ସ୍ଵରାଷ୍ଟ୍ର ବ୍ୟାପାର ମନ୍ତ୍ରଣାଳୟ
azadi ka amrit mahotsav

ଦେଶବ୍ୟାପୀ ବାମପନ୍ଥୀ ଉଗ୍ରବାଦ ବିରୋଧରେ ଜାରି ରହିଥିବା ସଂଘର୍ଷରେ ସୁରକ୍ଷା ବାହିନୀର ନିର୍ଣ୍ଣାୟକ ବିଜୟ


ବାମପନ୍ଥୀ ଉଗ୍ରବାଦ ବିରୋଧରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଶୂନ୍ୟ ସହନଶୀଳତା ନୀତି ଯୋଗୁ ମିଳୁଛି ସଫଳତା; ପ୍ରଥମ ଥର ପାଇଁ ଛତିଶଗଡ଼ ଓ ଝାଡ଼ଖଣ୍ଡ ସୀମାରେ ଥିବା ‘ବୁଢ଼ାପାହାଡ଼’ ଏବଂ ବିହାରର ସମ୍ପୂର୍ଣ୍ଣ ଅପହଞ୍ଚ ଇଲାକା ଚକ୍ରାବନ୍ଧ ଓ ଭୀମାବନ୍ଧକୁ କବଜାକୁ ଆଣିଲେ ସୁରକ୍ଷାବାହିନୀ; ଭୁଶୁଡ଼ିଲା ମାଓବାଦୀଙ୍କ ଗଡ଼ ଏବଂ ସ୍ଥାୟୀ ଶିବିର ପ୍ରତିଷ୍ଠା କଲେ ସୁରକ୍ଷାବାହିନୀ

ଏସବୁ ଥିଲା ଶୀର୍ଷ ମାଓନେତାଙ୍କ ଗଡ଼; ଏହି ତିନୋଟି ସ୍ଥାନରୁ ବିପୁଳ ପରିମାଣର ଅସ୍ତ୍ରଶସ୍ତ୍ର, ଗୋଳାବାରୁଦ, ବିଦେଶୀ ଗ୍ରେନେଡ, ଏରୋ ବୋମା ଏବଂ ଆଇଇଡି ଜବତ କଲେ ସୁରକ୍ଷାବାହିନୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏହି ନିର୍ଣ୍ଣାୟକ ସଫଳତା ପାଇଁ ସିଆରପିଏଫ ଏବଂ ରାଜ୍ୟ ସୁରକ୍ଷା ବାହିନୀକୁ ଅଭିନନ୍ଦନ ଜଣାଇଲେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଅମିତ ଶାହା; କହିଲେ, ବାମପନ୍ଥୀ ଉଗ୍ରବାଦ ଓ ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଗ୍ରହଣ କରିଛି ସ୍ୱରାଷ୍ଟ୍ର ମନ୍ତ୍ରଣାଳୟ ଏବଂ ଏହି ଲଢ଼େଇ ଆଗକୁ ଆହୁରି ସକ୍ରିୟ ହେବ

୨୦୨୨ରେ ବାମପନ୍ଥୀ ଉଗ୍ରବାଦୀଙ୍କ ବିରୋଧରେ ଆରମ୍ଭ କରାଯାଇଥିବା ଅପରେସନ ଅକ୍ଟୋପସ, ଅପରେସନ ଡବଲ ବୁଲ, ଅପରେସନ ଚକ୍ରାବନ୍ଧ ଜରିଆରେ ସୁରକ୍ଷାବାହିନୀକୁ ମିଳିଛି ଅଭୂତପୂର୍ବ ସଫଳତା। ଛତିଶଗଡ଼ରେ ୭ ମାଓବାଦୀ ନିହତ ଏବଂ ୪୩୬ ଜଣ ମାଓବାଦୀଙ୍କ ଗିରଫଦାରୀ/ ଆତ୍ମସମର୍ପଣ, ଝାଡ଼ଖଣ୍ଡରେ ୪ ମାଓବ

Posted On: 21 SEP 2022 7:06PM by PIB Bhubaneshwar

https://static.pib.gov.in/WriteReadData/userfiles/image/image001YZ1P.png

https://static.pib.gov.in/WriteReadData/userfiles/image/image0022AXX.png

https://static.pib.gov.in/WriteReadData/userfiles/image/image0030NJ6.png

 

