প্রধানমন্ত্রীগী লোইশঙ
পি.এম.না এক্তা নগর, গুজরাত্তা পাঙথোকপা স্তেত পুম্নমক্কী এনভাইরনমেন্ত মন্ত্রীশিংগী নেস্নেল কন্ফরেন্স হৌদোকখ্রে
“ভারত খোঙজেল য়াঙনা চাওখৎলক্লিবা শেন্মিৎলোন্নি, অমদি মশাগী ইকোলোজীসু লেপ্পা লৈতনা মপাঙ্গল কনখৎহল্লি”
“ঐখোয়গী উমংগী শরকু হেনগৎলক্লি অমদি ৱেতলেন্দশিংসু খোঙলৈ থুনা পাকথোক চাউথোরক্লি”
“স্তেতশিংদা হেক য়ারিবমখৈ সর্কুলর ইকনমী য়োকখৎনবা ৱাফম এনভাইরনমেন্ত মন্ত্রী পুম্নমক্কী মফমদা থমজরি”
“এনভাইরনমেন্ত মন্ত্রীশিংগী শক্লোন অসি রিগুলেতর অমা ওইবগী মহুত্তা অকোয়বগী ফীভম য়োকখৎপা মীওইরোমদনা হেন্না নকশিল্লি হায়না ঐনা লৌই”
“স্তেত খুদিংমক্তা লৈরিবা উমংগী মৈহৌ লাংপোক থেংননবা মেনানিজম তেক্নোলোজীনা থৌদুনা চৎপা অচৌবা থৌওং ওইহনগদবনি”
“অকোয়বগী ফীভম ঙাকশেন্নবগী থৌরাংশিং য়োকখৎনবগীদমক স্তেতশিংগী মরক্তা অফবা মখলগী হিদান্নবা লোয়ননা তেংবাংনবগী ফীভম লৈহনবা তাই”
“ভারত্তা চাওখৎপা পুরকপদা পন্থহন্নবা, অর্বান নক্সলগী কাঙলুপশিংনা তোঙান তোঙানবা মালেমগী লূপশিং অমসুং ফাউন্দেসনশিংদগী লুপাক করোর কয়াগী শেনফম লৌথদুনা মপাঙ্গল উৎলি”
“এনভাইরনমেন্ত মন্ত্রীশিংগী মীৎয়েঙদা অহোংবা লাক্লবা মতমদা, মহৌশাগী ফীভমদসু কান্নবা পুরক্কনি হায়না ঐনা থাজৈ”
“ঐখোয়গী স্তেতশিংগী য়ুনিভর্সিতীশিং অমসুং লেবোরেতরীশিংনা জয় অনুসন্ধানগী লাই
Posted On:
23 SEP 2022 12:38PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা গুজরাতকী এক্তা নগরদা পাঙথোকপা এনভাইরনমেন্ত মন্ত্রীশিংগী নেস্নেল কন্ফরেন্স হৌদোকখ্রে
থৌরমদুদা ৱা ঙাঙলদুনা, প্রধান মন্ত্রীনা পুম্নমকপু এক্তা নগরদা অমদি এনভাইরনমেন্ত মন্ত্রীশিংগী নেস্নেল কন্ফরেন্সতা তরাম্না ওকখি। কন্ফরেন্স অসি ভারতনা লাক্কদৌরিবা চহি ২৫গী অনৌবা পান্দমশিং থম্লকপা মতমদা পাঙথোক্লিবনি হায়বা ৱাফম থমখি। মসিগা মরু ওইবগী মতাঙদা পল্লদুনা, এক্তা নগরবু মপুং ফানা শেমগৎ শাগৎলিবা অসি উমং, ঈশিং য়োকখৎপা, লমকোয় অমসুং ঐখোয়গী ত্রাইবেল ইচিল ইনাওশিংগী মতাঙদা এনভাইরনমেন্তেল পিলগ্রিমেজকী অথোইবা খুদম অমনি হায়না প্রধান মন্ত্রীনা ফোঙদোকখি।
