প্রধান মন্ত্রী শ্রী নরেন্দ্র মোদীনা ওক্তোবর ১, ২০২২দা ভারত্তা ফাইব-জি সর্বিস হৌদোক্কনি অমসুং নিউ দিল্লিগী প্রগতি মাইদান্দা ওক্তোবর ১-৪, ২০২২ ফাওবা পাংথোক্কদবা ৬শুবা ইন্দিয়া মোবাইল কংগ্রেস ২০২২(আই এম সি-২০২২)শু হাংদোক্কনি।

চহি কয়া য়াম্না কন্না থৌরাং তৌরক্লবা মতুংদা ফাইব-জি সর্বিস অসি হৌদোক্কদবনি। হন্দক মাইপাক্না ফাইব-জি স্পেকত্রম নিলাম লাউখ্রে অমসুং তেলিকোম সর্বিস প্রোভাইদরশিংদা মেগাহর্জ ৫১,২৩৬ পীখ্রে অমসুং মসিদগী লুপা কোতি ১,৫০,১৭৩গী শেনফম ফংখি। নিলাম লাউবা অদুদা অফবা ফাইব-জিগী থবকশিং ফংহনখ্রে অমসুং মসিনা আই.ও.তি,এম ২ এম, কম্পুতিং অমসুং রোবোতিক্সকী থবকশিং শীজিন্নবা য়ারগনি। 

ফাইব-জিনা অনৌবা শেন-থুমগী খুদোংচাবা কয়া ফংহল্লগনি অমসুং মসিনা খুন্নাইগী ওইনা কান্নবা কয়া পীদুনা ভারতকী খুন্নাইগীদমক অওনবা পুরক্নবা শাফু অমা ওইরগনি। মসিনা লৈবাক অসিগী চাউখৎ-থৌরাংদা অপনবা পীরিবশিং লৌথোকপা ঙমহল্লগনি, স্তার্দঅপশিংনা অনৌবা কয়া পুথোক্লগনি অমসুং ‘দিজিতেল ইন্দিয়া’গী পান্দম ফংহনবা ঙম্লগনি। ভারত্তা ফাইব-জিনা পীগদবা শেন-থুমগী কান্নবা অসি ২০৩৫ ফাওবগী মনুংদা য়ু.এস দোল্লর বিল্লিয়ন ৪৫০ য়ৌগনি হায়না পানরি।

অগস্ত ২০২২দা তেলিকোম দিপার্তমেন্তনা রাইত ওফ ৱে(আর ও দব্লিউ) রুলস ২০১৬ শেমদোকখ্রে অমসুং রাইত ওফ ৱে পর্মিসনশিংগী চার্জশিং মরম চানা লৌরে অমসুং ফাইব-জি স্মোল সেলশিং থম্নবা অমসুং ওপ্তিকেল ফাইবর কেবল তিংনবগী রাইত ওফ ৱে চার্জশিং চপ চানা লেপ্লে।

তেক্নোলোজি শেমগৎনবা ২০১৮দা তেলিকোম দিপার্তমেন্তনা আই.আই.তিশিং, আই.আই.এস.সি বেঙ্গালুরু অমসুং সামিরগা লোয়ন্না ফাইব-জি তেস্তবেদ অমা লিংখৎখি। স্তার্দঅপশিংনা অনৌবা থবকশিং অমসুং প্রোতোতাইপ পুথোক্নবা ২০২০দগী ফাইব-জি হেক্কাথোন অমা হৌদোকখি অমসুং মদুনা অনৌবা পোৎথোক কয়া পুথোরকখি। ফাইব-জি য়ুজ-কেস লেবশিং লিংখৎপা ঙম্নবা, কেন্দ্র সরকারগী মিনিস্ত্রি ১২গা লোয়ন্না ২০২১দগী ফাইব-জি য়ুজ-কেসকী মতাংদা ইন্তর-মিনিস্তরিয়েল কম্মিতি অমা লিংখৎখি। ফাইব-জিনা শেন তানবদা পীগদবা খুদোংচাবশিং অমসুং সরকারনা পায়খৎকদবা মরুওইবা থবকশিং খঙদোক্নবা ইনভেস্তরশিং, বেঙ্করশিং অমসুং ইন্দস্ত্রিনা শরুক য়াদুনা মীফম অমা মুম্বাইদা পাংথোকখ্রে।