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାମପନ୍ଥୀ ଉଗ୍ରବାଦ ମୁକ୍ତ ଭାରତ ପରିକଳ୍ପନା ଏବଂ ଆତଙ୍କବାଦ ବିରୋଧରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଅମିତ ଶାହାଙ୍କ ଶୂନ୍ୟ ସହନଶୀଳତା ନୀତିକୁ କାର୍ଯ୍ୟକାରୀ କରିବା ଲାଗି ସ୍ୱରାଷ୍ଟ୍ର ମନ୍ତ୍ରଣାଳୟ ଅଧୀନରେ ବିଭିନ୍ନ କେନ୍ଦ୍ରୀୟ ଅର୍ଦ୍ଧସାମରିକ ବାହିନୀ ଗୁରୁତ୍ୱପୂର୍ଣ୍ଣ ଉପଲବ୍ଧି ହାସଲ କରିଛନ୍ତି । ସେମାନେ ଦେଶବ୍ୟାପୀ ବାମପନ୍ଥୀ ଉଗ୍ରବାଦ ବିରୋଧୀ ଲଢ଼େଇକୁ ନିର୍ଣ୍ଣାୟକ ସ୍ଥିତିରେ ପହଞ୍ଚାଇଛନ୍ତି । ମାଓବାଦ ଓ ନକ୍ସଲବାଦ ବିରୋଧରେ ଜାରି ରହିଥିବା ଅନ୍ତିମ ପର୍ଯ୍ୟାୟ ନିର୍ଣ୍ଣାୟକ ଲଢ଼େଇରେ ସୁରକ୍ଷାବାହିନୀମାନେ ଉଲ୍ଲେଖନୀୟ ସଫଳତା ହାସଲ କରିଛନ୍ତି।

ବାମପନ୍ଥୀ ଉଗ୍ରବାଦ ବିରୋଧରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଶୂନ୍ୟ ସହନଶୀଳତା ନୀତିକୁ ସଫଳତା ମିଳିଛି । ପ୍ରଥମ ଥର ପାଇଁ ଛତିଶଗଡ଼ ଓ ଝାଡ଼ଖଣ୍ଡ ସୀମାରେ ଥିବା ‘ବୁଢ଼ାପାହାଡ଼’ ଏବଂ ବିହାରର ସମ୍ପୂର୍ଣ୍ଣ ଅପହଞ୍ଚ ଇଲାକା ଚକ୍ରାବନ୍ଧ ଓ ଭୀମାବନ୍ଧକୁ ସୁରକ୍ଷାବାହିନୀ କବଜାକୁ ଆଣିବାରେ ସଫଳ ହୋଇଛନ୍ତି । ମାଓବାଦୀଙ୍କ ଗଡ଼ ଭୁଶୁଡ଼ିଛି ଏବଂ ସୁରକ୍ଷାବାହିନୀ ଏଠାରେ ସ୍ଥାୟୀ ଶିବିର ପ୍ରତିଷ୍ଠା କରିପାରିଛନ୍ତି । ଏସବୁ ଅଞ୍ଚଳ ଶୀର୍ଷ ମାଓନେତାଙ୍କ ଗଡ଼ ଥିଲା ।  ସୁରକ୍ଷା ବାହିନୀ ଦ୍ୱାରା ଏହି ତିନୋଟି ସ୍ଥାନରୁ ବିପୁଳ ପରିମାଣର ଅସ୍ତ୍ରଶସ୍ତ୍ର, ଗୋଳାବାରୁଦ, ବିଦେଶୀ ଗ୍ରେନେଡ, ଏରୋ ବୋମା ଏବଂ ଆଇଇଡି ଜବତ କରାଯାଇଛି ।

