ముంబయిలో తట్టు (మీజిల్స్) కేసుల పెరుగుదలను పరిశీలించేందుకు ఉన్నత స్థాయి నిపుణుల బృందాన్ని అక్కడకు పంపాలని కేంద్ర ఆరోగ్య, కుటుంబ సంక్షేమ మంత్రిత్వ శాఖ నిర్ణయించింది. ప్రజారోగ్య చర్యలు చేపట్టడానికి, వ్యాధి వ్యాప్తిని నియంత్రించే చర్యలు తీసుకోవడానికి ఈ బృందం మహారాష్ట్ర ఆరోగ్య శాఖ అధికారులకు సహాయం చేస్తుంది.

దిల్లీలోని నేషనల్ సెంటర్ ఫర్ డిసీజ్ కంట్రోల్ (ఎన్‌సీడీసీ), లేడీ హార్డింజ్ మెడికల్ కాలేజ్ (ఎల్‌హెచ్‌ఎంసీ), పుణెలో ఉన్న ఆరోగ్య & కుటుంబ సంక్షేమ శాఖ ప్రాంతీయ కార్యాలయం నుంచి వచ్చిన నిపుణులు ముంబయి వెళ్లే ముగ్గురు సభ్యుల కేంద్ర బృందంలో ఉన్నారు. ఎన్‌సీడీసీ 'సమగ్ర వ్యాధి నిఘా కార్యక్రమం' (ఐడీఎస్‌పీ) డిప్యూటీ డైరెక్టర్ డాక్టర్ అనుభవ్ శ్రీవాస్తవ ఈ బృందానికి నేతృత్వం వహిస్తున్నారు.

ముంబయిలో తట్టు కేసుల వ్యాప్తిని పరిశోధించడానికి కేంద్ర బృందం క్షేత్ర స్థాయిలోనూ పర్యటిస్తుంది. కేసుల పెరుగుదలను నియంత్రించేందుకు చేపట్టాల్సిన ప్రజారోగ్య చర్యలు, నిర్వహణ మార్గదర్శకాల విషయంలో మహారాష్ట్ర ఆరోగ్య విభాగాలకు సాయం చేస్తుంది.

****