প্রধান মন্ত্রী, শ্রী নরেন্দ্র মোদীনা ঙসি “পি.এম. বিশ্বকর্মা কৌশল সম্মান”গী মতাংদা বজেত মতুংগী ৱেবিনারদা ৱা ঙাংখ্রে। ৱারোল অসি আর্তিসান অমসুং ক্রাফকী মীওইশিংদা হোলিস্তিক ওইবা তেংবাং পীনবগীদমক্তা নৌনা লাউথোকপা স্কিম পি.এম. বিকাসতা কত্থোকপনি।

প্রধান মন্ত্রীনা ৱেবিনার অসিদা ৱা ঙাংবদা, মসিগুম্বা খন্ন-নৈনবা অসিদা স্তেকহোলদর পুম্নমক্না শরুক য়াবসিদা য়াম্না নুংঙাইবা ফাওই হায়না মহাক্না ফোংদোকখি। বজেত করম্না শেমগদগে হায়না খন্নবগী মহুত্তা, বজেত্তা য়াওরিবা ৱাফমশিংবু মতৌ করম্না থবক্তা নিংথীনা পাংথোক্কদগে হায়না স্তেকহোলদরশিংনা খন্ন-নৈনবগী মতৌবু মহাক্না শকখঙখি।

ঙসিগী ৱেবিনার অসিদি ভারত মচা করোর কয়াগী স্কিল অমসুং মহৈ-মশিংদা কত্থোক্লবনি হায়না প্রধান মন্ত্রীনা হায়খি। স্কিল ইন্দিয়া মিসন অমসুং কৌশল রোজগার কেন্দ্রগী খুত্থাংদা নহা করোর কয়াদা স্কিল পীবা অমসুং থবক পীবগী থৌওংশিংদা মিৎয়েং চঙলদুনা, প্রধান মন্ত্রীনা পান্দম অমা থমদুনা অখন্ননা থবক পায়খৎপগী তঙাই ফদবা লৈরে হায়না পনখি। পি.এম. বিশ্বকর্মা কৌশল সম্মান য়োজনা নত্ত্রগা পি.এম. বিশ্বকর্মা অসিদি মসিগুম্বা ৱাখল্লোনগী মহৈনি হায়না প্রধান মন্ত্রীনা হায়খি। স্কিম অসিগী তঙাই ফদবা অমসুং “বিশ্বকর্মা” হায়না মিংথোল্লিবা অসিগী মতাংদা প্রধান মন্ত্রীনা শন্দোক্না তাক্লদুনা ভারতকী চৎনবীদা লৈরিবা ভগ্বান বিশ্বকর্মগী মশক নাইরবা থাক অমসুং মশাগী মখুৎ শিজিন্নদুনা থবক তৌবগী চৎনবীবু ইকায় খুম্নবগী মতাংদা ৱাফম থমখি।

সেক্তর খরগী আর্তিসানশিংনা মীয়ামগী মিৎয়েং খরা ফংলবসু, খুন্নাইগী তৎন-থানবা য়াদ্রবা শরুক অমা ওইরিবা উ-শুবা, য়োৎ শুবা, মুর্তী শাবা, চেক চনবা অমসুং আর্তিসানগী মনুং চনবা অতোপ্পা কাঙলুপ কয়া অমনা খুন্নাইগী তঙাই ফদবা কয়া পীনবগীদমক্তা মতম্না পুরকপা অহোংবশিংগা চুননা চৎপা ঙম্নবা হোৎনদুনা লাক্লিবা অসিবু থৱা শাবীদে হায়না প্রধান মন্ত্রীনা হায়খি।

প্রধান মন্ত্রীনা গান্ধীজীগী গ্রাম স্বরাজকী ৱাখল্লোনগী মতাংদা পল্লদুনা খুঙ্গংগী পুন্সি মহিংদা মসিগুম্বা থবকশিংগা লোয়ননা লৌউ-শিংউবগী থবকশিংনা লৌরিবা থৌদাংশিংদা মীয়ামগী পুক্নিং চিংশিনখি। “খুঙ্গংগী কাঙলুপ খুদিংবু মখোয়গী চাউখৎ-থৌরাংগীদমক্তা মপাঙ্গল হাপ্পা হায়বসি ভারতকী চাউখৎপগী খোঙচত্তা য়াম্না মরু ওই”, মহাক্না হায়খি। পি.এম. স্বনিধীগী খুত্থাংদা লম্বীদা দুকান ফম্বশিংনা ফংলিবা খুদোংচাবশিংগা মান্ননা পি.এম. বিশ্বকর্মা য়োজনানা আর্তিসানশিংদা খুদোংচাবা কয়া পীগনি হায়না প্রধান মন্ত্রীনা হায়খি।

