হকশেল অমসুং য়াইফ-য়ুম্বাল মন্ত্রালয়
দব্লিউ.ঐচ.ও গ্লোবেল তি.বি রিপোর্ত ২০২২
২০২০দগী চাদা ১৮ হেন্দুনা, ২০২১দা ভারত্তা তি.বি কেস লাখ ২১.৪ থেংনখি
ঙল্লিঙৈদা খঙদোক্নবা অমসুং তি.বি লায়েংনবা লৈবাক শীনবা থুংনা ২০২১দা মীওই কোতি ২২ হেন্না তি.বি লায়না লৈবরা হায়না য়েংখি
অনৌবা থৌরাং প্রধান মন্ত্রী তি.বি মুক্তা ভারত অভিয়ানগী মখাদা, লৈবাক শীনবা থুংনা নিক্ষ্যা মিত্র ৪০,০০০ হেনবনা তি.বি অনাবা মীওই লাখ ১০.৪৫ হেন্না মতেং পাংলি
Posted On:
28 OCT 2022 6:22PM by PIB Imphal
ওক্তোবর ২৭, ২০২২দা দব্লিউ.ঐচ.ওনা গ্লোবেল তি.বি রিপোর্ত ২০২২ ফোঙলে। রিপোর্ত অদুদা কোবিদ-১৯ লাইচৎনা মরম ওইদুনা মালেম শীনবা থুংনা তি.বি লায়না মশক খঙদোকপা, লায়েংবদা থেংনখিবা খুদোংচাদবশিং পল্লি।
ওক্তোবর ২৭, ২০২২দা দব্লিউ.ঐচ.ওনা ফোঙখিবা গ্লোবেল তি.বি রিপোর্ত ২০২২ অদু হকশেল অমসুং য়াইফ-য়ুম্বাল মন্ত্রলয়না খঙখি অমসুং অতোপ্পা লৈবাকশিংগা চাংদম্নবা মরুওইবা হিরমশিংদা ভারতনা থবক হেন্না ফজনা পাংথোকখি হায়না শেংদোকখি। ২০১৫গী বেজলাইন ইয়র(ভারত্তা মীওই লাখ ১দা মীওই ২৫৬ তি.বি নাখিবা) অদুগা চাংদম্নবদা, ২০২১দা ভারত্তা মীওই লাখ ১দা মীওই ২১০ লায়না অসি মায়োক্নখি; মালেমগী ওইনা চাংচত্তা চাদা ১১ হন্থরকপদা, চাদা ৭গী পোইন্ত হেন্না ফগৎতুনা চাদা ১৮ হন্থখি। হায়রিবা মশিং অসিনা মালেমগী ওইনা লায়না অসি থেংনবা লৈবাকশিংগী মনুংদা ভারত ৩৬শুবা মফমদা লৈখি।
কোবিদ-১৯ লাইচৎনা মরম ওইদুনা মালেম শীনবা থুংনা তি.বি লাকশিন্নবা থবকশিংদা অপনবা পীরবসু, ভারতনা মাইপাক্না থবক কয়া পাংথোকখি, ২০২০ অমসুং ২০২১দা মরুওইবা থবক কয়া পায়খৎতুনা নেসনেল তি.বি ইলিমিনেসন প্রোগ্রামগী মখাদা তি.বি কেস লাখ ২১.৪ হেন্না থেংনখি অমসুং মসি ২০২০দগী কেস চাদা ১৮ হেনখি। অসিগুম্বা থবকশিং অসিগী মখাদা, কেস খুদিংমক তঙাইফদনা সরকারদা পাউ পীদবা য়াদবা ওইবনা শুকশোই শোইদনা কেসশিং লাউথোক্লি। অনাবা মীওইশিং মশক খঙদোক্নবা য়ুমথোঙ খুদিং চঙদুনা থিবগী থবক কনখৎলে অমসুং য়ুমথোঙ অমতা চিৎথহন্দবা হায়বসিনা থৌরম অসিগী য়ুম্বী অমা ওইরে।
