اسٹاپ ٹی بی پارٹنرشپ کے ایگزیکٹو ڈائریکٹر، ڈاکٹر لوسیکا ڈیتیو اور ان کی ٹیم نے صحت اور خاندانی بہبود کے مرکزی وزیر، ڈاکٹر منسکھ منڈاویہ سے ملاقات کی، اور ٹی بی کے خاتمے کے عالمی ردعمل کی قیادت کرنے میں ”حکومت ہند کی بے مثال قیادت“ کی تعریف کی۔ ڈاکٹر ڈیتیو نے ایک مضبوط وژن فراہم کرنے کی ہندوستان کی کوششوں کی بھی تعریف کی، جسے مؤثر انتظام اور اہم پروگرامیٹک اور پالیسی مداخلتوں کے تیز تر رول آؤٹ کے ذریعے حمایت حاصل ہے، جس میں نئے تشخیصی ٹیسٹ، سماجی معاونت کے اقدامات اور تیز رفتار کوششوں سے ٹی بی کی نئی ویکسین تیار کی گئی ہے۔ بحث میں ٹی بی کے خاتمے کے لیے ہندوستان کی طرف سے فراہم کیے جانے والے مضبوط قائدانہ کردار پر بھی توجہ مرکوز کی گئی، اور ہندوستان کی آنے والی G20 صدارت کے ذریعے عالمی سطح پر ٹی بی کے بارے میں بیانیہ کو بلند کرنے کے مواقع پر بھی توجہ دی گئی۔

 

ڈاکٹر منڈاویہ 2024 تک اسٹاپ ٹی بی پارٹنرشپ بورڈ کے چیئرمیں کے طور پر بھی خدمات انجام دے رہے ہیں۔ ڈاکٹر منڈاویہ نے وارانسی میں 25 سے 26 مارچ 2023 کو اسٹاپ ٹی بی پارٹنرشپ کی 36ویں بورڈ میٹنگ کی میزبانی کرنے پر اتفاق کیا۔ بورڈ کے اجلاس سے قبل 24 مارچ 2023 کو ایک اعلیٰ سطحی تقریب منعقد کی جائے گی، جسے عالمی سطح پر ٹی بی کے عالمی دن کے طور پر بھی منایا جاتا ہے۔

گروپ نے پردھان منتری ٹی بی مکت بھارت ابھیان کے آغاز کی بھی ستائش کی – اس پہل کے ذریعے، 40,492 سے زیادہ عطیہ دہندگان ملک بھر میں 10,45,269 سے زیادہ مریضوں کی مدد کے لیے آگے آئے ہیں۔ اس میں ٹی بی کے مریضوں کو علاج پر قابو پانے اور اس کے فوائد کے لیے اضافی سماجی مدد فراہم کرنا شامل ہے تاکہ ٹی بی کے خاتمے کے لیے کمیونٹی کی قیادت میں تحریک چلائی جا سکے۔ ڈاکٹر ڈیتیو نے بھی اس اقدام کے ذریعے دس ٹی بی کے مریضوں کی مدد کرنے کا عہد کیا۔

 

اسٹاپ ٹی بی پارٹنرشپ کے بارے میں

 

’اسٹاپ ٹی بی پارٹنرشپ‘ ایک بین الاقوامی تنظیم ہے جو پوری دنیا کے اسٹیک ہولڈروں کو ایک ساتھ لانے کے لیے کام کر رہی ہے، جس کا مشن ہر اس شخص کی خدمت کرنا ہے جو ٹی بی کا شکار ہے اور اس بات کو یقینی بنانا ہے کہ اعلیٰ معیار کی تشخیص، علاج اور دیکھ بھال ان تمام لوگوں کے لیے دستیاب ہوں جنہیں اس کی ضرورت ہے۔ اس کی بنیاد 2001 میں رکھی گئی تھی اور اس کا سیکرٹریٹ جنیوا، سوئٹزرلینڈ میں اقوام متحدہ کے دفتر برائے پروجیکٹ سروسز (UNOPS) کے زیر اہتمام ہے۔

اپنے 1700 سے زائد شراکت داروں کے ذریعے، جن میں بین الاقوامی اور تکنیکی تنظیمیں، حکومتی پروگرام، تحقیق اور فنڈنگ ​​ایجنسیاں، فاؤنڈیشنز، این جی او، سول سوسائٹی، کمیونٹی گروپس اور نجی شعبے شامل ہیں، یہ ٹی بی کو شکست دینے کے لیے طبی، سماجی اور مالیاتی پہلوؤں میں مہارت رکھتا ہے۔ ’اسٹاپ ٹی بی پارٹنرشپ‘ ایک پبلک پرائیویٹ پارٹنرشپ بورڈ کے زیر انتظام ہے۔ فی الحال، صحت اور خاندانی بہبود کے مرکزی وزیر 2024 تک تین سال کی مدت کے لیے اسٹاپ ٹی بی پارٹنرشپ کے بورڈ کی سربراہی کر رہے ہیں اور ٹی بی کے عالمی مقصد کی حمایت کے لیے ہندوستان کے عزم کی نمائندگی کر رہے ہیں۔

**************

ش ح۔ ف ش ع- م ف

U: 12400

(Release ID: 1875042) Visitor Counter : 159