পুৱারী ওইরবা থৌরম অসিদা শরুক য়াবিরিবা কেরলাগী রাজ্যপাল, শ্রী আরিফ মোহম্মদ খান, মুখ্য মন্ত্রী, শ্রী পিনারাই বিজয়ন, লৈবাক অসিগী ঙাকশেল মন্ত্রী, শ্রী রাজনাথ সিংহ, কেন্দ্রগী মন্ত্রী মন্দলগী অতোপ্পা মরুপশিং, চীফ ওফ নেবেল স্তাফ, এদমিরেল শ্রী আর. হরি কুমার, কোচিন শিপয়ার্দকী এম.দি., মশক নাইবা অমসুং অথোইবা মীথুংলেনশিং অমসুং ঐহাক্কী নুংশিরবা ইরৈবাকচাশিং!

ঙসি কেরলদাগী সমুদ্র খোঙবান অসিদা ভারত, ভারত মচা খুদিংমক্না অনৌবা তুংলমচৎকী মঙাল অমা উবা ফংলি। আই.এন.এস. বিক্রান্তগী মতাংদা পাঙথোক্লিবা থৌরম অসি মালেমগী থাক্তা ভারতকী হেনগৎলক্লিবা থৌনা-লিংজেলবু ইকাই খুম্নবা উৎপনি। ঙসি ঐখোয়না নীংতম লান্মীশিংনা খঞ্জরম্বা মতিক ময়াই লৈবা অমসুং মপাঙ্গল কনবা ভারত অমগী মঙলান অদু মঙফাওনবা উবা ফংলি।

বিক্রান্ত অসি পাকচাউই। বিক্রান্ত অসি তোপ-তোপ্পি, বিক্রান্ত অসি অখননৈ। বিক্রান্ত অসি শুপ্নগী ৱারশিপ অমা খক্তা নত্তে। মসি ২১শুবা চহিচাগী হোৎনবা কনবা, হৈশিংবা, হোংলক্লিবা অহোংবশিং অমসুং অচেৎপা ফিরেপকী খুদম অমনি। করিগুম্বা পান্দমশিং অদু লাপ্না লৈরবা, খোঙচৎশিং অদু শাংলবা, সমুদ্র অমসুং শীংনবশিংনা লোইনাইদ্রবদি – ভারতকী পাউখুম অসি বিক্রান্তনি। আজাদী কা অমৃত মহোৎসবকী চাংদম্নবা য়াদ্রা অমৃত অদুদি বিক্রান্তনি। বিক্রান্ত অসি ভারতনা আত্মনির্ভর ওইবগী অখন্নবা মমি অমনি। মসিগীদমক ঐহাক্না ইরৈচা খুদিংমক্তা নুংঙাইবা ফোঙদোকচরি।

মরুপশিং,

পান্দমশিং অদুনা ফনা অৱাবা ওইরবসু, শীংনবশিং অদুনা ফনা চাউরবসু ভারতনা ফিরেপ চেৎনা লেপ্পবা মতমদা ওইথোকপা ঙমলোইদবা পান্দম অমত্তা লৈতে। ঙসি ভারতনা অসিগুম্বা ইন্দিজিনস তেক্নোলোজীগা লোয়ননা অচৌবা এয়রক্রাফ কেরিয়র শারিবা মালেমগী লৈবাকশিংগী মরক্তা চনবা ঙমখি। ঙসি আই.এন.এস. বিক্রান্তনা লৈবাক অসিবু অনৌবা থাজবনা থলহনখি, অমসুং লৈবাক অসিদা অনৌবা থাজবা অমা পোকহনখি। ঙসি বিক্রান্ত উবাদা সমুদ্রগী ইথক-ইপোমশিংনা হায়রি-

