প্রধান মন্ত্রী শ্রী নরেন্দ্র মোদীগী ‘অত্মানির্ভর ভারত’কী মঙলান অসিনা মালেমদা ভারত খ্বাইদগী মপাঙ্গল কনবা অমসুং ইকায়খুম্নবা লৈবাক অমা ওইহল্লে। ৱাফম অসি সেপ্তেম্বর ১৬, ২০২২দা নিউ দিল্লিদা পাংথোকপা থৌরম অমদা রক্ষা মন্ত্রী শ্রী রাজনাথ সিংহনা ফোঙদোকখিবনি। মহাক্না হায়খি মরুওইনা ঙাক-শেনগা মরী লৈনবা হিরমশিংদা লৈবাক অসিগী দরকার ওইবশিং লৈবাক অমতগী মখা পোন্দবা ‘অনৌবা ভারত’ অমগী মঙলান মঙফাওনবা ঙম্নবা অউপ্পা উনা লোংনা হাইদোক্তুনা সরকারনা পায়খৎপা য়াবা থবকশিং পায়খৎলি।

ঙাক-শেনগী লমদা ‘অত্মানির্ভর ভারত’ ফংবা ঙম্নবা দিফেন্স মিনিস্ত্রিনা পায়খৎলিবা থবকশিংগী মতাংদা শ্রী রাজনাথ সিংহনা হায়খি আর্মদ ফোর্সশিংদা লৈবাক অসিনা মশানা শাবা অফবা খুৎলায়শিং পীনবা অমসুং তুংদা লাক্কদবা শিংনবশিং মায়োক্নবা থৌরাং তৌরিবা অমসুং লৈবাক্কী চাউখৎ-থৌরাংগী থবকশিংদা প্রাইভেত সেক্তর শরুক য়াহল্লিবা অমসুং লৈবাক অসিনা মশানা পুথোকচবা ঙম্লবা পোৎলম ৩১০গী লিস্ত অহুম ফোঙদোক্লিবা অসি সরকারনা চোকথবা লৈতনা হোৎনবগী খুদম্নি। লাক্লিবা চহি খর অসিদা ঈশিং, কংফাল অমসুং অতিয়াদা শীজিন্ননবা খ্বাইদগী নৌবা খুৎলায়শিং শানবা লৈবাক অসিগী উদোগশিংগী থৌনা লৈরে অমসুং লান্মীশিংদা মখোয়গী দরকার ওইবশিং ফংহনবা ঙম্নবা সরকারনা থবক খুদিংমক পায়খৎলে।   

সরকারনা হোৎনবদগী ফংলকপা মাইপাকপশিংগী মতাংদা শ্রী রাজনাথ সিংহনা হায়খি মতম অমদা লুপা কোতি ১,৯০০গী খুৎলায়শিং মপান্দা থাদোক্লম্বা অদু হৌজিক লুপা কোতি ১৩,০০০ য়ৌরে।  ২০২৫ ফাওবগী মনুংদা লুপা কোতি লাখ ১.৭৫গী ঙাক-শেনগী খুৎলায়শিং পুথোক্নবা পান্দম থম্লি অমসুং মসিগী মনুংদা লুপা কোতি ৩৫,০০০ গী খুৎলায়শিং মপান্দা থাদোকপা য়াওরি। লৈবাক অসিদা মশানা শাজবা মচাক চাদা ৭৬ য়াওবা লৈবাক অসিগী অহানবা এয়রক্রাফ কেরিয়র আই.এন.এস বিক্রান্ত প্রধান মন্ত্রীনা সেপ্তেম্বর ২, ২০২২দা কোতিদা কম্মিসন তৌখ্রে। মসি ভারতনা মশাগী ওক্নবা পুথোকচবা ঙম্নবা লম্বীদা চঙশিনবা মরুওইবা মাইপাকপা অমনি।

শ্রী রাজনাথ সিংহনা হায়খি অত্মানির্ভরগী ৱাহন্থোক্তি নাইতোম হিংবা হায়বা নত্তে; মসি মালেমদা থাজবা অমসুং লৈতাবা ফংহন্নবা ঐখোয়গী ফিরেপনি। পোৎ-চৈ শাফম অসি লৈবাক অমা খক্তদা লৈগদবা নত্তে হায়বা ঙসিদি মালেম্না খঙলে। হোঙলক্লিবা ফিবমশিং অসিদা, অনৌবা এম.এন.সিশিংনা মখোয়গী পোৎ-চৈ শাফমশিং মফম কয়াদা চাইথোক্নবা অনৌবা খুদোংচাবা কয়া থিরি। মালমগী শেন্মিৎলোন্দা অচৌবা অহোঙবা অমা পুরক্নবা পোৎ-চৈ শাফমশিং মফম কয়াদা চাইথোরকপা অসিদা ভারতনা অনৌবা থাজবশিং পীরে। ভারত অসি মালেমগী থাজবগী মফম অমা ওইরে। ঐখোয়গী খুদোংচাবা কয়া মরাংকাইনা লৈরে অমসুং ‘অত্মানির্ভর ভারত’না অনৌবা থোঙ কয়া লাউনা হাংদোক্লে। ঐখোয়গী পান্দমদি লৈবাক্কী য়াইফনবা থবক পায়খৎপনি অমসুং মসিগা লোয়ন্না ঐখোয়গী মরুপ-মপাং ওইবা লৈবাকশিং মখোয়গী পান্দমশিং ফংনবা মতেং পাংবনি। পান্দমদি ময়েক শেংলে-ভারত্তা শাবা, মালেমগীদমক শাবা।

