صحت اور خاندانی بہبود کے مرکزی وزیر ڈاکٹر منسکھ مانڈویہ نے آج احمد نگر میں ایک پروگرام میں صحت کے بنیادی ڈھانچے کے متعدد پروجیکٹوں کا افتتاح کیا۔ ان پروجیکٹوں میں احمد نگر میں ورچوئل طور پر افتتاح کئے گئے صحت کی دیکھ بھال کے تین بنیادی مراکز اور ڈاکٹر وکھے پاٹل نیوکلیئر میڈیسن سنٹر شامل ہیں۔ وزیر صحت نے کہا کہ ہندوستان صحت کے بنیادی ڈھانچے میں سرمایہ کاری کے ذریعہ ایک صحت مند اور خوشحال مستقبل کی طرف آگے بڑھ رہا ہے۔

ڈاکٹر منسکھ مانڈویہ نے رالیگن سدھی پرائمری ہیلتھ کیئر سنٹر (پی ایچ سی) کی مرکزی عمارت اور اسٹاف کوارٹرز کی تعمیر کا افتتاح کیا۔ پی ایچ سی کمپلیکس 702 لاکھ روپے کی متوقع لاگت سے تعمیر کیا جائے گا۔ وزیر صحت نے کھردہ میں پی ایچ سی کی مرکزی عمارت اور اسٹاف کوارٹرز کی تعمیر کا بھی افتتاح کیا، جو کہ 560 لاکھ روپے کی تخمینہ لاگت سے تعمیر کی جائے گی اور پڈھے گاؤں میں پی ایچ سی کی مرکزی عمارت، جو کہ 214 لاکھ روپے سے زیادہ کی تخمینہ لاگت سے تعمیر کی جائے گی۔ 

مرکزی وزیر صحت اور خاندانی بہبود ڈاکٹر منسکھ مانڈویہ نے ڈاکٹر وکھے پاٹل نیوکلیئر میڈیسن سنٹر کا بھی افتتاح کیا۔ سینٹر کینسر مریضوں کی جامع دیکھ بھال کے لیے سہولیات سے لیس ہے جس میں تشخیص اور علاج دونوں شامل ہیں۔ یہ مرکز ضلع میں اپنی نوعیت کا پہلا مرکز ہے اور یہ احمد نگر، بیڑ، ناسک، اورنگ آباد، سولاپور اور پونے اضلاع کے مضافاتی علاقوں کی آبادی کا احاطہ کرے گا۔

پروگرام سے خطاب کرتے ہوئے ڈاکٹر منسکھ مانڈویہ نے کہا کہ وزیر اعظم نریندر مودی کی قیادت میں ملک ترقی کر رہا ہے۔ انہوں نے مزید کہا کہ حکومت نے صحت کو ترقی سے جوڑ دیا ہے، کیونکہ صرف ایک صحت مند شہری ہی قومی ترقی میں اپنا حصہ ڈال سکتا ہے۔ مرکزی وزیر صحت نے کہا کہ "صحت کے ساتھ ساتھ علاج پر توجہ مرکوز کرنے کی ضرورت ہے۔ ہمیں اس بات کو یقینی بنانا چاہیے کہ ہمارے لوگ پہلے بیمار نہ ہوں۔ یہی وجہ ہے کہ ہماری حکومت صحت اور تندرستی کے مراکز پر توجہ مرکوز کر رہی ہے۔

وزیر صحت ڈاکٹر منسکھ مانڈویہ نے مزید کہا کہ کسی بھی پالیسی کو کس طرح آگے بڑھنا چاہیے۔ حکومت نہ صرف مزید طبی سہولیات بنا رہی ہے بلکہ میڈیکل کالجوں کی تعداد اور ایم بی بی ایس کی نشستوں کی تعداد میں بھی اضافہ کر رہی ہے۔ انہوں نے مزید کہا کہ جب تک ملک کے نوجوان میڈیکل کالجوں سے فارغ التحصیل ہوں گے، ملک میڈیکل ٹورازم کے مرکز میں تبدیل ہوچکا ہوگا، جس سے دنیا بھر کے مریضوں کو علاج کی سہولت میسر ہوگی۔ وزیر موصوف نے کہا کہ ہندوستان کے عالمی نظریہ کی بنیاد سب کی فلاح و بہبود کو حاصل کرنا ہے۔

حکومت ہند کی تحقیقی پالیسی پر بات کرتے ہوئے ڈاکٹر منسکھ مانڈویہ نے مزید کہا کہ دنیا بھر میں ہر 10 میں سے 3 سائنسدان اور ریسرچ اسکالر ہندوستانی ہیں۔ انہوں نے کہا کہ حکومت کی تحقیقی پالیسی کا مقصد باصلاحیت نوجوانوں کی حوصلہ افزائی اور مدد کرنا ہے جو جدید تحقیقی منصوبوں کو آگے بڑھانا چاہتے ہیں چاہے وہ کسی نجی ادارے سے ہوں یا سرکاری ادارے سے ہوں۔ ڈاکٹر منسکھ مانڈویہ نے کہا کہ ہندوستان کا مقصد اختراعات اور تحقیق میں قائد بننا ہے۔

اجتماع سے ورچوئل طور پر خطاب کرتے ہوئے پدم بھوشن انا ہزارے نے احمد نگر کے صحت کے بنیادی ڈھانچے کو تیار کرنے کے لیے حکومت ہند کا شکریہ ادا کیا، جس میں رالیگن سدھی گاؤں بھی شامل ہے۔ ڈاکٹر سوجے وکھے پاٹل، ممبر پارلیمنٹ، احمد نگر اور ٹرسٹی ڈاکٹر وٹھل راؤ وکھے پاٹل فاؤنڈیشن نے کہا کہ پچھلے دو سالوں میں احمد نگر ضلع میں قومی صحت مشن کے تحت 1347 لاکھ روپے کے پروجیکٹ مکمل کیے گئے ہیں۔ انہوں نے 47 کروڑ روپے سے زائد مالیت کے صحت کے بنیادی ڈھانچے کے متعدد منصوبوں کی فہرست بھی دی جو ضلع میں ایک سال کے اندر مکمل ہونے کا امکان ہے۔ اس پروگرام میں مہاراشٹر کے ریوینیو، مویشی پالن اور ڈیری کی ترقی کے وزیر ڈاکٹر رادھا کرشنا وکھے پاٹل، شرڈی حلقہ سے ممبر پارلیمنٹ ڈاکٹر سداشیو لوکھنڈے اور دیگر بھی موجود تھے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

ش ح۔ م ع۔ع ن

 (U: 11657)

(Release ID: 1869717) Visitor Counter : 159