অমৃর্ত্য বীর পুত্র হো, দ্ধর প্রতিজ্ঞ সোচ লো,

প্রশস্ত পুরন পন্থ হে, বরে চলো, বরে চলো।

মরুপশিং,

পুৱারী ওইরবা থৌরম অসিদা ঐহাক্না ইন্দিয়ন নভী, কোচিন শিপয়ার্দকী ইঞ্জিনীয়রশিং, বিজ্ঞানিকশিং অমসুং কোচিন শিপয়ার্দকী শিন্মী ইচিল-ইনাওশিং, মঙলান অসিবু মঙফাওনবা ঙমখিহনবশিংদা থাগৎপা ফোঙদোকচরি। ওনামগী কুহ্মৈ পাঙথোক্লিঙৈ মতমদা কেরলাগী শেংলবা লমদম অসিদা লৈবাক অসিনা মাইপাকপা ঙমখি। ঐহাক্না কুহ্মৈ অসিনা লাকপদা ইরৈবাকচা পুম্নমক্তা ওনমগী য়াইফ-পাউজেল পীজরি।

মরুপশিং,

আই.এন.এস. বিক্রান্তগী শরুক খুদিংমক্কী মশাগী ওইবা কান্নবশিং, পাঙ্গল, চাউখৎ খোঙচৎ লৈজৈ। মসি ইন্দিজিনসকী মতিক-ময়াই, ইন্দিজিনেসকী রিসোর্সশিং অমসুং ইন্দিজিনস স্কিলশিংগী খুদম অমনি। মাগী এয়রবেসতা ইনস্তোল তৌরিবা স্তীল অসি ইন্দিজিনস ওই, মসি দি.আর.দি.ও.গী বিজ্ঞানিকশিংনা দিবেলপ তৌখি অমসুং ভারতকী কম্পনীশিংনা পুথোকখি। 

মসি ৱারশিপ অমা ওইবা খক্তা নত্তনা ঈশিংদা তাউদুনা লৈবা এয়রফিল্দ, ঈশিংদা তাউদুনা লৈবা সহর অমনি। মসিদগী পুথোকপা ইলেক্ত্রিসিতী অসিনা য়ুমথোং ৫০০০দা মৈ মরাং কাইনা পীবা ঙম্বগনি। মাগী ফ্লাইৎ দেক অসিসু ফুতবোলগী লম্পাক অনিগা চাউবা মান্নৈ। বিক্রান্তদা শীজিন্নরিবা তরা অসিনা কোচীদগী কাশী য়ৌগনি। মসিগী কমপ্লেক্সিতী অসিনা ঐখোয়গী ইঞ্জিনীয়রগী তৌবা ঙম্বা অদু উৎলি। মেগা-ইঞ্জিনীয়রিংদগী নেনো সর্কিৎ ফাওবা মমাংদা ভারতকীদমক ৱাখলনা লাম্বা ফংদবা কয়া মঙফাওনবা ঙমহনখি।

মরুপশিং,

হন্দক্কী নীংতম নুমিৎতা ঐহাক্না লাল কিলাগী লানবন্দগী লাউথোকখিবা পঞ্চ প্রনশিংগী মতাংদা ফোঙদোকখি অমসুং ঐখোয়গী হরিজীনসু হৌজিক্তা পনবীখ্রি। অহানবা ৱাশক অসি চাউখৎপা ভারত অমগী অচৌবা ফিরেপ! অনিশুবা ৱাশক্না মীখা পোনবগী ৱাখল্লোন অদু মপুং ফানা মুত্থৎপনি। অহুমশুবা ৱাশক অসিনা অদোমগী হেরিতেজকীদমক চাউথোকচবা পোকপা। মরিশুবা অমসুং মঙা শুবা ৱাশক্না – অপুনবগী শক্তম, অমত্তা ওইনা লেপ্পা অমসুং থৌদাং পাঙথোকপনি! ঐখোয়না পঞ্চ প্রনশিং অসিগী ইনর্জী অদু আই.এন.এস. বিক্রান্ত শাবা অমসুং মাগী খোঙচৎতা উবা ফংখি। আই.এন.এস. বিক্রান্ত অসি হিংদুনা লৈরিবা অপুনবা খুদম অমনি। ঙসি ভারতনা লীগ অসিদা য়াওশিন্দুনা চাউখৎপা জাতি অমগী মাইকৈদা অতোপ্পা অচৌবা খোঙথাং অমা লৌখি।

