امور داخلہ اور امداد باہمی کے مرکزی وزیر جناب امت شاہ نے آج نئی دہلی میں دہلی پولیس کے 76ویں یوم تاسیس کی تقریبات میں بطور مہمان خصوصی شرکت کی۔ اس موقع پر مرکزی وزیر داخلہ نے پاسپورٹ کے ویری فکیشن (تصدیق) کی مکمل آن لائن سہولت کا افتتاح کیا اور دہلی پولیس میں شامل موبائل فارنسک وہیکلس بھی لوگوں کے لیے وقف کیں۔ اس کے ساتھ ہی مرکزی وزیر داخلہ نے نیشنل فارنسک سائنس یونیورسٹی (این ایف ایس یو) دہلی کیمپس کے اکیڈمک کمپلیکس کا بھی افتتاح کیا۔ اس موقع پر مرکزی داخلہ سکریٹری اور دہلی پولیس کمشنر سمیت کئی معززین بھی موجود تھے۔

اپنے خطاب میں امور داخلہ اور امداد باہمی کے مرکزی وزیر نے کہا کہ آزادی سے لے کر آج تک اپنی شاندار تاریخ کے ساتھ دہلی پولیس نے پورے ملک کی تعریف حاصل کی ہے۔ انہوں نے کہا کہ دہلی میں کئی ممالک کے سفارت خانے اور بہت اہم لوگوں کی رہائش گاہیں ہیں اور پوری دنیا دہلی پولیس کے سیکورٹی نظام کی تعریف کرتی ہے۔

جناب امت شاہ نے کہا کہ پولیس اور اس کے کام کو آزادی کے فوراً بعد بدلنا چاہیے تھا۔ انہوں نے کہا کہ آزادی سے پہلے پولیس کے کام میں خدمت کا جذبہ شامل نہیں تھا۔ پولیس کا کام داخلی سلامتی اور امن و امان کو برقرار رکھنا اور بنیادی طور پر برطانوی راج کے مفادات کا تحفظ کرنا تھا۔ انہوں نے کہا کہ آزادی کے بعد دہلی پولیس ’شانتی، سیوا، نیائے‘ کے اصولوں کے ساتھ آگے بڑھی ہے اور اس مقصد میں تبدیلی کے ساتھ دہلی پولیس نے 75 سال کے اس سفر میں اپنے کاموں، سرگرمیوں اور خیالات میں کافی تبدیلیاں کی ہیں۔ انہوں نے کہا کہ حال ہی میں ملک اور دنیا کووڈ-19 کی وبا سے گزری ہے، اس وقت دہلی پولیس کا انسانی چہرہ سب کے سامنے آیا، جس نے ملک اور دنیا میں اس کی تصویر بدل دی۔ دہلی پولیس کے اہلکاروں نے کووڈ 19 کی وبا کے دوران دہلی کے بوڑھے اور بیمار لوگوں کی دیکھ بھال کی، ان کے خاندان کے افراد کی طرح ان کے ساتھ رہے اور ان کی حفاظت کی۔ دہلی پولیس کے کئی اہلکار خود بھی کووڈ-19 سے متاثر ہوئے اور کئی اہلکاروں نے اپنی جان بھی گنوا دی، لیکن کورونا کی وبا کے خاتمے تک دہلی پولیس ’شانتی، سیوا، نیائے‘ کے اپنے نعرے کو پورا کرتی رہی۔

مرکزی وزیر داخلہ نے کہا کہ آج موبائل ٹیبلٹ کے ذریعے پاسپورٹ کی تصدیق کی سہولت بھی شروع کر دی گئی ہے، اس کے ساتھ پاسپورٹ کی درخواست کی پولیس تصدیق 15 دنوں کے بجائے 5 دن میں آن لائن ہو جائے گی۔ انہوں نے کہا کہ پاسپورٹ کے لیے روزانہ اوسطاً  2000 درخواستیں موصول ہوتی ہیں اور اب ان کی آن لائن پروسیسنگ سے عوام کو درپیش مشکلات میں کمی آئے گی۔

