ঙসি ফেব্রুৱারি ২০,২০২৩দা ভারতকী রাস্ত্রপতি শ্রীমতি দ্রৌপতি মুর্মু অরুনাচল প্রদেসকী ৩৭শুবা স্তেৎহুদ নুমিৎকী থৌরমশিং শরুক য়াখ্রে অমসুং মহাক ইকায়খুম্নবা উৎতুনা অরুনাচল প্রদেস সরকারনা শীন্দুনা ইতানগরদা পাংথোকপা তরাম্না ওকপগী থৌরম শরুক য়াখ্রে।

থৌরম অদুদা ৱা ঙাংবদা, রাস্ত্রপতিনা হায়খি অৱাং-নোংপোক লমদমদা খ্বাইদগী পাক-চাউবা রাজ্য ওইনা অমসুং ঙমখৈদা লৈবা রাজ্য অমা ওইনা, অরুনাচল প্রদেস অসি লাল্লোং অমসুং লম্মিৎ-তুমিৎকী মীৎয়েংদা য়াম্না মরুওইবা রাজ্য অমনি। লৈবাক্কী ঙাক-শেন অমসুং রাজ্যগী শেন-থুম চাউখৎনবা অফবা ইনফ্রাস্ত্রকচর শেমগৎপা তঙাইফদে। রাজ্য অসিগী নেসনেল হায়ৱেজ শেমগৎনবা লুপা করোর ৪৪,০০০ কাইথোকপদা কেন্দ্র সরকারনা অয়াবা পীবদা হরাওই। কামেং হায়দ্রো পৱার স্তেসন্না মৈ মেগৱাত ৬০০ পুথোক্তুনা অরুনাচল প্রদেস অসি মৈ লেম-পানা পুথোকপা রাজ্য অমা ওইরে। হন্দক শঙ্গাখিবা দোনয়ি পোলো এয়রপোর্তনা রাজ্য অসিগী চৎথোক-চৎশিনগী ফিবম ফগৎহনগনি অমসুং ললোন-ইতিক অমসুং তুরিজম চাউখৎহনগনি হায়বগী থাজবা থম্লি।

রাস্ত্রপতিনা হায়খি নুপীশিং চাউখৎহন্দনা খুন্নাই অমা পুন্না চাউখৎমিন্নবা ওইথোক্লোই। অরুনাচল প্রদেসতা পঞ্চায়তশিংগী মীহুৎশিংগী চাদা ৪৭ নুপীশিংনি হায়বা তাবদা মহাক হরাওই। অরুনাচল প্রদেসকী নুপীশিং হিরম খুদিংমক্তা মাইপাক্লে। নুমিৎ মঙানিগী মনুংদা মাউন্ত এভরেস্ত অনিরক কাখিবী অহানবা নুপী অনসু জামসেনপাগুম্বা নুপীদগী লৈবাক শীনবা থুংনা লৈরিবা নুপীশিংদা ইথিল পীগনি অমসুং অরুনাচল প্রদেসকী লৌউ-শিংউগী পোৎথোকশিং মালেমগী কৈথেলশিংদা য়ৌহনবা ঙম্বী তাগে রিতা তাখেনা ভারতকী অতৈ নুপীশিংগী পুক্নিং থৌগৎকনি।

রাস্ত্রপতিনা হায়খি ভারত্তা নুমিৎকী মঙাল অহানবা ওইনা অরুনাচল প্রদেসকী লৈমায়দা তাই। অরুনাচল প্রদেসকী তোঙান-তোঙানবা ত্রাইবশিং, মখোয়গী কলচরগী হেরিতেচশিং, মখোয়গী খেন্নবশিংগী মরক্তা অপুনবগী শক্তম্না ঐখোয় পুম্নমক পুক্নিং থৌগৎলে। অরুনাচল প্রদেসকী খুন্নাই অসি অপীকপা ভারতনি। 

রাস্ত্রপতিনা হায়খি চীংশাং পরেংশিং, অশুকপা উমংশিং, পাৎশিং, ঈশিংচাইবীশিং, পাম্বী মখল কয়া অমসুং লম্লক্কী শা-উচেক মরাং কাইনা ফংদুনা রাজ্য অসি থৱায়বা পানবা কয়াগী মফম্নি। অইং-অশাগী খল হোংলকপা থেংন্নবা অমসুং মহৌশাগী অকোয়গী ফিবম কন্নবা অরুনাচল প্রদেসনা ‘পাক্কে দিক্লারেসন’ চৎনবদা হরাওই। লৌউ-শিংউ, হোর্তিকলচর, অনা-লায়য়েং অমসুং অকোয়বগী ফিবম ঙাক-শেনবদা রাজ্য সরকারনা দ্রোন তেক্নোলোজি শীজিন্নরে হায়বা খঙবদশু হরাওই। হায়রিবা থবকশিং অসি অকোয়বগী ফিবম কন্নবা মরুওইবা খোঙথাংশিংনি।

রাস্ত্রপতি ভারতকী চাউখৎ-থৌরাংদা অরুনাচল প্রদেস য়াওনা অৱাং-নোংপোক্কী রাজ্যশিংনা মরুওইবা থৌদাং অমা লৌরি। অৱাং-নোংপোক্কী রাজ্যশিংদা জি-২০গী মীফম কয়া পাংথোক্লি হায়বা তাবদা মহাক হরাওই। হায়রিবা মীফমশিং অদুনা অৱাং-নোংপোক্কী কলচর অমসুং তুরিজমদা ইনোৎ অমা পীগনি অমসুং লমদম অসিদা শেন থাদরক্নবগী খুদোংচাবা কয়া ফংলগনি।

*****