২০২১দা মীওই কোতি ২২ হেন্না তি.বি লায়না লৈবরা হায়না চাংয়েং তৌখি। লায়না অসি মীয়ামদা শন্দোরকপা থিংনবা কেসশিং মশক খঙদোক্তুনা মখা তানা শন্দোকপা হন্থহনবা হায়বসি মরুওইবা পান্দম্নি। থবক অসিগীদমক, ভারত্তা লায়না মশক খঙদোকপা ঙম্বগী শক্তি হেনগৎহল্লে। হৌজিক লৈবাক অসিগী মফম শীনবা থুংনা লাইওং মশক খঙদোকপগী খুদোংচাবা ফংহন্নবা লৈবাক অসিনা মশানা শাজবা মোলিকুলার দাইগনোস্তিকশিং লৈরে। ভারতনা লৈবাক অসিগী জিলা খুদিংমক্তা মোলিকুলার দাইগনোস্তিক মেছিন ৪,৭৬০ ফংহনখ্রে।
হৌজিক লৈরিবা ফিবম অসিগী ওন্ন-তৈনবদা, মালেমগী ওইবা রিপোর্ত অসি ফোঙদ্রিঙৈদা, নাবগী চাং অমসুং লায়না অসিনা শিহনবগী চাং চপ চানা খঙনবা মিনিস্ত্রিনা মাঙজৌন্না থিজিনবা হৌরে অমসুং ২০২৩গী অঙনবা শরুক্তা থিজিনবগী ফংলকপা রিপোর্তশিং ফংলবা মতুংদা ভারতকী দেতা পীগনি হায়না হকশেল অমসুং য়াইফ-য়ুম্বাল মন্ত্রলয়না দব্লিউ.ঐচ.ওদা পাউ পীখ্রে। মসিগী মতাংদা হকশেল মন্ত্রলয়গী ফিবম অদু দব্লিউ.ঐচ.ওনা খঙখি অমসুং ২০০০-২০২১গী ওইনা ভারতকী তি.বি নাবা অমসুং শিবগী রেত অদু মরক্কী ওইবা রিপোর্তনি অমসুং অরোইবা রিপোর্ত অদু হকশেল অমসুং য়াইফ-য়ুম্বাল মন্ত্রলয়গা খন্নরবা মতুংদা খঙহনগনি হায়বা ৱাফম অদু দব্লিউ.ঐচ.ওনা খঙখ্রবনি।
হকশেল মন্ত্রলয়গীদমক সেন্ত্রেল তি.বি দিবিজন(সি তি দি)না পাংথোকখিবা থিজিনবগী ফল অদু ফংবদা চাউরাক্না থা ৬গী মতম চঙগনি অমসুং মতুং তারকপদা ফল অদু দব্লিউ.ঐচ.ওদা পীখ্রে। মালেমদা খ্বাইদগী চাউবা ওইনা, লৈবাক অসিগী তি.বিগী অশেংবা শক্তম অদু মশক খঙদোক্নবা ভারতনা লৈবাক অসিগী মশাগী ওইবা নেসনেল প্রিভলেন্স সর্ভে পাংথোক্লি। ২০২১দা অসিগুম্বা সর্ভে পাংথোকপা লৈবাক অসি ভারত মথন্থনি হায়না দব্লিউ.ঐচ.ওগী রিপোর্ত অদুদা পল্লি অমসুং “ভারত্তা শিংথাবা য়ানা ফিবম ফগৎলে” হায়খি।
তি.বি কেসশিং হেনগৎহনবদা মচি ওইবা চীঞ্জাক অমসুং অফবা চীঞ্জাক চাবা ৱাৎপনা লৌরিবা মরুওইবা থৌদাং অদু দব্লিউ.ঐচ.ওগী রিপোর্ত অদুদা পল্লি। হিরম অসিগী মতাংদা, মচি ওইবা চীঞ্জাক পীজনবা স্কিম- নিক্ষ্যা পোসান অভিয়ান্না মরুওইবা থবক পাংথোক্লি। ২০২০-২০২১ মনুংদা, দি.বি.তি প্রোগ্রাম অমগী মখাদা, ভারতনা তি.বি অনাবা মীওইশিংদা লুপা কোতি ৬৭০ ফংহনখ্রে। তি.বি লায়েংলিবা অনাবশিং মতেং পাংনবা, ২০২০গী সেপ্তেম্বরদা ভারতকী রাস্ত্রপতিনা অহানবা ওইনা প্রধান মন্ত্রী তি.বি মুক্তা ভারত অভিয়ান হৌদোকখ্রে। হৌজিক ফাওবদা, লৈবাক শীনবা থুংনা দোনর ৪০,৪৯২না অনাবা মীওই ১০,৪৫,২৬৯ মতেং পাংনবা চোঙথোরক্লে।
***
(Release ID: 1871676)
Visitor Counter : 224