অসমৰ ডিব্ৰুগড়ত অনুষ্ঠিত সোণোৱাল কছাৰী যুৱ আৰু সাংস্কৃতিক মহোৎসৱ, ২০২৩ৰ উদ্দীপনা বঁটা প্ৰদান অনুষ্ঠানত কেন্দ্ৰীয় বন্দৰ, জাহাজ পৰিবহণ আৰু জলপথ আৰু আয়ুষ মন্ত্ৰী শ্ৰী সৰ্বানন্দ সোণোৱাল মুখ্য অতিথি হিচাপে উপস্থিত থাকে। কেন্দ্ৰীয় মন্ত্ৰীগৰাকীয়ে সোণোৱাল কছাৰীৰ সমৃদ্ধ আৰ্থ-সামাজিক, সাংস্কৃতিক ঐতিহ্য আৰু ইতিহাসৰ সোণালী গাথাৰ সন্দৰ্ভত আলোকপাত কৰে আৰু ইয়াক বিশাল পৰিসৰত ভাগ বতৰা কৰাৰ কথা কয়। তেওঁ যুৱ প্ৰজন্মক তেওঁলোকৰ প্ৰতিভা বিকশিত কৰাৰ বাবে এক মঞ্চ প্ৰদান কৰাৰ বাবে অনুষ্ঠানটোৰ প্ৰচেষ্টাক প্ৰশংসা কৰে আৰু ২০৪৭ চনৰ ভিতৰত ভাৰতক এখন আত্মনিৰ্ভৰ দেশ হিচাপে গঢ়ি তোলাৰ অন্বেষণত অগ্ৰণী ভূমিকা পালন কৰিবলৈ সোণোৱাল কছাৰী জনগোষ্ঠীৰ যুৱচামক বিশেষভাৱে আহ্বান জনায়।

অনুষ্ঠানত ভাষণ প্ৰদান কৰি শ্ৰী সোণোৱালে কয়, "বিশ্বৰ ষ্টাৰ্ট-আপ প্ৰাণকেন্দ্ৰ হিচাপে ভাৰতৰ অভূতপূৰ্ব সফলতাৰ আঁৰত আছে যুৱপ্ৰজন্মৰ অটল প্ৰতিশ্ৰুতি, কঠোৰ পৰিশ্ৰম, উদ্ভাৱন শৈলী আৰু অদম্য স্পৃহা। ভাৰতে অমৃত কালৰ শুভ যাত্ৰা আৰম্ভ কৰাৰ লগে লগে, ই নতুন প্ৰতিশ্ৰুতিসমূহ পূৰ্ণ কৰাৰ এক মুহূৰ্ত। অসম আৰু ভাৰতৰ যুৱ প্ৰজন্মই এক সুন্দৰ ইতিহাস আৰু এক সুন্দৰ ভৱিষ্যতৰ মাজত এক শক্তিশালী সংযোগ হিচাপে কাম কৰা উচিত। সফল হোৱাৰ ক্ষমতা আপোনাৰ ভিতৰত আছে; সেই ক্ষমতাৰ বাবে কাম কৰক। আপোনাৰ এই বিশ্বাস থাকিব লাগিব যে আপুনি যিকোনো কাম কৰিব পাৰিব। এই আত্ম-নিশ্চয়তা আৰু অসম্ভৱক সম্ভৱলৈ পৰিৱৰ্তন কৰাৰ সামৰ্থ্য দেশৰ যুৱপ্ৰজন্মৰ বাবে গুৰুত্বপূৰ্ণ আৰু ভাৰতৰ যুৱপ্ৰজন্মই ইয়াক ভালদৰে বুজি পোৱা দেখি আনন্দিত হৈছে। আত্মবিশ্বাসৰ সৈতে যুৱপ্ৰজন্ম আগবাঢ়ি আছে। মই এই মঞ্চৰ জৰিয়তে যুৱক-যুৱতীসকলক তেওঁলোকৰ দক্ষতা বিকশিত কৰিবলৈ সক্ষম কৰাৰ বাবে কৰা প্ৰচেষ্টাক প্ৰশংসা কৰিব বিচাৰিছোঁ যাতে তেওঁলোকৰ আত্মনিৰ্ভৰ হোৱাৰ যাত্ৰাত আগবাঢ়ি যাব পাৰে।"

