ওজাগী নুমিৎ থৌরমদা প্রধান মন্ত্রী শ্রী নরেন্দ্র মোদীনা অনৌবা থৌরাং অমা-প্রধান মন্ত্রী শ্রী স্কুলস(পি.এম স্কুলস ফোর রাইজিং ইন্দিয়া )লাউথোক্লে। মসি লৈবাক শীনবা থুংনা লৈরিবা স্কুল ১৪০০ হেন্না ফগৎহন্নবা অমসুং চাউখৎহন্নবা কেন্দ্র সরকারনা শেন্থং পুথোকপা অনৌবা স্কিম অমনি। হৌজিক লৈরিবা কেন্দ্র সরকার/রাজ্য/য়ু.তি সরকার/লোকেল বোদিশিংগী স্কুলশিংদগী খনগৎলবা স্কুলশিংদা স্কিম অসি চৎনগনি। প্রধান মন্ত্রী শ্রী স্কুলশিংদা নেসনেল ইজুকেসন পোলিসি-২০২০গী মচাক খুদিংমক থবক ওইনা পাংথোক্কনি অমসুং তমজনফম ওইবা স্কুলশিং ওইনা শেমগৎকনি অমসুং মহৈরোয়শিংগা নক্নবদা লৈবা অতোপ্পা স্কুলশিংদগী খর হেন্না তম্নবা খুদোংচাবশু পীগনি। হায়রিবা স্কুলশিং অসিনা মগুন লৈবা তাকপী-তম্বীবগী থবকশিংগী মথক্তা ২১শুবা চহিচাগী স্কিলশিং লৈহন্দুনা হিরম খুদিংদা মতিক চারবা মীওই অমমম ওইহন্নবা পান্দম থম্লি।

হায়রিবা স্কুলশিং অসিদা চৎনগদৌরিবা লাইরিক তাকপী-তম্বীবগী থবকশিং অদু চাংয়েং তৌবা, অফবা, অপুনবা, শান্নবা/শান্নপোৎতা য়ুম্ফম ওইবা(মরুওইনা অপীকপা অঙাংশিংগী), খঙনিংবা পোকহনবা, অনৌবা পুথোকপদা য়ুম্ফম ওইবা, মহৈরোয়শিং মরুওইনা লৌবা, খন্ন-নৈনবদা য়ুম্ফম ওইবা অমসুং হরাও-তয়াম্বা ওইগনি। ক্লাস খুদিংমক্তা অঙাং খুদিংমক হৈফম থোকপা চাং য়ৌনা হৈহন্নবা মীৎয়েং চঙগনি। ক্লাস খুদিংমক্তা চাংয়েং তৌবা অসি কন্সেপতা য়ুম্ফম ওইগনি অমসুং অশেংবা পুন্সিগী ফিবমশিংদা লৌশিং কয়া য়াম্না শীজিন্নবগে হায়বা য়েংগনি।

হায়রিবা স্কুলশিং অদুদা লেবশিং, স্মার্দ ক্লাসরুমশিং, লাইব্রেরিশিং, শান্ন-খোৎনবগী মচাকশিং অমসুং কলাগী মফম য়াওনা মতমগা চুনরবা অনৌবা মচাক-মথুমশিং লৈহনগনি। স্কুলশিং অদুদা ঈশিং য়োক্তুনা থম্নবা, অমোৎপা রিসাইক্লিং তৌবা, ইনর্জি য়াম্না চঙদবা মচাকশিং অমসুং ওর্গনিক ওইবা পুন্সি মহিংগী মতাংদা করিকুলমদা য়াওহন্দুনা অকোয়গী ফিবম শোকহন্দবা স্কুলশিং ওইনা শেমগৎকনি।

কাংলুপা খুদিংমক কোনশিন্দুনা অমসুং হরাও-তয়াম্বা স্কুলগী ফিবম অমা শেমগৎতুনা হায়রিবা স্কুলশিং অদুনা মখোয় মখোয়গী লমদম অদুদা অফবা মগুন লৈবা ইজুকেসন ফংহনগনি অমসুং তোঙান-তোঙানবা ফিবমদা হিংলিবা অঙাংশিং, লোন কয়াগী দরকার ওইবশিং অমসুং তোঙান-তোঙানবা হৈথোই-শিংথোইবা ফিবমদা লৈরিবা অঙাংশিং চেকশিন্না য়েংশিনগনি অমসুং এন.ই.পি ২০২০গী পান্দম মতুংইন্না মখোয় নিংথিনা লাইরিক তম্বগী থবকশিং শরুক য়াহনগনি।

*****