ইন্দিয়ন ইন্সতিত্যুৎ ওব তেক্নোলোজীনা লৈবাক অসিগী চাউথোকচফম ওইদুনা লাক্লি হায়না ভারতকী রাস্ত্রপতি শ্রীমতি দ্রৌপদি মুর্মুনা ফোংদোকখ্রে। মহাক্না ঙসি নই দিল্লীদা পাঙথোকখিবা আই.আই.তি. দিল্লীগী দাইমন্দ ফুদোংবগী পালনগী লোইশিনবগী থৌরমদা ৱা ঙাংখি।

রাস্ত্রপতিনা হায়খি মদুদি আই.আই.তি.শিং অসিনা এজুকেসন অমসুং তেক্নোলোজীগী লমদা ভারতকী শক্তি মালেম পুম্বদা তাক্লি। লম্বী অমখক্তদা নত্তনা, আই.আই.তি.গী ৱারী অসি নীংতম্লবা ভারতকী ৱারী অমা ওইরি। আই.আই.তি.শিংনা মালেমগী থাক্তা লৈরিবা ভারতনা কল্লিবা মফমদা অদুক্কী মতীক মতেং পাংলি। আই.আই.তি.গী ফেকলতি অমসুং এলুম্নাইশিংনা ঐখোয়গী ব্রেনপাৱর মালেম পুম্বদা তাকখ্রে। আই.আই.তি. দিল্লী অমসুং অতোপ্পা আই.আই.তি.শিংদা তম্লকপা মীওইশিংগী খরদি মালেম পুম্ববু হুমদুনা পুরিবা দিজিতেল রিভোলুসনগী মাংজিল থারিবা মীওইশিং ওইরি। মসিগী মথক্তা, আই.আই.তি.শিংগী শাফু অসি সাইন্স অমসুং তেক্নোলোগী ৱাংমদসু লৈরি। আই.আই.তি.য়ানশিং অসিনা পুন্সিগী লম্বীশিং হায়বদি এজুকেসন, ইন্দস্ত্রী, ওন্ত্রপ্রিন্যুরশিপ, সিভিল সোসাইতী, এক্তিভিজম, জর্নেলিজম, লিতরেচর, অমসুং পোলিতিক্সতা মাংজিল থাবা লুচিংবশিং ওইরি।

রাস্ত্রপতি অসিনা হায়খি মদুদি আই.আই.তি.শিংগী মরক্তা অশেংবা অমা ওইরিবা আই.আই.তি. দিল্লী অসি ক্লব অসিগী হন্দক্তা নৌনা হাপ্লকখিবা আই.আই.তি. রোপার অমসুং আই.আই.তি. জম্মুগী লমজিংবা ওইরি। অসুম্না আই.আই.তি. দিল্লীনা মালেম পুম্বদা আই.আই.তি.শিংবু এক্সিলেন্সকী ময়াই লোইশঙ অমা ওইনা মশক তাকপদা মতেং চাউনা পাংলি হায়না মহাক্না হায়খি।

রাস্ত্রপতিনা হরাওনা ফোংদোকখি মদুদি আই.আই.তি. দিল্লীনা মতম চুপ্পদা অচৌবা কম্ম্যুনিতী অমা ওইনা শরুক য়ারক্লি অমসুং মসিনা খুন্নাই অসিদা লৌরিবা মাগী থৌদাংদা হেন্না থবক পায়খৎলক্লি। মহাক্না হায়খি মদুদি মসিনা খুন্নাই অসিগী লৌরিবা থৌদাংগী খ্বাইদগী নৌবা খুদম অসি লাইচৎকী হৌরকপা মতমদা উৎখ্রে। ভাইরস অসিবু লাকশিন্নবা হোৎনবদা অচৌবা শীংনবা অমা লাকপদগী, আই.আই.তি. দিল্লীনা মরুওইবা রিসর্চ অমসুং দিবেলপমেন্তকী প্রোজেক্তশিং হৌদোকখি। মসিনা রেপিদ এন্তিজেন তেস্ত কিৎ, পি.পি.ই., এন্তিমাইক্রোবাইয়েল ফেব্রিক, কা হেন্না কান্নবা ফংবা মাইখুম অমসুং মমল নেম্বা ভেন্তিলেতরশিং অমদি অতৈ অতৈ কয়া অমা দিজাইন তৌদুনা পুথোকখি। আই.আই.তি. দিল্লীনা লৈবাক অসিনা কোরোনাভাইরস থেংননবা হোৎনবদা লৌখিবা থৌদাং অসিনা ইঞ্জিনীয়রিং অমসুং তেক্নোলোজী ইন্সতিত্যুসনশিংনা মীয়ামগী হকশেলগী লাংফমদা করি থৌদাং লৌবা য়াবগে হায়বগী খুদম অমা ওইরি।