ৰাষ্ট্ৰ নিৰ্মাণত যুৱপ্ৰজন্মৰ ভূমিকা সন্দৰ্ভত ভাষণ প্ৰদান কৰি শ্ৰী সোণোৱালে লগতে কয়, "আজিৰ যুৱ প্ৰজন্মই ভাৰতত উদ্ভাৱন আৰু ষ্টাৰ্ট-আপৰ এক নতুন ঢৌৰ নেতৃত্ব দি আছে। তেওঁলোকৰ অধ্যৱসায়ী প্ৰচেষ্টাৰ জৰিয়তে ভাৰত বিশ্বব্যাপী ষ্টাৰ্ট-আপ পৰিস্থিতিতন্ত্ৰৰ শীৰ্ষ তিনিখন দেশৰ ভিতৰত এখন হিচাপে আত্মপ্ৰকাশ কৰিছে। প্ৰধানমন্ত্ৰী শ্ৰী নৰেন্দ্ৰ মোদীজীৰ দূৰদৰ্শী নেতৃত্বৰ বাবে ভাৰতে বাৰ্ষিক দাখিল কৰা পেটেন্টৰ সংখ্যায থেষ্ট বৃদ্ধি পাইছে, যি ২০১৪ চনত মাত্ৰ ৪,০০০ৰ পৰা ১৫,০০০ৰ এক উল্লেখযোগ্য সংখ্যাত উপনীত হৈছে। ২৬,০০০ নতুন ষ্টাৰ্টআপ স্থাপনেৰে ভাৰতে বিশ্বৰ বুকুত সফলতাৰে অনন্য কৃতিত্ব অৰ্জন কৰিছে। ইয়াৰ কৃতিত্ব ভাৰতৰ যুৱপ্ৰজন্মৰ শক্তি আৰু আকাংক্ষালৈ যায়, যিসকলে কেৱল তেওঁলোকৰ সপোনবোৰক ৰাষ্ট্ৰৰ প্ৰয়োজনীয়তাৰ সৈতে সংযুক্ত কৰাই নহয়, লগতে দেশৰ আশা আৰু আকাংক্ষাৰ সৈতে সংযোজিত কৰিছে। ভাৰতৰ যুৱ প্ৰজন্মৰ আজি ৰাষ্ট্ৰ নিৰ্মাণৰ প্ৰতি মালিকীস্বত্বৰ এক শক্তিশালী অনুভূতি আছে আৰু এই বিশ্বাসৰ দ্বাৰা তেওঁলোক চালিত হৈছে যে পথৰ নেতৃত্ব দিয়াটো তেওঁলোকৰ দায়িত্ব।"

চাৰিদিনীয়া এই উৎসৱ সোণোৱাল কছাৰী স্বায়ত্তশাসিত পৰিষদে আয়োজন কৰে আৰু ডিব্ৰুগড়ৰ ডুলিয়া-ডাইনীজানৰ হলালী সমন্বয় ক্ষেত্ৰত অনুষ্ঠিত হৈছে। মহোৎসৱৰ বিষয়বস্তু হৈছে "যুৱ আৰু সাংস্কৃতিক ঐতিহ্যৰ কল্যাণ"। ইয়াৰ উদ্দেশ্য হৈছে যুৱপ্ৰজন্মক অৰ্থনৈতিকভাৱে স্বতন্ত্ৰ কৰা আৰু ৰাষ্ট্ৰ নিৰ্মাণৰ সক্ৰিয় এজেণ্ট হোৱাৰ বাবে সুৰক্ষা, শিক্ষা আৰু দক্ষতা বিকাশৰ বাবে পৰিকল্পনা কৰা কল্যাণমূলক কাৰ্যকলাপবোৰ দাঙি ধৰা। সোণোৱাল কছাৰী সম্প্ৰদায়ৰ সমৃদ্ধ সাংস্কৃতিক ঐতিহ্য প্ৰদৰ্শনৰ লগতে এই উৎসৱৰ লক্ষ্য হৈছে অসমৰ বিভিন্ন সম্প্ৰদায়ৰ মাজত এক সমন্বয় গঢ়ি তোলা।

*************************

MJPS/KG