ঙরাং লোক সভাগী স্পিকর, শ্রী ওম বিরলানা গেঙতোক্তা কম্মনৱেল্থ পর্লিয়ামেন্তরি এসোসিএসন(সি পি এ) ইন্দিয়া রিজনগী ১৯শুবা চহিগী জোন-থ্রি কনফরেন্স হৌদোকখ্রে।

খন্ন-নৈনবা অমসুং ৱারি শানবগী মরুওইবগী মতাংদা লোক সভা স্পিকরনা হায়খি মসিনা গনতন্ত্রগী খ্বাইদগী চাউবা মপাঙ্গলনি। লেজিসলেচর অসি মীয়ামগী অৱাবশিং কোকহন্নবা মফম অমনি, লেজিসলেচরনা অপনবা লৈতনা খন্ন-নৈনবগী মফম ওইগদবনি অমসুং মসিনা ইন্সতিতুৎশিংদা মীয়ামগী থাজবা হেনগৎলক্কনি অমসুং ঐখোয়গী গনতন্ত্রগী মপাঙ্গল কনখৎহনগনি।

শ্রী বিরলানা হায়খি “সাইবর বুল্লিইং” অসি হৌজিক য়াম্না তোইনা থোক্লে, মসিনা ইনখৎলক্লিবশিং অমসুং নহারোলশিং শোকহল্লে।মীয়াম সাইবরনা খুদোংচাদবা থোকহনবদগী ঙাক-শেন্নবা অমসুং কন্নবা লোশিং চৎনগদবনি। লৈবাক ঙাকপদা খুদোংচানবা অমসুং মীয়ামগী পুন্সি মহিং ফগৎনবা ইনফোর্মেসন তেক্নোলোজি শীজিন্নগদবনি অমসুং মসিগী অমাঙবশিংগী মীয়াম অমসুং ইন্সতিতুৎশিং ঙাকথোক্কদবনি। মীফম অসিদগী ফংলকপা ফলশিংনা হেন্না ফবা পাম্বৈশিং পুথোকপা ঙমহনগনি।  

‘দ্রগ লান্না শীজিন্নবা অমসুং মসি কোকহন্নবা পাম্বৈশিং’গী মতাংদা ৱা ঙাংবদা লোক সভা স্পিকরনা হায়খি দ্রগ লান্না শীজিন্নবনা নহারোলশিং শোকহল্লে। মসিগী অৱাবা অসি অৱাং-নোংপোক খক নত্তনা লৈবাক শীনবা থুংনা মায়োক্নরে। হিরম অসিগী মতাংদা পর্লিয়ামেন্তদা দিশেম্বর ২০ অমসুং ২১, ২০২২দা কুপ্না খন্নরবা মতুংদা, লৈবাক শীনবা থুংনা নহারোলশিংদা ৱাখল তাহন্নবা মেম্বরশিংনা এৱারেনেস কেম্পেন অমা পাংথোকপা হায়না ৱারেপ লৌখি। লৈবাক অসিদা হেনগৎলক্লিবা দ্রগ লান্না শীজিন্নবগী অৱাবা কোকহন্নবা অমসুং দ্রগ শীজিন্নদবা ভারত অমা ওইহন্নবা অপুনবা ৱাখল্লোন অমদা খুদিংমক থবক তৌমিন্নগদবনি। হিরম অসিদা মীয়ামগী মীহুৎশিংনা মীয়াম ৱাখল তাহনগদবনি অমসুং নহারোলশিং অচুম্বা মাইকৈদা পুনবা থবক তৌগদবনি।

পর্লিয়ামেন্ত অমসুং লেজিসলেচরশিং মীয়ামগা হেন্না শম্নবগী মতাংদা ৱা ঙাংবদা শ্রী বিরলানা হায়খি আই.তি শীজিন্নদুনা লেজিসলেচরশিং অমসুং মীয়ামগী মরক্তা শরুক য়াবা হেনগৎলকপা অসি শিংথানিঙাইনি। লেজিসলেচরশিংনা পায়খৎলিবা থবকশিং তেক্নোলোজিগী খুৎথাংদা মীয়ামদা খঙহনগদবনি। লো শেম্বগী থবক্তা মীয়াম হেন্না শরুক য়াগদবনি অমসুং মসিনা মীয়ামগী অনিংবশিং থুংহনবা ঙম্বা লোশিং শেম্বা ঙমগনি।

