ইন্দিয়ন কাউন্সিল ওফ কল্চরেল রিলেসন্স (আই.সি.সি.আর.) অমসুং এম্বেসী ওফ দি রিপব্লিক ওফ এল সালবাদোরনা ইন্দিরা গান্ধী নেস্নেল সেন্তর ফোর আর্তস (আই.জি.এন.সি.এ.)গা খুৎশম্নদুনা এল সালবাদোরদগী মমিং লৈরবা লাইয়েকপা মিস্তর রোদোল্ফো ভিগা ওবীদোগী অয়েকপা লাইশিং উৎপা অয়েকপা লাইগী আর্ত একজিবিসন অমা পাঙথোকখ্রে‍।

একজিবিসন অদু এক্সতর্নেল এফ্যার্স অমসুং কল্চরগী রাজ্য মন্ত্রী মিস মীনাক্সী লেখীনা ঙসি নই দিল্লীদা লৈবা আই.জি.এন.সি.এ.দা মিস্তর রোদোল্ফো ভিগা ওবীদো য়াওনা হৌদোকখ্রে‍।

থৌরমদুদা ৱা ঙাঙলদুনা, শ্রীমতি মীনাক্সী লেখীনা কল্চরেল এক্সচেঞ্জ অমসুং আর্ত অমসুং ক্রাফ্তকী খুত্থাঙদা অমনা অমবু তৌবিমল খঙবা উৎনবনা পুন্সিগী মচৎশিং খঙজিনবদা মতেং পাংই অমদি লৈবাকশিংগী মরক্তা অফবা মরী শেমগৎলি হায়না ফোঙদোকখ্রে‍। মিস্তর রোদোল্ফো ভিগা ওবীদোগী মফমদা তৌবিমল খঙবা উৎলদুনা, মহাক ভারতনা অজাদী কা অমৃথৎ মহোৎসব পাঙথোক্লিঙৈগী নীংশিংনিংঙাই ওইরবা তান্ফম অসিদা ভারত্তা লাক্লি হায়না হায়খি‍।

মমিং লৈরবা আর্তিস্ত মিস্তর রোদোল্ফো ভিগা ওবীদো মাগী কল্চরেলগী থবকশিং অমসুং ফ্রান্স অমদি লেতিন অমেরিকাগী মরক্তা অফবা মরী শেমগৎপগীদমক ফ্রেঞ্চ লৈঙাক্না মনা পীদুনা ইকায়খুম্নবা উৎখ্রবা পেন্তর, ইন্তরিয়র অর্কিতেক্ত অমসুং কল্চরেল এদমিনিস্ত্রেতর অমনি‍।

রোদোল্ফোগী অয়েকপা লাইশিং অসি মাগী তোপ তোপ্পা ৱারীগী ময়ায়দা লৈবা এক্সিস অমগুম্না মথৌ তৌই‍। তরা, লৈঙোই অমসুং উনানচিংবা চেকশিন্না খোমজিনবা তোঙান তোঙানবা মখলগী পোৎলমশিংনা মহাক্কী ৱাখলদা তাবা মমিবু পুথোরক্তুনা নীংথিনা শেম-শারবা মচল শুরবা লাই ওইরকই‍। এক্রাইলিক অমসুং নিওন মচুনা শঙলবা কেনভসশিংনা তেংবানবগী নৎত্রগা লাই-তিনগী ওইবা ময়েকশিং পুনশিন্দুনা এব্সত্রেক্সনগী চিদাইদা লায়থোকহন্দুনা মকা লাম্বা মতৌ উৎলি‍। মসিগা মপা চাননা থম্লিবা মহাক্কী জিওমিত্রিকেল পেত্তর্নশিং, মচু অমসুং তেক্সচরশিংনা মহাক্কী লোলবু ফোঙদোক্লবসু হেক য়েংবদা পুক্নিংদা লাঙতক্নহল্লি‍। মচল অদুদা মুন্না য়েংশিল্লুরগনা আর্কিতেকচর, লাইশঙ, মঙাল মশেক, নুমিৎ, থা অমসুং অতৈ কয়াগী ময়েকশিংগী মরোল মরোল থোরকই‍। মসিনা নুমিৎ নৎত্রগা থাগী খোঙচৎকা লোয়ননা অতিয়াগী মশকপু, য়ুম হায়বসিনা মরুওইবা মচাক অমা ওইরগা, দাইমেন্সন অহুমগী মফম অমদা উৎপগুম তৌরি‍।

মহাক্কী থবকশিং অসি তোঙান তোঙানবা লনাই অমসুং মীয়ামগী কল্লেক্সনশিংগী শরুক্নি অমদি মহাক্না মালেমগী লৈবাক ২০গী মথক্তা মহাক্কী অয়েকপা লাইশিং উৎখ্রে‍। হায়রিবা একজিবিসনশিং অসিগী মরক্তা মেত্জগী পোম্বিদু ম্যুজিয়ম, তেহরান আর্তিস্তিক হাউস, স্পেনিস মিনিস্ত্রী ওফ দিফেন্স, ক্যুবাগী হবানাদা লৈবা গোমেজ পেলেসনচিংবশিং অসি পব্লিক কল্লেক্সনশিংনি‍।

***