لیبر 20 (ایل20) انگیجمنٹ گروپ کی ابتدائی میٹنگ، ہندوستان کی جی20 صدارت کے ایک حصے کے طور پر، آج امرتسر، پنجاب میں عالمی افرادی قوت سے متعلق کلیدی امور پر غور و خوض کے ساتھ شروع ہوئی تاکہ جی20 ممالک اور اداروں کو آخری فرد تک ترقی پر توجہ مرکوز کرنے کی سمت فراہم کی جا سکے۔

ٹریڈ یونین کے رہنما، لیبر اسٹڈیز کے ماہرین اور 20 ممالک کے مندوبین ہندوستان کی جی20 صدارت کے تحت لیبر 20 کے آغاز کے اجلاس میں سماجی تحفظ کو عالمگیر بنانے اور خواتین کو کام کے مستقبل کے مرکز میں رکھنے کا مطالبہ کرنے کی تیاری کر رہے ہیں۔

افتتاحی اجلاس میں ایل 20 کے صدر اور بھارتیہ مزدور سنگھ (بی ایم ایس) کے قومی صدر جناب ہیرنمے پانڈیا نے کہا کہ 2023 میں جی 20 کے جذبے کے مطابق دنیا کی افرادی قوت ایک خاندان ہے۔ انہوں نے جی20 کے تھیم #ایک زمین #ایک خاندان #ایک مستقبل پر روشنی ڈالی اور بتایا کہ یہ تصور عالمی سطح پر مزدور تحریکوں سے کس طرح مطابقت رکھتا ہے۔

ایل20 ایونٹ میں سابقہ صدارت، انڈونیشیا، اور اگلی صدارت، برازیل کے مندوبین نے بھی شرکت کی، اس کے علاوہ دیگر جی20 ممالک کے ٹریڈ یونین کے نمائندوں نے بھی شرکت کی۔ بی ایم ایس کے سابق قومی صدر جناب سی کے ساجی نارائنن نے کہا کہ ایل 20 میٹنگ کل سماجی تحفظ کی عالمگیریت اور خواتین اور کام کا مستقبل پر ایک مشترکہ بیان کے ساتھ اختتام پذیر ہوگی، دونوں موضوعات پر اس تقریب میں تفصیلات کے ساتھ بحث کی جائے گی۔

انہوں نے کہا، معاشی بحران خواتین پر سب سے زیادہ منفی اثر ڈالتا ہے، اور اس لیے کام کا مستقبل زیادہ تر خواتین کی افرادی قوت پر منحصر ہے، جسے عالمی سطح پر سمت کی ضرورت ہے۔ انہوں نے کہا کہ دنیا بھر میں مزدوروں کی نقل مکانی کے تازہ ترین رجحانات کے پیش نظر، سماجی تحفظ کی انتقال پذیری کے لیے ایک عالمی میکانزم تیار کرنا بھی ضروری ہے۔

ہندوستانی پلاننگ کمیشن کے سابق ممبر جناب ارون مائرا نے کہا کہ ہندوستان دنیا میں امن اور ہم آہنگی کا خواہاں ہے، اور کہا کہ یہ وقت ہے کہ معیشت میں ”خاندانی روح“ کو واپس لایا جائے۔ انہوں نے کہا کہ بہت سی کمیونٹیز ہیں جو معیشت اور معاشرے میں اپنے مستقبل کی بہتری کے بارے میں فکر مند ہیں۔ ان میں خواتین، نوجوان، کسان، فیکٹری ورکرز، سیلف ایمپلائڈ ورکرز اور مائیکرو انٹرپرائزز شامل ہیں۔ انہوں نے کہا کہ اب ان سب کو سننا چاہیے۔

میٹنگ کے دوران لیبر کی بین الاقوامی نقل مکانی اور سماجی تحفظ کے فنڈز کی آسانی سے منتقلی پر پانچ متوازی تکنیکی سیشنز؛ غیر رسمی کارکنوں کے لیے سماجی تحفظ؛ ہنر کی تربیت اور مہارت کی اپ گریڈیشن اور آجروں، ملازمین اور حکومتوں کا کردار اور ذمہ داریاں؛ کام کی بدلتی ہوئی دنیا اور جی20 ممالک میں ملازمت کے نئے مواقع؛ اور پائیدار مہذب کام کو فروغ دینا جیسے موضوعات پر اجلاس ہوئے۔ خواتین اور کام کے مستقبل پر کل دو روزہ لیبر-20 میٹنگ کے دوسرے دن تبادلہ خیال کیا جائے گا۔

**************

ش ح۔ ف ش ع-م ف

U: 2963