سڑک ، ٹرانسپورٹ  اور شاہراہوں کے مرکزی وزیر جناب نتن گڈکری نے کہا ہے کہ ہماری حکومت کی کوشش ہے کہ سماج کے آخری شخص تک پہنچے ، ان کی ترقی میں مدد کرے اور ان کی خدمت کرے ۔

سماجی انصاف اور تفویض اختیارات کے مرکزی وزیر ڈاکٹر وریندر کمار کے ہمراہ مرکزی حکومت کی نیشنل وایو شری اور اے ڈی آئی پی (معذور افراد کے لئے امداد) اسکیم کے تحت آج جنوبی ناگپور میں بزرگ شہریوں اور معذور افراد میں مفت ساز و سامان کی تقسیم کے پروگرام کا افتتاح کرتے ہوئے جناب گڈکری نے کہا کہ ہم ، اس پروگرام کے تئیں عہد بستہ ہیں۔

سال 2016 میں، وزیر اعظم جناب نریندر مودی کی قیادت میں، حکومت نے ملک میں معذور افراد کے حقوق کا قانون جاری کیا تھا ۔ اس کو ذہن میں رکھتے ہوئے، راشٹریہ وایوشری یوجنا کے تحت 27 فروری سے 23 اپریل ، 2022 ء تک بزرگ شہریوں اور مختلف معذور افراد کے لئے اسکریننگ کیمپوں کا انعقاد کیا گیا ، جس میں  ناگپور شہر  میں 28000 اور دیہی ناگپور میں 8000 لوگوں سمیت تقریباً 36000 لوگوں کی اسکریننگ کی گئی ہے اور ان سبھی کو 2 لاکھ 41 ہزار آلات اور ساز و سامان تقسیم کئے گئے ۔ ان تمام آلات اور ساز و سامان کی کل قیمت 34.83 کروڑ روپئے ہے۔

ان آلات کی تقسیم کے لئے ناگپور شہر کے تمام چھ اسمبلی حلقوں میں پروگرام منعقد کئے جا رہے ہیں اور آج اس سلسلے کا پہلا پروگرام ہے۔ دکشن ناگپور اسمبلی حلقہ کے 9,018 فیض کنندگان کو کل 66 ہزار آلات دیئے گئے ہیں، جن کی کل لاگت 9 کروڑ روپئے سے زیادہ ہے۔

ان آلات کی 43 اقسام میں بنیادی طور پر تین پہیوں والی سائیکلیں (ہاتھ سے چلنے والی)، وہیل چیئرز، واکنگ اسٹکس، ڈیجیٹل آلۂ سماعت ، بصارت سے محروم افراد کے لئے اسکرین ریڈنگ سے لیس اسمارٹ فون، بریل کین (فولڈنگ کین) کے ساتھ ساتھ مصنوعی ہاتھ اور پیر جیسے آلات بھی شامل ہیں۔

۔۔۔۔۔۔۔۔۔۔۔۔۔۔۔ ۔ ۔ ۔ ۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔ ۔ ۔ ۔۔۔۔۔۔۔۔۔۔۔۔

( ش ح ۔ و ا ۔ ع ا )

U. No. 9536