ঙসি ভারতকী রাস্ত্রপতি শ্রীমতি দ্রৌপতি মুর্মুনা ভর্চুএল ওইনা প্রধান মন্ত্রী তি.বি মুক্ত ভারত অভিয়ান হৌদোকখ্রে।

থৌরম অদুদা রাস্ত্রপতিনা হায়খি ‘প্রধান মন্ত্রী তি.বি-মুক্ত ভারত অভিয়ান’ মরুওইনা লৌবা হায়বসি নাগরিক খুদিংমক্কী থৌদাংনি অমসুং মসি মীয়ামগী খোঙজং অমা ওইহনগদবনি। ঐখোয়গী লৈবাক্তা লৌনগনবা লায়নাশিংগী মরক্তা মীওই মশিং য়াম্না শিহনবা অসি তি.বিনা ওইরি। ভারত্তা মালেমগী অপুনবা মীশিংগী চাদা ২০ লৈরি, অদুবু মালেমগী অপুনবা তি.বি নারবা মীওইগী চাদা ২৫ হেন্না লৈবাক অসিদা লৈরি। মসি য়াম্না নুংনাংনিঙাই ওইবা ৱাফম্নি। তি.বিনা শোকহল্লবা মীওই অয়াম্বা খুন্নাইগী লায়রবা কাংলুপনি।

রাস্ত্রপতিনা হায়খি ‘অনৌবা ভারত’কী ৱাখল্লোন্দি ভারত অসি মালেমদা মাঙজিল থাবা লৈবাক অমা ওইহনবনি। কোবিদ-১৯ লাইচৎ লাকশিনবদা ভারতনা মালেমদা খুদম অমা ওইরে। অনৌবা ভারতকী থৌশিল অসি মাঙলোমদা চঙশিন্দুনা তি.বি মুৎথৎনবগী মাইকৈদা থাজবা লৈরে। য়ুনাইতেদ নেসন্স স্তেনেবল দিবলপমেন্ত গোলগী মতুংইন্না, ২০৩০ ফাওবগী মনুংদা তি.বি মুৎথৎনবা লৈবাক খুদিংমক পান্দম থম্লে। অদুবু ২০২৫ ফাওবগী মনুংদা তি.বি মুৎথৎনবা ভারত সরকারনা পান্দম থম্লে অমসুং মসি ফংবা ঙম্নবা থবক পায়খৎলে।

রাস্ত্রপতিনা হায়খি খোঙজং অসি মীয়ামগী ইহৌ অমা ওইহন্নবা মীয়ামগী মরক্তা তি.বিগী মরমদা ৱাখল তাহনগদবনি। মসিগী লায়না অসি ঙাকথোকপা ঙম্বা লায়না অমনি হায়না মখোয়দা খঙহনগদবনি। মসিগী লাইয়েংবা ঙম্লে অমসুং ইরাই লাইনা লাইয়েংবা য়ারে অমসুং লায়না অসি ঙাকথোক্নবা অমসুং লাইয়েংনবা সরকারনা লেম্না খুদোংচাবা পীরে। অনাবা মীওই খর নত্ত্রগা কাংলুপ খরদা হৌজিক লায়না অসিগী মতাংদা চিংনবা খর লৈরি অমসুং মখোয়না লাইনা অসি নারে হায়না ফোঙদোকপদা ইকায়বা অমসুং চিংনবা অমা লৈরি। মসিগী অরানবা ৱাখল অসি লৌথোক্কদবনি। মীওই খুদিংমক্কী হকচাংদা তি.বিগী মহিকশিং য়াওরি হায়বসি মীওই খুদিংমক খঙহনগদবনি। মরম কয়াদগী কনাগুম্বা মীওই অমগী লায়না ঙাকথোকপা ঙম্বগী শক্তি অদু শোন্থরকপা মতমদা লায়না অসি মীওই অদুদা নারক্কনি। কনাগুম্বা অমনা লাইয়েংলবা মতুংদা লায়না অসিদগী মপুংফানা ঙাকথোকপা ঙমগনি। হায়রিবা পুম্নমক অসি মীয়ামদা খঙহনগদবনি।
 

তি.বি লাইয়েংবদা মতেং পাংলবা মরী লৈনবা খুদিংমক পুন্না থবক তৌমিন্নবা অমসুং তি.বি মুৎথৎনবা মাইকৈদা লৈবাক অসি খুমাঙচাউশিন্নবা প্রধান মন্ত্রী তি.বি মুক্ত ভারত অভিয়ান্না পান্দম থম্লি।

ভর্চুএল ওইনা পাংথোকপা থৌরম অদুদা হকশেল অমসুং য়াইফ-য়ুম্বালগী কেন্দ্র মন্ত্রী দোক্তর মনসুখ মন্দাবিয়া, হকশেল অমসুং য়াইফ-য়ুম্বালগী রাজ্য মন্ত্রী দোক্তর ভারতি প্রবিন পৱার, রাজ্যশিং অমসুং য়ু.তিশিংগী রাজ্যপালশিং অমসুং লেপ্তনেন্ত গভর্নরশিং, রাজ্য অমসুং জিলা থাক্কী হকশেলগী মীহুৎশিং অমসুং অতোপ্পা মরী লৈনবশিং শরুক য়াখি।

*****