হয়েং কর্নাতকাগী বেঙ্গালুরুদা প্রধান মন্ত্রী শ্রী নরেন্দ্র মোদীনা ইন্দিয়া ইনর্জি ৱিক(আই ই দব্লিউ)২০২৩ হৌদোক্কনি। ফেব্রুৱারি ৬তগী ফেব্রুৱারিগী ৮ ফাওবা পাংথোক্কদবা ইন্দিয়া ইনর্জি ৱিক অসিদা ইনর্জিগী লমদা অহোংবা কয়া লৈরবা ভারতকী তৌবা ঙম্বশিং উৎকনি। থৌরম অদুদা ত্রেদিসনেল অমসুং নন-ত্রেদিসনেল ইজর্নি ইন্দস্ত্রিগী লুচিংবশিং, সরকার অমসুং অখঙ-অহৈশিংনা হৌজিক ওইরিবা ইনর্জিগী লমদা লৈরিবা অহোংবশিংগী খুদোংচাদবশিং অমসুং কান্নবশিংগী মরমদা খন্নগনি। থৌরম অদুদা মালেমগী মফম কয়াদগী মিনিস্তর ৩০ হেন্না শরুক য়াগনি। ভারতকী ইনর্জিগী তুংলমচৎকী খুদোংচাদবশিং অমসুং কান্নবশিংগী মতাংদা খন্ননবা দেলিগেদ ৩০,০০০, একজিবিতর ১০০০ অমসুং ৱাঙাংলোয় ৫০০ হেন্না পুনগনি। প্রধান মন্ত্রীনা মালেমগী থাউ অমসুং গ্যাসকী সি.ই.ওশিংগা মীফম অমা পাংথোক্কনি। মহাক্না অকোয়বগী ফিবম শোকহন্দবা ইনর্জিগী লমদা তোঙান-তোঙানবা থবকশিংশু হৌদোক্কনি।

ই-২০ থাউ:

ইনর্জিগী লমদা অত্মানির্ভর ভারত অমা ফংবা ঙম্নবা ইথানোল য়ানশিনবগী থবক অসি সরকারগী মরুওইবা থবক অমা ওইরে। সরকারনা লেপ্তনা হোৎনবনা মরম ওইদুনা, ২০১৩-১৪দগী ইথানোল পুথোকপা ঙম্বগী চাং শরুক তরুক হেনগৎলে। ইথানোল য়ানশিনবা থৌরম অমসুং বাইওফুয়েল প্রোগ্রামগী মখাদা হৌখিবা চহি ৮দা লৈখিবা মাইপাকপশিংনা ভারতকী ইনর্জি ওক্নবা থম্বা হেনগৎহনবতা নত্তনা কার্বোন্দাইওক্সাইদ মেত্রিক তন লাখ ৩১৮ থাদোকপা হন্থহনবা য়াওনা অতোপ্পা কান্নবা কয়া ফংখি অমসুং লুপা করোর ৫৪,০০০ রোমগী ফোরেন একচেঞ্জ কনবা ঙমখি। মসিগী মহৈ ওইনা, ২০১৪দগী ২০২২ ফাওবগী মনুংদা ইথানোলশিং সপ্লাই তৌরকপগীদমক চাউরাক্না লুপা করোর ৮১,৮০০ রোম পীখি অমসুং লৌমীশিংদা লুপা কারোর ৪৯,০০০ হেন্না পীখি। প্রধান মন্ত্রীনা রাজ্য/য়ু.তি ১১দা ওইল মার্কেত্তিং কম্পেনিশিংগী ই-২০ থাউ য়োন্নবা আউতলেত ৮৪ হাংদোক্কনি। ই-২০ অসি পেত্রোলদা ইথানোল চাদা ২০ য়ানশিনবা থাউনি। ২০২৫ ফাওবগী মনুংদা মপুংফানা ইথানোল চাদা ২০ য়ানশিন্নবা সরকারনা পান্দম থম্লি অমসুং মসিগীদমক ওইল মার্কেত্তিং কম্পেনিশিংনা ২জি-৩জি ইথানোল প্লান্তশিং লিংখৎলে।

গ্রিন মোবিলিতি রেল্লি:

প্রধান মন্ত্রীনা গ্রিন মোবিলিতি রেল্লি হৌদোক্কনি। রেল্লি অদুদা গ্রিন ইনর্জিশিংনা চেনবা গারিশিং শরুক য়াগনি অমসুং মীয়ামদা গ্রিন ফুয়েলশিংগী মরমদা খঙহনবদা মতেং পাংগনি।

ইন্দিয়ান ওইলগী ‘অনবোত্তল’