মরুপশিং,

ভারতনা ৱাতর ত্রান্সপোর্তকী লমদা য়াম্না অচৌবা পুৱারী লৈজৈ, ঐখোয়গী মমল য়াম্লবা হেরিতেজ লৈজৈ। হী অমসুং জহাজশিংগা মরী লৈণবা স্লোকশিং ঐখোয়দা তাকপীরমখি-

দীর্ঘিকা তরনি: লোলা, গত্বরা গামিনী তরি:।

জনঘালা প্লাবিনী চেব, ধারিনী বেগিনী তথা।।

মসি ঐখোয়গী শাস্ত্রশিংদা শন্দোক্না য়াওরমখি। দীর্ঘিকা, তরনি লোলা, গত্বরা, গামিনী, জনঘালা, প্পাবিনী, ধারিনী, বেগিনী…ঐখোয়গী হী অমসুং জহাজকী সাইজ অমসুং মখল কয়া লৈ। হী অমসুং জহাজ অমসুং সমুদ্রগা মরী লৈনবা মন্ত্র কয়া ঐখোয়গী বেদশিংদসু য়াওই। বেদিক মতমদগী গুপ্তগী মতম  অমসুং মৌর্য় মতম ফাওবা ভারতকী মেরিতাইমগী শক্তি অসি মালেম শিনবা থুংবনা খঙলি। ছত্রপতি ভীর শিবাজী মহারাজনা সমুদ্রগী শক্তিগী মপাঙ্গল শীজিন্নদুনা অসিগুম্বা নেভী শাখি, মসিনা য়েকনবশিংদা অকিবা পোকহনখি।।

ব্রিতিশনা ভারত্তা লাকপা মতমদা ভারতকী জহাজশিংগী শক্তিদা অকিপা পোকখি অমসুং মখোয়গী খুত্থাংদা ললোন-ইতিক তৌখি। মখোয়না ভারতকী মেরিতাইম শক্তি অসিবু মাইথিবা পীনবা ৱারেপ লৌখি। মতম অদুদা ব্রিতিশ পার্লিয়ামেন্তদা আইন শেমদুনা ভারতকী জহাজ অমসুং ললোন-ইতিক তৌবা মীওইশিংদা অকনবা অথীংবশিং থমখিবা পুৱারীনা উবা ফংখি।

ভারতকী হৈশিংবা, এক্সপরিয়েন্স লৈজৈ। অদুবু ঐখোয়গী মীয়াম অসি ফত্তবা লাং অসিগীদমক শেম-শাহৌদে। ঐখোয়না শোন্থরকখি অমসুং তপ্না-তপ্না মীখা পোল্লিঙৈ মতমদা ঐখোয়গী পাঙ্গল শক্তি অদু কাউথোরকখি। হৌজিক অমৃত কাল অসিদা ভারতনা মাংলুরবা শক্তি অদু হিংগৎহল্লি, নৌহৌনা থৌনা হাপলি।

মরুপশিং,

ঙসি সেপ্তেম্বর ২, ২০২২গী পুৱারী ওইরবা নুমিৎ অসিদা পুৱারীবু হোংদোকপা ঙম্বা থৌদোক অমা থোক্লি। ঙসি ভারতনা মীখা পোনবগী মমি, মীখা পোনবগী পোৎলুম অদু কোকহনবা ঙমখি। ঙসিদগী ইন্দিয়ন নেভীনা অনৌবা ফিরাল অমা ফংজখি। ঙসি ফাওবদা মীখা পোনবগী শক্তম অদু ইন্দিয়ন নেভীগী ফিরালদা মমি তাদুনা লৈরকখি। অদুবু ঙসিদগীদি ছত্রপতি শিবাজীনা ইথিল পীখিবা অনৌবা নেভীগী ফিরাল অসি সমুদ্র অমসুং আতিয়াদা পাইহল্লগনি।

কবী রামধারী সিংহ দিনকরজীনা মহাক্কী শৈরেংদা অসুম্না ইরমখি -

নবীন সুর্য় কী নই প্রভা, নমো,নমো, নমো!

নমো স্বতন্ত্র ভারত কী ধ্বজা, নমো, নমো, নমো!

ঙসি ফিরালবু ইকাই খুম্নবা উৎপা অসিগা লোয়ননা অনৌবা ফিরাল অসি ফাদর ওফ নেভী হায়না খঙনরিবা ছত্রপতি ভীর শিবাজী মহারাজতা কত্থোকচরি। ঐহাক্না থাজৈ, ইন্দিয়ননেসকী ৱাখল্লোন য়াওবা অনৌবা ফিরাল অসিনা ইন্দিয়ন নেভীদা ইশা থাজবা অমসুং ইশাবু ইকাই খুম্নবা ফংহল্লগনি।

মরুপশিং,

ঐহাক্না ইরৈবাকচা পুম্নমক্কী মাংদা ঐখোয়গী ফোর্সশিং করম্না হোংলক্লি হায়বা মরু ওইবা ৱাফম অমগা থমজনীংই। বিক্রান্তনা ঐখোয়গী মেরিতাইম জোনদা ঙাকশেন্নবা চৎখিবা মতমদা নেভীগী নুপী লান্মী কয়া মসিদা স্তেসন তৌগনি। সমুদ্রগী চাউরবা শক্তি, লোইনাইদ্রবা নারী শক্তি অসিগা লোয়ননা মসিনা অনৌবা ভারতকী অৱাংবা পুক্নিং হুনিংঙাই ওইবা মশক অমা ওইরক্লি।

হৌজিক নেভীদা নুপী ওফিসর ৬০০ য়াওরি হায়না ঐঙোন্দা তাকপীরি। অদুবু হৌজিক ইন্দিয়ন নেভীনা নুপীশিংগীদমক মাগী ব্রাঞ্চ পুম্নমক হাংদোক্নবা ৱারেপ লৌখি। থমলমখিবা অথিংবশিং অদু হৌজিক্তি লৌথোক্লে। ইপোমগী ঙমখৈশিং লৈতবা অদুগুম্বা ভারতকী মচানুপীশিংগীদমক ঙমখৈশিং নত্ত্রগা অথিংবশিং লৈররোই।

চহি অমা নত্ত্রগা অনিগী মমাংদা নুপী ওফিসরশিং অসি তারিনী বোত অমগা লোয়ননা পৃথিবী পুম্বা কোইখি। তুংদসু অসিগুম্বা থৌওং অসি পাঙথোক্নবা ইচানুপী কয়া থৌরক্কনি, মখোয়না মালেমদা মখোয়গী শক্তিগী মরমদা খঙহনগনি। নেভীগুম্না নুপীশিংবু আর্মদ ফোর্স অহুমগী কোম্বেৎ রোলশিংদা ইনদক্ত তৌরি, মখোয়গীদমক অনৌবা থৌদাংশিং পীরি।

মরুপশিং,

আত্মনির্ভর অমসুং নীংতম্বা অসি অমনা অমগী মতেং পাংনৈ। লৈবাক অমনা অতোপ্পা লৈবাক অমগী মপাল হেন্না তংলবদি মসিনা হেন্না অৱাবা পীগনি। লৈবাক অমনা হেন্না আত্মনির্ভর ওইরবদি হেন্না শক্তি লৈগনি। কোরোনাগী মতমদা ঐখোয়না আত্মনির্ভরগী শক্তি অদু উবা ফংখি, খঙখি অমসুং ফাওখি। ঙসি ভারতনা আত্মনির্ভর ওইহন্নবা মপুং ফাবা শক্তিগা লোয়ননা থবক তৌরি।