সি-দোতনা লৈবাক অসিদা মশানা শাজবা ফাইব-জি নন-স্তেন্দ এলোন(এন এস এ)কোর পুথোক্লে। মফম অসিগী ইন্দস্ত্রি অমসুং স্তার্দ-অপশিংগা লোয়ন্না সি-দোতনা ফাইব-জি রেদিও এসেস নেতৱার্ক(রান)শু শেমগৎলে। তি.সি.এস অমসুং তাজাস নেতৱার্কসকা লোয়ন্না সি-দোতনা মসিগী ফোর-জি কোর মাইপাক্না চাংয়েং তৌখ্রে।

পায়খৎখ্রবা থবকশিং অদুনা প্রধান মন্ত্রীগী “জয় অনুসন্ধান”গী পাউখুম পীবদা মতেং পাংগনি। হায়রিবা থবকশিং অসিনা ভারতকী মেনুফেকচর অমসুং তেলিকোমগী থবকশিংদা অচৌবা অওনবশিং ওইদুনা লৈবাক অসিগী ফাইব-জিগী থবকশিং ফগৎহনবদা মতেং পাংগনি অমসুং ফাইব-জি য়ুজ কেসশিংদা অনৌবা কান্নবা কয়া ফংহল্লগনি।

অখন্নবা সহর খরদা প্রধান মন্ত্রীনা হৌদোক্কদৌরিবা ফাইব-জি অসি চহি খরগী মনুংদা লৈবাক শীনবা থুংনা কোনশিনগনি।

এসিয়াদা মাংজিল থাবা দিজিতেলগী থৌরম অমা ওইরিবা আই.এম.সি-২০২২ গী পান্দমদি “ইনকেপসুলেত, এঙ্গেজ এন্দ এক্সপেরিয়েন্স এ নিউ দিজিতেল য়ুনিভর্স” হায়বনি অমসুং থৌরম অসিগী মরুওইবা পান্দমদি অনৌবা তেক্নোলোজিশিং য়োকখৎপা, লৈবাক অসিদা শেমগৎজবা তেক্নোলোজিশিং পুক্নিং থৌগৎপা অমসুং মীয়াম ফাইব-জি শীজিন্নহনবা অসিনি। অতোপ্পা পান্দমশিংগী মনুংদা লৈবাক অসিদা পোৎ-চৈ শাবা য়োকখৎপা, মালেমগী লৈবাকশিংদা মতেং পীনবা হেনগৎহনবা, তুংকোইনা চৎনহৌগদবা চাউখৎ-থৌরাংগী থবকশিং পায়খৎপা, ওন্ত্রেপ্রেনিউয়রশিপ অমসুং অনৌবা পুথোকপা পুক্নিং থৌগৎপা, মপান লৈবাকশিংদগী অমসুং লৈবাক মনুংদগী শেন থাদবা হেনগৎহনা য়াওরি। মীফম অসিদা সি.এক্স.ও অমসুং মীহুৎ ৫,০০০ হেন্না, একজিবিতর ২৫০ হেন্না, স্তার্দ-অপ ১০০ হেন্না অমসুং ৱাঙাংলোয় ৩০০ হেন্না শরুক য়াগনি হায়না পানরি অমসুং শরুক য়ারিবশিং অমসুং য়েংবা লাকপশিং য়াওনা পুন্না মীওই ৭০,০০০ হেন্না তিনগনি হায়না পানরি।

আই.এম.সি-২০২২দা শরুক য়ানবা স্তেৎ আই.তি সেক্রেতরিশিং চেবাউ পীখ্রে অমসুং ফাইব-জি চৎনবা হৌহনবদা, ললোন-ইতিক্কী খুদোংচাবশিং, স্কিল হেনগৎহনবগী দরকার ওইবা অমসুং স্তার্দ-অপশিং অমসুং ইনভেস্তরশিংগা উন্নবগী মতাংদা রাজ্যশিং অমসুং য়ু.তিশিংগী থৌদাংগী মরমদা খন্ননবা আই.এম.সি-২০২২ মনুংদা রাজ্যশিংগী আই.তি মিনিস্তরশিংগা মীফম অমা পাংথোক্নবা থৌরাং তৌরি।

থৌরম অদুগী মতাংদা অকুপ্পা মরোল খঙনবা অমসুং মিংচন্নবা, চঙবীয়ু :

www.indiamobilecongress.com/.

*****