جناب امت شاہ نے کہا کہ دہلی پولیس کو آج موبائل فارنسک وین بھی ملی ہے۔ انہوں نے کہا کہ آنے والے دنوں میں دہلی پولیس ملک کی پہلی پولیس فورس بن جائے گی جو 6 سال یا اس سے زیادہ کی سزا والے ہر جرم کی فارنسک ٹیم کے دورہ سے تفتیش کرے گی۔ انہوں نے کہا کہ ہمارے ملک کے عدالتی نظام کو فارنسک سائنس شواہد کی بنیاد پر مضبوط کرنے کی اشد ضرورت ہے۔ جناب شاہ نے کہا کہ جب جدید ترین سہولیات اور 14 مختلف قسم کی فارنسک کٹس سے لیس یہ گاڑی جائے وقوعہ کا دورہ کرے گی تو سزا سنانے کی شرح میں نمایاں اضافہ ہوگا۔ انہوں نے کہا کہ نیشنل فارنسک سائنس یونیورسٹی (این ایف ایس یو) کے دہلی کیمپس میں تعلیمی سہولیات کے لیے 34 کروڑ روپے کی لاگت سے ایک جدید عمارت کا بھی آج افتتاح کیا گیا ہے۔ انہوں نے کہا کہ  5000 مربع میٹر سے زائد رقبے پر پھیلی یہ عمارت طلباء کی مدد کرے گی اور انہیں مطالعے اور تحقیق کے لیے اچھا ماحول فراہم کرے گی۔ اس عمارت میں  90 جدید ہاسٹل کمرے بھی دستیاب ہیں۔ انہوں نے کہا کہ آنے والے دنوں میں فارنسک تفتیش انصاف کے عمل میں بہت اہم کردار ادا کرے گی۔

امور داخلہ اور امداد باہمی کے مرکزی وزیر نے کہا کہ وزیر اعظم جناب نریندر مودی کی قیادت میں حکومت آنے والے دنوں میں آئی پی سی، سی آر پی سی اور ایویڈینس ایکٹ میں بنیادی تبدیلیاں کرنے جا رہی ہے۔ انہوں نے کہا کہ یہ تینوں قوانین وقت اور آئین کے روح کے مطابق لائے جائیں گے اور اندرونی سلامتی کو مضبوط بنانے کے لیے فارنسک اور دیگر شواہد کی دستیابی کے ساتھ اسے مزید مضبوط کیا جائے گا۔ انہوں نے کہا کہ اس کے لیے فارنسک سائنس کا جال پورے ملک میں پھیلانا ہوگا۔ جناب شاہ نے کہا کہ دہلی پولیس نے ان اصلاحات میں سے ایک کا ٹرائل بھی شروع کیا ہے جس کے تحت 6 سال یا اس سے زیادہ کی سزا والے ہر جرم میں فارنسک سائنس کی ٹیم کا دورہ لازمی قرار دیا جا رہا ہے۔ اس کے لیے تربیت یافتہ افرادی قوت اور فارنسک سائنس کے شعبے میں ماہر نوجوانوں کی ضرورت ہے اور اس مقصد کو پورا کرنے کے لیے وزیر اعظم جناب نریندر مودی نے نیشنل فارنسک سائنس یونیورسٹی قائم کی۔ انہوں نے کہا کہ بہت کم وقت میں اس یونیورسٹی کے کیمپس ملک کی 9 ریاستوں میں کھولے گئے ہیں اور اگلے 2 سالوں میں ملک کی ہر ریاست میں اس کے کیمپس ہوں گے۔ جناب شاہ نے کہا کہ یہ مجوزہ قانونی تبدیلیوں کے نفاذ کے لیے انتہائی ضروری تربیت یافتہ افرادی قوت فراہم کریں گے۔

جناب امت شاہ نے کہا کہ سال 2023 دہلی پولیس کے لیے بہت اہم ہے، دہلی پولیس بھی اس سال جی  20 چوٹی کانفرنس کے دوران سیکورٹی اور ٹریفک کے انتظامات کرکے ملک کا نام روشن کرے گی۔ جناب شاہ نے کہا کہ مستقبل کے چیلنجوں کو سامنے رکھتے ہوئے دہلی پولیس ہیڈ کوارٹر میں 20 شعبوں میں بہتری کا عمل شروع کیا گیا تھا، جس میں سے 16 شعبوں میں بہت اچھی پیش رفت ہوئی ہے۔ اس کی وجہ سے آنے والے دنوں میں دہلی پولیس کے کاموں میں نمایاں بہتری آئے گی، جو دہلی کی پوری عوام کے لیے بھی بہت اہم اور فائدہ مند ثابت ہوگی۔

