প্রধান মন্ত্রী, শ্রী নরেন্দ্র মোদীনা ভিদিও কন্ফরেন্সিংগী খুত্থাঙদা দিস্ত্রিক্ত ৭৫দা দিজিতেল বেঙ্কিং য়ুনিৎ (দি.বি.য়ু.) ৭৫ লৈবাক মীয়ামদা কত্থোকখ্রে‍।

তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা দিজিতেল বেঙ্কিং য়ুনিৎ (দি.বি.য়ু.) ৭৫না ফাইনেন্সিএল ইনক্লুজন হেনগৎহনগনি অমদি মীয়ামগী বেঙ্কিং এক্সপরিএন্স হেনগৎহগনি হায়বা ৱাফম অহানবদা থমখি‍। “মীচম মীয়াম হিংবদা কোমহন্নবগী লমদা দি.বি.য়ু. অসি অচৌবা ফোঙফম অমনি,” হায়না মহাক্না হায়খি‍। অসিগুম্বা বেঙ্কিং সেতঅপ অমদা, লৈঙাক্না ইনফ্রাস্ত্রকচর য়াম্না চঙহন্দনা সর্ভিস য়াম্না পীননবা পান্দম থম্লি, অমদি পুম্নমক অসি চে-চাং অমত্তা য়াওদনা দিজিতেল ওইনা তৌগদৌরিবনি হায়না প্রধান মন্ত্রীনা পাউদমখি‍। মসিনা বেঙ্কিংগী থৌওং লায়থোকহনবগা লোয়ননা অচৌবা অমদি খুদোংথিনিংঙাই লৈতবা বেঙ্কিং সিস্তেম অমসু ফংহনগনি‍। “অপীকপা ময়োল্লমশিংদা অমদি খুঙ্গঙশিংদা লৈরিবা মীওইশিংনা শেল থাদোক থাজিন্দগী হৌরগা লোন লৌবা ফাওবগী কান্নবা ফংগনি‍। দিজিতেল বেঙ্কিং য়ুনিৎশিং অসি ভারতকী মীচম মীয়ামগী পুন্সি হেন্না লায়থোকহন্নবা মায়কৈদা লৈবাকসিনা চঙশিল্লিবা মায়তৈদা অচৌবা খোঙথাঙ অমনি,” হায়না মহাক্না হায়খি‍।

প্রধান মন্ত্রীনা লৈঙাক্কী পান্দমদি মীচম মীয়ামবু মপাঙ্গল কনখৎহনবনি, অমদি মদুগী মহৈনা খুন্নাইগী মমৈদা লৈরিবা মীওই অমদি মখোয়গী য়াইফনবগী মায়কৈদা লৈঙাক্না চঙশিল্লিবা অসিদা মীৎয়েঙ থমদুনা খুজিল থৌরাং য়াৎখি হায়না ফোঙদোকখি‍। ,অঙেক্নে মতম অমত্তদা থবক পায়খৎলিবা হীরম অনিগী মনুংদা অহানবদি অওনবা পুরকপা, মপাঙ্গল কনখৎহনবা, অমসুং বেঙ্কিং সিস্তেমবু ত্রান্সপেরেন্ত ওইহনবনি, অদুগা অনিসুবনা ফাইনেন্সিএল ইনক্লুজন্নি হায়না মহাক্না হায়খি‍।

মমাঙদা মীয়াম্না বেঙ্কতা চৎনরম্বগী মতৌ নীংশিংলদুনা, প্রধান মন্ত্রীনা, বেঙ্কপু মীয়ামগী মনাক্তা ওইনা পুরক্তুনা লৈঙাক অসিনা মওং মতৌদা অওনবা পুরকখি হায়খি‍। “বেঙ্কিং সর্ভিসশিং অরাপ্পা মফমশিংদা য়ৌহনবদা ঐখোয়না মরুওইবা মীৎয়েঙ থম্লি,” হায়না মহাক্না হায়খি‍। লায়রবশিংনা বেঙ্কতা চৎলম্বদগী বেঙ্কশিংনা লায়রবশিংগী থোঙজিন্দা লাকপগী ফীভমসি য়ৌরকপদা অচৌবা অহোংবা অমা লাকখ্রে‍। মসিদা লায়রবশিং অমসুং বেঙ্ককী মরক্তা লৈরম্বা অরাপ্পা হন্থহনবগী থৌরাং য়াওখি‍। “ঐখোয়না অরাপ্পা হন্থহনবতা নত্তনা, খ্বাইদগী মরুওইনা, পুক্নিংগী অরাপ্পা হন্থহনখি‍।” মনুং হঞ্জিনবা মফমশিংদা বেঙ্কিংগী খুদোংচাবা য়ৌহনবদা খ্বাইদগী মরুওইবা মীৎয়েঙ থমখি‍। ঙসিদি ভারতকী খুঞ্জা চাদা ৯৯দি কিলোমিতর ৫গী মনুংদা বেঙ্ক ব্রাঞ্চ, বেঙ্কিং আউতলেৎ নৎত্রগা ‘বেঙ্কিং মিত্র’ লৈরে‍ হায়না প্রধান মন্ত্রীনা পাউদমখি‍। “মীচম মীয়ামদা বেঙ্কিংগী মথৌ তাবশিং ইন্দিয়া পোস্ত বেঙ্ককী খুত্থাঙদা পাক চাউরবা পোস্ত ওফিস নেৎৱর্ক্কী মতেং লৌদুনা ফংহল্লি,” হায়না মহাক্না হায়খি‍। “ঙসিদি ভারতকী এদল্ত সিতিজন লাখ অমমমদা থুংনরিবা ব্রাঞ্চ মশিং অসি জর্মী, চাইনা অমসুং খা অফ্রিকানচিংবা লৈবাকশিংদগী হেল্লে”, হায়না মহাক্না মখা তাখি‍।