“ঐখোয়গী লৈবাক্কী বিশ্বকর্মশিংগী তঙাই ফদবশিংগী মতুং ইন্না ঐখোয়না ঐখোয়গী স্কিল ইনফ্রাস্ত্রকচর সীস্তেম্বু নৌনা শীন্দোকপগী মথৌ তারি”, প্রধান মন্ত্রীনা হায়খি। বেঙ্ক গেরেন্তী অমত্তা য়াওদনা লুপা করোর কয়াগী লোন পীরিবা মুদ্র য়োজনাগী মতাংদা প্রধান মন্ত্রীনা খুদম ওইনা পীখি। মসিগী স্কিম অসিনা ঐখোয়গী বিশ্বকর্মশিংদা খ্বাইদগী চাউবা খুদোংচাবা পীগদবনি হায়না মহাক্না ফোংদোকখি অমসুং বিশ্বকর্মা শাথীশিংগীদমক্তা দিজিতেল লিতরেসী কেম্পেন পাংথোকপগী থৌওং অসিদসু অহেনবা মিৎয়েং চঙবগী তঙাই ফদবা লৈ হায়নসু মহাক্না ফোংদোকখি।

খুৎনা শাবা পোত্থোকশিংনা মীয়ামগী পুক্নিং লেপ্তনা চিংশিল্লিবা অসিগী মতাংদা পল্লদুনা, প্রধান মন্ত্রীনা ঐখোয়গী সরকারনা লৈবাক্কী বিশ্বকর্মা খুদিংগী মফমদা হোলিস্তিক ইন্সতিত্যুস্নেল সপ্পোর্ত পীগনি হায়না ফোংদোকখি। মসিনা লোন ফংহনবা, স্কিলিং তৌবা, তেক্নিকেল সপ্পোর্ত পীবা, দিজিতেল ইম্পাৱর্মেন্ত তৌবা, ব্রান্দ প্রোমোসন তৌবীবা, মার্কেতিং অমসুং রো মেতরিএলগী হীরমশিং পাংথোকপদা হেন্না লায়থোকহনগনি। “পি.এম. বিশ্বকর্মা য়োজনা অসিনা ত্রেদিস্নেল আর্তিসান অমসুং ক্রাফমেনশিংবু চাউখৎহনবগা লোয়ননা মখোয়গী মশক নাইরবা চৎনবীশিংবুশু ঙাক শেন্দুনা থম্নবা পান্দম থম্লি”, মহাক্না হায়খি। “ঙসিগী বিশ্বকর্মশিংনা হয়েংগী ওন্তোপ্রিনর ওইবা ঙমগনি হায়বসি ঐখোয়গী পান্দম্নি। মসিগীদমক্তা, মখোয়গী বিজনেস মোদেলদা সস্তেনেবিলিতী লৈহনবা হায়বসি য়াম্না মথৌ তাই”, প্রধান মন্ত্রীনা হায়খি।

আর্তিসান অমসুং ক্রাফমেনশিংনা ভেল্যু চেনগী শরুক অমা ওইরকপা মতমদা মখোয়গী মপাঙ্গল হেন্না লৈহনবা য়াগনি অমসুং মখোয়গী মনুংদগী য়াম্লবা মীওই কয়ানা ঐখোয়গী এম.এস.এম.ই. সেক্তরগী সপ্লাইয়র অমসুং প্রদ্যুসর ওইবা ঙমগনি হায়না প্রধান মন্ত্রীনা হায়খি।