ইন্তরনেস্নেল সোলার এলাইএন্স, কোএলিসন ফোর দিজাস্তর রেজিলিএন্ত ইনফ্রাস্ত্রকচর, অমসুং লাইফ মুভমেন্তপু খুদম ওইনা পীরদুনা, ভারতনা রিনিউএবল ইনর্জীগী লমদা খুমাঙ চাওশিন্না চঙশিনবতা নত্তনা মালেমগী অতৈ লৈবাকশিংসু লমজিংলি হায়না প্রধান মন্ত্রীনা হায়খি। “ঙসিগী অনৌবে ভারত অসিনা অনৌবা ৱাখল্লোন, অনৌবা লম্বী অমদা চঙশিল্লি,” হায়না প্রধান মন্ত্রীনা হায়খি। প্রধান মন্ত্রীনা মখা তারদুনা ভারত অসি খোঙজেল য়াঙনা চেনখৎলক্লিবা শেন্মিৎলোন অমনি অদুগা ভারতনা মাগী ইকোলোজীবুসু লেপ্পা লৈতনা মপাঙ্গল কনখৎহল্লি হায়না ফোঙদোকখি। “ঐখোয়গী উমংগী মফম হেনগৎলক্লি অমদি ৱেৎলেন্দশিংসু খোঙজেল য়াঙনা পাকথোক চাউথোরক্লি,” হায়না মহাক্না মখা তাখি।
ঙসি মালেম অসিনা ভারতকা খুৎশম্ননা চৎমিন্নরিবগী মরমদি পান্দমশিং ফংবগী ত্রেক রেকোর্দ অসিননি হায়বা ৱাফম প্রধান মন্ত্রীনা থমখি। গীর নোংশা, কৈ, শামু, মচি অমা পানবা রাইনো অমসুং কৈজেংলাংগী মশিংসু হৌখিবা চহিশিংসিদা হেনগৎলক্লি। নুমিৎ খরনিগী মমাঙদা মধ্য প্রদেশতা চীতাহ অমুক হন্না পুরকখিবনা অ্রনৌবা ইনোৎ অমা হাপ্লি,” হায়না প্রধান মন্ত্রীনা মখা তাখি।
ইং ২০৭০ ফাওবদা নেৎ জিরোগী পান্দম থম্লিবা অসিদা পুম্নমক্কী পুক্নিং চিংশিল্লদুনা লৈবাকসিগী মীৎয়েঙ গ্রীন গ্রোথ অমসুং গ্রীন জোবতা থম্লি হায়না প্রধান মন্ত্রীনা হায়খি। মহৌশাগী খল কায়হন্দনা থম্নবগী ৱাফমসু মহাক্না ফোঙদোকখি। হায়রিবা পান্দমশিং অসি ফংনবা হোৎনবদা এনভাইরনমেন্ত মন্ত্রীশিংনা লৌগদবা শক্লোনগী মতাঙদসু মহাক্না ফোঙদোকখি। “স্তেতশিংদা হেক য়ারিবমখৈ সর্কুলর ইকনমী লৈহন্নবগীদমক ঐনা এনভাইরনমেন্ত মন্ত্রী পুম্নমক্কী মফমদা হায়জরি,” হায়না প্রধান মন্ত্রীনা হায়খি। মসিনা সোলিদ ৱেস্ত মেনেজমেন্তকী থৌরাংবু মপাঙ্গল কনখৎহনগনি অমদি সিঙ্গল য়ুজ প্লাস্তিক্কী খুবাম্নুংদগী ঐখোয়বু মনীং তমহনগনি হায়বা ৱাফমসু শ্রী মোদীনা থমখি।