“হৌরকপা মতমদা অকক্নবা কাঙলুপ খরদা শেরান্নবা ৱাফমশিং লৈরম্লবসু, ঙসিদি লৈবাক পুম্বনা জন ধন বেঙ্ক একাউন্তকী মতিক উবা ফংলি,” হায়না প্রধান মন্ত্রীনা হায়খি‍। একাউন্তশিং অসিনা খুদোংচাদ্রবশিংদা অপীকপা প্রেমিয়মদা লৈঙাক্না ইন্স্যুরেন্স পীবা ঙমহল্লিবনি‍ হায়না মহাক্না পাউদমখি‍। “মসিনা লায়রবশিংদা কোলেতরেল য়াওদনা লোন ফংহন্নবা লম্বী পীরি অমদি তার্গেৎ বিনিফিসরীশিংগী একাউন্তশিংদা দাইরেক্ত বেনিফিৎ ত্রান্সফর ফংহল্লি‍। একাউন্তশিং অসি য়ুম, তোইলেৎ অমসুং গ্যাস সবসিদী ফংহন্নবগী মরুওইবা পাম্বৈ অমা ওইরি অমদি লৌমীশিংদা স্কীমশিংগী কান্নবশিং অপনবা লৈতনা ফংহনবদা মতেং ওইরি,” হায়না মহাক্না হায়খি‍। প্রধান মন্ত্রীনা ভারতকী দিজিতেল বেঙ্কিং ইনফ্রাস্ত্রকচরবু মালেম্না শকখঙলি হায়বা ৱাফম থমখি‍। “আই.এম.এফ.না ভারতকী দিজিতেল বেঙ্কিং ইনফ্রাস্ত্রকচরবু থাগৎলি‍। মসি অনৌবা তেক্নোলোজীশিং শীজিন্নরিবা, মখোয়গী পুন্সিগী শরুক অমা ওইহল্লিবা ভারতকী লায়রবা, লৌমী অমদি শিন্মীশিংগী হোৎনজমলননি,” হায়বা ৱাফম মহাক্না থমখি‍।

“য়ু.পি.আই.না ভারতকীদমক অনৌবা খুদোংচাবশিং পুরক্লি,” হায়না ফোঙদোক্লদুনা প্রধান মন্ত্রীনা “ফাইনেন্সিএল পার্ত্নরসিপকা দিজিতেল পার্ত্নরসিপকা পুনশিল্লকপা মতমদা খুদোংচাবা কয়ানা থল্লবা অনৌবা তাইবংপান অমা থোরকই‍। য়ু.পি.আই.গুম্বা অচৌবা খুদম অমা ঐখোয়গী মাঙদা লৈরে‍। মসি মালেমগী ওইনা অসিগুম্বা মখলগী অহানবা তেক্নোলোজী অমনি, অদুগা মসিগীদমক ভারতনা চাউথোকচরি,” হায়না মখা তাখি‍। ঙসিদি লমদমসিগী রুপে কার্দ করোর ৭০ মথৌ তৌরি, মসি মপান লমগী প্লেয়রশিং অমসুং অসিগুম্বা প্রদক্তশিংগী অৱাংবা থাক্কী মচত্তগী চাউনা অহোংবা লাক্লিবনি‍ হায়না মহাক্না পাউদমখি‍। “তেক্নোলোজী অমসুং শেন্মিৎলোন পুনশিনবা অসিনা লায়রবশিংগী ইকায়খুম্নবা অমদি এফোর্দেবিলিতী হেনগৎহল্লি অমদি ময়ায় ওইবা থাক্কী কাঙলুপ মপাঙ্গল কনখৎহনবগা লোয়ননা মসিনা লৈবাকসিদা লৈরম্বা দিজিতেলগী খেন্নববুসু মুত্থৎলি,” হায়না মহাক্না হায়খি‍। শেঞ্জা থুমজা মুত্থৎপদা দি.বি.তি.না লৌরিবা থৌদাংসু মহাক্না শিংথারদুনা দি.বি.তি.গী খুত্থাঙদা তোঙান তোঙানবা স্কীমশিংগী লুপা করোর লাখ ২৫ হেনবগী শেন্ফম থাখ্রে হায়খি‍। হয়েং মহাক্না লৌমীশিংগী মথংগী ইন্সতোলমেন্তকী শেন্ফম ত্রান্সফর তৌরগনি হায়না পাউদমখি‍। “ঙসি, মালেম পুম্বনা হায়রিবা দি.বি.তি. অসিবু অমদি ভারতকী দিজিতেলগী মতিকপু থাগৎনরি‍। ঙসি মসিবু মালেমগী তমজনফম অমা ওইনা উনরি‍। ৱর্ল্দ বেঙ্কনা দিজিতাইজেসনগী খুত্থাঙদা সোসিএল সিক্যুরিতী ফংহনবদা ভারতনা লমজিংবা অমা ওইরে হায়না ফাওবা হায়রি,” হায়না প্রধান মন্ত্রীনা ফোঙদোকখি‍।