মরী লৈনবা স্তেকহোলদর খুদিংনা অচৌবা ব্লুপ্রিন্ত অমা শেম্বীয়ু হায়রদুনা প্রধান মন্ত্রীনা মহাক্কী ৱারোল লোইশিনখি। সরকারনা লৈবাক্কী খ্বাইদগী মনুং-হঞ্জিনবা মফমশিংদা য়ৌশিন্নবা কন্না হোৎনরি অমসুং মখোয়গী মনুংদগী মীওই কয়া অমনা মপুন্সিগী অহানবা ওইনা সরকারগী স্কিমগী কান্নবা ফংবসু হৌরে হায়না প্রধান মন্ত্রীনা হায়খি। অয়াম্বা আর্তিসান কয়া অমদি দলিত, ত্রাইবেল, শোত্থরবা খুন্নাই নত্ত্রগা নুপীশিংনি অমসুং মখোয়গী মফমদা কান্নবা কয়া য়ৌহন্নবগীদমক্তা প্রেক্তিকেল ওইবা থৌরাং অমগী মথৌ তাই। “ঐখোয়না মসিগীদমক্তা অকক্নবা মতমগী মনুংদা মিসন মোদতা থবক পায়খৎপগী মথৌ তাই”, হায়রদুনা প্রধান মন্ত্রীনা মহাক্কী ৱারোল লোইশিনখি।

প্রধান মন্ত্রীগী অখন্নবা ৱারোল অসিবু পেরেলেল ব্রেকআউত সেসন মরিনা মতুং ইনখি। মখোয়শিং অদুদি- ১) দিজিতেল ত্রাঞ্জেক্সন অমসুং সোসিএল সেক্যুরিতীগী ইন্সেন্তিব য়াওনা এফোর্দেবল ফাইনান্সকী এক্সেস লৈবা, ২) স্কিলগী থাক ৱাংবা ত্রেনিং অমসুং হৌজিক মতমগী তুল অমসুং তেক্নোলোজী শিজিন্নবা ফংহনবা, ৩) লৈবাক অমদি মালেমগী কৈথেলগা মরী লৈননবা মার্কেতিংগী তেংবাং পীবা, ৪) স্কিম অসিগী স্ত্রকচর, বেনিফিশরী মশক খঙদোকপা অমসুং থবক ওইনা পাংথোকপগী ফ্রেমৱর্ক। ৱেবিনার অসিগী পেনেলদা মরী লৈনবা ফিল্দশিংগী খঙ-হৈরবা আর্তিসান, কেন্দ্র অমসুং রাজ্য সরকারগী ওফিসিএল, বেঙ্ক, অতোপ্পা ফাইনেন্সিএল ইন্সতিত্যুসন, প্রাইভেত ওর্গনাইজেসন, এসোসিএসন অমসুং ই-কম্মর্স প্লেতফোর্ম কয়াগী মীহুতশিং য়াওখি।

ফাইনান্স মন্ত্রালয়গী ফাইনেন্সিএল সর্ভিস বিভাগনা মোদরেত তৌবা “এক্সেস তু এফোর্দেবল ফাইনান্স, ইনক্লুদিং ইন্সেন্তিব ফোর দিজিতেল ত্রাঞ্জেক্সন এন্দ সোসিএল সেক্যুরিতী”গী অহানবা ব্রেকআউত সেসন অসিনা এফোর্দেবল ক্রেদিত, ক্রেদিত মখল, দিজিতেল ত্রাঞ্জেক্সন অমসুং সোসিএল সেক্যুরিতীগী ইন্সেন্তিবকী হীরমদা মিৎয়েং চঙখি। হায়রিবা অসিগী পেনেলিস্তশিংগী মনুংদা শ্রী ধনালাকোতা রাও (সনা শুবদা হৈ-শিংলবা), শ্রী গনেশ দোইফোদে (শউনগী থবক শুবদা হৈ-শিংলবা) অমসুং শ্রী রোহিত ধিমান (উ শুবদা হৈ-শিংলবা) য়াওখি। অতোপ্পা পেনেলিস্তশিংগী মনুংদনা শ্রী প্রবীন সোলাঙ্কী (গুজরাত সরকারগী কোত্তেজ অমসুং রুরেল ইন্দস্ত্রীগী সেক্রেতরী), শ্রী সুনিল মেহতা (ইন্দিয়ন বেঙ্ক এসোসিএসনগী সি.ই.ও.), শ্রী ভি. সত্যা ভেঙ্কতা রাও (আই.দি.বি.আই.গী দেপ্যুতী মেনেজিং দাইরেক্তর) অমসুং শ্রী গৌতম জেন (ভেদিকা ক্রেদিত কেপিতেল লিমিতেদকী এম.দি.) য়াওখি।