এনভাইরনমেন্ত মিনিস্ত্রীশিংগী থৌদাংগী মতাঙদা মখা তারদুনা, হায়রিবা থৌদাংশিং অসি অকক্নবা হীরম খরখক্তদা লৌরোইদবনি হায়বা ৱাফম প্রধান মন্ত্রীনা থমখি। শাংলবা মতম অমা এনভাইরনমেন্ত মন্ত্রালয়শিং রিগুলেতর অমগী শক্লোন লৌদুনা লাক্লি হায়বা ৱাফমদা মহাক্না নুংনাংবা ফোঙদোকখি। “এনভাইরনমেন্ত মন্ত্রালয়গী শক্লোন অসি রিগুলেতর অমা ওইবদগী হেন্দোক্তুনা অকোয়বগী ফীভমবু য়োকখৎপারোমদনা হেন্না নকশিল্লি হায়না ঐনা খল্লি,” হায়না প্রধান মন্ত্রীনা ফোঙদোকখি। স্তেতশিংদা ভেহিকল স্ক্রেপিং পোলিসী, অমসুং ইথানোল ব্লেন্দিং অমসুং মদুবু শীজিন্নহনবনচিংবা বাইওফুএল থৌরাংশিং পায়খৎনবা ৱাফম থমখি। হায়রিবা থৌরাংশিং অসি য়োকখৎনবগীদমক স্তেতশিংগী মরক্তা অফবা মওংগী হিদান্নবগা লোয়ননা তেংবাংনবগী মচৎ অমা থম্নবা ৱাফমসু মহাক্না থমখি।
লৈনুংগী ঈশিংগী মতাঙদা লৈরিবা ৱাফমশিংগী মতাঙদা পল্লদুনা, ঈশিং মরাং কায়না ফংলমবা স্তেতশিংসু হৌজিক্তি ঈশিং ফংদবগী ফীভমা মায়োক্নরি হায়না প্রধান মন্ত্রীনা হায়খি। কেমিকেল য়াওদবা মহৌশাগী লৌউ-পথাপ, অমৃৎ সরোবর অমসুং ৱাতর সিক্যুরিতীনচিংবগী শিংনবা অমদি থৌরাংশিং অসি মরী লৈনবা দিপার্তমেন্তশিংখক্তদা লোইবা নত্তে, অমদি এনভাইরনমেন্ত দিপার্তমেন্তনসু মসিবু চপ চানা মরু ওইবা শিংনবা অমা ওইনা লৌগদবনি হায়না প্রধান মন্ত্রীনা ফোঙদোকখি। “এনভাইরনমেন্ত মন্ত্রালয়শিংনা হীরম অসিদা পুম্নমক শরুক য়ামিন্নবা অমদি পুন্না চঙশিনমিন্নবগী পরিংদা থবক পায়খৎপা য়াম্না মরুওই। এনভাইরনমেন্ত মন্ত্রালয়শিংগী মীৎয়েঙদা অহোংবা লাক্লবা মতমদা মহৌশাগী ফীভমদা কান্নবা শোয়দনা পুরক্কনি হায়না ঐনা থাজৈ,” হায়না মহাক্না মখা তাখি।
হায়রিবা থবক অসি ইনফোর্মেসন দিপার্তমেন্ত নৎত্রগা এজুকেসন দিপার্তমেন্তখক্তদা লোইবা নত্তে হায়বা ৱাফম থম্লদুনা, প্রধান মন্ত্রীনা মীয়ামদা পাক শন্না খঙহনবা অসিসু অকোয়বগী ফীভম ঙাক শেন্নবগী মরুওইবা মাইওন অমনি হায়না হায়খি। “লৈবাকসিদা চৎনহনখ্রবা নেস্নেল এজুকেসন পোলিসী অসিনা এক্সপরিএন্স বেজ লর্নীংদা অহেনবা মীৎয়েঙ কয়ামরুম থম্লি হায়বা অদোমসু খঙলিবনি,” হায়না শ্রী মোদীনা মখা তাখি। হায়রিবা কেম্পেন অসি এনভাইরনমেন্ত মন্ত্রালয়না লমজিংদুনা চৎকদবনি। মসিনা অঙাংশিংদা বাইওদাইভর্সিতীগী মরমদা হেন্না খঙহনগনি অমদি অকোয়বগী ফীভম ঙাক শেন্নবগী ইথিল পোকহনবদা মতেং ওইগনি হায়না প্রধান মন্ত্রীনা