প্রধান মন্ত্রীনা, ফিন্তেক্না ভারতকী খুজিল থৌরাং অমসুং হোৎনরিবশিংগী থৱায়নি, অমদি মসিনা তুংলমচৎ শেম্বদা মরুওইবা শক্লোন লৌরি হায়না পাউদমখি‍। ফিন্তেক্কী মতিং অসিবু দিজিতেল বেঙ্কিং য়ুনিৎশিংনা হেন্না পাকথোক চাউথোকহনগনি‍। “জন ধন একাউন্তনা লৈবাকসিগী ফাইনেন্সিএল ইনক্লুজনগী য়ুম্বী ওইবগুম, ফিনতেক্না ফাইনেন্সিএল রিভোলুসনগী য়ুম্ফম ওইগদৌরিবনি”, হায়না মহাক্না হায়খি‍।

ব্লোকচেন তেক্নোলোজীদা য়ুম্ফম ওইবা দিজিতেল করেন্সী পুথোক্নবা লৈঙাক্না লাউথোকখিবা ৱাফম পল্লদুনা, প্রধান মন্ত্রীনা, “তুংদা লাক্কদবা দিজিতেল করেন্সী ওইরবসু, নৎত্রগা ঙসিগী দিজিতেল তেক্নোলোজী ওইরবসু, শেন্মিৎলোনগী মথক্তা তোঙান তোঙানবা হীরমশিংদা মরী লৈনৈ,” হায়না হায়খি‍। ফীজিতেল করেন্সীগী খুদোংচাদবশিং মুত্থৎপা অমদি অকোয়বগী ফীভমদা পীরিবা কান্নবশিংবু মহাক্না মরুওইবা কান্নবা ৱাফমশিং ওইনা পনখি‍। শেলয়েক নম্নবা চে অমসুং মুক মপান্দগী পুশিল্লকপনি, অদুগা দিজিতেল ইকনমী চৎনবনা ঐখোয়না মরোমদোম লেপচবা ভারত অমা ওইহন্নবগী মায়কৈদা থৌদাং য়াবনি অমদি চে শীজিন্নবা হন্থহন্দুনা অকোয়বগী ফীভমদা কান্নবা পীরিবনি হায়বা ৱাফমসু প্রধান মন্ত্রীনা ফোঙদোকখি‍।

প্রধান মন্ত্রীনা ঙসিদি বেঙ্কিং হায়বসি শেলথুমগী ত্রাঞ্জেক্সনদগী হেন্দোকখিদুনা ‘অফবা লৈঙাক’ অমসুং ‘হেন্না ফবা সর্ভিস দেলিভরী’গী পাম্বৈ অমা ওইরে হায়বা ৱাফম থমখি‍। ঙসিদি সিস্তেম অসিনা প্রাইভেৎ সেক্তর অমসুং স্মোল-স্কেল ইন্দস্ত্রীশিংগী চাওখৎনবগী চাউরবা খুদোংচাবশিং ফংহল্লি‍। তেক্নোলোজীগী খুত্থাঙদা প্রদক্ত অমসুং সর্ভিস দেলিভরী পীবনা অনৌবা স্তার্তঅপ ইকোসিস্তেম শেমগত্তবা মফম অমত্তা ভারত্তা লৈত্রে হায়বা য়াই হায়না মহাক্না মখা তাখি‍। “ঙসিদি দিজিতেল ইকনমী অসি ঐখোয়গী শেন্মিৎলোনগী, ঐখোয়গী স্তার্তঅপগী তাইবঙগী, মেক ইন ইন্দিয়াগী অমদি মরোমদোম লেপচবা ভারতকী অচৌবা মপাঙ্গল ওইরি,” হায়না মহাক্না হায়খি‍। “ঙসিদি ঐখোয়গী অপীকপা ইন্দস্ত্রীশিং, ঐখোয়গী এম.এস.এম.ই.শিংসু জি.ই.এম.গুম্বা সিস্তেম অমগী খুত্থাঙদা লৈঙাক্কী তেন্দরদা শরুক য়ারি‍। মখোয়না অনৌবা লল্লোন ইতিক্কী খুদোংচাবা ফংলি‍। হৌজিক ফাওবদা, জি.ই.এম.দা লুপা করোর লাখ ২.৫ হেনবগী ওর্দর তৌখ্রে‍। হায়রিবা মায়কৈ অসিদা হৌজিক্তি দিজিতেল বেঙ্কিং য়ুনিৎশিংগী খুত্থাঙদা অহেনবা অনৌবা খুদোংচাবা কয়া লাক্লগনি,” হায়না মহাক্না মখা তাখি‍।

