লাক্লিবা ওক্তোবর ২০দগী ওক্তোবর ২৩ ফাওবা লৈবাক্কী কোনুংদা লৈবা আই.জি স্তদিয়মদা অহানবা খেলো ইন্দিয়া ৱুমেন্স জুদো নেসনেল লিগ পাংথোক্লগনি। লিগ অসি জোন মরিগী নুপী জুদো শান্নরোয়শিংগী নেসনেল রেঙ্কিং তুর্নামেন্ত অমনি অমসুং মসি য়ুথ এফেয়ার্স অমসুং স্পোর্তস মিনিস্ত্রিগী স্পোর্তস দিপার্তমেন্ত অমসুং জুদো ফেদেরেসন ওফ ইন্দিয়ানা শীনবনি।

তুর্নামেন্ত অসিগীদমক ফেদেরেসন্দা লুপা কোতি ১.৭৪গী শেনফম অমা কাইথোক্তুনা য়ুথ এফেয়ার্স অমসুং স্পোর্তস মিনিস্ত্রিনা শৌগৎলি অমসুং মখোঙদগী হৌনা জুদো চাউখৎহন্নবা পুক্নিং থৌগৎলি। ৱেত কেতেগোরি ৩১দা পাংথোক্কদৌরিবা তুর্নামেন্ত অসিগী অপুনবা মনাগী শেনফম অসি লুপা লাখ ২৪.৪৩নি।

তুর্নামেন্ত অসি চহি কাংলুপা মরি থোক্না হায়বদি- সব-জুনিয়ন(চহি ১২-১৫), কেদেত(চহি ১৫-১৭), জুনিয়র(চহি ১৫-২০) অমসুং সেনিয়র(চহি ১৫ অমসুং মথক্ত)দা চাংদম্নগনি। ৱেত কেতেগোরি ৩১দা মকোক ৭ ফাওবগী মনুংদা লৈবা শান্নরোয়শিংদা শেনগী মনা পীগনি।

তুর্নামেন্ত অসিদা কম্মনৱেল্থ গেমস ২০২২দা সিলভর মেদল ফংখ্রবী তুলিকা মান অমসুং ৱার্ল্দ কেদেত জুদো চেম্পিয়নশিপতা সনাগী মেদল ফংখ্রবী অমসুং পুৱারি শেমখ্রবী লিন্থোই চনম্বম শরুক য়াগনি। চাংদম্নবা অসিদা অপুনবা ওইনা জুদো শান্নরোয় ৪৯৬ শরুক য়াগনি। মখোয় মখোয়গী জোনশিং হায়বদি নোর্থ, সাউথ, ইস্ত অমসুং ৱেস্ত জোনগী ওইনা মখোয়গী রেঙ্কিং অমসুং পর্ফোমেন্সতা য়ুম্ফম ওইরগা নেসনেল লিগকীদমক শান্নরোয়শিং খনবনি।  

নেসনেল সেলেক্সন ত্রাইয়েলশিং অমসুং নেসনেল জুদো তুর্নামেন্ততগী খনগৎলকপা রেঙ্ক ৭ ফাওবগী মনুংদা লৈবা জুদোকাশিং নেসনেল লিগ অসিদা শরুক য়াগনি।

*****