ঙসি আই.এন.এস. বিক্রান্তনা ভারতকী মতিক-ময়াই অদু অচৌবা ইপাক্তা উৎনবা শেম সাদুনা লৈরে খঙহল্লি, ঐখোয়গী তেজাসনা পনখৈ লৈত্রবা আতিয়াদা চপ মান্ননা খুমাং চাউশিল্লি। হন্দক্কী ওগস্ত ১৫দা লৈবাক শিনবা থুংবনা লমদম অসিদা শাজবা কেননগী মখোল লাল কিলাদগী তাবা ফংখি। ভারতনা নীংতম্বা ফংখিবগী চহু ৭৫গী মতুংদা আর্মীশিংদা রিফোর্ম পুরক্তুনা মাগী ফোর্সশিং অসি লেপ্পা লৈতনা মোদর্নাইজ তৌরি, আত্মনির্ভর ওইহল্লি।

ঐখোয়গী ফোর্সশিংনা লমদম অসিগী কম্পনীশিংদগী খক্তা লৈগদবা অদুগুম্বা ইক্বিপমেন্তগী অশাংবা লিস্ত শেমখি। বজেৎকী চাদা ২৫দি দিফেন্স সেক্তরদা রিসর্চ অমসুং দিবেলপমেন্তগীদমক লৈবাক অসিগী য়ুনিভর্সিতীশিং অমসুং কম্পনীদা পীনবা খাক্তুনা থমখি। উত্তর প্রদেশ অমসুং তামিল নাদুদা দিফেন্স কোরিদোরশিং লিংখৎখি। দিফেন্স সেক্তরদা আত্মনির্ভর ওইনবা পাইখৎখিবা খোঙথাংশিং অসিগা লোয়ননা লৈবাক অসিদা অনৌবা খুদোংচাবশিং লাক্লি।

মরুপশিং,

লাল কিলাদগী ঐহাক্না সিভিক দ্যুতীগী মরমদসু ৱা ঙাংখি। ঐহাক্না মদু অমুক হন্না থমজগে। ঈশিং মরিক অমমমনা অচৌবা ইপাক অমা শেম্মি। মতৌ অসুম্না করিগুম্বা ভারতকী প্রজা খুদিংমক্না ‘ভোকেল ফোর লোকেল’গী মন্ত্রগা লোয়ননা হিংবা তারবদি মসিনা লৈবাক অসিবু আত্মনির্ভর ওইহনবদা মতম য়াম্না চংলোই। ইরৈবাকচা পুম্নমক্না ভোকেল ফোর লোকেলগীদমক লেপ্পবদি মসিগী খোঞ্জেল অসি ভারত খক্তদা নত্তনা মালেম পুম্বনা তাবা ফংগনি অমসুং মালেমগী মেন্যুফেকচর্রশিংবু উরগা মখোয়না ভারত্তা লাকপা তাগনি অমসুং মেন্যুফেকচরিংগী লম্বীদা চৎকনি।

মরুপশিং,

ঙসি মালেমগী ফীভম অসি হোংলক্লি মসিনা মালেমবু মলতি-পোলর ওইহল্লি। মরম অসিনা তুংলমচৎকী থবক-থৌরমশিংগী সেন্তর ওইনবা বিজন অমা য়াম্না মরু ওই। খুদম ওপইনা ইন্দো-পেসিফিক রিজন অমসুং ইন্দিয়ন ওসিনগী সেক্যুরিতী অসি মতম শাংনা নাথৈদুনা থমলকখি। অদুবু ঙসিদি লম অসি ঐখোয়গী পুম্নমক্কীদমক লৈবাক অসিগী মরু ওইবা দিফেন্সকী লম ওইরে। মরম অসিনা ঐখোয়না নেভীগী বজেৎ হেনগৎহনবদগী হৌরগা মখোয়গী মতিক ময়াই হেনগৎহন্নবা লম খুদিংমক্তা থবক তৌরি।

