসিস্তেমদা অদুমক লাক্কদবনি। প্রোতেস্ত তৌবা ওইনা রাজনিতী দলশিংনা ৱায়েল শঙদা চৎখি অদুবু চৈথেং নংখি হায়রদুনা শ্রী মোদীনা হায়খি, “ঙসি মোদীনা শেঞ্জা-থুমজাগী তশেংবা হৌরকফমদা লান্দাখি। মরম অসিনা মীওইশিং অসিদা চৈথেং পীখি অমসুং তৌরিবা থবক খুদিংমক অশাওবনা তৌহনখি”।

তশেংবা ৱাখল্লোন্দা দেমোক্রেসী মপাঙ্গল কনখৎহন্নবা সবকা বিকাসকী (মীপুম খুদিংমক্কী চাউখৎ-থৌরাং) ৱাখল্লোনগা লোয়ননা থবক তৌরবা মতমদা সম্বিধানগী তশেংবা ৱাখল্লোন অদু ফংবা ঙম্মি। প্রধান মন্ত্রীনা নৌহৌনা হায়খো মদুদি লৈবাক পুম্বনা ২০১৪দা দাইনাস্তিক পোলিতিক্সকী য়োৎলিংতগী কেন্দ্র সরকারনা মনীং তমখিবগী ফল উবা ফংখি। হৌখিবা চহি ৯দা লৈবাক্কী ইমা-ইবেন, ইচে-ইচলশিং অমসুং ইচানুপী করোর ১১না তোইলেৎকী খুদোংচাবা ফংখি মসিদা তেলঙ্গানাদগী ইমুং লাখ ৩০ হেন্না য়াওখি। মহাক্না মখা তারদুনা হায়খি হৌখিবা চহি ৯দা লৈবাক্কী ইচে-ইচল অমসুং ইচানুপী করোর ৯ হেনবনা লেম্না উজ্জ্বলা গ্যাস কন্নেক্সনশিং ফংখি, মসিদা তেলঙ্গানাগী লায়রবা ইমুং লাখ ১১ হেন্না য়াওখি।

মহাক্না হায়খি ঙসি লায়রবা মীওই করোর ৮০দা ঐখোয়গী সরকারনা লেম্না রাসন পীখি, লায়রশিংদা লুপা লাখ ৫ ফাওবগী লেম্না লায়েং ফংহনখি, অহানবা ওইনা তেলঙ্গানাগী ইমুং করোর ১না জন ধন বেঙ্ক একাউন্তশিং  হাংখি, তেলঙ্গানাগী অপীকপা ওন্তপ্রিনোর লাখ অনি মখাইনা গরেন্তী য়াওদনা মুদ্রা লোন ফংখি, অহানবা ওইনা স্ত্রীৎ-ভেন্দর লাখ ৫না বেঙ্ক লোনশিং ফংখি, অমসুং তেলঙ্গানাগী অপীকপা লৌমী লাখ ৪০ হেনবনা পি.এম. কিসান সম্মান নিধিগী মখাদা লুপা করোর লিশিং ৯ ফংখি।

প্রধান মন্ত্রীনা হায়খি, “লৈবাক্না ‘তুস্তিকরন’দগী লাপনা লৈদুনা ‘সন্তুস্তিকরন’গী মাইকৈদা চংশিল্লিবা মতমদা তশেংবা সোসিএল জস্তিস ফংবা ঙম্মি”। মহাক্না হায়খি তেলঙ্গানা য়াওনা লৈবাক পুম্বনা সন্তুস্তিকরনগী লম্বীদা চংশিনবা পাম্মি অমসুং সবকা প্রয়াসকা লোয়ননা চাউখৎ মাইকৈদা শরুক তম্নীংলি। তেলঙ্গানাগী চাউখৎ খোঙচৎতা মথংগী চহি ২৫ অসি মরু ওই হায়না ফোঙদোক্লদুনা প্রধান মন্ত্রীনা লোইশিনবদা হায়খি, “আজাদী কা অমৃত মহোৎসবকী মতমদা চাউখৎপা ভারত অমা শেম্নবগীদমক তেলঙ্গানা খোঙজেল য়াংনা চাউখৎহনবা য়াম্না মরু ওই”।

থৌরম অসিদা তেলঙ্গানাগী রাজ্যপাল, দা. তামিলিসাই সোন্দরারজন, রেলৱেজকী কেন্দ্র মন্ত্রী, শ্রী অশ্বিনি বৈশ্নো, তুরিজমগী কেন্দ্র মন্ত্রী, শ্রী জি কিশন রেদ্দী, মালকাজগিরিগী মেম্বর ওফ পার্লিয়ামেন্ত, শ্রী এ রেবন্ত রেদ্দী অমসুং তেলঙ্গানা সরকারগী মন্ত্রীশিংনা শরুক য়াখি।

বেকগ্রাউন্দ

আই.তি সহর হাইদরাবাদ অমসুং ভগবান বেঙ্কতেশ্বরগী লৈফম তিরুপতিগা শম্নবা, সিকন্দরবাদ-তিরুপতি ভন্দে ভারত এক্সপ্রেস অসি তেল্লবা থা অহুমগী মনুংদা তেলঙ্গানাদগী চেনবা হৌগদবা অনিশুবা ভন্দে ভারত ত্রেন্নি। ত্রেন অসিনা সহর অনিগী মরক্তা চৎথোক-চৎশিন্দা চঙবা মতম পুং ৩:৩০দা হন্থহনগনি অমসুং মরুওইনা লাই খুরুম্বা লাকপশিং কান্নগনি।

লুপা করোর ৭২০ চঙনা অমুক হন্না শেমগৎকদৌরিবা সিকন্দরবাদ রেলৱে স্তেসন অসিদা মালেম থাক্কী খুদোংচাবশিং ফংহন্নবা শেমগৎকনি অমসুং ফজনা দিজাইন তৌরবা স্তেসন বিল্দিং শেমগৎকনি। নৌনা শেমগৎকদৌরিবা স্তেসন অসিদা দবল-লেভেলগী অপাকপা রুপ প্লাজা লৈগনি অমসুং মফম অমদা পেসেঞ্জরশিংগী খুদোংচাবা পুম্নমক ফংহনগনি অমসুং পেসেঞ্জরশিং রেলদগী অতোপ্পা মওংদা চৎখিবা য়ানবা খুদোংচাবশিং লৈগনি।

মীয়াম য়াম্না য়াংনা, নুংঙাইনা অমসুং খুদোংচাবা কয়াগা লোয়ন্না চৎথোক-চৎশিনগী খুদোংচাবা পীনবা হাইদরাবাদ-সিকন্দরবাদ সবঅর্বান সেক্সন্দা প্রধান মন্ত্রীনা অনৌবা মল্তি-মোদাল ত্রান্সপোর্ত সর্বিস(এম এম তি এস) ১৩ প্রধান মন্ত্রীনা লমথাখ্রে। সিকন্দরবাদ-মহাবুবনগর প্রোজেক্ত দব্লিং অমসুং ইলেক্ত্রিফিকেসন প্রধান মন্ত্রীনা লৈবাক মীয়ামদা কত্থোকখ্রে। কিলোমিতর ৮৫ হেন্না শাংবা প্রোজেক্ত অসি লুপা করোর ১,৪১০ হেন্না চঙনা পায়খৎখিবনি। প্রোজেক অসিনা ত্রেনশিং খোঙজেল হেনগৎহনবদা মতেং পাংগনি।

হাইদরাবাদকী পেরেদ গ্রাউন্দা পাংথোকপা মীয়ামগী থৌরম অমদা, প্রধান মন্ত্রীনা এম্স বীবীনগর, হাইদরাবাদ শানবা উরেপ-উয়ুং তমখ্রে। মসি লৈবাক অসিদা হকশেলগী ইনফ্রাস্ত্রকচর মপাঙ্গল কনখৎহন্নবা প্রধান মন্ত্রীগী পান্দমগী খুদম অমনি। এ.আই.আই.এম.এস বিবিনাগর অসি লুপা করোর ১৩৫০ চঙনা শেমগৎকদবনি। এম্স বীবীনগর লিংখৎপা অসিনা তেলঙ্গানাগী মীয়ামদা মগুন লৈবা অৱাংবা থাক্কী অনা-লায়য়েংগী খুদোংচাবশিং মখোয়গী থোঙজিলদা ফংহনবা ঙম্লগনি।

প্রধান মন্ত্রীনা লুপা করোর ৭৮৫০ হেনবগী নেস্নেল হায়ৱে প্রোজেকশিং উরেপ-উয়ুং তমখ্রে। হায়রিবা লম্বীগী প্রোজেক্তশিং অসিনা তেলঙ্গানা অমসুং আন্ধ্র প্রদেশ অনিমক্তা লম্বী-থোঙগী ফিবম ফগৎহল্লগনি অমসুং লমদম অসিগী শেন-থুম অমসুং খুন্নাই চাউখৎহনবদা মতেং পাংগনি।

Great vibrancy at the public meeting in Hyderabad. Do watch! https://t.co/XlC3y6hbXR

— Narendra Modi (@narendramodi) April 8, 2023

तेलंगाना-आंध्र प्रदेश को जोड़ने वाली वंदेभारत एक्सप्रेस, आस्था, आधुनिकता, टेक्नॉलॉजी और टूरिज्म को कनेक्ट करने वाली है। pic.twitter.com/gtfH3swsnA

— PMO India (@PMOIndia) April 8, 2023

आज का नया भारत, 21वीं सदी का नया भारत, तेजी से देश के कोने-कोने में मॉडर्न इंफ्रा बना रहा है। pic.twitter.com/KAf3YEYG29

— PMO India (@PMOIndia) April 8, 2023

The projects launched today in Telangana will further 'Ease of Travel,' 'Ease of Living' as well as 'Ease of Doing Business' in the state. pic.twitter.com/wOrCyfcRQW

— PMO India (@PMOIndia) April 8, 2023

हम सबका साथ-सबका विकास-सबका विश्वास-सबका प्रयास के मंत्र को लेकर आगे बढ़ रहे हैं। pic.twitter.com/0izB7Bbcck

— PMO India (@PMOIndia) April 8, 2023

***