লৌউ-শিংউ মন্ত্রালয়
রোজগার মেলা-২দা নহা ৭১,০০০দা এপোইন্তমেন্ত লেত্তর খুৎশিন্নখ্রে, কর্ময়োগী প্রারম্ভ মোদ্যুল হৌদোকখ্রে
নহাশিংগী মায়কৈ শুবা খুদোংচাবশিং শেমগৎলি – শ্রী মোদী
এমপ্লোইমেন্ত ফ্যার নহাশিংবু মপাঙ্গল কলহন্নবা, মখোয়বু লৈবাক চাওখৎপা পুরক্নবগী পাম্বৈ ওইহন্নবা থৌরাংনি – পি.এম.
ঐখোয়গী নহাশিংগী পাঙ্গল অমদি মশিং ঐখোয়গী খ্বাইদগী চাউবা লন্নি – শ্রী তোমার
Posted On:
22 NOV 2022 4:10PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি প্রধান মন্ত্রী রোজগার মেলাগী মখাদা ভিদিও কন্ফরেন্সিংগী খুত্থাঙদা নহা ৭১,০০০ হেনবদা এপোইন্তমেন্ত লেত্তর পীবগী থৌরম হৌদোকখ্রে। মসিগী মথক্তা, প্রধান মন্ত্রীনা, নৌনা থবক খল্লবা পুম্নমক্কী ওইবা ওনলাইন ওরিএন্তেসন কোর্স অমা ওইরিবা কর্ময়োগী প্রারম্ভ মোদ্যুলসু হৌদোকখি। থৌরমদুদা ৱা ঙাঙলদুনা, শ্রী মোদীনা স্তার্ত-অপ্তগী হৌরগা মশানা মশাবু থবক পীজবা ফাওবা, স্পেস্তগী হৌরগা দ্রোন ফাওবদা, ঙসি ভারত্তা নহাশিংগী মায়কৈ শুবা খুদোংচাবশিং শেমগৎলি হায়খি। রোজগার মেলা অসি নহাশিংবু মপাঙ্গল কলহন্নবা, মখোয়বু লৈবাক চাওখৎপা পুরক্নবগী পাম্বৈ ওইহন্নবা থৌরাংনি। ঙসি এমপ্লোইমেন্ত ফ্যারশিং লৈবাক্কী মফম ৪৫দা পাঙথোক্লি অমদি মসিগী মনুং চন্না ভোপালদা পাঙথোকপা থৌরমদা লৌউ-শিংউ অমদি লৌমীশিংগী য়াইফ-থৌরাংগী কেন্দ্র মন্ত্রী শ্রী নরেন্দ্র সিংহ তোমারনা অথোইবা মীথুং ওইনা শরুক য়াখি। শ্রী তোমারনা ঐখোয়গী লৈবাকসিগী নহাশিংগী মপাঙ্গল অমদি মশিং অসিনা ঐখোয়গী খ্বাইদগী চাউবা লন্নি হায়খি।
মরুওইবা ৱারোল পীরদুনা, প্রধান মন্ত্রীনা ঙসি নহা ৭১,০০০ হেনবদা এপোইন্তমেন্ত লেত্তরশিং পীদুনা ইমুং কয়াগীদমক নুংঙাইবগী অনৌবা মায়োল অমদা পুরক্লি হায়খি। মহাক্না ধন্তেরসকী নুমিৎতা কেন্দ্র সরকারনা নহারোলশিংদা এপোইন্তমেন্ত লেত্তর ৭৫,০০০ য়েন্থোকখিবা অদু নীংশিংখি। প্রধান মন্ত্রীনা, ঙসিগী রোজগার মেলা অসি কেন্দ্র লৈঙাক্না লৈবাক্কী নহারোলশিংদা থবক্কী খুদোংচাবশিং পীনবা মিসন মোদতা থবক তৌরি হায়বগী খুদম অমা ওইরি হায়খি। মতম মতমগী মতুং ইন্না অসিগুম্বা রোজগার মেলাশিং য়ুনিয়ন তেরিতরীশিং অমসুং স্তেত কয়ানা পাঙথোক্কনি। মহারাস্ত্র, গুজরাত, উত্তর প্রদেশ, জম্মু অমসুং কাশ্মির, লদাখ, অন্দমান অমসুং নিকোবর, লক্ষদ্বীপ, দামন অমসুং দিয়ু, দদ্রা অমসুং নগর হবেলি অমসুং চান্দিগরদা মখোয় মখোয়গী লৈঙাকশিংনা নহা লিশিং কয়াদা এপোইন্তমেন্ত লেত্তরশিং খুৎশিন্নখিবদা মহাক্না নুংঙাইবা ফোঙদোকখি। গোৱা অমসুং ত্রিপুরানা নুমিৎ খরনি অসিদা অসিগুম্বা রোজগার মেলাশিং পাঙথোক্নবা শেম-শারি। প্রধান মন্ত্রীনা অসিগুম্বা অচৌবা মাইপাকপা অসিগীদমক দবল-ইঞ্জিন লৈঙাকপু শিংথাখি অমসুং অসিগুম্বা রোজগার মেলাশিং অসি ভারতকী নহাশিংবু মপাঙ্গল কলহন্নবগীদমক মতম মতমগী ওইনা পাঙথোক্কনি হায়না থাজবা পীখি।
শ্রী মোদীনা নহাশিং অসি লৈবাক্কী খ্বাইদগী অচৌবা পাঙ্গলনি হায়খি। কেন্দ্র লৈঙাক্না মখোয়গী তেলেন্ত অমসুং ইনর্জী অসিবু লৈবাক শেমগৎপদা শীজিন্নবদা খ্বাইদগী মরু ওইবা মীৎয়েং চংলি। মহাক্না অনৌবা পব্লিক সর্ভেন্তশিংগী মফমদা নুংঙাইবা ফোঙদোক্লদুনা, মখোয়দা য়াম্না মরু ওইবা তানফম হায়বদি অমৃত কালদা মখোয়দা মরু ওইবা থৌদাং শীন্নরি হায়না নীংশিংখি। মহাক্না অমৃত কালদা চাউখৎপা লৈবাক অমা ওইহন্নবা লৈবাক্কী ফিরেপতা মখোয়না লৌগদৌরিবা থৌদাং অদু খঙহনখি। মহাক্না মখোয়দা কেন্দ্র লৈঙাক্কী মীহুৎশিং ওইনা মখোয় মশাগী থৌদাং অদু মুন্না খঙগদবনি অমসুং মখোয়গী থৌদাং পাঙথোক্নবা কেপাসিতী বিল্দিংদা লেপ্তনা মীৎয়েং থম্নবা হায়খি। লৈঙাক্কী শিন্মীশিং শেম শানবগী অখন্নবা কোর্স অমা ওইরিবা কর্ময়োগী প্রারম্ভকী কান্নবশিং শন্দোক্না তাক্লদুনা, মসিনা স্কিল দিভেলপমেন্তকী কান্নরবা সোর্স অমা ওইরগনি অমদি মখোয়দা চাউনা কান্নহনগনি হায়না মহাক্না হায়খি। লাইচৎ অমসুং লান্না মরম ওইদুনা মালেমগী থাক্তা নহাশিংনা থেংনরিবা খুদোংচাদবশিংগী মতাঙদা পল্লদুনা, প্রধান মন্ত্রীনা অসিগুম্বা অরুবা তানফমসিদসু মালেমগী অখঙ-অহৈশিংনা ভারতকী চাওখৎ লম্বীদা থাজবা থম্লি হায়খি। প্রধান মন্ত্রীনা, অখঙ-অহৈশিংগী মতুং ইন্না ভারতনা সর্ভিস সেক্তরদা মরু ওইবা ফোর্স অমা ওইনা মচিন তুমখৎলক্লি অমসুং অথুবদা মালেমগী মেন্যুফেকচরিং হব ওইরগনি হায়খি। অমরোমদা পি.এল.আই.