ওজাগী নুমিৎ লাকপদা ভারতকী রাস্ত্রপতি শ্রীমতি দ্রৌপতি মুর্মুনা লৈবাক শীনবা থুংনা লৈরিবা ওজাশিং তরাম্না ওকখ্রে।

পাউজেল অমদা রাস্ত্রপতিনা হায়খি, “ওজাগী নুমিৎ থৌরমদা ঐখোয়গী লৈবাক্কী ওজা পুম্নমক ঐনা ঐগী য়াইফ-পাউজেল পীজরি।

শক্নাইরবা ওজা-ফিলোসোফর অমসুং ভারতকী হান্নগী রাস্ত্রপতি দোক্তর এস.রাধাকৃষ্ণনগী মপোক নুমিৎতা থৌরম অসি পাংথোকপনি। ঐনা মহাক্কী মফমদা ঐগী ইকায়খুম্নবা উৎচরি। মহৈরোয়শিংদা লৌশিং লৈহনবগী মথক্তা মীওইবগী অফবা মগুনশিং চেলহন্নবা হোৎনরিবা ওজাশিংদা মহাক্না ইথিল অমা পীখি।

অনৌবা থিজিনবা, চাংয়েংশিং অমসুং অনৌবা পুথোকপশিংগী খুৎথাংদা মখোয়গী হৈথোই-শিংথোইবা অমসুং মতিক চাবা হেনগহন্নবা ঐখোয়গী ওজাশিংনা লেপ্তনা হোৎনরি। নেসনেল ইজুকেসন পোলিসি-২০২০গী মখাদা ঐখোয়গী লাইরিক তম্বীবগী থবকশিংদা অহোঙবা পুরক্লে। ঐখোয়গী লাইরিক তম্বীবগী থবকশিংদা ভারতকী কলচরগী ফজবশিং অমসুং লোনশিং য়াওহনবদা থৌশিল অসিনা খুদোংচাবা কয়া পীরি।

তাকপী-তম্বীবগী শীনফম অসিদা অফবা মীওই কয়া চঙলক্কনি হায়না ঐনা থাজবা থম্লি। ঐনা অমুক হন্না ওজা খুদিংমক্তা ঐগী য়াইফ-পাউজেল পীজরি। মখোয়না হোৎনবদগী লৈবাক অসিগী য়াইফনবা থবক তৌনবা থৌরাং তৌরিবা মথৌ মশক খঙবা নাগরিকশিং থোরকপা ঙম্লিবনি।

ইজুকেসনগী লমদা অনৌবা চাউখৎপা অমা পুরকপদা ঐখোয়গী ওজাশিংগী হোৎনবা অসিনা ঐখোয়দা মতেং পাংগনি হায়না ঐনা থাজবা থম্লি”।

*****