ভারত নেভিনা য়ুম্বু ওইবা ৬শুবা জপান-ইন্দিয়া মেরিতাইম বাইলেতরেল এক্সর্সাইজ(জিমেজ ২০২২) সেপ্তেম্বর ১১, ২০২২দগী বে ওফ বেঙ্গলদা হৌখ্রে।

জপান মেরিতাইম সেল্ফ দিফেন্স ফোর্স(জে এম এস দি এফ)কী জহাজশিং কমান্দার ইস্কোর্ত ফ্লোতিল্লা ফোর, আর. এদমিরেল হিরাতা তোসিয়ুকিনা লুচিংখি অমসুং ভারত নেভিগী জহাজশিং ফ্লেগ ওফিসার কমান্দিং ইস্তর্ন ফ্লিত, আর.এদমিরেল সঞ্জয় ভাল্লানা লুচিংখি।

জে.এম.এস.দি.এফকী জহাজশিং হেলিকোপ্তর কেরিয়র ইজুমো অমসুং গাইদেদ মিসাইল দিস্ত্রোয়র তাকানামিনা বে ওফ বেঙ্গলদা থুংলবদা ভারত নেভিগী জহাজশিংনা ওকখি। ভারত নেভিগী মাইকৈদগী লৈবাক অসিনা মশানা দিজাইন তৌজবা অমসুং শাজবা লানগী জহাজশিং; হিরম কয়াদা শীজিন্নবা য়ারবা স্ত্রিল্থ ফ্রিগেদ সাহ্যদ্রি অমসুং এন্তি-সবমেরিন ৱারফিয়ার কোর্বেত্তস কাদমাত অমসুং কাভারাত্তি শরুক য়াখি। লান ঔরাইবা অদুদা অহেনবা ওইনা, গাইদেদ মিসাইল দিস্ত্রোয়র রনবিজয়, ফ্লিত তেঙ্কর জয়তি, ওফসোর পেত্রোল ভেসেল সুক্যা, সবমেরিনশিং, মিগ-২৯কে ফাইত্তর এয়রক্রাফশিং, লোং রেঞ্জ মেরিতাইম পেত্রোল এয়রক্রাফ অমসুং জহাজদা পুবা হেলিকোপ্তরশিং শরুক য়াখি।

জিমেজ ২২ তাঙ্কক অনি থোক্না পাংথোকখি; সমুদ্র অমসুং ভিসাখাপাতনমগী হিথাংফমদা পাংথোকখি।

হন্দক্কী ইদিসন অসি জিমেজ চহি ১০ মপুংফারকপা থৌরম্নি, মসি জপান্দা ২০১২দা হৌদোকখি। মসি ভারত অমসুং জপানগী মরক্তা দিপ্লোমেতিক্কী মরী লৈনরকপা চহি ৭০ মপুংফারকপগা মপা চান্নরে। লৈমাই, ঈশিং মনুং অমসুং নোংথক্তা অরুবা লান কয়া ঔরাইদুনা লৈবাক অনিগী নেভিশিংগী মরক্তা অৱাংবা থাক্কী মতেং পাংন্নবা জিমেজ ২২না পান্দম থমখি।

*****