ৱেবিনার অসিদা স্তেকহোলদরশিংনা পীনরকখিবা মরু ওইবা পাউতাকশিংগী মনুংদা শেন্দোই কোম্থোকপগী তঙাই ফদবা লৈবা, খ্বাইদগী পীকপা গেরেন্তী ফীগা লোয়নবা ক্রেদিত গেরেন্তী ফন্দনা তেংবাংবগা লোয়ননা কোলেতরেল য়াওদনা লোন পীবা, নুপী ওন্তোপ্রিনরশিংগী অখন্নবা কাঙলোন অমসুং খুদোংচাবা, দিজিতেল ত্রাঞ্জেক্সন ইন্সেন্তিবাইজ তৌবগী মরু ওইবা অমসুং পেন্সন অমসুং ইন্স্যুরেন্সকী খুত্থাংদা অমসুং সোসিএল সেক্যুরিতী পীবা হায়বা ৱাফমশিং য়াওখি। অপীকপা ওন্তোপ্রিনরশিংনা থেংনরিবা অরুবা শিংনবা ওইরিবা এফোর্দেবল ক্রেদিত ফংবগী মতাংদা লৈরিবা ৱাফম কয়াগী মতাংদা কুপ্না খন্নখি অমসুং অনেম্বা শেন্দোইদা কোলেতরেল য়াওদবা ক্রেদিত পীবগী তঙাই ফদবা লৈরিবা অমসুং অহানবা লোন শিংদোকপা মতমদা অহেনবা ক্রেদিত অমুক পীবা অমসুং ক্রেদিত লৌনবগীদমক্তা চে-চাং য়াম্না চঙহন্দবা হায়বা হীরমশিং অসিসু খন্ন-নৈনবা অসিদগী থোক্লকপা মরু ওইবা পাউতাক ওইখি।

 “এদভান্স স্কিল ত্রেনিং অমসুং মোদর্ন তুল অমসুং তেক্নোলোজী শিজিন্নবা ফংহনবা” হায়রিবা অনিশুবা ব্রেকআউত সেসন অসিবু স্কিল দিভেলপমেন্ত অমসুং ওন্তোপ্রিনর্শিপ মন্ত্রালয়না মোদরেত তৌখি অমসুং সেসন অসিদা এদভান্স স্কিল ত্রেনিং পীবা, লৈবাক অমদি মালেমগী কৈথেলগা মরী লৈনবা ঙম্নবা মতমগা চুনবা তুল অমসুং তেক্নোলোজী পীবগী মতাংদা খন্ন-নৈনখি। সেসন অসিগী পেনেলিস্তশিংগী মনুংদা চফু শাবদা হৈ-শিংলবা অমসুং মিত্তিকুল (ইলেক্ত্রিসিতী য়াওদনা চলায়বা ক্লেগী রেফ্রিজরেতর) পুথোকখিবা শ্রী মনশুখ ভাই প্রজাপাতী, শ্রী শদাব খান (লাক খুজি শাবদা হৈ-শিংলবা মীওই) অমসুং শ্রী নরেশ বিশ্বকর্মা (হৈ শিংলবা ব্লেকস্মিথ) য়াওখি। অতোপ্পা পেনেলিস্তশিংগী মনুংদনা শ্রী মনু স্রিবাস্তব (মধ্য প্রদেশ সরকারগী এ.সি.এস.), শ্রী রজীব সক্সেনা (তেক্সতাইল মন্ত্রালয়গী জে.এস.) অমসুং শ্রী অনিল কুমার (মৈতীগী সেনিয়র দাইরেক্তর) য়াওখি। ত্রেনিং পীবা মতমদা হৈ-শিংলবা আর্তিসান অমসুং ক্রাফমেন য়াওহনবা, মখোয়গী মফমদা মতমগা চুনবা খুৎশু খুৎলায় পীবগী মরু ওইবা, থবক্কা মরী লৈনবা হকশেল অমসুং তেক্ত-কায়দনা লৈবগী মরু ওইবা, রো মেতরিএল বেঙ্ক লিংখতপগা মরী লৈনবা পাউতাক কয়াসু সেসন অসিদা পুথোক্নখি। ৱেবিনার অসিদা শরুক য়ারিবা মীওইশিংনা আর্তিসানশিংনা ত্রেনিং য়াওরিঙৈ মরক্তা নোংমগী খুৎশুমল ফংহনবা অমসুং পি.এম. বিকাসপু অতোপ্পা মন্ত্রালয়/বিভাগকী হান্নদগী লৈরবা স্কিমশিংগা পুন্সিনবগী মতাংদা ৱাহৌদোক থম্নখি।

“লৈবাক অমসুং মালেমগী কৈথেলগা মরী লৈননবা মার্কেতিং সপ্পোর্ত পীবা” হায়রিবা অহুমশুবা ব্রেকআউত সেসন অসিবু তেক্সতাইল মন্ত্রালয়না মোদরেত তৌখি। সেসন অসিনা আর্তিসানশিংদা পীগদবা মার্কেতিং সপ্পোর্ত, ফোৱার্দ অমসুং বেকৱার্দ লিঙ্কেজ, মখোয়গী পোত্থোকশিংবু সর্তিফাই তৌবা অমসুং পেকেজিং তৌবা অমসুং মখোয়গী মার্কেত এভেন্যু হেন্না ফগৎহনবগী মতাংদা মিৎয়েং চঙখি। সেসন অসিগী পেনেলিস্তশিংগী মনুংদা হৈ-শিংলবা আর্তিসান, শ্রী সুভম সতপুতে (শউনগী থবক্তা হৈ-শিংলবা), শ্রী বিহারী লাল প্রজাপতী (চফু শাবদা হৈ-শিংলবা) অমসুং শ্রী মনিকন্দন (মুর্তী শাবদা হৈ-শিংলবা) য়াওখি। অতোপ্পা পেনেলিস্তশিংগী মনুংদনা, শ্রী অভিশেক চন্দ্রা (ত্রিপুরা সরকারগী স্পিসিএল সেক্রেতরী), শ্রী ইর্ফান অলাম (খাদি ইন্দিয়া পোর্তেলগী দাইরেক্তর), শ্রীমতি প্রাচী ভুচর (মীশো ই-কম্মর্স প্লেতফোর্ম), শ্রী পি. গোপালকৃষ্ণন (ঐচ.ই.পি.সি.গী চেয়রমেন) অমসুং শ্রী রাজকুমার মলহোত্রা (ঐচ.ই.পি.সি.গী চেয়রমেন) য়াওখি। সেসন অসিনা মার্কেতিংগী থবকশিং হেন্না খুমাং চাউশিলহন্নবা মার্কেতিং এজেন্সী/ইন্তাইতী শেমগৎপা, পোৎলমশিং পেকেজিং তৌবা, গ্লোবেল মার্কেত লিঙ্কেজ হেন্না ফগৎহনবা, ই-কম্মর্স প্লেতফোর্ম লিংখৎপনচিংবা হীরম কয়াগামরী লৈনবা পাউতাক পুথোক্নখি।

“স্কিম অসিগী স্ত্রকচর অমসুং ইমপ্লিমেন্তেসন ফ্রেমৱর্ক”কী মরিশুবা ব্রেকআউত সেসন অসিবুনা এম.এস.এম.ই. মন্ত্রালয়না মোদরেত তৌখি অমসুং মসিনা স্কিম অসিগী ইমপ্লিমেন্তেসন ফ্রেমৱর্ক, স্তেকহোলদরশিংগী থৌদাং, শেন্দোইগী চাং, গেরেন্তী কবরেজ, অতোপ্পা স্কিমগা পুন্সিন্নবা, বেনিফিশরী মশক খঙদোকপগী মেকানিজম্নচিংবা হীরম কয়াদা অহেনবা মিৎয়েং চঙখি। সেসন অসিগী পেনেলিস্তশিংগী মনুংদা পদ্মা শ্রী শ্রী ভি.কে. মুনুস্বামী (চফু শাবদা হৈ-শিংলবা মীওই অমসুং তেরাকোত্তা আর্তিস্ত), শ্রী বিশ্বানাথন অচারী (ত্রেদিস্নেল আর্তিসানশিংগী কোওর্দিনেতর অমসুং ইন্নোভেতর) অমসুং মিস কেবিসেদেনুও মার্গরেত জিনয়ু (এক্সপর্ত দিজাইনর) য়াওখি। অতোপ্পা পেনেলিস্তশিংগী মনুংদনা শ্রী অমিত মোহন প্রসাদ (য়ু.পি.গী এদিস্নেল চীফ সেক্রেতরী), মিস উদিতা মিশ্রা (তেক্সতাইল মন্ত্রালয়গী এদিস্নেল কম্মিস্নর হেন্দিক্রাফ), শ্রী মুকেশ কুমার বন্সল (দি.এফ.এস., জে.এস.), শ্রী কৃষ্ণ কুমার দ্বিবেদী (জে.এস. অমসুং সি.ভি.ও., এম.এস.দি.ই.), শ্রী বিনিত কুমার (সি.ই.ও., কে.ভি.আই.সি.) অমসুং মিস শালিনী পান্দে (এম.ও.ঐচ.য়ু.এ., দাইরেক্তর) য়াওখি। সেসন অসিনা স্তেকহোলদর কয়া অমনা বেনিফিশরী মশক খঙদোকপা, ক্রেদিতকী ঙাক্লৌ পীবা, দিজিতেল ত্রাঞ্জেক্সন্দা ইন্সেন্তিব পীবা, সোসিএল সেক্যুরিতীগী মরু ওইবা, স্কিল ত্রেনিং পীবা, তুল অমসুং তেক্নোলোজী শিজিন্নবা ফংবা, মার্কেতিং অমসুং লোজিস্তিক সপ্পোর্ত, ইমপ্লিমেন্তেসন ফ্রেমৱর্ক, কেন্দ্র অমসুং রাজ্য সরকার, বিভাগ/এজেন্সীশিংগী থৌদাং অমসুং মোনিতরিং ফ্রেমৱর্ক অমদি এম.আই.এস. সীস্তেমগী মতাংদা পাউতাক কয়া পীনরকপগী মতৌ উবা ফংখি।