রাস্ত্রপতিনা হায়খি মদুদি ২০৪৭ ফাওবদা ঐখোয়না নীংতম্বগী চহি চাম্মা শুবগী পালন পাঙথোকপা মতমদা, ঐখোয়গী অকোইবদা লৈরিবা মালেম অসি মরিশুবা ইন্দস্ত্রিএল রিভোলুসননা মরম ওইদুনা অদুক্কী মতীক হোংলগনি। চহি ২৫গী মমাংদা ঐখোয়না হৌজিক লাক্কদবা মালেম অসি ভাপ্না লাম্বা ফংলমদবগুম্না, ঐখোয়না ঙসিসু আর্তিফিসিএল ইন্তেলিজেন্স অমসুং ওতোমেসননা মতৌ করম্না পুন্সি হোংহনবা য়াবগে হায়বদু উবা ঙমদে। মীশিং য়াম্বগা লোইননা, ঐখোয়না অকাই অতোই কয়ানা অনৌবা মহৌশা অমা ওইরক্কদবা তুংগী মতমদা করম্না থেংনগদগে হায়বদু ঐখোয়না মাংজৌননা উনবা হোৎনগদবনি। থবক্কী মতৌসু মপুং ফানা হোংলগনি।

রাস্ত্রপতিনা হায়খি মদুদি করিগুম্বা ঐখোয়না তুংদা থেংনগদবা কয়াদগী ঙাকথোকচনবা খোঙথাংশিং লৌখৎহৌবা তারবদি, ঐখোয়না দিমোগ্রাফিক দিভিদেন্দশিংগী মহৈ চাবা ঙমগনি। ঐখোয়না ইন্সতিত্যুৎশিং অসি তুংদা চুন্নবা ঙম্নবা মওঙদা শেমগদবনি। মসিদা অনৌবা তাকপী-তম্বীবগী মেত্রিক, পেদাগোজী অমসুং তুংলমচৎকা চুন্নবা কন্তেন্তশিং চঙই। মহাক্না থাজবা ফোংদোক্লদুনা হায়খি মদুদি ঐখোয়গী মমিং লৈরবা আই.আই.তি.শিং অসিগা লোইননা, ঐখোয়না হৌগৎলক্লিবা নহাশিংবু শীংনবশিং অসিবু থেংনবা ঙমগদবা তঙাইফদবা লৌশিং কয়া পীবা ঙমগনি।

অইং অশা হোংলকপনা পীরিবা শীংনবশিং অসিবু পল্লদুনা রাস্ত্রপতি অসিনা হায়খি মদুদি মীশিং য়াম্বগা লোইননা চাউখৎলক্লিবা লৈবাক অমা ওইনা, ঐখোয়গী শেন্মিৎলোন চাউখৎনবগীদমক এনর্জী চঙবগী চাং অসি য়াম্না ৱাংই। মরম অসিনা ঐখোয়না ফোসিল ফ্যুলদগী রিন্যুএবল এনর্জীদা মায় ওনশিনবা তাই। মহাক্না হায়খি মদুদি লাক্কদৌরিবা চহিশিং অসিদা, ইনভাইরনমেন্তকা মরী লৈনবা শিংনবা কয়াগী তেক্নোলোজীগা মরী লৈনবা ৱারোইশিন কয়া মালেম্না খৌরাংনা থিনরিবা অসিদা, ভারতকী নহা ওইরিবা ইঞ্জিনিয়র অমসুং সাইন্তিস্তশিংনা মীওইবা খুন্নাইনা হীরমশিং অসিগা মরী লৈনবা ৱারোইশিন মায় পাক্না পুরকপা ঙমগনি হায়বগী থাজবা লৈ হায়না মহাক্না ফোংদোকখি।

থৌরম অদুদা ৱা ঙাংলদুনা শ্রী প্রধাননা রাস্ত্রপতি শ্রীমতি দ্রৌপদি মুর্মুবু মহাক্কী লমজিং লমতাকশিংগীদমক থাগৎপা ফোংদোকচখি। মসিনা ঐখোয়গী এজুকেসনগী ফ্রেতর্নিতীবু অমৃতকালগী পান্দম ফংনবা হোৎনবদা ইথিল পীরগনি হায়না মহাক্না ফোংদোকখি। নিবত্রী অসিনা আই.আই.তি. দিল্লীবু মসিগী লংলবা চহি ৬০গী খোঙচৎ অসিগীদমক থাগৎপা অমসুং হরাওবা ফোংদোকখি। মসিনা লৈবাক্কী চাউখৎপদা মরুওইবা থৌদাং লৌরি হায়না মহাক্না মখা তাখি।