୨୦୧୯ ପରଠାରୁ ବାମପନ୍ଥୀ ଉଗ୍ରବାଦ ବିରୋଧରେ ଏକ ସ୍ୱତନ୍ତ୍ର ରଣନୀତି ଗ୍ରହଣ କରାଯାଇଥିଲା। କେନ୍ଦ୍ର ଓ ରାଜ୍ୟ ସରକାରଙ୍କ ସୁରକ୍ଷା ଏଜେନ୍ସି ଏବଂ ଏମାନଙ୍କ ସହ ଜଡ଼ିତ ସଂସ୍ଥା ମିଶି ସମନ୍ୱିତ ଉଦ୍ୟମ ଏବଂ ଅଭିଯାନ ଆରମ୍ଭ କରିଥିଲେ । ଏହି ମିଳିତ ପ୍ରୟାସକୁ ଅଭୂତପୂର୍ବ ସଫଳତା ମିଳିଛି । ଦେଶରେ ଅନେକାଂଶରେ ବାମପନ୍ଥୀ ଉଗ୍ରବାଦର ପ୍ରଭାବ ହ୍ରାସ ପାଇଛି ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏହି ନିର୍ଣ୍ଣାୟକ ସଫଳତା ପାଇଁ ସିଆରପିଏଫ ଏବଂ ରାଜ୍ୟ ସୁରକ୍ଷା ବାହିନୀକୁ ଅଭିନନ୍ଦନ ଜଣାଇଛନ୍ତି କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଅମିତ ଶାହା । ସେ କହିଛନ୍ତି ଯେ, ବାମପନ୍ଥୀ ଉଗ୍ରବାଦ ଓ ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଗ୍ରହଣ କରିଛି ସ୍ୱରାଷ୍ଟ୍ର ମନ୍ତ୍ରଣାଳୟ ଏବଂ ଏହି ଲଢ଼େଇ ଆଗକୁ ଆହୁରି ସକ୍ରିୟ ତଥା ବ୍ୟାପକ ହେବ ।

୨୦୨୨ରେ ବାମପନ୍ଥୀ ଉଗ୍ରବାଦୀଙ୍କ ବିରୋଧରେ ଆରମ୍ଭ କରାଯାଇଥିବା ଅପରେସନ ଅକ୍ଟୋପସ, ଅପରେସନ ଡବଲ ବୁଲ, ଅପରେସନ ଚକ୍ରାବନ୍ଧ ଜରିଆରେ ସୁରକ୍ଷାବାହିନୀକୁ ଅଭୂତପୂର୍ବ ସଫଳତା ମିଳିଛି । ଛତିଶଗଡ଼ରେ ୭ ମାଓବାଦୀ ନିହତ ହୋଇଛନ୍ତି ଏବଂ ୪୩୬ ଜଣ ମାଓବାଦୀଙ୍କ ଗିରଫଦାରୀ/ ଆତ୍ମସମର୍ପଣ ହୋଇଛି । ଝାଡ଼ଖଣ୍ଡରେ ୪ ମାଓବାଦୀ ନିହତ ହୋଇଥିବାବେଳେ ୧୨୦ ମାଓବାଦୀ ଗିରଫ ହୋଇଛନ୍ତି କିମ୍ବା ଆତ୍ମସମର୍ପଣ କରିଛନ୍ତି । ବିହାରରେ ୩୬ ମାଓବାଦୀଙ୍କ ଗିରଫଦାରୀ/ ଆତ୍ମସମର୍ପଣ ହୋଇଥିବା ସୁରକ୍ଷାବାହିନୀ ପକ୍ଷରୁ ସୂଚନା ମିଳିଛି । ସେହିପରି ମଧ୍ୟପ୍ରଦେଶରେ ସୁରକ୍ଷାବାହିନୀ ଦ୍ୱାରା ନିହତ ହୋଇଛନ୍ତି ୩ ମାଓବାଦୀ । ଆହୁରି ଗୁରୁତ୍ୱପୂର୍ଣ୍ଣ କଥା ହେଉଛି, ଏସବୁ ମାଓବାଦୀଙ୍କ ମୁଣ୍ଡ ଉପରେ ଥିଲା ଲକ୍ଷ ଲକ୍ଷ, କୋଟି  କୋଟି ଟଙ୍କାର ପୁରସ୍କାର ରାଶି । ଏମାନଙ୍କ ମଧ୍ୟରେ ଥିଲେ ମୁଣ୍ଡ ଉପରେ ୧ କୋଟି ଟଙ୍କାର ପୁରସ୍କାର ରାଶି ଥିବା ମିଥିଲେଶ ମାହତୋ ଭଳି କୁଖ୍ୟାତ ମାଓବାଦୀ ।