ইন্দিয়ান ওইলগী ‘অনবোত্তল’ থৌরাংগী মখাদা প্রধান মন্ত্রীনা য়ুনিফোর্মশিং হৌদোক্কনি। শিঙ্গল-য়ুজ প্লাস্তিক শীজিন্নবা তোক্নবা প্রধান মন্ত্রীগী পান্দমনা লমজিং ওইদুনা, ইন্দিয়ান ওইলনা মসিগী থাউ কাপ্পা মীওইশিং অমসুং এল.পি.জি য়েন্থোকপা মীওইশিং রিসাইকল পোলিস্তর অমসুং লশিংনা শাবা য়ুনিফোর্মশিং শীজিন্নহল্লে। ইন্দিয়ান ওইলগী থাউ কাপ্পা মীওই অমগী য়ুনিফোর্ম সেত অমা পুথোকপদা চাউরাক্না পি.ই.তি বোত্তল ২৮ রোম শীজিন্নৈ। রিসাইকল পোলিস্তরদগী শাবা ফিরোলশিংগী ব্রান্দ অমা ওইনা ‘অনবোত্তল’গী খুৎথাংদা ইন্দিয়ান ওইলনা থবক অসি পায়খৎপনি। ব্রান্দ অসিগী মখাদা অতোপ্পা ওইল মার্কেত্তিং কম্পেনিশিংগী থাউ কাপ্পা মীওইশিং, লান্মীগী নন-কম্বেত য়ুনিফোর্মশিং, মহৈলোয়শঙশিংগী য়ুনিফোর্মশিংগী দরকার ওইবশিং পীনবা ইন্দিয়ান ওইলনা পান্দম থম্লি।

ইন্দোর সোলার কুকিং সিস্তেমগী ত্বিন-কুকতোপ মোদেল

প্রধান মন্ত্রীগী ইন্দিয়ান ওইলগী ইন্দোর সোলার কুকিং সিস্তেমগী ত্বিন-কুকতোপ মোদেল হৌদোক্কনি অমসুং মসি মীয়ামদা য়োনবগী থবক হৌদোক্কনি। ইন্দিয়ান ওইলনা মমাঙদা শিঙ্গল কুকতোপদা অনৌবা অমসুং পেতেন্ত তৌরবা ইন্দোর সোলার কুকিং সিস্তেম অমা পুথোকখ্রে। মীয়ামদগী ৱারোল কয়া তারবা মতুংদা, শীজিন্নরিবা মীওইশিং হেন্না নুংঙাইনবা ত্বিন-কুকতোপ ইন্দোর সোলার কুকিং সিস্তেম পুথোকপনি। মসি ইনৌ নৌবা মতম অমতদা সোলার অমসুং অতোপ্পা ইনর্জি অনিমক শীজিন্নবা ইন্দোর সোলার কুকিংগী থবক অমনি অমসুং মসিনা ভারতকী থোং-থাকপগী থবকশিং মপুংফানা পাংথোকপা ঙমহনগনি।

চহি খর অসিদা ইনর্জিগী লমদা অহোংবা কয়া লাক্লে। বাইওফুয়েলশিং, ইলেকত্রিক গারিশিং, গ্রিন হায়দ্রোজেন য়াওনা কার্বোন য়াম্না পুথোকপদা পাম্বৈশিং শীজিন্নবা হেনগৎহন্নবা সরকারনা থৌরাং তৌরে। পেত্রোলিয়ম অমসুং নেচরেল গ্যাসকী য়ুনিয়ন মিনিস্তর হরদিপ সিংহ পুরিনা হায়খি ভারতকী ক্লাইমেত চেঞ্জগী পান্দমশিং ফংবা ঙম্নবা কার্বোন য়াম্না পুথোক্তবা ইনর্জিদা ওন্থোকপা হায়বসি অরুবা অমনি।

য়ুনিয়ন মিনিস্তরনা হায়খি গ্রিন ইনর্জি ফংহনবা ঙম্নবা লৈবাক অসিগী বজেত ২০২৩-২৪দা সরকারনা লুপা করোর ৩৫,০০০গী শেন অমা লাউথোক্লে। শেন-থুম তানবগী তোঙান-তোঙানবা থবকশিংদা ইনর্জি লিক্না শীজিন্ননবা সরকারনা গ্রিন ফুয়েল, গ্রিন ইনর্জি,গ্রিন ফার্মিং, গ্রিন মোবিলিতি, গ্রিন বিল্দিং অমসুং গ্রিন ইকুইপমেন্তগী থৌরম কয়া পায়খৎলি। ইনর্জিগী অওনবা পুরক্নবা অমসুং ৱাৎহন্দনবা ঐখোয়না থবক কয়া পায়খৎলে অমসুং তুংগী ইনফ্রাস্ত্রকচর শেমগৎলে। ইনর্জি দরকার ওইবা হেনগৎলক্লিবা অসি ইনর্জিশিং য়ানশিন্নবনা ফংহনবা ঙমগনি।

*****