হায়খি। “সমুদ্র খোঙবালগী লমশিংদা লৈবা অঙাংশিংদা সমুদ্রগী ইকোসিস্তেম কমদৌনা ঙাক শেনগনি হায়বগী মরমদা তাকপি তম্বিবা মথৌ তাই। ঐখোয়না ঐখোয়গী অঙাংশিং, অমসুং তুংগী মীরোলশিংবু অকোয়বগী ফীভম লুনা লৌনবা শেম্বা তাই,” হায়না প্রধান মন্ত্রীনা মখা তাখি। ঐখোয়গী স্তেতশিংগী য়ুনিভর্সিতীশিং অমসুং লেবোরেতরীশিংনা জয় অনুসন্ধানগী লাইৱা তুংইন্দুনা অকোয়বগী ফীভম ঙাক শেনবগা মরী লৈনবা ইনোভেসনশিংদা খ্বাইদগী মরুওইনা লৌফম থোকই। অকোয়বগী ফীভম ঙাক শেনবদা তেক্নোলোজী শীজিন্নবগী মরুওইবা ৱাফমসু প্রধান মন্ত্রীনা থমখি। “উমংগী মরমদা উমংগী লৈরিবা ফীভমশিংদা থিজিন হুমজিনবসু চপ চানা মরুওই,” হায়না শ্রী মোদীনা মখা তাখি।
নোংচুপ লৈবাকশিংদা উমং মৈ চাকপগী কিংনিংঙাই ওইরবা ফীভমদা মীৎয়েঙ থম্লদুনা লম্মৈ চাকপনা মরম ওইরগা গ্লোবেল ইমিসন্দা ভারতকী শরুক মশিং থানিংঙাই ওইদ্রবসু, মতম পুম্নমক্তা ঐখোয় মীকুপ নাহুম শিংনা লৈবা মথৌ তাই হায়না প্রধান মন্ত্রীনা হায়খি। স্তেত খুদিংমক্তা লৈরিবা উমং মৈ চাকপা থেংননবগী মেকানিজম তেক্নোলোজীনা থৌদুনা চৎপা অমদি পাক চাউবা ওইহনবগী তঙাই ফদবা ৱাফম প্রধান মন্ত্রীনা থমখি। ঐখোয়গী ফোরেস্ত গার্দশিংদা ত্রেনিং পীবদা উমং মৈ চাকপা থেংনবগী থৌওংশিংদা অখন্নবা মীৎয়েঙ থম্ফম থোকই হায়না শ্রী মোদীনা ফোঙদোকখি।
এনভাইরনমেন্তেল ক্লিয়রেন্স লৌবদা থেংনরিবা খুদোংচাদবশিং পল্লদুনা, ফীভম অসিনা মতমগা চুনবা ইনফ্রাসস্ত্রকচর শেমগৎপা অমদি পুন্সি মহিং ফগৎহন্নবা থৌরাংশিংদা অপনবা পীরি হায়না প্রধান মন্ত্রীনা হায়খি। ১৯৬১দা পন্দিৎ নেহরুনা হৌরম্বা সর্দার সরোবর দামবু প্রধান মন্ত্রীনা খুদম ওইনা পীখি। অকোয়বগী ফীভম ঙাক শেনবগী মিংদা চয়েৎনবা কয়ানা মরম ওইরগা দাম অসি শাবা লোইশিনবদা চহি কয়া লৌখিবা মহাক্না পনখি। তোঙান তোঙানবা মালেমগী লূপশিং অমসুং ফাউন্দেসনশিংদগী লুপা করোর কয়া লৌদুনা ভারতকী চাওখৎ থৌরাংদা অপনবা পীবদা অর্বান নক্সলশিংনা লৌরিবা থৌদাংশিংসু প্রধান মন্ত্রীনা তাকখি। অসিগুম্বা মীওইশিং অসিনা পুথোরকপা ৱাফমশিং অসিনা মরম ওইরগা দাম অসিগী অৱাংবা হেনগৎহন্নবগীদমক ৱর্ল্দ বেঙ্কনা লোন পীয়ু হায়বা