“লৈবাক অমগী শেন্মিৎলোনগী খোঙজেল মাগী বেঙ্কিং সিস্তেমগী মপাঙ্গল কল্লিবমখৈ য়াঙই”, হায়না প্রধান মন্ত্রীনা ফোঙদোকখি‍। লৈবাকসিনা হৌখিবা চহি ৮সিদা ২০১৪ মমাঙগী ‘ফোন বেঙ্কিং’ সিস্তেমদগী দিজিতেল বেঙ্কিংদা হোংলক্লে, অমদি মসিগী মহৈ ওইনা ভারতকী শেন্মিৎলোন খোঙজেল লৈনা মাঙদা চেনখৎলি হায়না মহাক্না হায়খি‍। মমাঙগী মতমবু নীংশিংলদুনা, প্রধান মন্ত্রীনা, ২০১৪গী মমাঙদা বেঙ্কশিংদা মখোয়গী মথৌ তৌনবগী ফিরেপ লৌনবা হোৎনবদা ফোন য়াম্না লাক্নরম্মী হায়বা ৱাফম মহাক্না থমখি‍। ফোন বেঙ্কিং পোলিতিক্সনা বেঙ্কশিংবু খুদোংথিনিংঙাই ওইহল্লম্মী অমদি লুপা করোর কয়াগী স্কামগী মরূ হুন্দুনা লৈবাকসিগী শেন্মিৎলোন সিক্যুর ওইহল্লমদে‍ হায়না মহাক্না মখা তাখি‍।

হৌজিক পাল্লিবা লৈঙাকসিনা সিস্তেম অসিবু কমদৌনা অহোংবা পুরকখিবগে হায়বগী মতাঙদা তাক্লদুনা, প্রধান মন্ত্রীনা ত্রান্সপেরেন্সীদা মরুওইবা মীৎয়েঙ থমখি হায়না পাউদমখি‍। “এন.পি.এ.শিং মশক খঙদোকপগী থৌওংদা ত্রান্সপেরেন্সী পুরক্লবা মতুংদা, লুপা করোর লাখ কয়া বেঙ্কিং সিস্তেমদা অমুক হন্না পুশিল্লকখি‍। ঐখোয়না বেঙ্কশিং শেল অমুক লৈহনখি, থৌওইনা লোন থীদোক্তবা মীওইশিংগী মথক্তা থবক লৌখৎখি, অমদি প্রিভেন্সন ওফ করপ্সন এক্ত শেমখিএ” হায়না প্রধাম মন্ত্রীনা হায়খি‍। আই.বি.সি.গী মতেঙগা লোয়ননা এন.পি.এ.গা মরী লৈনবা ৱাফমশিংগী ৱাখৈ পুরকপদা খোঙজেল য়াঙখৎহনখি, অমদি লোনগীদমক, ত্রান্সপেরেন্ত ওইবা অমদি সাইন্তিফিক সিস্তেম অমা শেম্নবগীদমক তেক্নোলোজী শীজিন্নববু য়োকখৎখি‍। “বেঙ্কশিং পুনশিন্নবগী ৱারেপ পোলিসী শেম্বা হৈতবগী মহৈনি অমদি মদুবু লৈবাকসিনা থৌনা লৈনা থাগোন্নখি‍। হায়রিবা ফিরেপশিং অদুগী মহৈ ঙসি ঐখোয়গী মাঙদা তাদুনা লৈরে,” হায়না মহাক্না মখা তাখি‍। দিজিতেল বেঙ্কিং য়ুনিৎকুম্বা অনৌবা থৌরাং অমসুং ফিন্তেকপু ইনোভেতিব ওইনা শীজিন্নদুনা বেঙ্কিং সিস্তেমগী অনৌবা সেল্ফ-দ্রিভন মেকানিজম অমা শেমগৎলি‍ হায়না মহাক্না পাউদমখি‍। স্তেকহোল্দরশিংবু ইহৌ অসি মখা শমথনবা ৱাফম থম্লদুনা মহাক্না থৌরাং অসিদা কঞ্জ্যুমরশিংগী নীংতম্বা নীংথিনা লৈবগা লোয়ননা বেঙ্কশিংগীসু হান্নগুম নুংঙাইবা অমদি ত্রান্সপেরেন্সী লৈহল্লি হায়না ফোঙদোকখি‍।