শ্রী প্রধান্না হায়খি মদুদি রিসর্চ অমসুং ইন্নোবেসন পার্ক ঙসি শঙ্গাবা অসিনা আই.আই.তি. দিল্লীদা আর. এন্দ দি.গী খুন্নাই অসিদা পীরিবা শাফু হেনগৎহনবদা খোঙজেল য়াঙখৎহল্লগনি।

মহাক্না মখা তারদুনা হায়খি মদুদি ঙসি চাউখৎলবা লৈবাক কয়ানা মখোয়গী লৈবাকশিংদা আই.আই.তি.গী কেম্পসশিং হাংদোকপা অমসুং য়ুম্বু ওইবা পাম্নরকপা হায়বসি য়াম্না চাউথোকচনিংঙাইনি। মসিমক ঐখোয়গী আই.আই.তি.শিংগী চাউথোকচনিংঙাই ওইরবা শক্তি, পাঙ্গল, অমসুং মগুন তাক্লি হায়না মহাক্না ফোংদোকখি। মন্ত্রী অসিনা পনখি মদুদি ঙসিগী ভারতনা চাউখৎপগী লম্বীদা ইন্নোবেসননা লমজিংদুনা পুরি। মসিনা মালেমদা খ্বাইদগী য়াম্বা দিজিতেল ত্রাঞ্জেক্সনশিং তিএল তাইম ওইনা তৌবসু তাক্লি। লমদম অসিদা পুথোকচবা ৫জি অসিনসু মখা তানা ভারত্তা দিজিতেল রিভোলুসন অমা পুরকপা ঙম্লগনি। ঐখোয়গী আই.আই.তি.শিং অসিনা অনৌবা শেন্মিৎলোনগী ময়োল লম ওইরি। মখোয়না মখোয়গী থৌদাং অসি নৌনা লৌশিনগদবনি হায়না মহাক্না ফোঙদোকখি।

মহাক্না পুক্নিং চিংশিল্লদুনা হায়খি মদুদি আই.আই.তি. দিল্লীনা ভারতপু ইন্দস্ত্রী ৪.০গী মাংজিল থাবা ঙম্নবা হোৎনগদবনি। মখোয়না মহৈরোইশিংবু তুংগী শীংনবশিং থেংনবা ঙম্নবা পাম্বৈ পীগদবনি অমসুং মসিগী মথক্তা মালেমগী মাঙদা থৌদাং লৌবা ঙম্নবা হোৎনগদবনি হায়না মহাক্না হায়খি।

শ্রী প্রধান্না আই.আই.তি. দিল্লীনা ঐখোয়গী 'গনতন্ত্রগী লাইশঙ'গী লৌশিংগী মপাং ওইদুনা লাক্লিবা অসিবু শিংথাখি। মহাক্না মখা তানা হায়খি মদুদি ঐখোয়না একাদেমিয়া, ইন্দস্ত্রী অমসুং পোলিসী মেকরশিংবু ২১শুবা চহি চাগী মঙলানশিং মপাঙ্গল কনখৎনবা হোৎনগদবনি অমসুং ভারতপু মালেমদা খ্বাইদগী মকোক্তা লৈবা শেন্মিৎলোন ওইহন্নবা হোৎনগদবনি।

শ্রী প্রধান্না প্রধান মন্ত্রী শ্রী নরেন্দ্র মোদীনা হৌদোকচবা 'পঞ্চ প্রান'না ভারতপু ২০৪৭ ফাওবদা চাউখৎলবা লৈবাক অমা ওইনবা অমসুং ঐখোয়গী একাদেমিক ইন্সতিত্যুৎশিংগী তুংলমচৎ অমা শাগৎনবা হোৎনগদবনি হায়না আপিল তৌখি। মহাক্না আই.আই.তি.শিংবু শীংনবশিং অসি লৌশিন্দুনা হেন্না চাউবা ৱারেপ অমগা লোইননা লৈবাক্কী পান্দমশিং মঙফাওননবা মাংজিল থানা চঙশিনগদবনি হায়না পুক্নিং চিংশিনখি।

***************

(রিলিজ আই.দি.: 1856566) ভিজিতর কাউন্তর : 169