য়ারকখিদে হায়না প্রধান মন্ত্রীনা পাউদমখি। “অসিগুম্বা ফীভমশিং অসি লোইশিনবদা মতম খরা লৌখি, অদুবু গুজরাতকী মীয়াম্না মায় পাকখি। দাম অসি অকোয়বগী ফীভমদা কায়হল্লক্কনি হায়না হায়রম্মি, অদুবু ঙসিদি হায়রিবা দাম অসিনা অকোয়বগী ফীভম ঙাক্নবগী পাম্বৈ অমা ওইরি,” হায়না প্রধান মন্ত্রীনা মখা তাখি। মীয়ামগী মফমদা মখোয় মখোয়গী স্তেতশিংদা লৈরিবা অসিগুম্বা অর্বান নক্সলশিংদগী মীকুপ নাহুম শিংনা লৈনবা ৱাফম প্রধান মন্ত্রীনা থমখি। স্তেতশিংদা এনভাইরনমেন্তেল ক্লিয়রেন্সকী প্রপোজেল ৬০০০ অমদি ফোরেস্ত ক্লিয়রেন্সকী এপ্লিকেসন ৬৫০০ হেন্না তাদুনা লৈরি হায়না প্রধান মন্ত্রীনা ফোঙদোকখি। “হায়রিবশিং অসিদগী মরম চাবা প্রপোজেলশিং থুনা পীথোকখিনবা স্তেতশিংনা হোৎনগদবনি। অসুম্না পন্দুনা লৈবনা মরম ওইরগা, লুপা করোর লিশিং কয়াগী প্রোজেক্তশিং পন্দুনা লৈগদৌরিবনি,” হায়না মহাক্না মখা তাখি। পন্দুনা লৈবা হন্থহন্নবা অদুগা ক্লিয়রেন্স পীবগী মতম থুজিলহন্নবা থবক তৌবগী মওং মতৌ হোংদোকপগী মথৌ তাই হায়বা ৱাফমসু প্রধান মন্ত্রীনা থমখি। এনভাইরনমেন্তেল ক্লিয়রেন্স পীবদা, ঐখোয়না চৎন-কাঙলোনশিং চেকশিন্না য়েংগদবনি অমদি মফমদুদা লৈরিবা মীওইশিংগী চাওখৎ থৌরাংদা অহেনবা মীৎয়েং থমগদবনি হায়নানা প্রধান মন্ত্রীনা মখা তানা ফোঙদোকখি। “মসিনা শেন্মিৎলোন অমসুং মহৌশাগী ফীভম অনিমক্কীদমক ইকান্দা কান্নবা ফীভম ওইগদৌরিবনি,” হায়না মহাক্না হায়খি। “অকোয়বগী ফীভমগী মিংদা মরম চাদবা ৱাফম কয়া পুখত্তুনা ইজ ওফ লিভিং অমসুং ইজ ওফ দুইং বিজিনেস্তা খুরৌ থাংহল্লোইদবনি। এনভাইরনমেন্ত ক্লিয়রেন্স হেক থুনা ফংলিবমখৈ চাউখৎপসু থুগদৌরিবনি হায়বা ৱাফম ঐখোয়না নীংশিংগদবনি,” হায়না মহাক্না ফোঙদোকখি।
প্রধান মন্ত্রীনা চয়োল খরগী মমাঙদা লৈবাক মীয়ামদা কত্থোকখিবা দিল্লীগী প্রগতি মৈদান তনেলবু খুদম ওইনা পীখি। “তনেল অসিনা মরম ওইরগা দিল্লীগী মীয়াম্না চত্থোক চৎশিন তৌবদা পল্লমবা অমদি ত্রাফিক জামগী ফীভম হন্থহল্লে। প্রগতি মৈদান তনেলনা চহিদা থাউ লিতর লাখ ৫৫ হেন্না সেব তৌবদসু মতেং ওইরগনি,” হায়না মহাক্না মখা তাখি। এক্সপর্তশিংগী মতুং ইন্না