امور داخلہ اور امداد باہمی کے مرکزی وزیر نے کہا کہ 2014 سے 2023 تک ملک کی امن و امان کی صورتحال اور داخلی سلامتی میں بنیادی تبدیلیاں آئی ہیں۔ کشمیر میں آرٹیکل 370 کی منسوخی کے بعد ہماری سیکورٹی ایجنسیوں کا دہشت گردی پر مکمل غلبہ ہے۔ انہوں نے کہا کہ جموں و کشمیر میں تازہ ترین اعداد و شمار کے مطابق دہشت گردی کے واقعات میں زبردست کمی آئی ہے۔ کروڑوں لوگ سیاحت کے لیے کشمیر آتے ہیں۔ پتھراؤ، جلوسوں اور بند کے واقعات کی بجائے جو پہلے ہوا کرتے تھے، آج پورا کشمیر ان واقعات سے آزاد ہے اور لاکھوں سیاحوں کا استقبال کر رہا ہے۔ جناب شاہ نے کہا کہ بائیں بازو کی انتہا پسندی کئی دہائیوں سے ہمارے ملک کے لیے ایک بڑی تشویش کا باعث تھی، لیکن اب اس میں زبردست کمی آئی ہے۔ انہوں نے کہا کہ بائیں بازو کی انتہا پسندی کے تشدد کے سب سے کم اعداد و شمار سال 2022 میں دیکھے گئے ہیں۔ انہوں نے کہا کہ بائیں بازو کی انتہا پسندی اب صرف 46 تھانہ علاقوں تک محدود ہوگئی ہے جو کہ ایک بہت بڑی کامیابی ہے۔ جناب شاہ نے کہا کہ ہماری سیکورٹی فورسز بائیں بازو کی انتہا پسندی والے علاقوں میں بہادری اور جرات کا مظاہرہ کرتے ہوئے اعتماد کے ساتھ آگے بڑھ رہی ہیں، جس کے نتیجے میں بائیں بازو کی انتہا پسندی میں کمی آ رہی ہے۔ انہوں نے کہا کہ جھارکھنڈ اور بہار کی سرحد پر بدھا پہاڈور سکیورٹی فورسز نے کئی علاقوں کو بائیں بازو کی انتہا پسندی سے مکمل طور پر آزاد کرایا ہے۔ اس کے لیے جناب شاہ نے حکومت ہند اور ریاستی حکومتوں کی تمام سیکورٹی فورسز کو مبارکباد دی۔

جناب امت شاہ نے کہا کہ پہلے شمال مشرق میں شورش پھیلانے والے بہت سے گروہ سرگرم تھے، لیکن آج وہاں امن قائم ہوا ہے اور شمال مشرق کے 60 فیصد حصے سے افسپا کو ہٹا دیا گیا ہے۔ جناب شاہ نے کہا کہ آج شمال مشرق میں 8000 سے زیادہ نوجوان ہتھیار چھوڑ کر قومی دھارے میں شامل ہو گئے ہیں۔ حکومت نے کئی انتہا پسند تنظیموں کے ساتھ معاہدے کیے ہیں اور ان پر مکمل طور پر عمل درآمد کیا ہے اور اس سے حکومت اور وزارت داخلہ کی ساکھ میں اضافہ ہوا ہے۔ انہوں نے کہا کہ وزارت داخلہ نے ریاستوں کے درمیان سرحدی تنازعات کو حل کرنے کے لیے بھی پہل کی ہے اور ایسے سرحدی تنازعات کو حل کرکے امن قائم کیا گیا ہے۔

مرکزی وزیر داخلہ نے کہا کہ 4 ماہ قبل دہلی، پنجاب، راجستھان پولیس اور این آئی اے نے مل کر شمالی ہندوستان میں بین ریاستی گروہوں کے خلاف کریک ڈاؤن شروع کیا، جس میں انہیں بڑی کامیابی ملی، اس میں دہلی پولیس کا بھی بڑا کردار ہے۔ انہوں نے کہا کہ دہلی پولیس نے وزیر اعظم جناب نریندر مودی کی قیادت میں حکومت ہند کی طرف سے شروع کئے گئے ’نشہ مکت بھارت ابھیان‘ کو مضبوط بنانے میں کوئی کسر نہیں چھوڑی ہے۔ انہوں نے کہا کہ ملک کے نوجوانوں بالخصوص دہلی کے نوجوانوں کو منشیات سے آزاد کرنا ہم سب کی مشترکہ ذمہ داری ہے۔ جناب امت شاہ نے کہا کہ دہلی پولیس نے منشیات کے عادی لوگوں کے ساتھ ہمدردی کرکے بہت اچھا کام کیا ہے۔ دہلی پولیس نے انہیں مرکزی دھارے میں واپس لا کر سماج میں انھیں دوبارہ مقام دلایا اور منشیات فروشوں کو سزا دی اور انھیں سلاخوں کے پیچھے ڈال دیا۔

جناب امت شاہ نے کہا کہ وزیر اعظم جناب نریندر مودی نے دہلی پولیس اور تمام سی اے پی ایف کے لیے ہاؤسنگ سٹسفیکشن ریشیو بڑھانے کے لیے کل کابینہ میں ایک بہت بڑا بجٹ منظور کیا ہے۔ انہوں نے اس اعتماد کا اظہار کیا کہ حکومت  2024 سے پہلے ملک کی پولیس، تمام سی اے پی ایف اور دہلی پولیس کے ہاؤسنگ سٹسفیکشن ریشیو کو  60 فیصد سے اوپر لے جائے گی۔ جناب شاہ نے خواہش ظاہر کی کہ دہلی پولیس کے تمام اہلکار اپنے نصب العین’شانتی، سیوا، نیائے‘ کے راستے پر آگے بڑھتے ہوئے ملک کی راجدھانی دہلی میں امن و امان کی صورتحال کو بہترین طریقے سے سنبھالتی رہے گی۔

******

ش ح۔ م م۔ م ر

U-NO. 1750