মহাক্কী ৱারোল লোইশিল্লকপদা, প্রধান মন্ত্রীনা খুঙ্গঙগী অপীকপা বিজিনেস মপুশিংবু দিজিতেল ত্রাঞ্জেক্সনলোমদা মপুং ফানা চঙশিন্নবা ৱাফম থমখি‍। মহাক্না বেঙ্কশিংগী মফমদসু লৈবাক্কী কান্ননবগীদমক্তা মর্চেন্ত ১০০গা মরী শেমগত্তুনা মপুং ফানা দিজিতেল ওইহন্নবা ৱাফম থমখি‍। “থৌরাং অসিনা ঐখোয়গী বেঙ্কিং সিস্তেম অমসুং শেন্মিৎলোনবু তুংলমচৎকা চুনবা থাক্তা পুগনি, অমদি মালেমগী শেন্মিৎলোন লমজিংনবগী মতিং হাপকনি হায়না ঐনা থাজৈ,” হায়বা ৱাফম ফোঙদোক্লদুনা শ্রী মোদীনা মহাক্কী ৱারোল লোইশিনখি‍।

শেলথুম অমসুং কোর্পোরেৎ এফ্যার্সকী কেন্দ্র মন্ত্রী শ্রীমতী নির্মলা সিতরমন্না মহাক্কী ৱারোলদা, অমৃৎ কালসিদা, ইকায়খুম্নরবা প্রধান মন্ত্রী, তেক্নোলোজী হেন্না শীজিন্নবগী অমদি ভারত্তা দিজিতেল বেঙ্কিং পুরক্নবগী অদোমগী মঙলানবু ইকায়খুম্নবা ওইনা, সিদ্যুল্দ কম্মর্সিএল বেঙ্কশিংনা লৈবাকসিগী দিস্ত্রিক্ত ৭৫দা দিজিতেল বেঙ্কিং য়ুনিৎ (দি.বি.য়ু.) ৭৫ লিংখৎলি হায়না ফোঙদোকখি‍।

ৱাসিংতন দি.সি.দগী হৌদোকপগী থৌরমদুবু ভিদিও কন্ফরেন্সিংগী খুত্থাঙদা শরুক য়ারদুনা, শ্রীমতী সিতরমন্না, দি.বি.য়ু.শিং অসিনা মশাগী পর্সনেল কম্প্যুতর লৈজদবা, লেপতোপ লৈজদবা, নৎত্রগা স্মার্তফোন অমফাওবা পায়জদবা মীওইশিংদা বেঙ্কিং সর্ভিসশিং ফংহনবা ঙম্লগনি‍। মখোয়না হায়রিবা সর্ভিসশিং অসি চে য়াওদনা দিজিতেল ওইনা তৌবা য়ারগনি‍। তেক্কী লমদা নীংথিনা খঙদবা মীওইশিংগীসু হায়রিবা চে চাওদবা সর্ভিসশিং অসি ফংননবগী থৌওং অমা লৈরি‍।

চাওখৎপগী পান্দমশিং ফংনবগীদমক তেক্নোলোজী শীজিন্নবনা ঐখোয়গী লৈঙাক্কী মচৎ ওইরি হায়না শেলথুম মন্ত্রীনা ফোঙদোকখি‍।

“রিজর্ব বেঙ্ককী গভর্নরনা শন্দোক্না তাকপিখিবগুম, পেপরলেস ওপরেসন পুং ২৪ চুপ্না ফংগনি‍। শেল হাপচিনবা নৎত্রগা ফিক্স দিপোজিৎ নৎত্রগা রিকরিং দিপোজিৎ হাংদোকপগী খুদোংচাবসু ফংগনি‍। ইচম চম্বা য়ুজরশিংনসু জন সমর্থ পোর্তেলগী খুত্থাঙদা লৈঙাক্কী ক্রেদিৎ লিঙ্ক স্কীমশিং ফংগনি, এম.এস.এম.ই. অমসুং রিতেল য়ুজরশিংনসু মসিগী কান্নবা লৌবা য়াগনি,” হায়না শ্রীমতী সিতরমন্না হায়খি‍।

মমাঙদা হায়খিবগুম, ফাইনেন্সিএল লিতরেসী হায়রিবা দি.বি.য়ু.শিং অসিগী খুত্থাঙদা শন্দোকপা ঙমগনি‍। ফাইনেন্সিএল ইনক্লুজন অমসুং দিজিতেল বেঙ্কিংনা ভারতকী শেন্মিৎলোনবু হেন্না দিজিতাইজ তৌবা অমদি ফোর্মেল ওইহনবদা চাউনা মতেং ওইগনি‍ হায়না শেলথুমগী কেন্দ্র মন্ত্রীনা ফোঙদোকখি‍। “ঐনা ঙসি মফমসিদা শরুক য়ারিবা মীহুৎ পুম্নমক্কী মফমদা অদোম অদোমগী অনকপদা লৈরিবা বেঙ্ককী কস্তমরশিং অমসুং অপীকপা বিজিনেস য়ুনিৎশিংদা লিতরেসী, ফাইনেন্সিএল লিতরেসী, দিজিতেল এজুকেসনগী মরমদা খঙহন্নবগীদমক নোংমগী মনুংদা মতম খরা খরা কায়থোকপিনবা ৱাফম থমজরি,” হায়না শ্রীমতী সিতরমন্না হায়খি‍।