মসিনা উ লাখ ৬কা মান্নবা মওংদা চহি খুদিংগী কারবোন ইমিসন তন লিশিং ১৩রোমগী চাংদা হন্থহল্লগনি। “ফ্লাইওভর, লম্বী, এক্সপ্রেসৱে, নৎত্রগা রেলৱে প্রোজেক্ত ওইরবসু, মখোয়শিং অসি শেমগৎপনা কার্বোন ইমিসন হন্থহল্লি। ক্লিয়রেন্স পীবা মতমদা, হায়রিবা ৱাফম অসি ঐখোয়না নাথৈরোইদবনি,” হায়না শ্রী মোদীনা হায়খি।
অকোয়বগী ফীভমগা মরী লৈনবা ক্লিয়রেন্স মখল পুম্নমক্কী সিঙ্গল ৱিন্দো মোদ অমা ওইরিবা পরিবর্তন পোর্তেলগী অয়াবা লৌবদা ত্রান্সপেরেন্সী অমসুং মতিংবু শিংথারদুনা পোর্তেল অসিবু শীজিন্ননবা ৱাফম প্রধান মন্ত্রীনা থমখি। “চহি ৮গী মমাঙদা এনভাইরনমেন্ত ক্লিয়রেন্স লৌবদা নুমিৎ ৬০০ হেন্না চঙলম্বা অদু, ঙসিদি নুমিৎ ৭৫খক্তা চঙলে,” হায়না প্রধান মন্ত্রীনা মখা তাখি।
ইনফ্রাস্ত্রকচর প্রোজেক্তশিং খুৎশম্ননা পায়খৎমিন্নবগী চাং হেনগৎলক্লে অমদি পি.এম. গতি শক্তি নেস্নেল মাস্তর প্লান চৎনহনখিবদগী হৌজিক ফাওবদা প্রোজেক্ত কয়াগী খোঙজেল হেনগৎলক্লে হায়বা ৱাফম প্রধান মন্ত্রীনা পাউদমখি। পি.এম. গতি শক্তি নেস্নেল মাস্তর প্লান অসি অকোয়বগী ফীভম ঙাক শেন্নবগী অচৌবা খুৎলায় অমসু ওইরে হায়রদুনা মহাক্না দিজাস্তর রেজিলিএন্ত ইনফ্রাস্ত্রকচরগী মরুওইবা ৱাফমসু মহাক্না ফোঙদোকখি। অইং অশাগী খল হোংলকপগা মরী লৈনবা শিংনবশিং থেংনবা মতমদা শেন্মিৎলোনগী মচিন তুমখৎলক্লিবা সেক্তর খুদিংমক ঐখোয়না মওং চুম্না শীজিন্নগদবনি হায়না শ্রী মোদীনা হায়খি। “কেন্দ্র অমসুং স্তেত লৈঙাক অনিমক্না গ্রীন ইন্দস্ত্রিএল ইকনমীগী মায়কৈদা পুন্না চঙশিনমিন্নবা মথৌ তাই,” হায়না প্রধান মন্ত্রীনা মখা তাখি।
মহাক্কী ৱারোল লোইশিল্লকপদা, এনভাইরনমেন্ত মন্ত্রালয় অসি শুপ্নতগী রিগুলেতরী বোদী অমখক নত্তে, মীয়ামগী শেন্মিৎলোন মপাঙ্গল কনখৎহন্নবগী অমদি থবক পীননবা পাম্বৈশিং শেমগৎনবগী অচৌবা মেদিয়ম অমসুনি হায়না প্রধান মন্ত্রীনা হায়খি। “অদোম্না এক্তা নগরদা তমশিনবা য়াবা, য়েংবা য়াবা অমদি তৌবা য়াবা কয়া থেংনগনি। গুজরাতকী মীশিং করোর কয়াদা অমৃৎ য়েল্লিবা সরদার সরোবর দামসু মফম অসিমক্তদা লৈরিবনি। সরদার সাহেবকী চাউখ্রবা মীতম অসিনা অপুনবগী ৱাশক ঙাক্না চৎনবগী ইনোৎ হাপ্লি,” হায়না মহাক্না মখা তাখি।