গুম্বা থৌশিলশিংনা মসিদা অচৌবা থৌদাং লৌরগনি, অদুগা লৈবাক্কী নহা ওইরিবা অমদি স্কিল মেনপাৱরনা মপুং ওইবা য়ুম্ফম ওইরগনি হায়না ফোঙদোকখি। মেদ ইন ইন্দিয়া, ভোকেল ফোর লোকেলগুম্বা কেম্পেনশিং অমসুং লোকেলবু গ্লোবেল য়ৌহনবা মসিনা থবক্কী অমসুং মশানা মশাবু থবক পীজবগী অনৌবা খুদোংচাবশিং পীরি হায়না মহাক্না হায়খি। মহাক্না হায়, লৈঙাক অমসুং লনাই সেক্তর অনিমক্তা অনৌবা থবক্কী খুদোংচাবশিং লেপ্পা লৈতনা হেনগৎলক্লি। মরু ওইনা, খুদোংচাবশিং অসি নহাশিংগী মখোয় মশাগী ময়োল্লম অমসুং খুঙ্গংশিংদা হেনগৎলক্লি। মসিনা নহাশিংবু য়ুম হোংবগী তঙাই ফদবা হন্থহন্দুনা মখোয়না লৈরিবা মফম অদুগী চাউখৎ-থৌরাংদা মখোয়না থৌদাং লৌবা ঙমহল্লগনি।
স্তার্তঅপতগী মশানা মশাবু থবক পীজবা অমসুং স্পেসতগী দ্রোন ফাওবদা লৈরিবা সেক্তরশিংদা পাইখৎখিবা খোঙথাংশিংনা পীখিবা অনৌবা খুদোংচাবশিংগী মতাংদা ফোঙদোক্লদুনা, প্রধান মন্ত্রীনা স্তার্তঅপ ৮০,০০০না নহাশিংদা মখোয়গী তেলেন্ত উৎচনবা খুদোংচাবা পীরি। দ্রোনশিং অসি হীদাক-লাংথক, তিল হীদাক অমসুং স্বামিত্ব স্কিমদা মেপ্পিং তৌবা অমসুং দিফেন্স সেক্তরদা শীজিন্নবা হেনগৎলক্লি। মসিনা মরম ওইরগা নহাশিংগীদমক অনৌবা থবক্কী খুদোংচাবশিং পীরি শেমগৎলক্লি। নুমিৎ খরনিগী মমাংদা ভারত্তা প্রাইবেৎ সেক্তরনা ভারতকী অহানবা স্পেস রোক্কেৎ লোঞ্চ তৌখিবা অদু নীংশিংলদুনা, প্রধান মন্ত্রীনা স্পেস সেক্তর হাংদোক্নবা লৌখিবা ফিরেপ অমদি মসিনা ভারতকী নহারোলশিংদা থবক্কী খুদোংচাবশিং পীরিবা অসিবু থাগৎখি। প্রধান মন্ত্রীনা রিসর্চ অমসুং ইন্নোভেসনবু মাঙদা পুখৎলিবা অসিনা মরম ওইরগা লৈবাক অসিদা থবক্কী খুদোংচাবশিং হেনগৎহল্লে হায়খি।
ভোপালগী সাসস্ত্র সীমা বল (এস.এস.বি.) একাদমীদা পাঙথোকখিবা জোব ফ্যারদা কেন্দ্র মন্ত্রী শ্রী তোমারনা ঐখোয়গী লৈবাক অসি অনৌবা তেক্নোলোজীশিং খোঙলৈ থুনা শীজিন্নরদুনা মাঙদা চঙশিন্নবা হোৎনরি অমদি লৈবাকসিগী নহারোলশিংনা খোঙজেল অসি হাপ্লিবা মরুওইবা মতিংনি। চহি অসিগী জুন থাদা প্রধান মন্ত্রীনা ৱাশকখিবগী মতুং ইন্না, শ্রী মোমারনা থা খুদিংগী নহা ৭৫,০০০ থবক পীননবা পায়খৎলিবা থৌরাং অসি চহি চুপ্পা মিসন মোদতা মীওই ১০,০০,০০০দা থবক পীনবগী পান্দম ফংননবগীদমক চত্থখিগনি, অদুম ওইনমক লৈঙাক্কী থবকখক্তনা থবক নত্তে, মসিনা পুম্নমক্কী পাম্বৈ নত্তে হায়বসি ঐখোয়না খঙগদবনি হায়খি। লৈবাকসিদা তোঙান তোঙানবা স্কীমশিংগী খুত্থাঙদা থবক কয়াসু পীরি, প্রধান মন্ত্রীনা মেক ইন ইন্দিয়া, স্কিল ইন্দিয়া, স্তেন্দঅপ ইন্দিয়া অমদি স্তার্তঅপ ইন্দিয়াগী মরমদা ৱাফম কয়া ফোঙদোক্লিবসিদা, হায়রিবা স্কীমশিং অসিদা নহাশিংবু থবক পীননবা য়াম্লবা খুদোংচাবশিং লৈরি। মসিগা লোয়ননা, লনাই সেক্তরদা লৈরিবা খউদোংচাবশিংসু থুনা হেনগৎলক্লি। ঙসি ফম্পাক পুম্নমক থবক পীনবগীদমক নীংথিনা শীজিন্নরি। পন্দীৎ দীনদয়াল উপধ্যায় গ্রামীন কৌসাল্য য়োজনাগী খুত্থাঙদা নহা করোর অমগা মখায়দা ত্রেনিং পীখ্রে অমদি মখোয়গী মনুংদা নহা ৮০,০০,০০০ হেনবনা থবক ফংখ্রে। নহাশিংবু ত্রেনিং পীদুনা অমদি বেঙ্কশিংগা খুৎশম্ননা থবক তৌমিন্নবা রুরেল ত্রেনিং ইন্সতিত্যুৎশিংগী খুত্থাঙদা লোন পীদুনা মপাঙ্গল কলহন্নবা থবকসু পায়খৎলি হায়না মহাক্না হায়খি।
শ্রী তোমারনা, ঐখোয়গী খুঙ্গংগী লমদা লৈবা ইচে ইচল ৮,০০,০০,০০০না সেল্ফ-হেল্প গ্রুপশিংগী খুত্থাঙদা থবক তৌদুনা পুন্সি হিংনবগী শেল তাল্লি, হায়রিবা গ্রুপশিং অসিদা বেঙ্কশিংনা লোন চাউনা পীথরি অদুবু মখোয়গী এন.পি.এ.গী চাংদি চাদা ২গী মখাদা লৈ হায়খি। অনৌবা স্তার্তঅপ লিশিং কয়া লৈবাকসিদা অনৌবা য়াওলগী ইনোৎ হাপ্লি, স্তার্তঅপ খুদিংমক্না মীওই ৫-১০দা থবক পীরি, অনৌবা ভারত স্তার্তঅপশিংগী খুত্থাঙদা শেমগৎলি, ঐখোয়না অনৌবা মায়কৈ অমদা চঙশিল্লি হায়না মহাক্না হায়খি।
শ্রী তোমারনা, ঙসি মথৌ তারিবদি, ঐখোয়না থবক পায়খৎলিবা রম খুদিংদা, ঐখোয়না খোঙজেল য়াঙনা থবক তৌবনি হায়খি। মীপুম খুদিংমক ঐনা তৌবা থবক্না লাক্কদৌরিবা মতমদা লৈবাক অসিবু চাওখৎপা ভারত অমদা অওনবা পুরকপদা মতেং ওইগদৌরিবনি হায়বা ৱাখল্লোনগা লোয়ননা শেম শাগদবনি। শ্রী তোমারনা মহৈরোয়শিংগী ৱাখল্লোন মপাঙ্গল কল্লিবমখৈ, মখোয়গী পুন্সিসু হেন্না ৱাহন্থোক লৈগদৌরিবনি হায়না নহাশিংদা পুক্নিং থৌগৎখি।
থৌরম অদুদা, শ্রী সোমিৎ জোসী, দিপুতী ইন্সপেক্তর জেনেরেল, এস.এস.বি. একাদমীনা মীথুংশিংবু তরাম্না ওকখি। কোলোনেল অজিৎ কুমার, দিপুতী দাইরেক্তর, এইমস, ভোপাল, ইন্দিয়ন রেলৱেজকী সেনিয়র দি.পি.ও. অজয় কুমার দিক্সিৎ, বেঙ্ক ওফ ইন্দিয়াগী ওফিসিএলশিং অমদি অতৈ মীওই কয়াসু থৌরমদুদা শরুক য়াখি। কম্মান্দেন্ত শ্রী অজিৎ কুমার রোথোরনা থাগৎ ৱাহৈ ফোঙদোকখি।
*****
(Release ID: 1878051)
Visitor Counter : 105