“দিজিতেল বেঙ্কিং মীয়াম্না পাম্নহনবা মরুওই, অদুগা মসি কঞ্জ্যুমরশিংগীদমক্তা শেল চঙবা হন্থবা অমদি শীজিন্নবদা করিসু নুংশা থিংনিংঙাই লৈতবা শাফবা মওংনি হায়বসি খ্বাইবগী মরু ওইবা ৱাফম্নি‍। হায়রিবা ৱাখল্লোন অসি বেঙ্ক এজেন্তশিংনা হায়বদি বেঙ্কিং এজেন্তশিং, বেঙ্কিং করেসপোন্দেন্তশিং, বেঙ্ক মেনেজরশিং অমসুং ওফিসিএল পুম্নমক্না ভারতকী শেন্মিৎলোনবু হেন্না ফোর্মেল ওইহন্নবগীদমক নীংথিনা খঙহনবিগদবনি,” হায়না মহাক্না হায়খি‍।

আর.বি.আই. অমসুং ইন্দিয়ন বেঙ্ক এসোসিএসনগী মফমদা হায়রিবা থৌওংসিবু থুনা অমদি মওং মরিল নাইনা দোকুমেন্ত তৌবগীদমক নুংঙাইবা ফোঙদোক্লদুনা, শ্রীমতী সিতরমন্না ভারত্তা দিজিতেল বেঙ্কিং হেন্না অমদি খোঙজেল য়াঙনা চৎনহনবদা অমদি ঐখোয়গী শেন্মিৎলোনবু কেসলেস অমসুং ইনক্লুজিব ইকনমী ওইহন্নবা থৌরাংদা দি.বি.য়ু.শিংনা চাউনা মতেং ওইগনি হায়না ফোঙদোকখি‍।

থৌরমদুদা ৱা ঙাঙলদুনা, আর.বি.আই. গভর্নর শক্তিকান্ত দাসনা, ঐখোয়না ‘অজাদী কা অমৃৎ মহোৎসব’ পাঙথোক্লিঙৈ মতমসিদা প্রধান মন্ত্রীনা দিজিতেল বেঙ্কিং য়ুনিৎ (দি.বি.য়ু.)শিং লৈবাক্কী থৌগলদা কত্থোক্লিবা অসি তশেংনমক পুৱারী ওইরবা তাঞ্জা অমনি হায়না ফোঙদোকখি‍। মসি লৈঙাক, আর.বি.আই., ইন্দিয়ন বেঙ্ক এসোসিএসন অমসুং শরুক য়ারিবা বেঙ্কশিংগী অপুনবা থৌরাং অমনি‍ হায়না মহাক্না মখা তাখি‍।

হৌখিবা চহি খরসিদা, দিজিতেল বেঙ্কিংনা লৈবাকসিদা বেঙ্কিং সর্ভিস পীননবগী পাম্নবা থৌওং অমা ওইরক্লি হায়না আর.বি.আই. গভর্নরনা হায়খি‍। বেঙ্কিং সর্ভিসকী দিজিতেল ইনফ্রাস্ত্রকচর ফংবগী চাং ফগৎহন্নবা লেপ্পা লৈতবা থৌরাং রিজর্ব বেঙ্কনা পায়খৎলি‍। কেন্দ্রগী বজেৎ ২০২২-২৩দা দি.বি.য়ু. ৭৫ লিংখৎনবা লাউথোকখিবা মতুংদগী, আর.বি.আই.না ইন্দিয়ন বেঙ্ক এসোসিএসন অমসুং হীরমসিদা খঙ-হৈরবশিংগা তান্নদুনা মথৌ তাবা চৎন-পথাপ থোকখি‍।

কম্মর্সিএল বেঙ্কশিংনা – পব্লিক অমসুং প্রাইভেৎ সেক্তর অনিমক – থৌরাং অসিদা য়ানিংবা উৎলকখি‍। ঐখোয়গী নীংতম্বা চহি ৭৫ ফারকপবু নীংশিংবা ওইনা লৈবাকসিগী দিস্ত্রিক্স ৭৫দা রেকোর্দ ওইবা থা তরুক্কী মনুংদা দি.বি.য়ু. ৭৫ লিংখৎখ্রে হায়না শ্রী দাসনা ফোঙদোকখি‍।

দি.বি.য়ু.শিংনা দিজিতেল ইকোসিস্তেমগী ইনেব্লর ওইনা মথৌ তৌগনি অমদি অয়েৎ অপন লৈতবা বেঙ্কিং ত্রাঞ্জেক্সন লৈহন্দুনা কস্তমর এক্সপরিএন্স ফগৎহনবগা লোয়ননা চে চঙদবা, মতিং লৈবা, শাফবা ফীভমদা বেঙ্কিং সর্ভিসশিং পীদুনা ফাইনেন্সিএল ইনক্লুজন য়োকখৎনবা ঐখোয়না হোৎনরিবসিদা মথৌ হাপ্লগনি হায়না শ্রী দাসনা ফোঙদোকখি‍।