এক্তা নগরগী কেবারিয়াদা লৈরিবা তমশিনবগী খুদোংচাবশিং পল্লদুনা, মহৌশাগী ফীভম অমসুং শেন্মিৎলোন অনি তুনা চাওখৎমিন্নবা, অকোয়বগী ফীভম মপাঙ্গল কনখৎহনবা অমসুং অনৌবা এম্প্লোইমেন্তকী খুদোংচাবশিং শেমগৎপা, বাইওদাইভর্সিতীবু ইকো-তুরিজম হেনগৎহন্নবগী পাম্বৈ অমা ওইহনবা, অমসুং ঐখোয়গী ত্রাইবেল ইচিল ইনাওশিংগী লনথুম হেনগৎপগা উমংগী লনথুম হেনগৎহনবগা মপা চাননা চৎহন্নবগী মতাঙদা লৈরিবা ইসুশিংগী পাম্বৈশিং মফমসিদা পুরকপা য়াগনি হায়না প্রধান মন্ত্রীনা ফোঙদোকখি।
গুজরাতকী মুখ্য মন্ত্রী, শ্রী ভুপেন্দ্র পতেল অমসুং এনভাইরনমেন্ত, ফোরেস্ত অমসুং ক্লাইমেৎ চেঞ্জকী কেন্দ্র মন্ত্রী শ্রী ভুপেন্দ্র য়াদবসু থৌরমদুদা শরুক য়াখি।
বেকগ্রাউন্দ
কোওপরেতিব ফেদরেলিজমগী ৱাখল্লোন মাঙদা পুখত্তুনা, মমা লোঙবা পাম্বৈগী খুত্থাঙদা প্লাস্তিক পোলুসন মুত্থৎপা, লাইফ – লাইফস্তাইল ফোর এনভাইরনমেন্তগী থৌওংশিংদা মীৎয়েং থমদুনা অইং অশাগী খল হোংলকপা থেংননবা স্তেত এক্সন প্লান শেম্বনচিংবা ইসুশিংগী হেন্না ফবা খুজিল থৌরাং য়াৎপদা কেন্দ্র অমসুং স্তেত লৈঙাকশিংগী মরক্তা থোং মান্ননা চৎমিন্নবগী ফীভম শেমগৎনবগীদমক্তা কন্ফরেন্স অসি পঙথোকপনি। মসিনা মহৌশাগী ফীভম কায়থরক্লবা মফমশিং হান্নগী ফীভমদা হঞ্জিলহনবা অমসুং লমলক্কী শা-উচেক য়োকখৎপদা অখন্নবা মীৎয়েঙ থমদুনা উমংগী মফম হেনগৎহনবদসু মীৎয়েঙ থমগনি।
নুমিৎ নিনি চত্থগদবা কন্ফরেন্স অসি সেপ্তেম্বর ২৩ অমসুং ২৪দা লাইফ, কোম্বেতিং ক্লাইমেৎ চেঞ্জ (অপদেতিং স্তেত এক্সন প্লান ওন ক্লাইমেৎ চেঞ্জ ফোর মিতিগেসন ওফ ইমিসন্স এন্দ এদাপ্তেসন তু ক্লাইমেৎ ইম্পেক্ত); পরিবেস (সিঙ্গল ৱিন্দো সিস্তেম ফোর ইন্তিগ্রেতেদ গ্রীন ক্লিয়রেন্স); ফোরেস্ত্রী মেনেজমেন্ত; প্রিভেন্সন এন্দ কন্ত্রোল ওফ পোলুসন; ৱাইল্দলাইফ মেনেজমেন্ত; প্লাস্তিক এন্দ ৱেস্ত মেনেজমেন্ত হায়রিবা হীরমশিং অসিদা মীৎয়েঙ থম্বা থিমেতিক সেসন তরুক লৈগনি।
*****
(Release ID: 1861749)
Visitor Counter : 189
Read this release in:
Kannada
,
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam