नवी दिल्ली, 14 सप्टेंबर 2022

संरक्षण मंत्री राजनाथ सिंह आणि त्यांचे  समकक्ष  अमेरिकेचे संरक्षण मंत्री  लॉयड ऑस्टिन यांच्यात आज दूरध्वनीवरून  सौहार्दपूर्ण  आणि फलदायी  चर्चा झाली. यावेळी उभय नेत्यांनी  बहुआयामी भारत-अमेरिका संरक्षण सहकार्याचा आढावा घेतला आणि लष्कर-ते-लष्कर संबंध अधिक दृढ करण्यासाठी परस्पर वचनबद्धतेचा पुनरुच्चार केला.

अमेरिकेचे संरक्षण मंत्री ऑस्टिन यांनी भारताच्या संरक्षण आधुनिकीकरण कार्यक्रमाला पाठिंबा व्यक्त केला आणि भारत-अमेरिका संरक्षण औद्योगिक आणि तंत्रज्ञान सहकार्य आणखी बळकट  करण्यासाठी उत्सुकता दर्शवली.

उभय देशाच्या संरक्षण मंत्र्यांनी  प्रादेशिक मुद्द्यांवरही  चर्चा केली आणि क्षेत्रीय  व  त्यापलीकडील  शांतता आणि स्थैर्य  राखण्याची  त्यांची दृढ  सामायिक इच्छाशक्ती व्यक्त केली.  पाकिस्तानच्या एफ -16 ताफ्यासाठी आधार  पॅकेज देण्याच्या अमेरिकेच्या निर्णयावर भारताच्या वतीने राजनाथ सिंह यांनी  चिंता व्यक्त केल्या.

भारत-अमेरिका धोरणात्मक भागीदारी अधिक दृढ करण्याच्या उद्देशाने दोन्ही देश  आपापली  प्रतिबद्धता कायम  ठेवतील याचा पुनरुच्चार उभय मंत्र्यांनी  केला. 2023 मध्ये आगामी  मंत्रिस्तरीय 2+2 चर्चेसाठी  अमेरिकेचे संरक्षण मंत्री ऑस्टिन यांचे भारतात स्वागत करण्यास उत्सुक असल्याचे संरक्षण मंत्र्यांनी यावेळी सांगितले.

S.Kulkarni /S.Chavan/P.Malandkar

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai