ইন্দিয়ন ইন্সতিত্যুত ওফ তেক্নোলোজীনা ঐখোয়গী লৈবাকপু চাউথোকচহল্লি হায়না ভারতকী রাস্ত্রপতি, শ্রীমতি দ্রৌপদি মুর্মুনা হায়খ্রে। মহাক্না ঙসি আই.আই.তি. দিল্লীদা ঙসি (সেপতেম্বর ৩, ২০২২) পাংথোকখিবা দাইমন্দ জুবিলী লোইশিনবগী থৌরমদা ৱা ঙাঙখিবনি।

এজুকেসন অমসুং তেক্নোলোজীগী দোমেন্দা আই.আই.তি.শিংনা ভারতকী মতিকপু মালেমদা উৎলে হায়না রাস্ত্রপতিনা হায়খি। আই.আই.তি.গী ৱারীনা  হীরম অমা খক্তদা নত্তনা ভারতকী নীংতম্বগী ৱারী ওইরি। ভারতনা ঙসি মালেমগী থাক্তা হেন্না ফগৎলবা মফমদা লেপ্পা ঙম্লিবসিদা আই.আই.তি.শিংগী শরুক য়াওরি। আই.আই.তি.শিংগী ফেকলতী অমসুং এলম্নাইশিংনা মালেমদা ঐখোয়গী ব্রেনপাৱর খঙহল্লি। আই.আই.তি. দিল্লী অমসুং অতোপ্পা আই.আই.তি.শিংদা তমখিবশিংজ্ঞী মরক্তগী খরনা মালেম শিনবা থুংবগী দিজিতেল ইহৌবু মাংজিল থানা লুচিংলি। মসিদা নত্তনা, আই.আই.তি.য়নশিংগী শাফুনা সাইন্স অমসুং তেক্নোলোজী ৱাংমা লান্না পীরি। মখোয়না পুন্সিগী খোঙচৎ খুদিং – এজুকেসন, ইন্দস্ত্রী, ওন্তোপ্রিনর্শিপ, সিভিল সোসাইতী, এক্তিবিজম, জর্নেলিজম, লিতরেচর অসুং রাজনিতীদা মকোক থোংলি।

আই.আই.তি. দিল্লীনা খ্বাইদগী অহানবা আই.আই.তি.শিংগী মরক্তা অমা ওইদুনা ক্লব অসিদা খ্বাইদগী নৌনা য়াওরক্লিবা আই.আই.তি. রোপার অমসুং আই.আই.তি. জম্মুবু লমজিং লমতাকপীরি হায়না রাস্ত্রপতিনা ফোংদোকখি। মতৌ অসুম্না, আই.আই.তি. দিল্লীনা আই.আই.তি.শিংবু মালেম শিনবা থুংবগী সেন্তর ওফ এক্সেলেন্স অমা ওইবগী শক্তাক্তা মশক থোক্না তেংবাংলি হায়না মহাক্না হায়খি।

আই.আই.তি. দিল্লীনা হেন্না চাউবা খুন্নাইগী শরুক অমা ওইনা মশাবু উজবা অমসুং খুন্নাইদা লৈরিবা মখোয়গী মথৌদাংবু নীংথিনা খঙবসিদা য়াম্না নুংঙাইবা ফাওই হায়না রাস্ত্রপতিনা হায়খি। মখোয়না খুন্নাইগীদমক্তা খনবগী খ্বাইদগী নৌবা খুদমদি ঐখোয়না হন্দক্কী লাইচৎকী অহৌবা ফেজতা উবা ফংখি। ভাইরস লাকশিন্নবা হোৎননবা থোক্লক্তুনা আই.আই.তি. দিল্লীনা মরু ওইরবা রিসর্চ অমসুং দিভেলপমেন্ত প্রোজেক্ত কয়া পায়খৎখি। মখোয়না অতোপ্পা পোত্থোক কয়াগী মরক্তগী রেপিদ এন্তিজেন তেস্ত, পি.পি.ই., এন্তিমাইক্রোবিএল ফেব্রিক, হাই ইফিসিএন্সী ফেস মাস্ক অমসুং শেল তাঙদবা ভেন্তিলেতরশিং শেম-শাখি। আই.আই.তি. দিল্লীনা ভারতনা কোরোনা থেংনবগী লান্থেংদা ইঞ্জিনিয়রিং অমসুং তেক্নোলোজীগী ইন্সতিত্যুসন অমনা মীয়ামগী হকশেলগা মরী লৈনবা ইরাংদা তেংবাংবা ঙম্মি হায়বা উৎখি।