ଏସବୁ ଅପରେସନକୁ ତ୍ୱରାନ୍ୱିତ କରିବା ଲାଗି କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟର ପଦକ୍ଷେପ କାରଣରୁ ବିହାରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ଝାଡ଼ଖଣ୍ଡ ଏବଂ ଓଡ଼ିଶାରେ ସୁରକ୍ଷା କ୍ଷେତ୍ରରେ ରହିଥିବା ଶୂନ୍ୟସ୍ଥାନ ଭରଣା କରାଯାଇପାରିଛି ଏବଂ ଏସବୁ ରାଜ୍ୟରେ ବାମପନ୍ଥୀ ଉଗ୍ରବାଦୀମାନଙ୍କ ଗଡ଼ ଭୁଶୁଡ଼ିଛି । ଏହି ରଣନୀତିକୁ ଅନୁସରଣ କରି, ଅନ୍ୟ ରାଜ୍ୟରେ ମଧ୍ୟ ସୁରକ୍ଷାବାହିନୀର ସ୍ଥିତି ସୁଦୃଢ଼ ହୋଇଛି । ମାଓ ହିଂସା ଘଟଣା ଏବଂ ବାମପନ୍ଥୀ ଉଗ୍ରବାଦ ପ୍ରବଣ ଭୌଗଳିକ କ୍ଷେତ୍ରର ପରିସୀମା ହ୍ରାସ ପାଇଛି ।

୨୦୧୮ ତୁଳନାରେ ବାମପନ୍ଥୀ ଉଗ୍ରବାଦ ଜନିତ ହିଂସା ଘଟଣା ୩୯% ହ୍ରାସ ପାଇବା ସୁରକ୍ଷାବାହିନୀର ଏହି ଲଢ଼େଇ ନିର୍ଣ୍ଣାୟକ ସ୍ତରରେ ପହଞ୍ଚିଥିବାର ପ୍ରମାଣ ଦେଉଛି । ସୁରକ୍ଷାବାହିନୀର ବଳିଦାନ ଘଟଣାରେ ୨୬% ହ୍ରାସ ପାଇଛି । ନାଗରିକଙ୍କ ମୃତ୍ୟୁ ଘଟଣା ୪୪% କମିଥିବା ବେଳେ ମାଓହିଂସା ପ୍ରଭାବିତ ଜିଲ୍ଲା ସଂଖ୍ୟା ୨୪% ହ୍ରାସ ପାଇବା ସହ ୨୦୨୨ରେ ଏଭଳି ଜିଲ୍ଲା ସଂଖ୍ୟା ୩୯କୁ କମିଛି ।

୨୦୧୪ ତୁଳନାରେ ମାଓବାଦୀ ହିଂସା ଘଟଣା ୭୭ ପ୍ରତିଶତକୁ ହ୍ରାସ ପାଇଛି । ୨୦୦୯ରେ ଏଭଳି ୨୨୫୮ଟି ହିଂସା ଘଟଣା ଘଟିଥିଲା ଯାହାକି ୨୦୨୧ରେ ୫୦୯କୁ ହ୍ରାସ ପାଇଛି । ହିଂସାଜନିତ ମୃତ୍ୟୁ ହାର ମଧ୍ୟ ୮୫ ପ୍ରତିଶତ କମିଛି । ୨୦୧୦ରେ ମାଓ ହିଂସା ଜନିତ ମୃତ୍ୟୁ ସଂଖ୍ୟା ୧୦୦୫ ଥିଲା ଯାହାକି ୨୦୨୧ରେ ୧୪୭କୁ ହ୍ରାସ ପାଇଛି । ୨୦୧୦ରେ ଦେଶରେ ୯୬ଟି ମାଓ ପ୍ରଭାବିତ ଜିଲ୍ଲା ଥିବା ବେଳେ ୨୦୨୨ରେ ଏହା ମାତ୍ର ୩୯କୁ ହ୍ରାସ ପାଇଛି ।

 

*****

P.S.



(Release ID: 1861341) Visitor Counter : 60


Read this release in: English , Urdu , Hindi , Marathi