শেন-থুমগী লমদা লৈরিবা অৱাং-নোংপোক্কী খুদোংচাবশিংগী মতাংদা শ্রী বিরলানা হায়খি তুরিজম, রিনিউএবল ইনর্জি, ওর্গনিক ফার্মিং অমসুং হেন্দিক্রাফকী মতাংদা য়াম্লবা খুদোংচাবশিং লৈরি। লমদম অসি চাউখৎনবা অৱাং-নোংপোক লমদমগী মীয়ামগী হৈশিংবশিং নেসনেল অমসুং ইন্তরনেসনেলগী কৈথেলদা য়ৌনবা লাল্লোং অমা শেমগদবনি। ঐখোয়গী সংবিধান শেম্লম্বশিংনা মঙজরম্বা নুংঙাই-য়াইফবা, চাউখৎপা অমসুং মশাগী ওক্নবা পুথোকচবা ঙম্বা ভারত অমগী মঙলান অদু থবক্তা ওন্থোক্নবা ঐখোয়না ৱাশক অমা লৌগদবনি।

লোক সভাগী স্পিকরনা মখা তানা হায়খি কম্মনৱেল্থ পর্লিয়ামেন্তরি এসোসিএসন(সি পি এ)ইন্দিয়া রিজন অসি য়াম্না মরুওইবা মফম অমনি। জোন অসিনা শীন্দুনা তোঙান-তোঙানবা হিরমশিংদা অৱাং-নোংপোক লমদমগী লেজিসলেচরশিংগী মরক্তা চাংনাইনা খন্নবা পাংথোক্লি অমসুং থৌরাং অসিগী মখাদা হিরম কয়াদা অমতা ওইবা পাম্বৈ কয়া পুথোকপা ঙমহল্লি। অৱাং-নোংপোক লমদমগী লেজিসলেচরশিং অমসুং মীয়ামগী মীহুৎশিংগী অপুনবা থবক্না লমদম অসিগী শেন্মিৎলোন অমসুং মীয়ামগী পুন্সিদা অচৌবা অহোঙবা অমা পুরক্লে।  

রাজ্য সভাগী দিপুতি চিয়ারমেন, শ্রী হরিবন্সনা হায়খি কোবিদ লাইচৎ মনুংদা মালেম্না দিজিতেল তেক্নোলোজি শীজিন্নবা হৌরকখি।তুংগী থৌরাং তৌনবা ভারতকী পর্লিয়ামেন্ত দিজিতাইজেসনগী থবক পায়খৎলে। লেজিসলেতিপ বোদিশিংগা মীয়ামগা শম্নবা হেনগৎহন্নবা অনৌবা আই.তিগী থবকশিং পায়খৎলে। দিজিতেল পর্লিয়ামেন্ত এপ্প অমসুং নেসনেল ই-বিধান সভা এপ্লিকেসন অসি মাইকৈ অসিদা পায়খৎপা অনৌবা থবকশিংনি।  

‘সাইবর বুল্লিইং’গী মতাংদা ৱা ঙাংবদা দিপুতি চিয়ারমেন্না হায়খি দিজিতেলগী লমদা মপাঙ্গল কনবা লৈবাক অমা ওইনবা অনৌবা দিজিতেল তেক্নোলোজিশিং শীজিন্নবা মতমদা সাইবর বুল্লিইংগুম্বা খুদোংচাদবা কয়া মায়োক্নখি। মালেমগী দেতাগী মতুংইন্না ভারত অসি ‘সাইবর বুল্লিইং’ কেসশিং য়াম্না মায়োক্নবা মাংজিল থাবা লৈবাক অমনি। মসি কোক্নবা মীফম অসিনা পাম্বৈ অমা পুথোক্কনি হায়বগী থাজবা থম্লি। ‘দ্রগ লান্নবা শীজিন্নবা অমসুং মসি থেংন্নবা তুংগী থৌরাংশিং’গী মতাংদা ৱা ঙাংবদা মহাক্না হায়খি লৈবাক শীনবা থুংনা দ্রগ লান্না শীজিন্নবগী চৈথেং ফংলে। ভারত অসি মালেমদা খ্বাইদগী নৌরিবা লৈবাক্নি, অনৌবা ভারতকীদমক নহারোলশিং থৌরাং তৌনবা মসিগী খুদোংচাদবা অসি মরু ফংনা মুৎথৎকদবনি।

মীফম শরুক য়াখিবশিং তরাম্না ওক্লদুনা সিক্কিমগী চীফ মিনিস্তর শ্রী প্রেম সিংহ তমাংনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা অৱাং-নোংপোক লমদম অসি শিংথাবা য়াবা অহোঙবশিং পুরক্লে। ঙসিদি, অৱাং-নোংপোক লমদম অসি রাজনিতিগী মফম অমা ওইরম্বদগী চাউখৎপগী মফম অমা ওইরে।হিরম খুদিংমক্তা চাউৎপা ঙম্লে। ভারত সরকারগী এক্ত ইস্ত পোলিসি অসি অৱাং-নোংপোক লমদমগী বর অমা ওইরগনি। প্রধান মন্ত্রী শ্রী নরেন্দ্র মোদীনা অৱাং-নোংপোক লমদম অসি ‘অস্তা লাক্ষমি’ হায়না মমিং থোল্লে। মসিনা লমদম অসিগী মীয়াম পুক্নিং থৌগৎলে অমসুং লমদম অসি ইকায়খুম্নবা হেনগৎহল্লে।

মরুওইবা ৱারোল পীরদুনা, অরুনাচল প্রদেস লেজিসলেতিপ এশেমব্লিগী স্পিকর অমসুং সি.পি.এ জোন-৩গী চিয়ারমেন, শ্রী পাসাং দি.সোনানা হায়খি মীয়াম ৱাহল্লিবা মরুওইবা হিরমশিং খন্ন-নৈন্নবা লৈবাক অসিগী অমসুং মালেমগী লেজিসলেচরশিং পুনশিন্নবা সি.প.এনা মাংজিল থারি। কম্মনৱেল্থ পর্লিয়ামেন্তরি এসোসিএসন(সি পি এ)ইন্দিয়া রিজনগী জোন-৩না চাং নাইনা মীফম পাংথোকপা অসি হরাওই। হৌখিবা চহি ২৫দা অৱাং-নোংপোক লমদমদা মীফম ১৯ পাংথোকখ্রে।

অৱাং-নোংপোক লমদমগী অখন্নবা কলচর, বাইওদাইভর্সিতি, লোন, লম্মিৎ-তুমিৎকী মতাংদা শ্রী সোনানা হায়খি অৱাং-নোংপোক লমদমগী মীয়াম্না খুদোংচাদবা কয়া মায়োক্নরি। অসিগুম্বা মীফম অসিনা লমদম অসিনা মায়োক্নরিবা খুদোংচাদবশিং অপুনবা ওইনা খন্নবগী খুদোংচাবা পীরে। হৌজিক দ্রগ লান্না শীজিন্নবা অমসুং সাইবর বুল্লিইং অসি অচৌবা ৱাথোকশিং ওইরে। মরুওইনা নহারোলশিংদা শাথিনা শোকহনবা হায়রিবা খুদোংচাদবশিং অসি থেংন্নবা পাম্বৈশিং পুথোক্নবা খন্নবা হায়বসি য়াম্না মরুওই।

মীফম অসি হৌদোকপগীদমক সিক্কিম লেজিসলেতিপ এশেমব্লিগী স্পিকর শ্রী অরুন কুমার উপ্রেতিনা লোক সভাগী স্পিকর শ্রী ওম বিরলা থাগৎখি। মহাক্না হায়খি মীয়াম অমসুং লেজিসলেচরশিংগা মরী লৈনবা হিরমশিংদা তম্নবা মীফম অসি মরুওইবা অমনি। মীফম অসিদগী ফংলবা ফলশিং অদুনা লেজিসলেচরশিং অমসুং মীয়ামগী মীহুৎশিংনা মখোয়গী থৌদাংশিং মপুংফানা পাংথোকপদা মঙাল অমা পীরগনি।

মহাক্না সিক্কিম লেজিসলেতিপ এশেমব্লিদা থুংলবদা শ্রী ওম বিরলনা গার্দ ওফ ওনর অমা য়েংখি।

*****