ঐখোয়না লৈবাক্কী নীংতম্বগী চহি ১০০ মপুং ফাবগী নুংঙাইবা ফোংদোকপগী চহি, ইং ২০৪৭তদি মরিশুবা ইন্দস্ত্রীএল রিভোল্যুসন্না মরম ওইরগা মালেম অসিনা য়াম্না চাউনা হোংলগনি হায়না রাস্ত্রপতিনা হায়খি। হৌজিক্কী মতমগী মালেম্না করম্বা মতৌ ওইগনি হায়বা ঐখোয়না চহি ২৫গী মমাংদা খঙলদবগুম্না, আর্তিফিসিএল ইন্তেল্লিজেন্স অমসুং ওতোমেসন্না ঐখোয়গী পুন্সিবু মতৌ করম্না অমুক্কা হোংহনগনি হায়বা ঐখোয়না খঙবা ঙমদ্রি। ঐখোয়গী মশিং য়াম্বা মীশিং অসি য়েংলুরগদি, অপনবা-অয়েৎপা পীবনা অনৌবা নোর্মেল ওইগদৌরিবা তুংগী মতমগী শাফুশিংগা মাইয়োক্নবা ঙম্নবা মিৎয়েং লৈবা অমসুং থৌরাং য়াৎপগী তঙাই ফদবা লৈ। থবক তৌবগী মতৌসু মপুং ফানা হোংলগনি।

ঐখোয়না তুংগী মতমগী শিংনবশিংদগী ঙাকথোক্নবা থৌরাং লৌখৎকে হায়রবদি, ঐখোয়না মতিক লৈরবা দেমোগ্রাফিক দিভিদেন্তকী কান্নবা লৌবা তাবনি হায়না রাস্ত্রপতিনা হায়খি। ঐখোয়না ইন্সতিত্যুসনশিংবু তুংগী মতমগা চুনবা ঙহন্নবা শেম্ব-শাবা তাবনি। মসিদা তুংগী মতমগা অখন্ননা শেম-শাবা তাকপা-তম্বগী অনৌবা মেত্রিক্স, অনৌবা পেদাগোজী অমসুং কন্তেন্তকী মথৌ তাগনি। ঐখোয়না ঐখোয়গী মমিং চৎলবা আই.আই.তি.শিংগী মতেংদগী নহা ওইরিবা চারোন শুরোনশিংবু হায়রিবা শিংনবশিং অসি মাইয়োক্নবা ঙম্নবা তঙাই ফদবা লৌশিংগী ফম্বাক অমসুং চুনবা স্কিল পীদুনা শেম্বী-শাবীবা ঙমগনি হায়না মহাক্না মখা তাখি।

রাস্ত্রপতিনা অইং-অশা হোংবগী ফিভম্না অচৌবা শিংনবা অমা ওইহল্লি হায়না পল্লদুনা, মীশিং য়াম্বা চাউখৎলক্লিবা লৈবাক অমা ওইবনিনা, ঐখোয়গী শেন্মিৎলোনগী শাহৌ লৌবদা মথৌ তাবা ইনর্জী তঙাই ফদবগী চাং য়াম্না ৱাংই হায়না ফোংদোকখি। মরম অদুনা, ঐখোয়না ফোসিল ফুএলদগী রিন্যুএবল ইনর্জীদা হোংদোকপগী তঙাই ফদবা লৈ। লাক্কদৌরিবা চহিশিং অসিদা, ইনভাইরনমেন্তকা মরী লৈনবা শিংনবা কয়াগী তেক্নোলোজীগা মরী লৈনবা ৱারোইশিন কয়া মালেম্না খৌরাংনা থিনরিবা অসিদা, ভারতকী নহা ওইরিবা ইঞ্জিনিয়র অমসুং সাইন্তিস্তশিংনা মীওইবা খুন্নাইনা হীরমশিং অসিগা মরী লৈনবা ৱারোইশিন মায় পাক্না পুরকপা ঙমগনি হায়বগী থাজবা লৈ হায়না মহাক্না ফোংদোকখি।

রাস্ত্রপতিগী মপুং ফাবা ৱারোল পানবগীদমক্তা মফমসিদা ক্লিক তৌবীয়ু

***