ব্রেকআউত সেসনশিং অসিগী মখা তারকপদা শ্রীমতি রচনা শাহ (তেক্সতাইল মন্ত্রালয়গী সেক্রেতরী) অমসুং শ্রী বি.বি.স্বাইন (এম.এস.এম.ই., সেক্রেতরী)না লুচিংদুনা ক্লোজিং সেসন অমা পাংথোকখি। ব্রেকআউত সেসনশিঙ্গসিগী মোদরেতরশিংগী মনুংদা দাঃ রজনীশ, এ.এস. অমসুং দি.সি. (এম.এস.এম.ই.), শ্রী নিলম্বুজ শরন (সেনিয়র ইকোনোমিক এদভাইজর, স্কিল দিভেলপমেন্ত অমসুং ওন্তোপ্রিনর্শিপ মন্ত্রালয়), মিস শুব্রা (তেক্সতাইল মন্ত্রালয়গী হেন্দিক্রাফ অমসুং হেন্দলুমগী ত্রেদ আদভাইজর অমসুং দি.সি.) অমসুং শ্রী মুকেশ কুমার বন্সল (ফাইনান্স মন্ত্রালয়গী ফাইনেন্সিএল সর্ভিস বিভাগকী জে.এস.) য়াওখি। পেনেলিস্তশিং অসিনা সেসনশিং অসিদা পুথোক্নখিবা পাউতাকশিংবু শম্লপ্না থমখি। সবকা সাথ, সবকা বিকাস, সবকা বিশ্বাস অমসুং সবকা প্রয়াসকী ৱাখল্লোনবু খোঙফম চেৎনা ইল্লিবা সরকারগী অনৌবা খোংথাং কয়াগী মরু ওইবশিংদা শ্রী বি.বি.স্বাইন (এম.এস.এম.ই.)না মীয়ামগী পুক্নিং চিংশিনখি।

লোইশিনবগী সেসন অসিগী মতুংদা তেক্সতাইল মন্ত্রী, শ্রী পিয়ুশ গোয়লগী ৱারোলনা তুং ইনখি। সরকারনা শীন-লাঙলিবা বজেত মতুংগী ৱেবিনারশিংনা অসিনা পোলিসী দিস্কোর্সতা মতৌ করম্না ভেল্যু হাপ্লি হায়না মহাক্না ফোংদোকখি। অতোপ্পা মন্ত্রালয়/বিভাগশিংগী হান্নদগী লৈরবা স্কিমশিংগা পি.এম. বিকাসকা পুন্সিবগী তঙাই ফদবগী মতাংদা মহাক্না ৱাফম থমখি। স্কিম অসিবু থবক্তা ওন্থোকপা মতমদা হৌজিক লৈরিবা সাইলো কয়াবুসু থুগায়বগী মরু ওইবগী মতাংদা মহাক্না পনখি। সেসন অসিদা শ্রী ভানু প্রতাপ সিংহ, এম.এস.এম.ই.গী রাজ্য মন্ত্রী অমসুং শ্রীমতি দর্শনা বিক্রম জর্দোশ, তেক্সতাইলগী রাজ্য মন্ত্রীসু শরুক য়াখি।

******