নিংতম্বা ফংলবা মতুংদা মহাক্কী লুচিং মখাদা ভারতনা অমুক হন্না মপাঙ্গল কল্লবা শেন্মিৎলোন অমা ওইরকপা ঙমখিবা হান্নগী প্রধান মন্ত্রী শ্রী রাজনাথ সিংহনা নিংশিংখি অমসুং হৌজিক্কী সরকার অসিনা ‘লৈবাক্না অহানবা’ হায়বা মহাক্কী পান্দম অদু থবক ওইনা পাংথোকলি হায়না মখা তাখি। মহাক্না হায়খি অতলজিগী লমজিং মখাদা লৈবাক অসি চাউখৎপগী লম্বীদা অমুক হল্লকখি। মহাক্না ইনফ্রাস্ত্রকচর চাউখৎহনবা, লায়রবশিংগী য়াইফ-থৌরাং, মমল হেনগৎপা লাকশিনবা অমসুং ইকোনোমি হেনগৎলকপগী চাং চাদা ৮গী মথক্তা থম্নবা মীৎয়েং চঙখি। হৌজিক প্রধান মন্ত্রী শ্রী নরেন্দ্র মোদীগী লমজিং মখাদা ভারতনা মালেমদা ৫শুবা খ্বাইদগী চাউবা ইকোনোমি ওইরে। হৌখিবা চহি ৮ অসিদা লৈঙাক্কী থবকশিং অওনবা কয়া পুরক্লে। চৎনবা য়াদ্রবা আইনশিং মহুৎশিল্লে অমসুং লৈবাক অসিদা শেন থাদরক্নবা অফবা ফিবম কয়া শেমগৎলে। ‘ললোন-ইতিক্কী থবকশিং লাইহন্নবা’ হোৎনবগা লোয়ন্না লৈবাক অসিদা ‘হিংবদা লাইনবা’ ঐখোয়না মীৎয়েং চঙলে অমসুং মসিগী মখাদা মীওই খুদিমক্তা তঙাইফদনা চঙদ্রবা য়াদ্রবা পোৎলমশিং ফংহল্লে।

শ্রী রাজনাথা সিংহনা মখা তানা হায়খি তুমিন্না য়েংলগা লৈবা লৈবাক অমা ওইরম্বদগী প্রধান মন্ত্রী শ্রী নরেন্দ্র মোদীনা ভারতকী শক্তম অসি থবক ঙম্বা অমসুং পোৎথোক পুথোকপা লৈবাক অমদা ওন্থোক্লে। কোবিদ-১৯ লাইচৎ মনুংদা ঐখোয়না খ্বাইদগী চাউবা তিকা থাবগী থবক পাংথোকখি। ঐখোয়না ঐখোয়গী মীয়াম ঙাকথোকপা খক নত্তনা, অতোপ্পা লৈবাকশিং মতেং পাংখি। লৈবাক ১০০ হেনবদা কোবিদ তিকা, হিদাক-লাংথকশিং অমসুং তঙাইফদবা পোৎলমশিং ফংহনখি। রুসিয়া-য়ুক্রেনগী অহানবা তাঙ্কক্কী লান্দা ঐখোয়গী প্রধান মন্ত্রীনা য়ু.এস, রুসিয়া অমসুং য়ুক্রেনগী প্রসিদেন্তশিংগা ৱারি শানখি অমসুং ‘ওপরেসন গঙ্গা'গী খুৎথাংদা ঐখোয়না লানফমদগী চাউরাক্না ভারতমচা ২২,৫০০ কনবা ঙমখি। মসি ভারতকী দিপ্লোমেসি, থবক ঙম্বা অমসুং লুচিংবগী গুন অদু উৎথোকপনি।

মহাক্না হায়খি লৈবাক অসিনা য়াংনা চাউখৎলকপা উবা ফংলিবা অসিগী মরুওইবা মরমদি মীয়ামগী মরক্তা অপুনবা অমসুং মরৈবাক নুংশিবা লৈবদগীনি। মখোয়গী হৈনজবা শীনফমশিংদা থবক তৌবা মতমদা মীয়াম্না মখোয়গী থম্মোয়দা লৈবাক্না মাঙথাগদবনি অমসুং মসি লৈবাক অসি চাউখৎপা পুরক্নবগী অমতা ঙাইরবা লম্বীনি।

*****