রাস্ত্রপতিগী লোইশঙ
ভারতকী রাস্ত্রপতিনা অসাম সরকার অমসুং কেন্দ্রগী রোদ ত্রান্সপোর্ত অমসুং হায়ৱেজ, পেত্রোলিয়ম অমসুং নেচরেল গ্যাস অমদি রেলৱেজ মন্ত্রালয়শিংগী তোঙান-তোঙানবা প্রোজেক্তশিং শঙ্গাখ্রে/উরেপ-উয়ুং তমখ্রে
Posted On:
14 OCT 2022 1:24PM by PIB Imphal
ভারতকী রাস্ত্রপতি, শ্রীমতি দ্রৌপতি মুর্মুনা গুৱাহাতিগী শ্রীমন্ত সঙ্করদেব কলাক্ষেত্রাদগী ঙসি (ওক্তোবর ১৪, ২০২২) ভর্চুএল ওইনা অসাম সরকার অমসুং কেন্দ্রগী রোদ ত্রান্সপোর্ত অমসুং হায়ৱেজ, পেত্রোলিয়ম অমসুং নেচরেল গ্যাস অমদি রেলৱেজ মন্ত্রালয়শিংগী তোঙান-তোঙানবা প্রোজেক্তশিং শঙ্গাখ্রে/উরেপ-উয়ুং তমখ্রে। মসিদা সিলচরগী মোইনরবোন্দদা ইন্দিয়ন ওইল কোর্পোরেসন লিমিতেদকী রেলহেদ দিপোৎ অমসুং হায়ৱে প্রোজেক্ত অনি শঙ্গাবা; অসামগী তী গার্দেনগী মফমশিংদা মোদেল সেকেন্দরী স্কুল ১০০; হায়ৱে প্রোজেক্ত অনি; অমসুং গুৱাহাতিগী অঘতোরিদা মোর্দন কার্গো-কম-কোচিং তর্মিনেল - উরেপ-উয়ুং তম্বা য়াওখি। রাস্ত্রপতিনা শোখুবি (নাগালেন্দ) অমসুং মন্দিপাথার (মেঘালয়) য়ৌবা গুৱাহাতিদগী লুমদিং পাস ফাওবগী ত্রেন অমা লমথাখি।
থৌরম অদুদা ৱা ঙাংলদুনা রাস্ত্রপতিনা ঙসি হৌদোকখিবা হকশেল, মহৈ-মশিং, রেলৱেজ, লম্বী শেম্বা, পেত্রোলিয়ম অমসুং নুপীদা শক্তি পীবগা মরী লৈনবা প্রোজেক্তশিং অসি মাইপাকপা ওইনবগীদমক য়াইফ-মঙ্গোল পীখি। মহাক্না স্কিমশিং অসি মাইপাক্না ইমপ্লিমেন্ত তৌবনা ললোন-ইতিক অমসুং থবক্কী অনৌবা খুদোংচাবশিং পীরগনি, ত্রান্সপোর্তেসন ফেসিলিতীশিং হেনগৎলগনি অমসুং অসাম য়াওনা অপুনবা অৱাং নোংপোক লমদমদা শেন্মীৎলোন মপাঙ্গল কনখৎহল্লনি হায়না থাজবা থমখি।
রাস্ত্রপতিনা হায় মদুদি রাজ্য অমা হেক্তগী চাউখৎ খোঙচৎকী য়ুম্ফম অফবা ইনফ্রাস্ত্রকচরনা ওইরি। অৱাং নোংপোক লমদম অসি ভারতকী ‘এক্ত ইস্ত পোলিসী’গী সেন্তর পোইন্ত ওইরি। কেন্দ্র সরকারনা লমদম অসিগী ইনফ্রাস্ত্রকচর অমসুং কন্নেক্তিবিতীদা অখন্নবা মীৎয়েং চংলিবা অসিদা মহাক্না নুংঙাইবা পোকই হায়না ফোঙদোকখি। মহাক্না হায় মদুদি অসাম চাউখৎহনদুনা অপুনবা অৱাং নোংপোক লমদমগী চাউখৎ-থৌরাংগী ইঞ্জিন ওইবা য়াগনি।
রাস্ত্রপতিনা হায় মদুদি অৱাং নোংপোক লমদম অসি নেচরেল রিসোর্সেস মরাং কাইনা লৈ। মহাক্না হায় অসামনা ভারতকী অপুনবা ক্রুল ওইল পুথোকপদা চাদা ১৩ শরুক তম্লি। অমসুং ভারতকী অপুনবা নেচরেল গ্যাস পুথোকপগী চাদা ১৫দি অৱাং নোংপোক লমদমদগী ওইরি। মহাক্না ঙসি শঙ্গাখিবা মোইনরবোন্দদা খ্বাইদগী নৌবা দিপোৎ শাখিবা অসিনা অপুনবা বরাক তম্পাক লোয়ননা ত্রিপুরা, মনিপুর অমসুং মিজোরামগী তঙাই ফদবা পেত্রোলিয়ম প্রদক্তসিং থুংহনবদা মতেং ওইরগনি হায়না থাজবা থমখি।
রাস্ত্রপতিনা হায় মদুদি কেন্দ্র সরকারনা অসাম য়াওনা অৱাং নোংপোক থংবা রাজ্য পুম্নমক্তা লম্বী অমসুং রেলৱে কন্নেক্তিবিতীদা অখন্নবা মীৎয়েং চংলি। ঙসি উরেপ-উয়ুং তমখিবা অমসুং শঙ্গাখিবা লম্বী অমসুং রেলৱেগা মরী লৈনবা তোঙান-তোঙানবা প্রোজেক্তশিং অসিনা লমদম অসিগী ললোন-ইতিক অমসুং ত্রান্সপোর্তেসন হেনগৎহনবগী মথক্তা তুরিজমগী খুদোংচাবশিংসু পীরগনি হায়না থাজবা ফোঙদোকখি।
রাস্ত্রপতিনা হায় মদুদি নুপী অমসুং অঙাংশিং শাফনা থম্বা অমসুং হীরম খুদিংমক্তা খুমাং চাউশিনহনবা হায়বা অসি চাউখৎপা খুন্নাই অমগী খুদমনি। অসামদা লৈরিবা নুপী অমদি অঙাংশিংদা তোঙান-তোঙানবা কান্নবশিং ফংলিবা অসি মপাঙ্গল কনখৎহন্নবগীদমক ঙসি মোদেল অঙ্গনৱাদী সেন্তর ৩০০০ শঙ্গাখিবা অসি শীংথানীংঙাই ওইবা থৌশিল অমনি। মহাক্না তী গার্দেনগী শিন্মীশিংগী মচা-মশুশিংদা অফবা মহৈ-মশিং ফংহন্নবগী পান্দমদা মোদেল সেকেন্দরী স্কুল ১০০গী উরেপ-উয়ুং তমখিবদা মহাক্না নুংঙাইবা ফোঙদোককি।
রাস্ত্রপতিনা পীখিবা ৱারোল য়েংনবগীদমক মসিদা নম্বীয়ু -
***
(Release ID: 1867875)
Visitor Counter : 146