দি.বি.য়ু.শিং অসিনা পীগদৌরিবা অকক্নবা ফাইনেন্সিএল সর্ভিসশিংগী মরক্তা সেভিং, ক্রেদিৎ, ইনভেস্তমেন্ত অমসুং ইন্স্যুরেন্স য়াওরি‍। ক্রেদিৎ দেলিভরীগী মতাঙদা, অহৌবগী ওইনা দি.বি.য়ু.শিং অসিনা ওনলাইন এপ্লিকেসন্দগী হৌরগা থাদোকপা ফাওবদা স্মোল তিকেৎ রিতেল অমসুং এম.এস.এম.ই. লোনশিংগী এন্দ-তু-এন্দ দিজিতেল প্রোসেসিংগী সর্ভিস পীগনি হায়না আর.বি.আই. গভর্নরনা মখা তানা ফোঙদোকখি‍।

“দি.বি.য়ু.শিং অসিনা অকক্নবা শকখঙলবা লৈঙাক্না স্পোন্সর তৌবা স্কীমশিংগা মরী লৈনবা সর্ভিসশিংসু পীগনি‍। হায়রিবা য়ুনিৎশিং অসিদা, সেল্ফ সর্ভিস অমসুং এসিস্তেদ মোদ হায়রিবা থৌওং অনিদা সেল্ফ সর্ভিসগী মওংদা প্রদক্ত অমসুং সর্ভিসশিং পুং ২৪ চুপ্না চহি চুপ্পা ফংহনগনি‍। বেঙ্কশিংনা দি.বি.য়ু.গী ফুৎপ্রিন্ত হেন্না পাকথোক চাউথোকহন্নবগীদমক দিজিতেল বিজিনেস ফেসিলিতেতর অমসুং বিজিনেস করেসপোন্দেন্তগী সর্ভিসশিংসু পীবদা অকায়বা লৈতে,” হায়না শ্রী দাসনা হায়খি‍।

থৌরম অদু কেন্দ্রগী শেলথুম মন্ত্রী; মুখ্য মন্ত্রীশিং; কেন্দ্র অমসুং স্তেতকী মন্ত্রীশিং; আর.বি.আই. গভর্নর; এল.জি.শিং; এম.পি.শিং অমসুং এম.এল.এ.শিং; ভারত লৈঙাক্কী সেক্রেতরীশিং অমসুং মকোক থোংবা ওফিসিএলশিংনা শরুক য়াখি‍। বেঙ্কশিংগী এম.দি. অমসুং সি.ই.ও., ওফিসিএলশিং অমদি অতৈ মীয়ামগী মীহুৎশিংসু লৈবাকসিগী তোঙান তোঙানবা দি.বি.য়ু.শিংদগী থৌরমদুদা শরুক য়াখি‍। দি.বি.য়ু. ৭৫মক্তা মথৌ তৌরিবা ওফিসিএল পুম্নমকসু থৌরমদুদা শরুক য়াখি‍।

দিজিতেল বেঙ্কিং য়ুনিৎ (দি.বি.য়ু.)শিংগী মরমদা

দি.বি.য়ু.শিং অসিনা আই.সি.তি. মচাক মথুম লৈজদবশিংগী মফমদা বেঙ্কিং সর্ভিস দিজিতেল ওইনা ফংহনগনি‍। তেক্কী মরমদা নীংথিনা খঙদবা মীওইশিংদা মখোয়না দিজিতেল বেঙ্কিং শীজিন্নবদা মতেংসু পাংগনি‍। দি.বি.য়ু.শিংদা প্রদক্ত অমসুং সর্ভিসশিং কস্তমরদা পাম্বৈ ২দা ফংহনগনি:

• সেল্ফ সর্ভিস মোদ
• দিজিতেল এসিস্তেন্স মোদ

দি.বি.য়ু.শিং অসি মখাদা পীরিবশিং অসিদা হান্না লৈরিবা ব্রাঞ্চশিংদগী খেন্নগনি:

• মখোয়না শেল থমজিনবা অমদি লৌথোকপা য়াওনা বেঙ্কিং সর্ভিসশিং পুং ২৪ চুপ্না ফংহনগনি‍।
• সর্ভিসশিং দিজিতেল ওইনা ফংহগনি‍।
• কন্নেক্তিভিতী নৎত্রগা কম্প্যুতিং দিভাইস লৈতবা মীওইশিংনা দি.বি.য়ু.দা পেপরলেস মওংদা বেঙ্কিং ত্রাঞ্জেক্সন তৌবা য়াগনি‍।
• এসিস্তেদ মোদতা য়ুজরশিংবু বেঙ্কিং ত্রাঞ্জেক্সনগী লমদা মতেং পানবা অমদি লমজিংবিনবা বেঙ্ক স্তাফশিং লৈগনি‍।
• দিজিতেল ফাইনেন্সিএল লিতরেসী পীবদা অমদি দিজিতেল বেঙ্কিং শীজিন্ননবগী এৱ্যারনেস পীবদা মতেং ওইগনি‍।