ওফশোর পেত্রোল ভেসেলশিং ওইরবসু, সবমেরিনশিং ওইরবসু, নত্ত্রগা এয়রক্রাফ কেরিয়রশিং ওইরবসু ঙসি ভারতকী নেভীগী মপাঙ্গল অসি অমুক্তা ওইখিদ্রিবা মওংদা খুমাং চাউশিল্লি। মসিনা তুংদা ঐখোয়গী নেভীগী মপাঙ্গল কনখৎকনি। হেন্না সেক্যুর ওইবা ‘সি-লেন্স’কা লোয়ননা হেন্না নীংথিনা য়েংশিনবা অমসুং ঙাকথোকপা ঙমগনি। ঐখোয়গী এক্সপোর্তশিং, মেরিতাইম ত্রেদ অমসুং মেরিতাইল প্রদক্সন হেনগৎলক্কনি। মসিনা ভারত খক্তা নত্তনা মালেমগী অতোপ্পা লৈবাকশিংগীদমক মরু ওইনা ঐখোয়গী য়ুমলোন্নরিবা এলীশিংগীদমক্তা ললোন-ইতিক অমসুং চাউখৎ-থৌরাংগী অনৌবা এভেন্যুশিং হাংলগনি ।

মরুপশিং,

ঐখোয়গী শাস্ত্রশিংদা অসুম্না হায় অমসুং মসি য়াম্না মরু ওইবা ৱাফমনি -

বিদ্ধা বিবাদায় ধন মদায়, শক্তি: পরেসা পরিপীদনায়।

খলস্য সাধো: বিপরীতম এতদ, জ্ঞানায় দানায় চ রক্ষনায়।।

মসিগী ৱাহন্থোক্তি, ফত্তবগী লৌশিং অসি থুগাইবনি, লন অমসুং শক্তিনা নাপল কাহনবা অমদি অতোপ্পবু নমথবা হায়বনি। অদুবু চিংলেম্বা মীশক অমগীদি মসি লৌশিং, চেরিতী অমসুং অশোনববু ঙাকশেন্নবা পাম্বৈ অমনি। মসি ভারতকী চৎনবীনি মরম অসিনা মালেম্না মপাঙ্গল কনবা ভারত অমগী মথৌ তাই।

দা. এ.পি.জে. অব্দুল কলামদা অসুম্না কনাগুম্বা অমনা হংলমখি হায়না তাজৈ, অদোমগী য়াম্না অখন্নবা মগুন অমা য়াওই, অদোম য়াম্না ইং তপ্পা মীওই অমা মাল্লি, করিগীদমক অদোম্না খুৎলাই মথৌ তারিবনো? কলামনা অসুম্না পাউখুম পীখি শক্তি অমসুং শান্তি অসি অমনা অমগীদমক মথৌ তাই। মসিনা মরম ওইদুনা ঙসি ভারতনা শক্তি অমসুং অহোংবা অনিমক্কা পুন্না মাংদা চংশিল্লি।

ঐহাক্না থাজৈ মদুদি মপাঙ্গল কনবা ভারতনা শান্তি লৈবা অমসুং শাফবা মালেম অমগী লম্বী য়াৎলগনি। থাজবা অসিগা লোয়ননা ঐহাক্না অথৌবা লান্মীশিং, অথৌনা মীওইশিংবু ইকাই খুম্নবা উৎচরি অমসুং মখোয়গী থৌনা-লিংজেল অদুগীদমক অচৌবা থৌরম অসি মখোয়দা কত্থোকচরি। ঐহাক্না পুম্নমকপু থমোয় শেংনা থাগৎপা ফোঙদোকচরি।

জয় হিন্দ!

*****