ইজুকেসন অমসুং স্কিল দিবলপমেন্তগী য়ুনিয়ন মিনিস্তর শ্রী ধর্মেন্দ্র প্রধান্না ত্রোইকাগী কো-চিয়র ওইনা জি-২০ ইজুকেসন মিনিস্তরশিংগী মীফমদা হৌদোকপগী ৱারোল পীখ্রে অমসুং ‘রিকভরি, রি-ইমাজিন এন্দ রিবিল্দ স্ত্রোঙ্গর’ হায়বা হিরমদা ৱাফম কয়া থমখি।

মহাক্না হায়খি অনৌবা মালেম অমা শেম্নবা লৌশিং শরুক য়ামিন্নবা অমসুং পুন্না থবক তৌমিন্নবা হায়বসি য়াম্না মরুওই অমসুং অপুনবগী ওইনা থেংনরিবা খুদোংচাদবশিং কোকহন্নবা হোৎনবদা ইজুকেসন্না মরুওইবা মফম অমা কন্দুনা থম্লি। মমল হোঙনা, ইরাই লাইনা, মগুন লৈবা অমসুং মরম চানা লাইরিক তম্বা ফংহনবা হায়বা ফিদম অসিগী মখাদা পায়খৎলিবা নেসনেল ইজুকেসন পোলিসি ২০২০ অসি পুন্সি চুপ্পা লাইরিক তম্নবা খুদোংচাবশিং পীনবা ভারতকী লমজিং মৈরানি অমসুং মসিনা জি-২০গী পান্দম ফংহনবা ঙমগনি।

শ্রী প্রধান্না হায়খি খুদোংচাদবা কয়া থেংনবা ঙম্বা অমসুং মীওই খুদিংমক লাইরিক-লাইশু তম্বগী খুদোংচাবা ফংহন্নবা অমসুং স্কিল লৈহন্নবা মাইকৈদা ভারতনা থবক কয়া পায়খৎলি অমসুং নেসনেল ইজুকেসন পোলিসি ২০২০ থবক ওইনা পাংথোক্তুনা মহৈরোয় খুদিংমক্কী গুনশিং খঙবা ঙম্লে। পীক্লিবা অঙাংশিং লাইরিক তম্বীবা অমসুং য়েংশিনবা, হকচাংগী ফিবমদা মীমান্নদ্রবা অঙাংশিং মতেং পাংবা, দিজিতেল অমসুং মল্তি-মোদালগী লমদা লাইরিক তম্বীবা, স্কিল ত্রেনিংগী লমদা ভারতনা অখন্নবা মীৎয়েং চঙলি। হায়রিবা থবকশিং অসিনা লাইরিক তম্বগী মহৈ চাবগী চাং হেনগৎহন্নবা মরুওইবশিংনি।  

মহাক্না মখা তানা হায়খি ভারত্তা ভর্চুএল স্কুলশিং থবক হৌরে অমসুং দিজিতেল য়ুনিভর্সিতি লিংখৎনবা থৌরাং হৌরে অমসুং ভারতকী তোঙান-তোঙানবা লোনশিংদা লাইরিক তম্নবা তি.ভি চেন্নেল ২৬০ হেন্না লৈরে অমসুং মসিনা মী খুদিংমক য়াম্না লাইনা লাইরিক তম্বা ফংহনবা ঙমগনি। ভারত্তা লাইরিক-লাইশু তম্বগী থবক মালেমগী থাক্তা পুখৎনবা নেসনেল ইজুকেসন পোলিসি ২০২০না লম্বী শেম্লে অমসুং অহমেদবাদকী গিফ সিতিদা কেম্পসশিং লিংখৎনবা ভারতনা মপানগী য়ুনিভর্সিতিশিং তরাম্না ওক্লি। ভারত শীনবা থুংনা মপানগী য়ুনিভর্সিতিশিংনা মখোয়গী কেম্পসশিং লিংখৎপা য়াহন্নবা থৌশিল শেম্নবা ঐখোয়না থৌরাং তৌরি।

শ্রী প্রধান্না হায়খি লাইরিক তম্বগী ফংলকপা লৌশিং অদু ২১শুবা চহিচাগী স্কিলশিংগা চুনবা ঙম্নবা লাইরিক-লাইশু তম্বগী থৌরাং অমা পায়খৎনবা জি-২০ মেম্বর লৈবাকশিং পু্ন্না থবক তৌমিন্নবা দরকার ওইরে। ইজুকেসন্না মালেমগী চাউখৎপগী দ্রাইভর ওইনবা, ঐখোয়গী জি-২০ ইজুকেসন ৱার্কিং গ্রুপকী কান্নবা মপুংফানা লৌনবা থবক পায়খৎকদবনি।

মহাক্না মখা তানা হায়খি মালেমগী ওইনা লৈরিবা লাইরিক-লাইশু তম্বগী থবকশিংনা মায়োক্নরিবা খুদোংচাদবশিং অমসুং মমাংদা অমুক্তা থেংনখিদ্রিবা অহোঙবশিং মায়োক্ননবা জি-২০ ইজুকেসন গ্রুপনা এজেন্দা অমা শেম্লে। ইজুকেসন সিস্তম অমুক হন্না শেমগৎনবা জি-২০গা লোয়ন্না পুন্না থবক তৌমিন্নবা ভারতনা থাজবা থম্লি। 

জি-২০ ইজুকেসন মিনিস্তরশিংগী মীফমগী নাকলদা শ্রী প্রধান্না শিঙ্গাপুরগী ইজুকেসন অমসুং ফোরেন এফেয়ার্সকী সেকেন্দ মিনিস্তর, প্রাইম মিনিস্তর ওফিসকী মিনিস্তর দোক্তর মোহমদ মালিকি বিন ওস্মান, য়ু.এ.ইগী ইজুকেসন মিনিস্তর অমসুং ওন্ত্রেপ্রেনিউয়রশিং অমসুং এস.এম.ইগী রাজ্য মন্ত্রী দোক্তর অহমদ বেলহাওল এল ফালাসি অমসুং সাওদি অরাবিয়াগী ইজুকেসন মিনিস্তর দোক্তর হামদ এম.ঐচ. এল সৈখকা নাকল অনিগী ওইবা মীফমশিং পরিং নাইনা পাংথোকখি। নাকল অনিগী ওইবা মীফমশিং অদুদা ইজুকেসন অমসুং স্কিল দিবলপমেন্তগী লমদা হেন্না থবক তৌমিন্ননবা ৱাফমশিং খন্নখি।

*****