দি.বি.য়ু.শিং অসি সেভিং একাউন্ত হাংদোকপা, বেলেন্স চেক তৌবা, পাসবুক নম্বা, ফন্দ থাদোক থাজিন তৌবা, ফিক্স দিপোজিত্তা শেল থাদবা, লোনগী চে থাবা, ইসু তৌখ্রবা চেক্কী স্তোপ পেমেন্তকী ইন্সত্রকসন শেম্বা, ক্রেদিৎ/দেবিৎ কার্দ এপ্লাই তৌবা, একাউন্ত স্তেতমেন্ত য়েংবা, খাজনা থীবা, বিল থীবা, নোমিনেসন তৌবনচিংবা মখল মখা কয়াগী দিজিতেল বেঙ্কিং সর্ভিসশিং ফংহল্লি‍। দি.বি.য়ু.শিং অসিনা জন সমর্থ পোর্তেলগী খুত্থাঙদা লৈঙাক্কী ক্রেদিৎ লিঙ্ক স্কীমশিংদা য়াওবা অমদি স্মোল তিকেৎ এম.এস.এম.ই./রিতেল লোনশিংগী এন্দ-তু-এন্দ দিজিতেল প্রোসেসিংগী খুদোংচাবশিং ফংহনগনি‍।

বেকগ্রাউন্দ

ফাইনেন্সিএল ইনক্লুজন হেন্না মরা চেৎশিলহন্নবগী থৌরাং অমগী মখাদা, প্রধান মন্ত্রী শ্রী নরেন্দ্র মোদীনা ভিদিও কন্ফরেন্সিংগী খুত্থাঙদা দিজিতেল বেঙ্কিং য়ুনিৎ (দি.বি.য়ু.) ৭৫ লৈবাক মীয়ামদা কত্থোকখ্রে‍।

২০২২-২৩গী কেন্দ্রগী বজেৎ ৱারোলগী শরুক অমা ওইনা শেলথুম মন্ত্রীনা লৈবাকসিগী নীংতম্বা চহি ৭৫ শুরকপবু নীংশিংবা ওইনা লৈবাকসিগী দিস্ত্রিক্ত ৭৫দা দি.বি.য়ু. ৭৫ লিংখৎনবা ৱাফম লাউথোকখি‍। দি.বি.য়ু.শিং অসি লৈবাকসিগী কাচিন কোয়া শিনবা থুংনা দিজিতেল বেঙ্কিংগী কান্নবা ফংহন্নবা পান্দমদা লিংখৎপনি অমদি মসিনা স্তেত অমসি য়ুনিয়ন তেরিতরী পুম্নমক কোনশিনগনি‍। থৌরাং অসিদা পব্লিক সেক্তর বেঙ্ক ১১, প্রাইভেৎ সেক্তর বেঙ্ক ১২ অমদি স্মোল ফাইনান্স বেঙ্ক অমনা শরুক য়ারি‍।

দি.বি.য়ু.শিং অসি সেভিং একাউন্ত হাংদোকপা, বেলেন্স চেক তৌবা, পাসবুক নম্বা, ফন্দ থাদোক থাজিন তৌবা, ফিক্স দিপোজিত্তা শেল থাদবা, লোনগী চে থাবা, ইসু তৌখ্রবা চেক্কী স্তোপ পেমেন্তকী ইন্সত্রকসন শেম্বা, ক্রেদিৎ/দেবিৎ কার্দ এপ্লাই তৌবা, একাউন্ত স্তেতমেন্ত য়েংবা, খাজনা থীবা, বিল থীবা, নোমিনেসন তৌবনচিংবা মখল মখা কয়াগী দিজিতেল বেঙ্কিং ফেসিলিতীশিং মীয়ামদা ফংহন্নবা আউতলেৎশিংনি‍।

দি.বি.য়ু.শিংনা কস্তমরশিংদা চহি চুপ্পা বেঙ্কিং প্রদক্তশিং অমসুং সর্ভিসশিং মমল হন্থবা, লায়না ফংবা ঙম্বা অমদি ফীভম ফগৎলবা দিজিতেল বেঙ্কিং এক্সপরিএন্সশিং ফংহনগনি‍। মখোয়না দিজিতেল ফাইনেন্সিএল লিতরেসী  শন্দোক্কনি অমদি কস্তমরশিংদা সাইবর সিক্যুরিতী এৱ্যারনেস অমসুং সেফগার্দশিংগী মরমদা খঙহনবদা অখন্নবা মীৎয়েঙ থমগনি‍। লোয়ননা মফমশিং অসিদা রিএ তাইম এসিস্তেন্স পীননবা অমদি দি.বি.য়ু.শিংনা হকথেংননা নৎত্রগা বিজিনেস ফেসিলিতেতরশিং/করেসপোন্দেন্তশিংগী খুত্থাঙদা পীরিবা বিজিনেস অমসুং সর্ভিসশিংগী মরমদা পেন্দবা লৈবশিংগী ৱাখৈ পুরক্নবা দিজিতেল মেকানিজম মতিক চানা লৈগনি‍।

দিজিতেল বেঙ্কিং য়ুনিৎ (দি.বি.য়ু.)শিংগী লিস্ত য়েংনবগীদমক মসিদা নম্বিয়ু‍।

****